Luke 15
15
1အ့်ာရှိနွို့ လို့တန်အကောင့်ဘို့ဘက်န လို့အပြစ်ဒုစရိုက်ဘို့ဘက်နွို့နောင်း ကိုယ်တော်ယေရှုဟောဖြိုကရီနွို့ မောင်းကန်းနွို့ လောက်ပိုကြဘို့နွို့နဲ့။ 2ချန်နွို့နု့ ဖာရိရှဲဘို့ဘက်န ဆာယာပါလိတ်ကျမ်းဘို့ဘက်နား “လို့နီးနောင်း လို့အပြစ်ဒုစရိုက်ဘို့ဘက်န စုကြဘို့ဘို့ပေ့စယ်မှကာ့ကော လို့ဇာ့နွို့နအနုဲင်နုဲင် စွေဟက်မဲ့ဟောက်ကိုး” နွို့ကရကြဘို့နွို့နဲ့။ 3စနွို့လဲ ကိုယ်တော်နား လို့ဇာ့နွို့နား ပုံဥပမာအမာ့န ဘာ့ဟောဖြိုနွို့နောင်း 4“ပွို့နွို့နု့ သိုးဟိုယော့အ့်ာကွက်အာ့်ဖျားနား ကောင်ဖုန်သိုးနွို့မှ အာ့်ကွက်နွို့ တာ့ဗာ့နွို့နု့ မို့နောင်း သိုစံန်ကျင်စံန်ကွက်နွို့ ဗွေကန္တာရနွို့ ကံပို့တွို့ထာ ဘာ့ဗာပွန်မဲ့သိုးအ်ာ့ကွက်နွို့ မထွိမချောင်း ရက်ကြဘို့ကက်ကောဟား။ 5ဆောင့်ထွိဘတ်နွို့နောင်းလဲဉ်း သိုးနွို့နောင်း တံတွိုကွေစဗါ့ထာ နွက်တူးတူးန ရန်းတွို့ညာ့ထာ 6ဘိုပေ့အို့နွို့ ဟက်တွို့ထာ ‘သိုးအို့ဘာ့ဗာ့မဲ့နွို့ ထွီဘတ်တွို့နွို့ခေါင်း အို့နအနုဲင်နုဲင် နွက်တူးကြဘို့’ နွို့ဖြိုလောက်ဟောက်။ 7နာ့နွို့နု့ ပွို့နွို့နား အိုဟောဖြိုနွို့နား ကနံကလို့ဖြားနောင်း လို့ဘာ့ဖြောက်မှန်ကန်မဲ့ လိုလ့်ဗင်ကောနောင်တနွို့ လို့ဘာ့ထုန်မဲ့နွို့နား တာစံန်ကျင်စံန်ကွက်နွို့မှ ဘာ့လှည့်ပိုဖက်ဖြားနွို့ ဘာ့ယို့အပြစ်ဒုစရိုက်နွို့မှ တာ့ဗင်နောင်တသံဝေဂအာ့်ကွက်နွို့ခေါင်း ဗဟိုမဲ့ရွှေမြို့တော် ဖြားန ကနံကလို့အမ်နွို့နောင်း နွက်တူးလှူးလောက်ဟောက်” နွို့ဟောဖြိုမနနွို့နဲ့။ 8နွို့ခေါင်း ကိုယ်တော်ယေရှုနား လို့ဖုန်ကုန်နွိုနား ပုံဥပမာအမာ့န ဘာ့ဟောဖြိုနွို့နောင်း “ပဆံဒင်္ဂါးမာ့ကျင်ပလက်ဟိုမဲ့ ကမြအာ့်ကွက်နား ပဆံဒင်္ဂါးအာ့်ပလက် တာ့ဗာနွို့နု့ သမြနွို့နောင်း ညာ့ညွမ်နွို့ ထွန်းညှိတွို့ထာ ညာ့အမ်နွို့ ဖေတွို့တောင်းဖေထာ မထွိမချောင်းရက်ဟောက်ကက်ကောဟား။ 9တာ့ရက်ထွိကောနွို့လဲဉ်း ကမြနွို့နောင်းဟက်တွို့ဘို့ပေ့အမ်ထာ ‘ပဆံဒင်္ဂါးဘာ့ဗာ့ကု့နွို့ ထွိပလောက်တွို့နွို့ခေါင်း ဝမ်းသာကြဘို့’ နွို့ဖြိုလောက်ဟောက်။ 10နာ့နွို့အတွိုန်း ပွို့နွို့နား အို့ဘာ့ဟောနွို့နား ဗင်တွို့နောင်တသံဝေဂထာ လှည့်ဘက်ပိုဖက်ဖြားနွို့ ဒါလို့ယို့အပြစ်ဒစရိုက်အာ့်ကွက်နား ဖြားန ကနံကလို့အမ်ဘို့ဘက်နောင်း နွက်တူးတူးနကလုဲင်လောက်ဟောက်” နွို့ဟောဖြိုမနနဲ့။ 11အခွပ် ကိုယ်တော်ယေရှုနား ဟောလေက်ပုံဥပမာအာ့်မာ့နွို့နား “ကရှိနွို့ လို့အာ့်ကွက်နား ကွန်ဖြောက်ဟိုအဲဉ်ကွက်နွို့နဲ့။ 12အာ့်ရှိနား ကွန်ဖြောက်အာ့်ပေ့နွို့အာ့်ကွက်နား ဘာ့ကလုဲင်ပါအမ်နွို့နား ‘ပါ၊ မို့ခါဗီးကောနီးနွို့ အို့ဘာ့ဗင်ထိုက်မဲ့ အမွေနွို့နု့ အခွပ်ခွီအာစေး’ နွို့ဖြိုဟောက်ခေါင်း ပါအမ်နောင်း တာ့သဘောတူတွို့ထာ ကွန်ဖြောက်အဲဉ်ကွက်နွို့ ခွီအာမဲ့အမွေနွို့နဲ့။ 13ခါကနိုကောနွို့နား ကွန်ဖြောက်အာ့်ပေ့အာ့်ကွက်နောင်း ပစ္စည်းအမ်ဘာဗင်မေ့မေ့နွို့ စာတွို့ထာ ဘာ့စာဗင်ပဆံနွို့န အွေကုတွို့ထာ ဘာ့ငါလွန်းမဲ့တိုင်းပြည်အ့်ခြားနွို့ လေးပွန်တွို့ထာ တာ့လွက်နွို့ ဇာ့ဘာ့ဟိုနွို့နု့ ထုံးဖျောက်တွို့အပျော်အပါးထာ မန်းလေမနနွို့နဲ့။ 14နွို့ခေါင်း ဇာ့အမ်ဘာ့ပိုင်ဘို့ဘက်နွို့ အချန်ဆောင့်ထုံးဖျောက်ယော့မေ့မေ့နွို့နောင်း ဖြိုင်အနှံ့နွို့နု့ အစွေဖုန်အွူဖုန်ဘာ့ငတ်နွို့ရောက်ပွိုနွို့ခေါင်း အမ်နောင်းလဲဉ်း ဘဝဆန်းရဲလှူးနွို့ လောက်ကုဟောက်နွို့နဲ့။ 15စနွို့နား အမ်နောင်း သဖြိုင်နွို့မှ ကစာ့ရေ့ဗါ့အ်ာ့ကွက်နွို့ကု့တွို့ထာ အာအ့်ယို့နွို့ တောင်ပန်မနခေါင်း လို့နွို့နား ကွန်ဖြောက်အပေ့အာ့်ကွက်နွို့နား တာ့ခြံန်အမ်နွို့မှ ကလိပ်နွို့ မောင်းအာထန်နွို့ ခိမနနဲ့။ 16ချန်နွို့နု့ ကွန်ဖြောက်အ့်ပေ့အာ့်ကွက်နောင်း ငှတ်လွန်းလန်းဟောက်နွို့ခေါင်း ခမ်းစွေအ့်စွေကလိပ်နွို့ မင်စွေခွင်ဗင်ဟောက်နွို့လဲဉ်း ဆောင်ကွေမှ အမ်နား အာကောပွို့ခမ်းစွေနွို့နဲ့။” 17အတုဲတ်နွို့ ကွန်ဖြောက်အ့်ပေ့အာ့်ကွက်နောင်း အ့်ငန်းတရားနွို့ဗင်တွို့ထာ ညာ့ပါအေ့နွို့ လို့ယို့အ့်ယို့ဆောင်ဘို့မှဘို့ ခွို့နွို့နောင်း မင်စွေကြဘို့ထိထနာ့နွို့နဲ့။ စနွို့လဲ အို့နောင်း တာ့လွက်ဖက်နီးနွို့ ငှတ်လေမဲ့အ့်စွေအ့်ငွမ်းနား မောင်းဗီးတွို့နု့ကိုးနွို့နဲ့။ 18အို့နောင်း အခွပ်နွို့ တာ့လွက်နီးလေးပွန်တွို့ထာ တာပါအေ့နွို့ကု့တွို့ထာလဲဉ်း “ပါ၊ အို့နောင်း ဖြားနွို့ဖုန်၊ ပါအေ့နွို့ဖုန် ပြစ်မှားမာန့်တွို့။ 19စနွို့နား အို့နွို့ နာ့ကွန်ဖြောက်အာ့်ကွက်နို့သတ်မှတ်ကောရော။ နာ့လို့ယို့အ့်ယို့မို့အာ့်ကွက်နွို့စယ်” အ့်ကလုဲင်ပို့ဝဲ့နေ နွို့တွေးလေမနနဲ့။ 20နွို့ခေါင်း ကွန်ဖြောက်အ့်ပေ့အာ့်ကွက်နောင်း အောက်တွို့ထာ ရန်းကု့ညာ့ပါအမ်နို့နွို့နဲ့။ ပါအမ်နောင်း ကွန်ဖြောက်အမ်အ့်ပေ့အာ့်ကွက်ရန်းပွို့ အ့်ငှာနွို့ ဆောင့်ရင်မာန့်နွို့န ကွန်ဖြောက်အမ်နွို့ သနားဟောက်ခေါင်း ကန့်တွို့အ့်ဗီတွိုန်းထာ ကု့ဖက်ကု့မှု့ဝဲ့နွို့နဲ့။ 21ကွန်ဖြောက်အ့်ပေ့အာ့်ကွက်နောင်းလဲဉ်း ပါ၊ အို့နောင်း ဖြားနွို့ဖုန်၊ ပါအေ့နွို့ဖုန် ပြစ်မှားမာန့်တွို့။ အို့နောင်း ကွန်ဖြောက်မို့အာ်ကွက်နွို့ လာ့သတ်မှတ်ထိုက်ကော နွို့ဖြိုမနနဲ့။ 22စနွိုလဲ ပါအမ်နောင်း ဟက်တွို့အစေခံထာ အမ်နွို့ ခရိုန်းဘာ့ကြထက်ပေ့နွို့ အွေပိုတွို့ထာ အမ်နောင်း ဗါ့အာကြဘို့။ တိအမ်နောင်းလဲဉ်း ကက်အာကြဘို့ ဆန်တိထာ တာ့ကောက်နွို့ တန်အာကြဘို့ ဇာနပ်နေ။ 23နွို့ခေါင်း ကု့နွို့ထာ ဝက်ဗစ်ထက်ပေ့နွို့အွေပွို့တွို့ထာ ဗီဒိုင်ကြဘို့။ တာ့ကွန်ဖြောက်အို့ရန်းပိုနွို့နား ပွီးဂုဏ်ပြု ယို့အာကြဘို့အောင်။ 24ရွားနွို့ပဒေကား ကွန်ဖြောက်အို့အ့်ပေ့အာ်ကွက်နား အမ်ပီးတွို့နွို့ထုံဟောက်နု့လဲဉ်း လုနီးအထက်ပလုဲင်းဘတ်တွို့ထာ၊ အမ်ဗာကု့ဟောက်နွို့ထုံဟောက်နု့လဲဉ်း လုနီးထွီးဘတ်တွို့ နွို့ဆောင်ဖြိုယော့နောင်း ခွို့နွို့နောင်း ပွီးဂုဏ်နွို့ စယို့ကြဘို့နွို့နဲ့။ 25ချန်နွိုနို ကောင်ရေ့လာ့နွို့ ယို့မဲ့အ့်ယို့ ကွန်ဖြောက်အ့်ကုန်းအ်ာ့ကွက်နောင်း