Luke 18
18
1နွို့ခေါင်း ကိုယ်တော်ယေရှုနား တပည့်တော်နွို့နား ဆောင်မားမှ နွက်ဖျောက်လျှော့ကောအားနား အမြဲမပြတ် ယုံကြည်ကြည်န လိုလ့်ဆုတောင်းဟောက်နွို့ခေါင်း ပုံဥပမာအာ့မာန ကရီအာမနနွို့နဲ့။ 2ကိုယ်တော်နား ခွို့နွို့နား “ကရှိသမြိုအမြိုနွို့ ဖြားလဲဉ်းလာ့ရကား၊ တကွေအများပြည်သူလဲဉ်း ရိုသေလေးစားမဲ့နွို့လဲဉ်း လာဟိုကော တရားသူကြီး အ်ာ့ကွက်ဟိုဟောက်နွို့နဲ့။ 3ဗဟိုတမြိုနွို့ မိတ်ဆို့မအာ့်ကွက်နောင်း တာ့တရားသူကြီးနွို့ မနားမတန်း ကုတွို့ထာ ကမြနွို့နား လို့ဘာ့လှံစွေမဲ့န တဘောက်တွို့ထာ စီရင်တရားမျှမျှတတနွို့ တောင်ပန်မနနဲ့။ 4အချန်ကနိုနွို့အောင် တရားသူကြီးနောင်း သမြနွို့နား မောင်းအာအကူအညီနွို့ ဆန္နဟိုကော။ စနွို့လဲ ဘတ်ထက်ပေ့နွို့ တရားသူကြီးနောင်း ‘အို့နောင်း ဖြားနွို့လဲဉ်း လာ့ရကော၊ ဆောင်ကွေမှလဲဉ်း လာ့ရိုသေကောနွို့နား အမှန်ကိုးနွို့နဲ့။ 5မိတ်ဆို့မနီးနောင်း အို့နား အာဆို့နွက်ဒုက္ခနွို့ခေါင်း သမြနွို့နား လို့လှံစွေလှည့်စွေမဲ့နွို့နား တာ့စီရင်တရားမျှမျှတတနွို့နု့ မင်အာအကူအညီနွို့နဲ့။ ဇာ့နွို့မှတကက်ကောနွို့နု့ သမြနွို့နောင်း တာအို့နီး မနားမတန်း ပို့တွို့ထာ’ မာ့တောင်းဆိုမဲ့နွို့ခေါင်း အို့နား မာ့အာနွက်ဒုက္ခနွို့ကိုးနု့ စဉ်းစားမန” နွို့ဟောဖြိုမနနဲ့။ 6နွို့ခေါင်း ကိုယ်တော်ယေရှုနား “ဗဟိုမဲ့ဘာ့ရိုးသားကောဘာ့ဖြောင့်မတ်ကော တရားသူကြီးနွို့ ဘာ့ကြံစည်ဘာ့ဖြိုပွို့မဲ့ ပနောင်နွို့နား စန်းစဉ်းစားရေစ်စန်းစဲ။ 7နာ့စနွို့နု့ ဘာ့ရိုးသားကော တရားသူကြီးနွို့ အမ်နား အခွပ်ယော့အခွပ် လို့ဘာ့တောင်းဆိုနွို့ ဗင်တရားမျှမျှတတအောင် တာ့ဆောင်ရွက်အာနွို့နု့ ဖြားနောင်း တာ့သိုလ်အေ့နီး မနားမတန်း ဘာ့ဆုတောင်းမဲ့ ခွို့နွို့နား မောင်းကူညီနွို့ ပန်းလောက်ဟောက်အချန်နွို့ ပွို့ထုန်ကြဘို့ဟား။ 8ပွို့နွို့နား အို့ဘာ့ဟောဖြိုနွို့နောင်း အမှုဘာ့မှန်ကန်နွို့ ပန်းကောအချန်နား တာ့ဆောင်ရွက်အာနွို့နု့ အမှန်ကိုးနွို့ အိုဖြိုနိုင်းအသေအချာနွို့နဲ့။ စနွို့လဲ အို့ကွန်ဖြားဘာ့ကြံပိုချန်နွို့ လောကကသေ့ကုန်းနီးနွို့ လိုယုံကြည်ခြင်းဘာ့ဟိုနွို့ မင်ထွိမဲ့ဟား” နွို့ဟောဖြိုမနနဲ့။ 9နွို့ခေါင်း ကိုယ်တော်ယေရှုနောင်း ပနောင်အမ်နွို့နု့ ဘာ့ကမ်မဲ့ပွို့ဘ ကောင်ဖုန်လို့နွို့ သိုလ်အမ်သိုလ်အမ်ဖြောင့်မက်မှန်ကန်ဟောက်နွို့ ထုန်ယော့ကြဘို့ လို့အခြားဘို့ဘက်နောင်းလဲဉ်း လို့နွက်ဘာ့နှိမ့်ချနွို့နား ပုံဥပမာအာ့်မာ့န ဘာဟောဖြိုပွို့နွို့နဲ့။ 10ကိုယ်တော်ယေရှုနား ကရှိနွို့ ဖာရိရှဲအာ့်ကွက်န လို့တန်အကောင့်ဘို့ဘက်နောင်း တာဖြားနွို့ မောင်ဆုတောင်းနွို့ ဗဟိုမြိုဂျေရုဆလင် ဗိမာန်တော်နွို့ ကု့ကူးဟောက်နွို့နဲ့။ 11နွို့ခေါင်း ဖာရိရှဲနောင်း မုဲင်ယော့တွို့ထာ “အို ဖြား၊ အို့နား နာ့လို့အာ့်ခြားနွို့ လို့ကျူးလွန်အပြစ်ဒုစရိုက်နွို့ ကက်ကော။ အို့နောင်း တောင်မြ တကက်ကောလဲ လို့ဖြောင့်မက်ကော နွို့ကက်ကော။ အို့နောင်း လို့ဖောက်ပြန်ညားရေစ်လဲဉ်းကက်ကားဖုန် နာ့လို့တန်အကောင့်နီး ကက်ကောနွို့ခေါင်း ကျေးဇူးဒံမနဖြားကိုး 12အို့နောင်း အာ့်ပက်နီး အဲဉ်ရှိနွို့ စောင်အ့်စွေစောင်ဥပုသ်ထာ ဆုတောင်းယော့ အို့ဘာ့ဗင်မဲ့ ပဆံမေ့မေ့ မာ့ကျင်စို့အာ့်စို့နွို့လဲဉ်း ဖြားနား လှူအာမန” နွို့ဆုတောင်းမနနဲ့။ 13စနွိုလဲ လို့တန်အကောင့်အာ့်ကွက်နောင်း ဗဟိုရွှေမြို့တော်နွို့ ဖြားနွို့နား မောင်းမော်ရေစ်လဲ ထိုက်တန်ကောနွို့ မင်ခံစွေနား လို့အခြားဘို့ဘက်န တာ့လွက်ဘာ့ငှါလွန်းမဲ့ မန်းယော့တွို့နှိမ့်ချနထာ တောင်သူးအမ်နွို့နား ပေါ်တွို့တိနထာ နွက်ဘာ့ပေ့နွို့နား ပလေမနနွို့နဲ့။ နွို့ခေါင်း အမ်နား “ဖြား အို့နောင်း လို့အပြစ်သားကိုး။ အို့နား သနားကြင်နာတွို့ထာ ခွင့်လွှတ်အာစေး” နွို့ဆုတောင်းမနနဲ့။ 14ပွို့နွို့နောင်း “အို့ဘာ့ဟောနွို့နား တာဖြားနွို့ ဗင်တွို့ ခွင်လွှတ်နွို့ထာ လို့ဘာ့ရန်းညာ့နွို့နောင်း လို့သန်အကောက်နီးနွို့ခေါင်း ဖာရှိရှဲကက်ကော။ ရွားနွို့ပဒေကား