Luke 22
22
1အခွပ်နီးနွို့ လို့မျိုးဂျူးနွို့ စေ့နှမ်းစေ့နှမ်းဘာ့ကျင်းပမဲ့ပို့နွို့နား ဘာ့ဟက်ပွီးပသခါနွို့ ပွီးချိတဆေးမဲ့ မောင်းကျင်းပနွို့ အချန်တမေ့ပိုတွို့နွို့နဲ့။ 2ပုရောဟိတ်အကုန်းအပေ့ဘို့ဘက်နား ဆာယာပါလိတ်ကျမ်းစားနွို့နောင်း ကိုယ်တော်ယေရှုနွို့ ဗီနိုင်းအောင် အွက်စ်တွို့ထာ ကြံစည်မဲ့ကြဘို့နွို့နဲ့။ ရွားနွို့ပဒေကား တာလို့ဘာ့ရင်နွို့ တစက်နွို့နု့ လို့ဖုန်ကုန်းနွို့ ဘာ့ယို့ဇာ့နွို့နား ရကြဘို့နွို့ခေါင်းကိုးနဲ့။ 3နွို့ခေါင်း မာရ်နတ်နောင်း ကောင်သာဝကမာ့ကျင်အဲဉ်ကွက်နွို့ ဘာ့ကလုဲင်အာ့်ကွက် ကောင်ယုဒရှကာရုတ်နွို့ကွက်တဗောက်ပူးမနနဲ့။ 4စနွို့နား ယုဒရှာကာရုတ်နောင်း ပုရောဟိတ်အကုန်းအပေ့ဘို့ဘက်န လိုဆုပ်ဗိမာန်တော်ခေါင်းဆောင်နွို့ ကု့တွို့ထာ ကိုယ်တော်ယေရှုနား တိခွို့နွို့နား မောင်းစက်နွို့ နည်းလမ်းဘာကြထက်ပေ့န မောင်းစက်နွို့ ခံမ့်ဘာ့ကူညီနိုင်းနွို့နား ဆွေးနွေးတိုင်ပင်ကြဘို့နွို့နဲ့။ 5ခွို့နွို့နောင််းလဲဉ်း နွက်တူးတူးန ယုဒရှာကာရုတ်နွို့ မောင်းအာပဆံနွို့ ဆုံးဖြတ်ကြဘို့နွို့နဲ့။ 6ယုဒရှာကာရုတ်နောင်းလဲဉ်း သဘောတူတွို့ထာ လို့ဖုန်ကုန်းချန်ဘာ့ဟိုကောနွို့ ကိုယ်တော်ယေရှုနား မောင်စက်နွို့ ဆုပ်မဲ့ အခွင်ကလို့နွို့နဲ့။ 7နွို့ခေါင်း အချန်ပွီးချိတဆေးမဲ့နွို့ ရောက်ပိုနွို့နဲ့။ ရှိနွို့နု့ တာလို့မျိုးပွီးပသခါနား သိုးပေ့နွို့ ဗီတွို့ထာ ရှိပူဇော်နွို့ လောက်ပိုနွို့နဲ့။ 8စနွို့နား ကိုယ်တော်ယေရှုနောင်း ပေတရုန ယောဟန်နွို့နား ကောင်မြိုဂျေရုဆလင်နွို့ မောင်းကုနွို့ ပလွတ်တွို့ထာ “တာအေ့ဘာ့စွေနွို့ ပွီးပသခါခို့ခါနွို့ ဖျောင်ပို့ကြဘို့” နွို့မားကြဘို့နွို့နဲ့။ 9ခွို့နွို့နောင်း ကိုယ်တော်နွို့ “ကိုယ်တော်၊ အေ့နီးနား တာ့လွက်တာ့မားနွို့ လို့ဖျောင်အာမဲ့နောင်း” နွို့ မားမဲ့ကြဘို့နွို့နဲ့။ 10ချန်နွို့နု့ ကိုယ်တော်နား “ကမ်းကြဘို့ သေသေချာချောနေ၊ ပွို့နွို့နောင်း ဆောင့်ကွက်ကောင်မြိုနွို့နု့ လို့ဘာ့ကွက်ပွို့ အ့်လို့အွူနွို့ ပွို့နောင်း ထွိလေလာက်ကြဘို့။ ကု့လွမ်းတွို့ဗက်အမ်ထာ တာညာ့အမ်ဘာ့ကွက်နွို့ ပွို့နွို့နား ကွက်လွမ်းကြဘို့။ 11စယော့နွို့နု့ ကစာ့ညာ့နွို့ ‘ကိုယ်တော်နား တပည့်တော်အို့ဘို့ဘက်နအနုဲင်နုဲင် ပွီးပသခါခို့ခါနွို့ ခမ်းစွေအခန်းနွို့နား ဟိုတမွှားကိုးရား နွို့ ကိုယ်တော်နား မို့နွို့ မားလောက်ဟောက်’ နွို့ဖြိုကြဘို့နေ။ 12ချန်နွို့နု့ အမ်နောင်း မို့နောင်း ဟက်ကု့တွို့ တကွေနို့အထပ်ထာ ဘာမောင်းစွေမဲ့ ဘာ့ယိုးလွန်းမဲ့နွို့နား ပလေလောက်ဟောက်။ တာ့လွက်နွို့နား ပွီးအ့်စွေပွို့နွို့ ဘာ့မင်ဖျောင်မဲ့ လွက်နီးစယ်ကိုး” နွို့ဟောဖြိုမနနဲ့။ 13နွို့ခေါင်း တပည့်တော်နွို့နောင်း ဆောင့်ကွက်ထို့ကြဘို့ကောင်မြိုနွို့နောင်း ကိုယ်တော်ယေရှုဟောဖြိုပွို့နွို့အတွိုန်း ထွိဟောက်ခေါင်း တလွက်နွို့နောင်း တာ့ပွီးပသခါ ခို့ခါနွို့ ဖျောင်မဲ့ကြဘို့နွို့နဲ့။ 14မောင်းစွေပွီးပသခါနွို့ အချနဆောင့်လောက်ပိုနွို့ ကိုယ်တော်ယေရှုနောင်း သာဝကမာကျင်ပါးန အနုဲင်နုဲင် သပခုံနွို့ ထုစ်ကြဘို့နွို့နဲ့။ 15နွို့ခေါင်း ကိုယ်တော်နား ခွို့နွို့နု့ “အို့နောင်း ဒုက္ခဝေဒနာဘို့ဘက်န ခါမင်ဗီးကောနွို့နား ပွီးပသခါခို့ခါနွို့ ပွို့နအနုဲင်နုဲင်မောင်းစွေနွို့ လိုလ့်လွန်းဟောက်နွို့နဲ့။ 16ထာထနာတော်ဖြားမောင်ပေါ်လေးမဲ့ အချန်ကာလနွို့ လို့အထက်ဘာ့ပလုဲင်းမေ့မေ့နွို့နား ပွီးပသခါနောင်း ရည်ရွယ်ချက်တတ်ထားန ဘာ့ကျင်းပနွို့နောင်း အပြည့်အဝငါးလည်သဘော့ပေါက်မဲ့ အချန်ခါလောက်ကောအောင် အို့နောင်း ပွီးပသခါနွို့ လောက်ဘက်အခွပ် ဘာ့စေါနွို့ လာ့ယို့ကော” နွို့ဟောဖြိုမနနဲ့။ 17နွို့ခေါင်း ကိုယ်တော်ယေရှုနောင်း ကဒက်စပျစ်ဝိုင်နွို့ အွေတွို့ထာ ဆောင့်ချီးမွမ်းယော့ကျေးဇူးတော်ဖြားနွို့ “ကဒက်စပျစ်ဝိုင်နွို့ အွေတွို့ထာ အချောင်းချောင်းဝေမျှတွို့ထာ ငွမ်းကြဘို့။ 18ပွို့နွို့နောင်း အို့ဖြိုလောက်ဟောက် ဖြားနောင်း ထာထနာတော်အမ်နွို့ ခါတည်ထောင်ကောနွို့တွိုန်း စပျစ်ဝိုင်နွို့ လောက်ဘက်အခွပ်လာ့ငွမ်းကောနွို့နဲ့။” 19အခွပ် ချိနွို့ အွေတွို့ထာ ဆောင့်ချီးမွမ်းယော့ကျေးဇူးတော်ဖြားနွို့ တပည့်တော်နွို့နု့ ဖုဲင့်အာတွို့ထာ “ချိနီးနောင်း တာ့ပွို့နွို့နု့ ဘာ့အာဆပိမဲ့ သိုလ်အို့ကိုးနွို့နဲ့။ နောင်ထွိတွို့အို့ထာ အို့ဘာ့ယို့ဘို့နွို့အတွိုန်း” ဆက်ဖြိုကြဘို့နေ။ 20နာနွို့အတွိုန်း ဆောင်စွေယော့အစွေခို့ခါနွို့ ကိုယ်တော်ယေရှုနောင်း ကဒက်စပျစ်ဝိုင်နွို့အွေတွို့ထာ “စပျစ်ဝိုင်နီးနား