Matius 6
6
Dosadhakaa
6:1-4
1“Tandaiꞌeomu, koise angkafiomu tubhono agamamiu mefewohaomu kaowu ne mie bhahi. Ane peda naꞌa Amamu te surugaa pae namaꞌangkoomu ponambo. 2Dadiꞌanomo ane fowaꞌao sadhakaa koe mefole-folelea, peda nehabundo mie mehaaꞌulano. Andoa ini dohabu peda anaꞌa weo lambu-lambu kasambaheaꞌa tawa ne kaangkaꞌa so dotipudhiꞌao ne mie bhaindo. Amohatokoomu, kotu-kotuꞌu andoa maitu dotahimaemo ponambodoa. 3Tamaka ane sumadhakaa, nehabuno suanamu koemo nopandeꞌaanea kemamu. 4Sadhakaamu koemo dopandeꞌaanea bhaindo, maka Amamu mohano tifebuniꞌano nabholosiangkoe.”
Dosambahea
6:5-15
Luk 11:2-4
5“Ane sumambaheaꞌomu koe nameda mie mehaaꞌulano. Andoa maitu doasiane dosambahea ngkaehe-ehe weo lambu kasambaheaꞌa bhe ne kampuna defewoha ne mie bhaindo. Amohatokoomu, kotu-kotuꞌu andoa maitu dotahimaemo ponambodo. 6Tamaka ane sumambahea pesua weo bolokumu, onto fointo maka sambahea ne Amamu pata tiwohano. Ane nada naꞌa Amamu mohano tifebuniꞌano nabholosiangkoe.
7Pakade sambaheamu koe tanobhahi-bhahimo wamba tapa komaꞌanano, peda kaneando mie tapa mandeꞌaono Lahataꞌala. Dukuno lalondo hampano kabhahino wambado maitu, natitahimaanemo kamesalondo. 8Dadiꞌanomo hintimiu koe peda andoa maitu. Kapaꞌamo miinaꞌo mesaloomua, Amamu te surugaa nopandeꞌaanemo kafaraluumua. 9Dadiꞌanomo sambaheaꞌomu nada aini,
‘Ama mani te surugaa,
notifosibhalaꞌo toha neamu.
10Nohatoꞌo toha Kafopahintaꞌamu,
nokoꞌulaꞌo toha patudhumu we dhunia ini peda te surugaa.
11Waꞌa kainsami nehumaa kafaraluu mani seꞌoleo itu.
12Amponie sabhaha dhosa mani,
pedamo dua insaodi tamaꞌafuꞌao mie kokaꞌalano ne insaodi.
13Koise folapasa kainsami weo kasoba,
tamaka dhagani kainsami ne kuasa modai.
[Kapaꞌamo Hintumo mahintano, kokuasano bhe kumalabhiano ampa suhue dhamani. Amin.]’
14Ane maꞌafuꞌaoꞌomu mie kokaꞌalano ne hintimiu, Amamiu te surugaa naꞌumamponikoomu dua. 15Tamaka ane paise maꞌafuꞌaoꞌomu mie bhaimiu, Amamiu te surugaa pae dua naꞌumamponikoomua.”
Dopoasa
6:16-18
16“Ane moasaomu koe mengkuru-ngkuruomua peda mie mehaaꞌulano. Andoa maitu dohabu-habue ulando, defewoha ne mie putae dopoasa. Amohatokoomu, kotu-kotuꞌu andoa dotahimaemo ponambodoa. 17Tamaka ane moasaomu mekundeomu, meheꞌuomu, 18keana dopandeꞌaane mie bhaindo putae poasaomu, ampamo kaowu Amamu tapa tiwohano mandeꞌaane. Maka Amamu mohano tifebuniꞌano nabholosiangkoeꞌomu.”
Defoꞌonu kahangkaea
6:19-24
19“Koise mefoꞌonuomu kahangkaeano dhunia, kapaꞌamo nadumai-daiꞌe faa bhe hase, pakade dapombuhusiane kasoꞌo. 20Tamaka foꞌonuomu kahangkaeano surugaa, kapaꞌamo te surugaa paise nadumai-daiꞌe faa bhe hase pakade pae dua dapombuhusiane kasoꞌo. 21Kapaꞌamo ne amai kanandooꞌano kahangkaeamu, ne ituꞌaemo dua totono lalomu.
22O mata kantaleanomo mbadha. Ane netaa matamu, nentaleamo dua mbadhamu. 23Ane nodai matamu, nohohondomo dua mbadhamu. Dadiꞌanomo ane tilanga we lalomu nohohondomo, notolau sepaliꞌa kahohondono!
24Miina bhe bhatua dohodua kafeompuꞌano. Ane nada naꞌa tetewei seemiea nabansie, seemie namasiane, tawa nokampuu-mpuu lalono ne seemieno maka seemieno miina nakumonaꞌi miea. Hintimiu pae naembalia meompuomu ne Lahataꞌala bhe ne kahangkaeano dhunia.” #6:24 Sakotuꞌuno: Mamon, maꞌanano o dhoi.
Kamihino lalo
6:25-34
Luk 12:22-31
25“Dadiꞌanomo amohatokoomu, koise nomihi lalomiu ne kadadiꞌamiu, momaaꞌomu ae tawa mohoꞌuomu ae. Koise dua nomihi lalomiu ne mbadhamiu bhahaꞌi mepakeomu ae. Ingka noliuꞌe dadi ini bhe oti, noliuꞌe dua mbadha bhe pakea. 26Soba ondoomu kaꞌuhi lumolano; miina dahumooa, miina dakumape, miina dua dasumolo pehapindo, tamaka Amamiu te surugaa noꞌondofaanda. Ingka foliuda hintimiu bhe kaꞌuhi lumolano maitu.
27Laꞌae bhahaa ne olotamiu itu hampano kamihino lalono namooli namodhulu dadino naseendai kaowu? 28Noafa nomihiꞌao lalomiu bhahaꞌi mepakeomu ae? Soba ondoomu kamba-kamba we pada; miina dakumahadhaa, miina dua damoohu. 29Tamaka amohatokoomu, omputo Salomo foliuno kahangkaea maitu, pakeano miina naehatoa ne kakesano kamba-kamba aitu! #1Raj 10:4-7 30Kahoku tumumbuꞌano we pada oleo itu, namentae datumawuemo. Sanginomo kahoku maitu nolegasiemo Lahataꞌala, bhemo toha dua hintimiu! Kakuhano dua kaparasaeamiu!
31Dadiꞌanomo koe nomihi lalomiu bhe pugauꞌomu, ‘Daomaa ae?’, ‘daohoꞌu ae?’ tawa ‘daepake ae?’ 32Kosasawiꞌae naꞌa nefosibhalandomo sabhaha bansano liwu tapa mandeꞌaono Lahataꞌala. Amamiu te surugaa nopandeꞌaane kosasawiꞌae maitu faraluuꞌeomu. 33Dadiꞌanomo ondofiomu kadeki Kafopahintaꞌano Lahataꞌala bhe dhalangieꞌomu kapoindalono. Maka kosasawiꞌae kafaraluumiu naꞌa namaꞌangkoeꞌomu dua. 34Dadiꞌanomo koe nomihiane lalomiu oleo naewine, kapaꞌamo oleo naewine bhe kasabhano dua wutono. Seꞌoleo-seꞌoleo bhe kasabhano wutono, koemo dotubha-tubhahiea.”
Currently Selected:
Matius 6: mnbSD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.