Zakaria 14
14
Zugsɔb kenna ye o an na'ab
1Zugsɔb la na'am dabisir la kenna, ka ba na pʋdig la'abanɛ ka ba faaɛn ya san'an la tis taaba ya nini ni.
2Zugsɔb la yɛl ye, M na la'as buudi la wʋsa ka ba kena zab nɛ Jerusalem; ba na nyaŋ teŋ la ka kpɛn' yaanɛ vaae ya la'ad wʋsa, ka bib pu'ab la. Teŋ la nidib pʋsʋk na keŋ teŋ zʋŋ, amaa nimbanɛ kpɛlim la ba kʋ mɔri ba yi teŋin laa.
3Ani ka Zugsɔb la yʋ'ʋn na yii zab nɛ buudban la wʋʋ on da ɛɛn zabid si'em kʋdimin la. 4Daakan la o na kena zi'en Olif Zuor linɛ bɛ Jerusalem ya-nya'aŋ la zug, ka zuor la na buak zin'is ayi' yi ya-nya'aŋi paae ya-tuona, ka bʋmbɔk tita'ar na bɛ teŋsʋk, ka pʋsʋk lɛbid ya-datiuŋ ka pʋsʋk mɛ lɛbid ya-dagɔbʋg. 5Ya na zɔɔ dɔl bɔn'ɔg kanɛ bɛ zuor la teŋsʋk la, bɔzugɔ li na dɔlis ala keŋ paae Azal teŋin. Ya na zɔ nwɛnɛ teŋi da dam Juda Na'ab Uzia saŋa ka ya da zɔ si'em la. Ani ka m Zugsɔb Wina'am la yʋ'ʋn na kena, nɛ o maliaknam wʋsa.
6Daakan la nɛɛsim nɛ waad kʋ bɛɛ, ka mɛligim ɛɛnti lii ga'aŋ la mɛ kʋ bɛɛ. 7Li na an dabisgiŋgaŋ, linɛ ka nintaŋ kʋ yii ka yʋ'ʋŋ kʋ sɔbɛ. Zugsɔb la ma'aa na mi' dabisir la yɛla. Zaam na ma'ae ka nintaŋ nam bɛ.
8 #
Ezi 47:1; Jon 7:38; Nie 22:1 Daakan la vʋm ku'om na pʋbid Jerusalem teŋin yit na, li pʋsʋk na keŋ atɛuk linɛ bɛ ya-nya'aŋ la, ka pʋsʋk keŋ atɛuk linɛ bɛ ya-tuona la; sɛɛung nɛ ʋʋn wʋsa.
9Zugsɔb la na di dunia wʋsa na'am. Daakan la Zugsɔb yinne ma'aa na bɛ, ka on yʋ'ʋr ma'aa ka nidib na mi'.
10Teŋ la wʋsa, lin pin'il Geba ti paae Rimmon, linɛ lɛbid Jerusalem ya-dagɔbʋg baba la na lieb sassi nwɛnɛ Araba teŋ nɛ. Amaa Jerusalem on na kpɛm bɛɛ li zin'igin kʋkʋn zug, lin naan Benjamin Za'anɔɔrin la ti paae Yiiga Za'anɔɔr la, nɛ Za'anɔɔr kanɛ bɛ Gɔnligir Zin'ig la, nɛ lin pin'il Hananɛl Girimbisa la ni ti paae na'ayin zin'ikanɛ ka ba nwiakid tiis wala maan daam la. 11Nidib na zin' ani; ba kʋ lɛn san'ami li ya'asɛ. Jerusalem yʋ'ʋn na mɔr yɔlisim.
12Ban'akanɛ ka Zugsɔb la na kɛ ka li paae buudbanɛ zabid nɛ Jerusalem la nwa': ba na vʋe ka ba niŋgbina lɛɛ kpi, ba nini na pun'oe, ka ba zilima pun'oe ba nɔya ni. 13Daakan la Zugsɔb la na kɛ ka dabiem kpɛn' ninsaal wʋsa. Sɔ' wʋsa na gban'e o tiraan nu'ugʋ vɛ'ɛgi zi'el, ka ba tuligi zabid nɛ taaba. 14Juda mɛ na zabi sʋŋ Jerusalem. Ba na faaɛn buudbanɛ giligi ba la kpan'am linɛ an sanlima nɛ anzurifa nɛ fuud bɛdegʋ. 15Ban'akan buudi mɛ na gban'e widi nɛ bʋmis, nɛ yʋgʋma, nɛ bʋnkɔnbid banɛ wʋsa ka ba mɔr.
16Buudbanɛ zabid nɛ Jerusalem ka ba nidib kpɛlim la wʋsa na ken anina na yʋʋm wʋsa wɔ'ɔgid Na'ab la, onɛ an Zugsɔb Onɛ an Paŋtita'ar Sɔb la, ka di Sʋga Gbɛɛnb Malʋŋ la. 17Ka teŋ kanɛ nidibi zan'as ka pʋ keŋ Jerusalem wɔ'ɔg Na'ab onɛ an Zugsɔb Onɛ an Paŋtita'ar Sɔb la, saa kʋ nii ba teŋinɛ. 18Egipt dim la mɛ ya'a pʋ keŋ niŋ alaa, ba mɛ kʋ nyɛ saa. Zugsɔb la na kɛ ka ban'as kanɛ paae buudbanɛ wʋsa zan'as ye ba kʋ keŋ di Sʋga Gbɛɛnb Malʋŋ la paae ba. 19Nɛ'ɛŋa na an namisʋgʋ tis Egipt nɛ buudbanɛ wʋsa zan'as ye ba kʋ keŋ di Sʋga Gbɛɛnb Malʋŋ la.
20Daakan la, ba na sɔbi tabil widi la lʋmma ni ye, “Li ANƐ KASI TIS ZUGSƆB LA,” ka dʋgʋb la'abanɛ bɛ Zugsɔb Yin la na an kasi wʋʋ la'abanɛ bɛ maan daka la zin'igin la an si'em la. 21Dʋk wʋsa linɛ bɛ Jerusalem nɛ Juda na an kasi tis Zugsɔb Onɛ an Paŋtita'ar Sɔb la, ka banɛ wʋsa kena ye ba maal maana la na nɔk dʋgid la dʋg. Daakan la banɛ kuosid la'ad kʋ lɛm bɛ Zugsɔb Onɛ an Paŋtita'ar Sɔb la Pʋ'ʋsim Yinnɛ.
Currently Selected:
Zakaria 14: kus_gh
Highlight
Share
Copy
Want to have your highlights saved across all your devices? Sign up or sign in
© 2023, Ghana Institute of Linguistics, Literacy and Bible Translation