သိုလ်အမ်သိုလ် ဘာ့ချီးမြှောက်လို့စေ့ကွက်နွို့နောင်း ဗင်နှိမ့်ချခံဟောက်နွို့ခေါင်း သိုလ်အမ်သိုလ်အမ် လို့ဘာ့နှိမ့်ချနွို့နောင်း ပွီးဂုဏ်ပြုချီးမြောက်နွို့နောင်း မင်ခံစွေဟောက်” နွို့ဟောဖြိုမနနဲ့။ 15အာ့်ရှိနောင်း ဘာ့ဘို့ဘက်မဲ့လို့ဖုန်ကုနွို့နား တာကိုယ်တော်ယေရှုနွို့ လောက်ပိုကြဘို့နွို့ခေါင်း ကောင်ခွို့နွို့မှ တောင်ခိုင့်နောင်း လို့ပေ့ခွို့နွို့ဖုန် ဟက်ပိုကကြဘို့နွို့နဲ့။ ရွားနွို့ပဒေကား ကိုယ်တော်နား လို့ပေ့ဘို့ဘက်နွို့နု့ ခိုက်တွို့ တိနထာ ဆောင်အာကောင်းကြီးမင်္ဂလာနွို့ခေါင်းကိုးနဲ့။ စနွို့လဲ တပည့်တော်ကိုယ်တော်နွို့နောင်း ဇာ့နွို့နား ဆောင်ရင်ကြဘို့နောင်း ခွို့နွို့နား ဆုံးမကြဘို့နွို့နဲ့။ 16စနွို့လဲ ကိုယ်တော်ယေရှုနောင်း လို့ပေ့ဘို့ဘက်နွို့နား ဆောင်ဟက်ယော့နောင်း တပည်တော်နွို့နား “လို့ပေဇာ့နွို့ ပွို့ပို့လောက်တာအို့နီးနား လာ့တားကြနပွို့။ ရွားနွို့ပဒေကား ထာထနာတော်ဖြားနောင်း နာလို့ပေ့နီးအတွိုန်း လို့ဘို့ဘက်နစယ် သက်ဆိုင်ဟောက်နွို့နဲ့။ 17ပွို့နွို့နား အို့တာဖြိုအ့်မှန်နွို့နု့ ဆောင်ကွေကွေ ထာထနာတော်ဖြားနား နာ့လို့အေ့နီးအတွိုန်း တာနှိမ့်ချနွို့နု့ တာလက်ခံကြကောပို့နွို့နု့ လို့ဇာ့နွို့နောင်း ကောင်ထာထနာတော်ဖြားနွို့ ဘာ့ကွက်နိုင်းကောနွို့နား အသေအချာကိုး” နွို့ဟောဖြိုမနနဲ့။ 18ကစာ့နား လို့မျိုးဂျူးခေါင်းဆောင်အာ့်ကွက်နောင်း ကိုယ်တော်နွို့ “ဆာယာ ဘာ့ကလို့ထက်ဘေ့နွို့၊ အထက်နိစ္စထာဝရနွို့ ဗင်အောင် မင်ယို့ဇာ့မွှား” နွို့မားမနနဲ့။ 19ကိုယ်တော်ယေရှုနား “ရွား အို့နား ဘာ့ကလို့ဟောက်နွို့ ဟက်ကြဘို့နား။ တာလိုလ်တွို့ဖြားပါးနွို့ ဆောင်ကွေမှ ကလို့ဟောက်နွို့ ဘာ့လာ့ဟိုကော။ 20မောရှေပညက်ကျမ်းနွို့မှ အဆန် ဖြားဘာ့အပ်ပွို့မဲ့ ပညက်ကျမ်းဘို့ဘက်နွို့နား မို့ငန်းယော့တွို့နား ကိုးနဲ့။ ဖောက်ပြန်ကောယော့ညာရေး၊ ဆောင်ကွေမှ ဗကြဘို့နွို့ လာ့ယို့ကြနဘို့။ ဆောင်ထန်မှ လာ့ရက်အွေကြနပွို့၊ ရက်လှံစွေဘေ့နွို့ လာ့ယို့ကြနဘို့၊ မိတ်ပါပွို့နား ဟိုကြဘို့ လေးစားကြဘို့ရိုရိုသေသေ” နွို့ဟောဖြိုမနနဲ။ 21လိုးနိုနား"အိုနို သမ်းခါပဲ့နားအတွို စည်းကမ်းတရားဖြား အိုလိုက်နာကျင့်ကြ့ပို့ပန"လျှောက်ဒံစနို့။ 22ဘာ့လျှောက်တံပနောင်နွို့ ဆောင့်အွမ်ယော့နောင်း ကိုယ်တော်ယေရှုနွို့ “မို့နောင်း လိုလ့်ဆောင်ရွက်လွန်မဲ့ အာ့်မာ့ကိုး။ ဇာ့မို့ဘာ့ပိုင်ဆိုင်တာ့လွက်ပစ္စည်းဥစ္စာမေ့မေ့နွို့နား စာတွို့ထာ လို့ဘာ့ဆန်းရဲလွန်နွို့နား အာပန်းကြဘို့။ တာ့ယို့ဇာ့နွို့နု့ ဖြားနောင်း မို့နွို့ ရွှေမြို့တော်နို့ တာမို ပစ္စည်းဥစ္စာမို့ဘို့ဘက် ဟိုလောက်ဟောက်နွို့နဲ့။ နွို့ခေါင်း အ့်ကလုဲင်တပည့်တော်အို့ ကု့လွမ်းဘက်အို့” နွို့ဟောဖြိုမနနဲ့။ 23လို့မျိုးဂျူးခေါင်းဆောင်နောင်း ကလုဲင်လို့ချမ်းထာလွန်လန်းဟောက်ခေါင်း ပစ္စည်းဥစ္စာအမ်နွို့ လာ့စွန်တောဝ်းနိုင်းကောနွို့ခေါင်း ကိုယ်တော်ဘ့ာဟောဖြိုပနောင်နွို့ နွက်ဖျောက်လွန်းလန်းကု့ဟောက်နွို့နဲ့။ 24ကိုယ်တော်ယေရှုနောင်း လို့နွို့နွက်ဖျောက်ကု့ဟောက်နွို့ ဆောင့်ရင်နွို့နောင်း “လို့ဘာ့ချမ်းထာလွန်းလန်းနွို့နား ကောင်ထာထနာတော်ဖြားနွို့ မောင်ကွက်နွို့နု့ ရစ်ရန်းလွန်းလန်းဟောက်နွို့နဲ့။ 25လို့ချမ်းထာလွန်းလန်းအာ့်ကွက်နောင်း ထာထနာတော်ဖြားနား မောင်းကွက်နွို့မှ ကုလားအုပ်အာ့်ကွက်နောင်း ကောင်ကဒုနွို့ တတ်ထို့လို့တ့ကပ်ဖာနွို့စယ်မှ မန်းငါးမဲ့ဝ” နွို့ဟောဖြိုမနနဲ့။ 26ပနောင်နွို့ လို့ဘာ့အွမ်မေ့မေ့နွို့နောင်း “ဇာ့နီးနွို့နု့ လို့နောင်း ကညွမ်းနည်းလမ်းကမာ့မားန ကယ်တင်ခံနိုင်ဟောက်နား” နွို့မားမနနဲ့။ 27စနွို့လဲ “ကိုယ်တော်နွို့ ခွို့နွို့နား လို့နောင်းဘာ့ကလုဲင်နိုင်းကောဇာ့နွို့ဟိုဟောကက်နွို့လဲဉ်း ဖြားနွို့နောင်း လာ့ကလုဲင်နိုင်းကောနွို့နား လာဟိုကော” နွို့ဟောမနနဲ့။ 28ချန်နွို့နု့ ပေတရုနား “ရေစ်စန်းမယ့်၊ ကိုယ်တော်ယေရှု အေ့နီးနား