တာအကျိုးပွို့နွို့နား ဘာ့လွှန်းအာမဲ့ ကဏံအို့နွို့ ကိုယ့်စားအို့ကိုး။ စနွို့ဖုန် ဖြားန ကောင်ဗလလို့နွို့ ဘာဘို့မဲ့ သဘောဘာ့တူပွို့ အ့်ကမေ့နွို့လဲဉ်း ကဏံအို့နောင်း သက်သေကိုးနွို့နဲ့။ 21စနွို့လဲ အို့နီးနွို့ရန်သူနွို့နား စက်နိုင်းနွို့အောင် လို့ဘာ့ကူညီအာမဲ့နွို့နောင်း အို့နအနုဲင်နုဲင် တပခုံနွို့ ထုစ်တွို့ထာ ဘာ့စွေမဲ့နွို့ နား ပွို့နွို့မေ့မေ့ ငန်းကြဘို့။ 22အို့ကွန်ဖြားနောင်း အလိုတော်ဖြားအတွိုန်း ဘာ့မင်ကု့မဲ့နွို့နား အမှန်ကိုးနွို့နဲ့။ စနွို့လဲ ကွန်ဖြားနွိုနား သစ္စာဖောက်တွို့ထာ ကောင်တိရန်သူနွို့ လို့ဘာ့အပ်နှံနွို့နား ဘာ့ဆို့ရွားမဲ့ ပြစ်ဒဏ်နွို့ မင်ခံလောက်ဟောက်နွို့နဲ့။” 23ချန်နွို့နု့ တပည့်တော်နွို့နား “ကောင်အေ့နီးနွို့ ကွားနောင်း နာ့ဘာ့ကလို့ကောဇာ့ဘို့ဘက်နား မောင်းယို့နွို့ ကြံစည်မဲ့ဘို့နောင်း” နွို့ စမားကြဘို့နွို့နဲ့။ 24နွို့ခေါင်း တပည့်တော်ဘို့ဘက်နွို့နောင်း ကောင်ခွို့နွို့ ကွားနောင်း ကုန်းထက်မြတ်ထက်မေ့လေဘ်နွို့ အချောင်းချောင်း စညောင်းကြဘို့နွို့နဲ့။ 25စနွို့နား ကိုယ်တော်နား ခွို့နွို့နု့ “လို့မျိုးခြား ဖရင်ဘို့ဘက်နောင်း လို့နွို့ ဖိနှိပ်နှိပ်စက်တွို့ထာ ဘာ့အုပ်ချုပ်ကြဘို့နွို့နဲ့။ နာ့ဇာ့နွို့လို့ဘာ့ချုပ်ဘို့ဘက်နောင်း အခွင့်အာဏာခွို့နွို့ ထုံးတွို့ထာ လို့နွို့နား ဖိနှိပ်နှိစက်က့ဘို့နွို့လဲ ခွို့နွို့နု့ လို့အများနား ခေါင်းဆောင်ကြ နွို့မင်ဟက်ခံလောက်ဟောက်နွို့နဲ့။ 26စနွို့လဲ ပွို့နွို့နောင်း တာလို့နွို့အတွိုန်း လို့လ့်ကလုဲင်ကော။ ပအန်နွို့ ကောင်ပွို့နွို့နု့ လို့အရေးဘာ့တန်နွို့နား နာ့လို့အရေးဘာ့တန်ကောနွို့တွိုန်း တောင့်ဒေ့ဒေ့န မန်းမနားကိုးနဲ့။ လို့ဘာ့ကလုဲင်ခေါင်းဆောင်စေ့ကွက်နောင်းလဲဉ်း လို့အခြားနွို့နား နာအစေခံနွို့ တောင့်ဒေ့ဒေ့န မင်ယို့မွီးဟောက်နွို့နဲ့။ 27တပခုံနွို့ လို့ထုစ်မဲ့နွို့န လို့ဘာ့ယို့ပွီးနွိုနု့ ကွားနောင်း ကုန်းမြတ်ထက်ဘေ့နောင်း။ တပခုံနွို့ လို့ဘာ့စွေဘာ့ငွမ်းမဲ့နွို့နောင်း မန်းကုန်းမြတ်ဟောက်ကက်ကောဟား။ စနွို့လဲ အို့နောင်း ကောင်ပွို့နွို့နု့ အစွေအငွမ်းဘို့ဘက်နွို့ ဖျောင်တွို့ထာ နာ့လို့ယို့မွီးမဲ့နွို့အတွိုန်း ကိုးနဲ့။ 28အို့နောင်း ဒုက္ခဆန်းရဲဘို့ဘက်န မင်ကြင်တွို့ထာ ဘာ့စန်းသက်အချန်နွို့နောင်းလဲဉ်း ပွို့နွို့နောင်း တစာ့အို့နွို့ အို့နအနုဲင်နုဲင်လို့ဟိုကြဘိုနွို့ကိုးနဲ့။ 29စနွို့နား အဖဖြားနောင်း အို့နွို့ တာ့လွက်ဖရင်နွို့ အခွင့်ဘာ့အုပ်စိုးနွို့ နာ့အပ်ပွို့နွို့အတွိုန်း ပွို့နွို့နောင်းလဲဉ်း အို့နအနုဲင်နုဲင် ဘာမင်အုပ်စိုးအခွင့်နွို့ အို့မာ့အပ်ဟောက်နွို့နဲ့။ 30စနွို့နု့ ပွို့နွို့နောင်း ထာထနာတော်အို့နွို့ ပလ္လင်အို့နွို့ ဘာ့မင်စွေအခွင့်နွို့နောင်းလဲဉ်းဖုန်၊ အခွင့်အာဏာဗဟိုမဲ့ အ့်ကလုဲင်ဖရင်နွို့လွက်အို့ဘာ့ထုစ်မဲ့နွို့ လို့မျိုးအစ္စရေး မာကျင်အဲဉ်နွို့နား ဘာ့အုပ်ချုပ်အခွင့်နွို့ဖုန် ဗင်ဟောက်နွို့နဲ့။” 31နွို့ခေါင်း ကိုယ်တော်ယေရူနား ရှိမုန်ပေတရုနား “ရှိမုန်၊ ရှိမုန်၊ လို့ယို့ရေစ်နောင်း ပ္လေ့ဗါ့န တောင့်ကောက်ဗါ့နွို့ နာ့ခွီပွို့နွို့အတွိုန်း မာရ်နတ်နောင်းလဲဉ်း တကွေပွို့နွို့ ယုံကြည်မှုတည်မြဲရေ့မားနွို့ မောင်းစမ်းသတ်နွို့ တဖြားနွို့ ခွင့်တောင်းမနနွို့နဲ့။ 32စနွို့လဲ ရှိမုန်၊ ပွို့နွို့နောင်း ယုံကြည်မြဲတည်မြဲနွို့အောင် အို့ဆုတောင်းဟောက်။ စနွို့နား ပွို့နွို့နောင်း ဗင်တွို့အသိတရားထာ တအို့နွို့ ဆောင့်လှည့်ပွို့ကြဘို့နောင်း တပည့်တော်မို့အို့အခြားဘို့ဘက်နား တကွေအို့ဘာဟိုမဲ့ ယုံကြည်မှုခွို့တည်မြဲအောင် တိုက်တွန်းကြဘို့။” 33စနွို့လဲ ရှိမုန်ပေတရုနား “ကိုယ်တော် တကွက်ကောင်ထောင်နွို့ယော့ ခံအဗီးနွို့ယော့ အို့နောင်း ကိုယ်တော်နအနုဲင်နုဲင် မောင်းကု့လွမ်းနွို့ ဟိုမဲ့အဆင်သင့်ကိုး” နွို့ဖြိုမနနဲ့။ 34ကိုယ်တော်ယေရှုနောင်းလဲဉ်း “ပေတရု မို့နွို့ အိုဖြိုလောက်ဟောက်။ လငွမ်းငွမ်းခါစောစော ရင်ခါအွမ်ကောနွို့ ပွို့နောင်း အို့ငန်းကောနွို့ အွီးခေါက်တိတိ ညောင်းလောက်ဟောက်” နွို့ဟောဖြိုမနနဲ့။ 35နွို့ခေါင်း ကိုယ်တော်ယေရှုနား တပည့်တော်မေ့မေ့နွို့နား “အို့နောင်း ပွို့နွို့နု့ ညာ့ပဆံ၊ အိပ်ခမ်းအွေကု့ခရီး၊ ဇနပ်နွို့နား အာအွေကု့ကောနွို့နား အာဟောဖြိုမင်္ဂလာကတမ်းဖြားနွို့ ဟောဖြိုနွို့အောင် မြို၊ တဘိုဘို့ဘက်နွို့ တန်းဘာ့ပလွတ်ကု့နွို့ တပွို့နွို့ အဆင်ပြေကော အမာ့မာ့ ဟိုဖူးရား” နွို့ဆောင့်မားနွို့နု့ တပည့်တော်နွို့နား “အဆင်ပြေကော