ဆောင့်လောက်လောင်းဂို့နွို့ ချန်ဆောင့်ရန်းညာ့နွို့ ဆောင့်လောက်တာ့စာ့ညာ့အမ်နွို့နောင်း ကရက်သချောင်းဘို့ဘက်န ထှာကြမဲ့ဘို့ကရက်နွို့နောင်း အွမ်ဟောက်နွို့နဲ့။ 26ချန်နွို့နု့ အမ်နောင်း ဆောင့်လောက်ရန်းညာ့နောင်း ဟက်တွို့အစေခံအာ့်ကွက်ထာ ကလုဲင်ကြမဲ့ဘို့တတ်ထားနီးနား နွို့မားမနနဲ့။ 27အစေခံအာ့်ကွက်နောင်းလဲဉ်း တွေပေ့မို့နွို့ ဘေးကင်းကင်းန လောက်ရန်းပိုညာ့နွို့ခေါင်း ပါပွို့နောင်း ဝက်ဗစ်ဗစ်အ်ာ့ကွက်နွို့ အာဗီတွို့ထာ ဒိုင်ယော့ ယို့အာကြမဲ့ဘို့ ပွီးဂုဏ်ပြုကိုးနဲ့ နွို့ဖြိုဘတ်မနနဲ့။ 28ချန်နွို့နု့ ကွန်ဖြောက်အ့်ကုန်းအ့်ကွက်နောင်း နွက်သက်တွို့ထာ ဆောင်ကွက်ကောကောင်ညာ့နွို့ခေါင်း ဘာ့ကလုဲင်ပါအမ်နွို့နောင်း လေးတွို့ဖက်ပလန်းထာ အမ်နွို့ ကုချော့မနနွို့နဲ့။ 29စနွို့လဲ ကွန်ဖြောက်အ့်ကုန်းအာ့်ကွက်နောင်လဲဉ်း ရေ့စမ်းမဲ့ အို့နောင်း ဇာ့ဘာ့အေ့ဘာ့ခိနွို့ ယို့လွမ်းအာ့ယော့ နာ့အစေခံနောင်း ယို့မွီးပွို့နှမ်းပေါင်းဘို့ဘက်တွိုန်းနွို့လဲဉ်း ပါအေ့နောင်း တာအို့နွို့ ဘို့ပေ့ဘို့ဘက်န အနုဲင်နုဲင် မောင်းစွေနွို့ ဆိတ်အာ့်ကွက်စယ်မှ လာ့အာဖူးကော။ 30စနွိုလဲ ကွန်ဖြောက်အ့်ပေ့အ်ာ့ကွက်နောင်း ပစ္စည်းဥစ္စာပါအေ့နွို့နု့ ကမြဖျောက်ဘို့ဘက်န ထုံးဖျောက်ယော့ ဆောင့်ရန်းပွိုနောင်း ပါအေ့နောင်း ဝက်ဗစ်ဗစ်နွို့ ဗီတွို့ထာ ပွီးဂုဏ်ပြုနွို့ယို့ကြမဲ့ဘို့ နွို့ဖြိုမနနဲ့။ 31“ဘာ့ကလုဲင်ပါအမ်နားလဲဉ်း ‘ကွန်ဖြောက်အို့၊ မို့နောင်း အို့နအနုဲင်နုဲင် ဟိုမဲ့အမြဲနွို့နား ဇာ့အို့ဘာ့ပိုင်ပစ္စည်းဥစ္စာနွို့နောင်း တာမို့ကိုးနွို့နဲ့။ 32စနွိုလဲ တွေမို့နောင်း အမ်ပီးတွို့နွို့ထုန်ဟောက်နု့လဲဉ်း လုနီးအထက်ပလုဲင်းဘတ်တွို့ထာ၊ အမ်ဗာကု့ဟောက်နွို့ထုန်ကြဘို့နု့လဲဉ်း လုနီးထွီးဘတ်တွို့နွို့ခေါင်း လိုလ့်နွက်တူးဟောက်’ နွို့ဖြိုမနနဲ့” နွို့ဟောဖြိုမနနဲ့။
Currently Selected:
Luke 15: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.