ကလုဲင်ပိုနိုင်းလို့ကု့လွမ်းဘက်ကိုယ်တော်အောင် ဇာ့ဘာ့ပိုင်ဆိုင်နု့မေ့မေ့နွို့ စွန်တောဝ်းတွို့ထာ ဘတ်ကိုယ်တော်နွို့ ဗို့အ်လွမ်းပို့တွို” နွို့လျှောက်တံကြဘို့ကိုးနဲ့။ 29ကိုယ်တော်နွို့ “ပွို့နွို့နု့ အို့တာဖြိုအ့်မှန်နွို့နု့၊ ဆောင်ကွေကွေ တာထာထနာတော်ဖြား ညာ့၊ ဖြိုလ့်၊ တွေကုန်းတွေပေ့၊ မိတ်ပါ၊ ကွန်ဖြောက်ကွန်မြနွို့ လို့ဘာ့စွန်တောဝ်းနွို့နောင်း 30ကာလအခွပ်နား အဆပေါင်းဘို့ဘက် ဗင်တွို့ကောင်းကျိုးချမ်းထာဘို့ဘက်ထာ တာဗီးယော့နွို့နောင်းလဲဉ်း အထက်နိစ္စထာဝရနွို့ မာ့ဗင်ကြပွို့ အသေအချာကိုး” နွို့ဟောဖြိုမနနဲ့။ 31နွို့ခေါင်း ကိုယ်တော်ယေရှုနောင်း သာဝကမာကျင်အဲဉ်ကွက်နွို့ ဟက်ပွို့တွို့ကစားအမ်ထာ “ကမ်းကြပွို့ ဂရုတစိုက်။ အခွပ်အို့နောင်း မြိုဂျေရုဆလင်နွို့ ကုတွို့ကြဘို့နွို့နဲ့။ ခံမ့်အို့ကွန်ဖြားနွို့န ဘာ့သက်ဆိုင်မဲ့ ကစာ့နွို့ ပရောဖက်ဘို့ဘက် ဘာတဲင်းပွို့မဲ့ ဇာ့ဘာ့ဟိုနွို့နောင်း ဖြစ်ပျက်ပိုလောက်ဟောက်အမှန်နွို့နဲ့။ 32အို့ကွန်ဖြားနောင်း ကောင်တိလို့မျိုးခြားနွို့ မင်အပ်ခံတွို့ထာ လို့ဇာ့နွို့ ဘာ့ကရက်နွို့ဖုန်၊ ဘာ့စော်ကားဖြိုနွို့ဖုန်၊ ဘာဆူဗက်ညှင်းနနွို့ဖုန် မာ့မင်ခံဟောက်နွို့နဲ့။ 33နွို့ခေါင်း လို့ဇာ့နွို့နောင်း အို့ကွန်ဖြားနွို့ ကြိမ်နပေါ်တွိုပွို့ထာ အို့နောင်း ဗီကြလောက်ဟောက်ပွို့အ့်ဗီးနွို့နဲ့။ စနွို့လဲ အွီရှိမြောက်နွို့ အို့ကွန်ဖြားနီးနား ဘာ့ဗီးနွို့မှ အထက်ပလုဲင်းပလောက်လောက်ဟောက်” နွို့ဟောဖြိုမနနဲ့။ 34စနွိုလဲ တပည့်တော်နွို့နောင်း ကိုယ်တော်ဘာ့ဟောဖြိုမဲ့ ပနောင်အစိပ္ပာယ်ဇာ့နွို့နား နားလည်ဟောက်နွို့ လာ့ဟိုကော။ ရွားနွို့ပဒေကား ကိုယ်တော်ဘာဟောဖြိုမဲ့ ပနောင်အစိပ္ပာယ်နွို့နောင်း တာခွို့နွို့နု့ ဆန်းဆန်းလန်းလန်း ငန်းနိုင်ကောနွို့ခေါင်း ကိုယ်တော်နောင်း အမ်ဆိုလိုတတ်ထားနွို့ပဒေနောင်း နားလည်သဘောပေါက်နွို့ လာ့ဟိုကော။ 35နွို့ခေါင်း ကိုယ်တော်ယေရှုန တပည့်တော်ဘို့ဘက်နွို့နောင်း သမြိုဂျေရိခေါနွို့ ဆောင့်လောက်ပိုကြဘို့နား တာ့လွက်နွို့နု့ လို့လငုဲင်းပယင်ကားအာ့်ကွက်နောင်း တာ့ဇာ့ကညွမ်နွို့ ထု့တွို့ထာ ညွှန်းလေမနနဲ့။ 36လို့လငုဲင်းဘာ့ရင်ကောနွို့နောင်း လို့ဖုန်ကုန်းနွို့ ဘာ့ဖြတ်ကူးမဲ့ ကရက်နွို့ ဆောင်အွမ်နောင်း လို့အ့်မေ့အမာ့တနွို့နား ကမာ့မွှားဘာ့ဖြစ်ပျက်မဲ့ဇာ့နွို့နား နွို့မားကြဘို့နွို့နဲ့။ 37လို့တောင့်ခိုင့်နွို့ အမ်နား လို့မြိုနာဇရက်နွို့ မှ ကိုယ်တော်ယေရှုနွို့ ကြွပိုဟောက်လောက်ဟောက် နွို့ ဖြေပလောက်မယ့်နနွို့နဲ့။ 38စနွို့နား လို့လငုဲင်းဘာ့ရင်ကောနွို့နောင်း “ကမာ့မျိုးနွယ် ဖရင်ဒါဝိဒ် ကိုယ်တော်ယေရှု၊ သနားတော်စန်းအို့” နွို့ကလေ့လေမနနဲ့။ 39ငွမ်းကိုယ်တော်ယေရှုနအနုဲင်နုဲင် ကု့ကျမဲ့ဗို့ ခွို့နွို့နောင်း အမ်နား ဆိုမမ်းအမ်တပ်တပ်နွို့ ဆုံးမပွို့နွို့လဲဉ်း အမ်နား ကရက်အထန်ထောတွိုန်းန “ကမာ့မျိုးနွယ် ဖရင်ဒါဝိဒ် ကိုယ်တော်ယေရှု၊ သနားတော်စန်းအို့” နွို့ ဆက်ကလစ်လေမနနွို့နဲ့။ 40နာနွို့နု့ ကိုယ်တော်ယေရှုဆောင့်အွမ်နောင်း မုဲင်တွို့ထာ လို့လငုဲင်းဘာ့ရင်ကောနွို့နား အာဟက်ပွို့သအမ်နို့နု့ လို့တောင်ခိုင့်နွို့ ဟောဖြိုမနနဲ့။ ဆောင့်လောက်တာ့မေ့လို့နွို့နောင်း ကိုယ်တော်နား အမ်နွို့ 41“တာမိုနွို့ အို့ ဆောင်အာကူညီ တတ်ထား” နွို့ မားမနခေါင်းလို့နွို့နား “ကိုယ်တော်၊ အို့နောင်း လငုဲင်းဆောင်ယင်ဟောက်” နွို့လျှောက်တံမနနဲ့။ 42ချန်နွို့နု့ ကိုယ်တော်ယေရှု “အခွပ်နွို့ လငုဲင်းမို့ရင်ဘက်တွို့။ မို့နောင်း ယုံကြည်အို့နို့နား လငုဲင်မို့ဗာပွန်တွို့” နွို့ဟောဖြိုမနနွို့နဲ့။ 43လို့နွို့နောင်း အတိတွိုန်း လငုဲင်းအမ်ရင်တွို့နွို့နား ချီးမွမ်းတွို့ကျေးဇူးဖြားထာ တန်လွမ်းကု့ဖပ်ဘတ်ကိုယ်တော်ယေရှုနွို့ကိုးနဲ့။ ပရင်မဲ့အဖြစ်ပျက်ဇာ့နွို့ လို့ဖုန်ကုန်းမေ့မေ့နောင်းလဲဉ်း ချီးမွမ်းကျဗို့ကျေးဇူးဖြားကိုးနဲ့။
Currently Selected:
Luke 18: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.