အမာ့မာ့ ဟိုဖူးကော” နွို့လျှောက်တံမနနဲ့။ 36ကိုယ်တော်နား ခွို့နွို့နု့ “စနွို့လဲ အခွပ်နား၊ လို့နောင်း ပွို့နွို့နု့ လာ့ကူညီကောနွို့နဲ့။ စနွို့နား ညာ့ပဆံန အိပ်ခမ်းအွေကု့ခရီးလို့ဘာ့ဟို့စေ့ကွက်နောင်း လို့အွေကု့ဟောက်နွို့ခေါင်း လို့နှိက်လှိုန်ဘာ့ဟိုကောနွို့နောင်းလလဲဉ်း ခရိုန်းတကွေအမ်နွို့ စာတွို့ထာ ဘာ့ဗင်ပဆံနွို့န ဝမ်းကြဘို့ နှိက်လှိုန်နေ။ 37ရွားနွို့ပဒေကား ‘လို့နီးနောင်း နာ့လို့ချိုးဖောက်ဉပဒေနွို့အတွိုန်း မင်ဆက်ဆံခံဟောက်’ နွို့ခံမမ့်အို့နီးနောင်းနောင်း လိတ်ကျမ်းနွို့ဘာတဲင်းပွို့မဲ့ ဖြားနား ပရောဖက်မှအဆင့် ကြိုဟောဖလးပွို့မဲ့ အဖြစ်အပျက်ဘို့ဘက်နွို့နောင်း တာ့အို့နီးအမှန်ခါလောလော မောင်ကလုဲင်ပိုတွို့” နွို့ဟောဖြိုမနနဲ့။ 38ချန်နွို့နု့ တပည့်တော်နွို့နား “ကိုယ်တော် ရေစ်စေး၊ အေ့နီးနောင်း နှိက်လှိုန်အဲဉ်ရန်ဟိုမန” နွို့တဖြိုနွို့ ကိုယ်တော်နား “လုံလောက်တွို့” နွို့ဟောဖြိုမနနဲ့။ 39နွို့ခေါင်း ကိုယ်တော်ယေရူနောင်း မြိုဂျေရုဆလင်နွို့မှ လေးပွန်တွို့ထာ အမ်ဘာ့ကုပွို့နွို့အတွိုန်း ကွေဗွေသံလွင်နွို့ ကြွကု့ဟောက်နွို့နဲ့။ တပည့်တော်နွို့နောင်းလဲဉ်း ဘက်ကိုယ်တော်နွို့ တန်လွမ်းကု့ကြဘို့နွို့နဲ့။ 40ဆောင့်လောက်တလွက်နွို့နောင်း ကိုယ်တော်ယေရှုနား တပည့်တော်နွို့နု့ “မင်လှံစွေခံကောနွို့အောင် ဖြားနား ပွို့နွို့နား မောင်းကူညီအာနွို့နု့ ဆုတောင်းကြဘို့နေ” နွို့ဟောဖြိုမနနဲ့။ 41နွို့ခေါင်း ကိုယ်တော်ယေရှုနောင်း ခွို့နွို့န မငှာတစ်ငှာနွို့ အာ့်ပါးဝဲ့ လေးပွန်ယော့နွို့ ထောက်တွို့တောင်ဂို့ထာ ဆုတောင်းနွို့နောင်း 42“အဖဖြား၊ အဖဖြားအလိုတော်တဟိုနွို့နု့ ကနို့ကောကောင်ချန်နွို့နု့ အို့မင်ခံစွေမဲ့ ဒုက္ခဝေဒနာနွို့မှ လွတ်မြောက်နွို့အောင် ခွင့်ပြုအာစေး။ စနွို့လဲ အလို့တော်အို့အတွိုန်းကက်ကောနား အလိုတော်အဖဖြားအတွိုန်းစယ် တကလုဲင်လဲ” နွို့ဆုတောင်းမနနဲ့။ 43ချန်နွို့နု့ ရွှေမြို့တော်နွို့ ကနံကလို့ဖြားအာ့်ပါးနောင်း ကိုယ်တော်နွို့ ပလေတွို့သိုလ်အမ်ထာ နွက်ဖုန်၊ သိုလ်ဖုန် ဗင်ခွန်အောင် အာမဲ့နွက်ခွန်အားနွို့နဲ့။ 44ကိုယ်တော်ယေရူနောင်း ဗင်နွက်သောကနွို့န မင်ကစုခံစွေလွန်းဟောက်ခေါင်း နွက်ထန်ထန်နလိုလ့်တွို့ထာ ဘာ့ဆုတောင်းနွို့နား တကိုယ်တော်နွို့ ကနှုံန်ဘို့ဘက်နောင်း ကဏံနအနုဲင်နုဲင် ကလို့မဲ့ကွေကသေ့နွို့နဲ့။ 45ဆောင်ဆုတောင်းယော့ဇာ့နွို့ ကိုယ်တော်ယေရူနောင််း အောက်တွို့ထာ တာ့တပည့်တော်ဘို့ဘက်နွို့ ဆောင်ကြွပိုဘက်ပိုနောင်း ခွို့နွို့နောင်း နွက်ပေ့တွို့ထာ ပံလွန်းနားတီဗိကြမဲ့ဘို့နွို့ ရင်ဟောက်နွို့နဲ့။ 46ချန်နွို့နု့ ကိုယ်တော်ယေရှုနား တပည့်တော်နွို့နု့ “ရွား တီဗိကြမဲ့ ပွို့နောင်း။ မင်လှံစွေခံကောအောင် အောက်တွို့ထာ ဆုတောင်းကြဘို့နေ” နွို့ဟောဖြိုမနနဲ့။ 47ကိုယ်တော်ယေရှုနွို့ တန်းဘာ့ဟောဖြိုမဲ့နွို့နု့ လို့ဖုန်ကုန်းနောင်း တရုတ်ရုတ်လောက်ပွိုကြဘို့နွို့နဲ့။ လို့ဖုန်ကုန်းနွို့နား ဦးဆောင်တွို့ထာ လို့ဘာ့ဟက်ပွို့နွို့နောင်း ကောင်တပည့်တော်ကိုယ်တော်နွို့ မာကျိဉ်အဲဉ်ကွက်မှ ဘာ့ကလုဲင်အာ့်ကွက်ယုဒရှာကာရုတ်နွို့နား အမ်နောင်း ကိုယ်တော်နွို့ ကမှု့တွို့ထာ မောင်းနှုတ်ဆက်နွို့ တဗောက်ပွို့အ့်တမေ့ထာ ပွိုပိုနွို့နဲ့။ 48စနွို့လဲ ကိုယ်တော်ယေရှုနား ယုဒရှာကာရုတ် “မို့နောင်း ကွန်ဖြားနား အကမှု့န ကောင်တိရန်သူနွို့ မောင်းပအပ်မယ်ဟား” နွို့မားမနနဲ့။ 49ကိုယ်တော်ယေရူန ဘာ့ဟိုမဲ့အနုဲင်နုဲင် တပည့်တော်နွို့နု့ ကမွှာ့မား ဘာ့ကလုဲင်ပိုနွို့နောင်း ငန်းတွို့ထာ ခွို့နွို့နား ကိုယ်တော်နွို့ “ကိုယ်တော်၊ အေ့နွို့နှိက်လှိုန်န မောက်ဝဲ့ဟား” နွို့မာမဲ့ကြဘို့နွို့နဲ့။ 50နွို့ခေါင်း ကောင်တပည့်တော်ကိုယ်တော်နွို့မှ အာ့်ကွက်နား နှိက်လှိုန်အမ်နွို့ ထှက်လေးတွို့ထာ အစေခံပုရောဟိတ်ကုန်းထက်ပေ့နွို့နား နှိက်နမောက်တွို့ထာ လာ့သန်အစေခံဖက်ဒုနွို့နောင်း တိတ်ကု့ဟောက်နွို့နဲ့။ 51ချန်နွို့နု့ ကိုယ်တော်ယေရှုနာ “ရီးနီးစယ် မိုင်စေး” နွို့ဟောတော်မူယော့ လာ့သန်အစေခံနွို့လဲဉ်း ခိုက်တွို့တိအမ်ထာ အ့်ကစုရောဂါ ဗာပွန်ကု့ဟောက်နွို့နဲ့။
52နွို့ခေါင်း ကိုယ်တော်ယေရှုနောင်း မောင်းစက်အမ်နွို့ ဘာ့လောက်ပိုကြမဲ့ ပုရောဟိတ်အကုန်းအပေ့ဘို့ဘက်၊ လို့ဆုပ်ဗိမာန်တော်ခေါင်းဆောင်ဘို့ဘက်န လို့မျိုးဂျူးအကုန်းအပေ့ဘို့ဘက်နွို့ “ပွို့နွို့နောင်း တောင်မြဘို့ဘက်နွို့ နာစက်နွို့အ့်တွိုန်း မောင်းစက်အို့နွို့နု့ တောင်းတုတ်ဘို့ဘက်၊ နှိက်လှိုန်ဘို့ဘက်နွို့စယ် လိုလ့်အွေပိုဟောက်နွို့ဟား။ 