التكوين 3
3
بداية العالم
الذنب لأول
1وكان الحنش هو أمكر حيوانات لخلا اللي خلڮ الله تعالى. وڮال للمرة: حڮحڮ ڮالكم الله تعالى : لا توكلو من أي صدراية فهاذي لبليدة الزينة ؟ 2وڮالت لمرة للحنش: ابدي انڮدو نوكلو من احدج الصدر كامل اللي فهاذي لبليدة، 3يغير الصدراية اللي فوسط هاذي لبليدة الزينة، ڮط ڮالنا الله تعالى: لا توكلو منها ولا اتمسوها اياك ما اتموتو. 4وڮال الحنش للمرة: ابدي مانكم لاهي اتموتو . 5يغير الله تعالى يعرف اعلنكم الوقت اللي توكلو منها لاهي اتعود عندكم معرفة اجديدة واتعودو كيفت الله تعالى اتميزو امبين الصالح والطالح. 6وشافت لمرة اعلن الصدراية زينة للوكيل وتجذب شورها العين، ومرغوب فيها بسبب اللي تعطي من الحكمة لحد يوكل منها . وڮبظت من احدجها وكالت. ومن فم اعطات لراجلها اللي كان امعاها وكال هو املي. 7وانفتحو عينيهم، وفطنو اعلنهم عريانين. وخيطو اورڮ صدراية التين وصنعو لروسهم لباس يغطي عورتهم.
8ومن فم سمعو صوت الله تعالى ماشي فهاذي لبليدة الزينة وقت مشي الريح، واتروقو الراجل وأعيالو من الله تعالى امبين اصدر هاذي لبليدة. 9وعيط الله تعالى للراجل وڮالّو: انتا امنين؟ 10وڮال الراجل: اسمعت صوتك فهاذي لبليدة ونخلعت بيّلي آنا عريان، واتروقت عنك. 11وڮالّو الله تعالى: من ڮالّك اعلنك عريان؟ اثرك كلت من الصدراية اللي انهيتك عن توكل منها؟ 12وڮال الراجل: لمرة اللي امعايَ ، اعطاتني من احدج الصدراية وكلت. 13وعند ذاك ڮال الله تعالى للمرة: ذا اللي عدلتي شنهو؟ وڮالتلو لمرة: الحنش احتال اعليَّ وكلت من احدج ذيك الصدراية.
14وڮال الله تعالى للحنش: بيكلي انتا عدلت ذاك، اتعود ملعون أكثر من المخلوقات لخرين كاملين. وكل أيام حياتك لاهي تحبي اعلى كرشك، ولاهي توكل التراب، 15ولاهي اندير عداوة امبينك وامبين لمرة وامبين نسلك ونسلها. لاهي يبعج نسلها راسك وانتا لاهي اتعظو فالعرڮوب.
16وڮال الله تعالى للمرة: لاهي انكثر اوجاع حملك. وبلألام لاهي تبراي أولادك، ولاهي تخدمي راجلك، ولاهي يسود اعليك.
17وڮال الله تعالى للراجل: انتا اسمعت اللي اقترحت اعليك أعيالك وكلت من الصدراية اللي انهيتك عن توكل منها. ولذا لاهي نلعن لارض، ولانك لاهي اتعود توكل منها يكون بالكد والتعب كل أيام حياتك. 18ولاهي اتنبتلك الشوك وينيتي، ولاهي توكل من اصدر لحريثة . 19اتحصل اطعامك باعرڮ جبهتك ، يلين ترجع للتراب اللي اوخلڮت منها. من التراب اوخلڮت وشور التراب لاهي ترجع.
20وسما آدم أعيالو حواء بيهَلي لاهي اتعود أم البشر كاملين. 21واصنع الله تعالى لباس من جل حيوان لآدم وأعيالو، ولبسولهم.
22وڮال الله تعالى: اراعيه عاد لإنسان كيف واحد منا فالتمييز امبين الصالح والطالح، وظرك عاد يڮد يمد ايدو ويڮبظ من احدج صدراية الحياة ويوكل منها ويعيش إلى الأبد. 23وصاعو الله تعالى من لبليدة الزينة اللي فعدن اياك يحرث التراب اللي اوخلڮ منها. 24وعاڮب يلين صاع لإنسان، دار مولانا فجيهة شرق عدن نوع من الملائكة أسمهم الكروبيم اللي كانو رافدين سيف من نار يزڮنن اياك يحرس اطريڮ اللي واعدة صدراية الحياة.
Currently Selected:
التكوين 3: الحسانية
Highlight
Share
Copy
Want to have your highlights saved across all your devices? Sign up or sign in
© 2024 Pioneer Bible Translators
This work is licensed under the Creative Commons Attribution ShareAlike 4.0 license https://creativecommons.org/licenses/by-sa/4.0/