Matius 10
10
Yesus nebhasi anaguhuꞌi doompulu hodua
10:1-4
Mrk 3:13-19; Luk 6:12-16
1Yesus nebhasi anaguhuꞌino doompulu hodua maka nowaꞌanda kuasa daefolimba seetani, daefekasali sabhaha saki bhe kadaino namisi. 2Pedamo aini neando rasulu ompulu hoduano naꞌa. Kabhao-bhaono Simon nekonando Petrus bhe Andreas kakutaꞌano. Pada anaꞌa Yakobus anano Zebedeus bhe Yohanes kakutaꞌano. 3Maka Filipus bhe Bartolomeus, Tomas bhe Matius mealano sewa, Yakobus anano Alfeus bhe Tadeus. 4Simon miendo Zelot #10:4 Miendo Zelot naꞌa dokopatudhu damobebasi witeno Israel maiꞌao ne kafopahintaꞌano Roma. bhe Yudas Iskariot. Anoamo ini mowano Yesus ne limano kaewando.
Takando rasuluꞌi ompulu hoduano
10:5-15
Mrk 6:6b-13; Luk 9:1-6
5Yesus notudumo anaguhuno ompulu hoduano naꞌa dakumala bhe nofohatoda ambano, “Koise angkafiomu kampuna humopeꞌano we liwundo mie suano Yahudi tawa mesuaꞌano weo kotando miendo Samaria. 6Tamaka kalaomu ne umatino Israel kolilinono tapedamo dhumba. 7Kalaomu bhe foleleomu, ‘Kafopahintaꞌano Lahataꞌala nomaꞌomo.’ 8Fekaꞌosadaomu mie mosaki, fowanudaomu mie mate, fekaꞌuhidaomo mie kokuli modaino, folimbadaomu seetani. Kosasawiꞌae ini awaeꞌomu miina umolieꞌomua, dadiꞌanomo tafowaꞌaomoomu dua.
9Koise mewowoꞌoomu bulawa, tawa salaka bhahaꞌi dhoi tambaga ne kawawemiu. 10Koise dua mewowoꞌoomu bhaku so we laano sala, koise mewowoꞌoomu bhadhu nahaa tuwu, koise mepakeomu kaampini tawa katuko, kapaꞌamo mie kumahadhaa nopantasi naꞌumawa ponambono. 11Ane mesuaꞌomu ne kota tawa ne liwu, meꞌondoomu mie mantasino so kabutuꞌamiu, meate-ateomu ne itu ampa kumalaomu toha. 12Ane mesuaꞌomu ne lambudo mie feabhadaomu putae, ‘Kabarakatino Ompu so polambu aini.’ 13Ane damantasi, kabarakatino kafeabhamiu naeatemo ne andoa. Tamaka ane paise, kabarakatino nasumuli ne wutomiu. 14Ane nandumandoo mie tapa tumahimakoomu tawa dokiido dametingkekoomu, limba bhe hunsaomu lambu tawa kota aitu; tantaeꞌomu bhe bungahasino aꞌemiu. 15Amohatokoomu kotu-kotuꞌu, nahumato Oleono Kiama kahukumu neꞌawano witeno Sodom bhe Gomora nandoo naosape ane dapototoane bhe so neꞌawano liwu aitu.” #10:15 Sodom bhe Gomora, ondo Kej 19:24-28
Kakadee-dee so netompaloi
10:16-33
Mrk 13:9-13; Luk 12:2-9; Luk 21:12-19
16“Tandaiꞌeomu! Atumudukoomu kumalaomu nada dhumba monaleno damesua ne wunta-wuntando daꞌu ngkahoku. Dadiꞌanomo tabeano mengkowaweomu nada ule bhe naelaa lalomiu nada dhaadhaha.
17Ampamo kaowu kodhagaomu ne mie, kapaꞌamo dahumakokoomu bhe damowakoomu ne Sahano Agama. Dahumambisiangkoomu habuta weo lambu kasambaheaꞌando. 18Hintimiu datumondakoomu ne wiseno kabhalano liwu bhe kafeompuꞌa mbaꞌinomo kaparasaeamiu ne Idi. Aini somo katolalamiu membaliomu sakusiiku ne andoa bhe mie tapaꞌo mandeꞌaono Lahataꞌala. 19Ane damowakoomu ne fobhitahakino, koe nekenda-kenda handamiu nada amai tawa o ae so pugaumiu. Kapaꞌamo so pugaumiu itu damaꞌangkoeꞌomu wakutuu aitu dua. 20Suanomo hintimiu so mugauno, tamaka Rohino Amamiu te surugaa so kosuahano namangka ne hintimiu.
21O mie damowa kakutando ne kokuasano damongkoeꞌao, pedamo dua o ama damowa anando damongkoeꞌao. 22Hintimiu ini dabansikoomu sabhaha mie mbaꞌinomo neaku. Tamaka so kosabahano napotaami ampa namalusi, damosalamatida. 23Ane damodee-deekoomu ne seꞌonu liwu, fileiꞌomu ne liwu sigaoꞌano. Amohatokoomu, kotu-kotuꞌu paeꞌo madaeꞌomu liwu-liwuno Israel mangkaiꞌeomua, Anano Manusia - Idimo ini - nahumatomo. 24Seemie anaguhu pae nalumiu guruno, tawa seemie bhatua pae nalumalo kafeompuꞌanoa. 25Naetaamo seemie anaguhu napototo bhe guruno, bhe seemie bhatua napototo bhe kafeompuꞌano. Ane kolambuno dakumonaemo Beelsebul ⸤ maꞌanano Kafeompuꞌando seetani⸥ , bhemo toha mie weo lambuno; ingka dawambakianda sabhaha modaiꞌano. 26Dadiꞌanomo koe moteꞌiomua; kapaꞌamo kosasawiꞌae tifebuniꞌano damotiumbae; sabhaha rahasia damekantaleaꞌie. 27O ae nepugauꞌaoku weo kahohondo, pugauaneomu ne mentaleaꞌano. O ae nekamuntui ne tingalamiu, foniomu te melangkeꞌano maka foleleomu ne mie bhahi. 28Koise moteꞌiomu ne mie mepongkono mbadha tamaka miina dakokuasa daepongko alusu. Ampamo kaowu moteꞌiomu ne Anoa kokuasano fofobinasano naetaa alusu naetaa mbadha weo narakaa.
29Ingka dopandeꞌaanemo o rone doasoe haa ulu sedhoi. Tamaka bhe naseꞌulu miina bhe mondawuꞌano we wite ane pae namoindalo Amamu te surugaa. 30Hintimiu itu bhemo wuluno fotumiu dopadae doꞌeapie. 31Dadiꞌanomo koise moteꞌiomua, noliuꞌe hintimiu itu bhe kawaindo rone.
32Laꞌae mangakuno ne wisendo manusia putae anoa noangkafi Idi, aꞌumakuiꞌe dua te wiseno Amaku te surugaa. 33Tamaka laꞌae gumagano ne wiseno manusia putae anoa miina namangkafi Idi, agumagaiꞌe dua ne wiseno Amaku te surugaa.
Yesus neowa powengke-wengkeꞌa
10:34—11:1
34Koise kofekihiomu hatoku ini aeowa pometaa te dhunia. Ahato miina aeowa pometaa, tamaka o kampue ⸤ maꞌanano powengke-wengkeꞌa⸥ . 35Kapaꞌamo maiku ini aepogaatiꞌao amano bhe anano, anaꞌi hobhine bhe inano, seemie hobhine bhe ponia hobhineno. 36Tangkanomo kaewando mie sanea mie weo lambu.
37Laꞌae so moasiꞌaono inano bhe amano nalumiuꞌe kaasino ne Idi, pae namantasia namangkafi kanau. Laꞌae moasiꞌaono anano moꞌane tawa hobhine nalumiuꞌe kaasino ne Idi pae namantasia namangkafi kanau. 38Laꞌae so pata tumongkuno sau salipuno #10:38 Maꞌanano: doꞌunda mahingga damate. maka namangkafi kanau, pae namantasia so Idi. 39Laꞌae so potaamiꞌano inawano, namiinae inawano. Tamaka laꞌae miinaeno inawa mbaꞌinomo noangkafi Idi, tetewei namehapi dadi mpuuno.
40Laꞌae tumahimakoomu, notahimamo dua Idi; maka laꞌae tumahimano Idi, notahimamo Anoa tumudu kanau. 41Laꞌae metahimano seemie anabii weo lambuno mbaꞌinomo mie aitu o anabii, naeꞌawa ponambono anabii; laꞌae metahimano mie banara mbaꞌinomo mie aitu nobanara, naetahima ponambono mie banara. 42Laꞌae fowaꞌaono oe kafohoꞌu mahingga nasekampohoꞌuꞌa kaowu so mie mepandano kaengkohaꞌa ini mbaꞌinomo mie aitu anaguhuku, kotu-kotuꞌu pae namiinaea ponambonoa.”
Currently Selected:
Matius 10: mnbSD
Highlight
Share
Copy
Want to have your highlights saved across all your devices? Sign up or sign in
© 2022, Wycliffe Bible Translators, Inc. All rights reserved.