53အို့နောင်း စေ့ရှိစေ့ရှိ ကောင်ဗိမာန်တော်နွို့ ပွို့နအနုဲင်နုဲင်ဟိုဗွို့မနနွို့လဲဉ်း ပွို့နွို့နောင်း စက်ကြကောပွို့အို့။ စနွို့လဲဉ်း အချန်အခွပ်နောင်း ကလုဲင်ယော့အချန်ပွို့နွို့နား အခွင့်အာဏာ မာရ်နတ်ဟိုတွို့ထာ အချန်ဝေါက်ဝက်ကိုးနဲ့။” 54နွို့ခေါင်း လို့ဆုပ်ဗိမာန်တော်ခေါင်းဆောင်ဘို့ဘက်နောင်း ကိုယ်တော်ယေရှုနွို့ စက်တွို့ထာ ညာ့ပုရောဟိတ်ကုန်းထက်ပေ့နွို့ ပန်းဟက်ကု့ကူးဟောက်နွို့နဲ့။ ပေတရုနောင်းလဲဉ်း လို့ဇာ့နွို့န မငှာတငှာနွို့ တန်းကု့ဟောက်နွို့နဲ့။ 55ပုရောဟိတ်ဘာ့ကုန်းထက်ဘေ့ ကောင်ခြံန် ကောင်ဒိုင်တေ့တေ့နွို့ လို့တောင်ခိုင့်နောင်း ဗက်တွို့ညွမ်ထာ စုတွို့ကြဘို့အနုဲက်နုဲင်ထာ ထုစ်မဲ့ကြဘို့နွို့နဲ့။ ပေတရုနောင်းလဲဉ်း ကောင်ဗလလို့ဇာ့နွို့ ထုစ်မနနွို့နဲ့။ 56ချန်နွို့နု့ အစေခံကမြအာ့်ကွက်နောင်း ဖက်အ့်ရောင်ညွမ်နွို့ ဗွို့တွို့ဗါ့အမ်ထာ ဘာ့ထုစ်မဲ့ပေတရုနွို့ရင်ဟောက်နား ရေစ်စန်းတွို့ထာ “လို့နီးနောင်း အဖွဲ့ကိုယ်တော်ယေရှုကိုး” နွို့ဖြိုမနနဲ့။ 57ချန်နွို့နု့ ပေတရုနား “နီးနောင်းကမြနွို့၊ အို့နောင်း လို့နီးနွို့ လာ့ငန်းကော” နွို့ညောင်းမနနဲ့။ 58ကနိုယော့အစုနွို့ လို့အာ့်ကွက်နောင်း ရင်ပေတရုနွို့ခေါင်း “မို့နွို့နောင်းလဲဉ်း ကောင်အဖွဲခွို့နွို့မှ လို့အ်ာ့ကွက်ကိုး” နွို့ ဖြိုပလောက်နွို့နဲ့။ စနွို့လဲ
ပေတရုနား “ဘို့ပေ့၊ အို့နောင်း ကောင်အဖွဲခွို့နွို့ကက်ကော” နွို့ညောင်းမနကိုးနဲ့။ 59နွို့ခေါင်း ကနိုအာ့်နာရီနွို့ လို့အ့်ခြားအာ့်ကွက်နောင်းလဲဉ်း ပေတရုန ဘာ့သက်ဆိုင်မဲ့နွို့နု့ “လို့နီးနောင်း အပန်ဖြိုပနောင်းနွို့နောင်း လို့ဂါလိလဲနယ်ကိုးနွို့ ဖော်ပလေမနနဲ့။ စနွို့နား လို့နီးနွို့ ယေရှုနအနုဲင်နုဲင် လို့ဘာ့ဟိုနွို့နား သေချာမနကိုး” နွို့ အာမခံဖြိုမနနဲ့။ 60စနွို့လဲ ပေတရုနား “ဘို့ပေ့၊ မို့ဘာ့ဖြိုမဲ့ အကြောင်းအရာဘို့ဘက်နွို့ အို့ငန်းကောခါလောလော” နွို့ညောင်းပလောက်အခွပ်နွို့နဲ့။ လို့ဇာ့နွို့ တန်းဘာ့ဖြိုအချန်နွို့စယ် ရင်ကအွန်ဟောက်နွို့နဲ့။ 61ချန်နွို့နု့ ကိုယ်တော်ယေရူနောင်း ပေတရုနွို့ လှည့်ရေစ်မနနွို့နဲ့။ ပေတရုနောင်း “လာ့ဂို့နီး ရင်ခါအွမ်ကောနွို့စယ် မို့နောင်း အို့ငန်းကောနွို့ အွီးခေါက်တိတိ ညောင်းလောက်ဟောက်” နွို့ ပနောင်ကိုယ်တော်နွို့ နောင်ထွိမာန့်ဟောက်မနကိုးနဲ့။ 62နွို့ခေါင်း ပေတရုနောင်း ဖက်ပလန်းခြံန်နွို့ လေးပွန်တွို့ထာ နွက်ပေ့ပေ့န ညှင်းမနနွို့နဲ့။ 63ဘာ့ဆုပ်ရေစ်ကိုယ်တော်ယေရှု လို့ဘို့ဘက်နောင်း ကိုယ်တော်ယေရှုနွို့ ကရတွို့ထာ ပေါ်ကြဘို့နွို့နဲ့။ 64ခွို့နွို့နောင်း လာ့ငုဲင်းကိုယ်တော်နွို့ ခရိုန်းဘို့ဘက်န တုတ်ဗွို့ယော့နွို့နား ပေါ်လောက်တွို့ထာ “မို့နောင်း ပုရောတမှန်နွို့နု့ လို့ဘာ့ပေါ်မို့နွို့နု့ ကလုဲင်ကွားနွို့နောင်း ဖြိုစေးနေ” နွို့ ဖြိုမဲ့ကြဘို့ကိုးနဲ့။ 65စနွို့ဖုန် ခွို့နွို့နောင်း ကိုယ်တော်နွို့ အ့်ခြား ဘာ့ကရမဲ့ ပနောင်အာ့်မာ့မာ့နွို့န စော်ကားဖြိုဗွို့ကြဘို့နွို့နဲ့။ 66သေ့ဆောင့်လန်းနောင်း ကောင်လို့ဖုန်ကုနန်းနွို့မှ လို့မျိုးဂျူးအကုန်းအပေ့ဘို့ဘက်၊ ပုရောဟိတ်အကုန်းအပေ့ဘို့ဘက်န ဆာယာပါလိတ်ကျမ်းဘို့ဘက်နောင်း စုတွို့ကြဘို့ထာ ကိုယ်တော်နွို့ တာ့အဖွဲဗဟိုဘာ့စီရင်တရား တာ့တရားရုံးနွို့ ဟက်ကု့ကြဘို့နွို့နဲ့။ 67နွို့ခေါင်း ခွို့နွို့နား ကိုယ်တော်နွို့ “မို့နောင်း ကယ်တင်ရှင်မေရှိယ က်ကောဟားကက်ဟား ဖြိုစေးအေ့နေ” နွို့မားမနနဲ့။ 68ကိုယ်တော်ယေရူနာ "အိုတက်ဖြိုနွတ် ပွိုအန်ယွမ်ဟလက်ကက်ကား၊ပွိုလဲအိုတမုဲင်နွတ် ပိုအန်ဖြေဟလက်ကက်ကား"။ စနွို့လဲ ကိုယ်တော်ယေရှုနား “ပွို့နွို့နား အို့တဖြိုမေရှိယနွို့နု့ ပွို့နွို့နောင်း လာ့ယံကြဘောဘို့။ 69စနွို့လဲ ကွန်ဖြားနောင်း ဖုန်း တန်ခိုးန ဘာ့ပြည့်စုံမဲ့ ဖက်တိဒုဖြားနွို့ ထုစ်တွို့ထာ ရှိဘာ့အုပ်ချုပ်နွို့နောင်း ကနိုကောလောက် မောင်းလောက်ပပွိုနတွို့ကိုး” နွို့ဟောဖြိုမနနဲ့။ 70ချန်နွို့နု့ ခွို့နွို့မေ့မေ့နောင်း “တာဖြိုဇာ့နွို့နု့ မို့နောင်း ကလုဲင်ကွန်ဖြားဟား” နွို့မားကြဘို့နဲ့။
ကိုယ်တော်နားလဲဉ်း “နာ့ပွိုဖြိုနွို့ အတွိုန်း အမှန်ကိုး” နွို့ဟောဖြိုမနနဲ့။ 71ချန်နွို့နု့ ခွို့နွို့နား “အေ့နီးနောင်း ဘာ့လေးပိုမဲ့ပနောင်အမ်နွို့ အွမ်ယော့တွို့ကြဘို့နွို့ခေါင်း အမ်နွို့ မောင်းစီရင်တရားနု့ လိုလ်မဲ့ သက်သေအခြား တတ်ထား” နွို့အချောင်းချောင်းဖြိုကြဘို့နွို့နဲ့။
Currently Selected:
Luke 22: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.