Hebru 1
1
Buŋ kaaw iŋ biy ka Roŋji
1Awalle, iŋ biŋka ku nabiinnar, Buŋ deesco kaawe ɗo aginiyte iŋ botilay dakina. 2Diŋ gay, ɗo wiktin ta ba aaro, ŋa kaawte lote iŋ biy ka Roŋji. Iŋ ŋaar ko, Buŋ kilgiyiit duniine iŋ gamin okin̰co kuuk goy kuwa ho keɗer, ho ŋa rasiijig okin̰co-aŋ ɗo pisin̰ji. 3Iŋ Roŋ ŋaar-ak ko, gee taliy portikaw ta *darjin ta Buŋdi, ho iŋ ŋaar ko, gee yaa ibinin̰ Buŋ, ŋaar maman, asaan Roŋ-ak ara ko ŋaar di tak. Gamin okin̰co kuuk kuwa ho keɗer-ak goy iŋ gudurre ta kaawoy. Min ŋa piltu botol a gee yaa gine *cawar ɗo uŋji ka Buŋdi, ŋa daktu goy ka samaaner ɗo meeday ta ŋaar kaak gin gudurre pakgig gamin okin̰co. 4Ampaa ko, Buŋ gaartu kadar Roŋ-ak pakgig *ɗubal ku Buŋdi serek. Ɗo bi ŋaar-ak ko, ŋa diyiiji oki siŋ kuuk pakgig kun̰co.
Roŋ ka Buŋdi pakgig ɗubal ku Buŋdi
5Ka seener, ƴiriy rakki, Buŋ bal kaawe ɗo rakki min ɗubilji aman :
« Kiŋke-aŋ ko Roŋdu,
min ƴiriyta-aŋ, ŋuu ibine kadar nun ko takko. »#1.5 Wer ka gase kaawor ɗo Soom 2.7.
Ho ŋa bal kaawe tak-tak ɗo bi ka rakki minninco aman :
« Nun, naa gine Tacco kan̰ji
ho ŋaar gay yaa gine Roŋdu kanto. »#1.5 Wer ka gase kaawor ɗo 2 Samiyeel 7.14.
6Kar gay, Roŋ ka Buŋdi, ŋaar di kaaco ka gamin okin̰co.#1.6 ‛ŋaar di kaaco ka gamin okin̰co’ : Iŋ kaaw ta Grek, ŋu kaawa a ‛Roŋji kaak ŋa weetu awalle’. Kar kaaw-an gay kaawɗo kadar Buŋ gin koogin ku pey kuuk ŋa weeyig ba aaro. Ta kaawa a Iisa, ŋaar ar roŋ kaak ŋu weetu awalle, asaan ŋaar di kaaco ka gamin okin̰co. Wiktin taat Buŋ rakiy n̰aamin̰ Roŋji ɗo duniiner, ŋa kaawtu aman :
« Ɗubal ku Buŋdi okin̰co yaa abdiyin̰ji. »#1.6 Wer ka gase kaawor ɗo Deteronoom 32.43.
7Ɗo bi ka ɗubilji-ak, Buŋ kaawtu aman :
« Ɗubal kunto, ŋuur ar usu
ho gay riyor kunto, ŋuur ar lesas ku aki. »#1.7 Wer ka gase kaawor ɗo Soom 104.4.
8Kar ɗo Roŋji gay, ŋa kaawji aman :
« Kiŋ kaak Buŋ, ki goy doo ka sees ka sultan.
Ki hokumiyaag gee iŋ botol.
9Ki el gamin kuuk iŋ botilco
ho kuuk jookum gay, ki ƴilaagu.
Ampaa ko, kiŋ kaak Buŋ,
Takko Buŋ doɓin̰ciŋ a ki pakgig een̰ji
ho iŋ sewe kaak ŋa etiliijiŋ ɗo kaan̰-ak,#1.9 ‛sewe kaak ŋa etiliijiŋ ɗo kaan̰’ : Ɗo aadin ta Yuudinnar, ya ŋu etila sewe ɗo kaa ka gemor-ak gaara kadar ŋu darjiyaag sultan.
adin̰ gintu portiko. »#1.9 Wer ka gase kaawor ɗo Soom 45.7-8.
10Buŋ kaawtu pey aman :
« *Rabbine, ɗo teesindi, ŋa kiŋken di kilgiyig kiɗa
ho samaan sa, ŋa kiŋken di siyig iŋ pisin̰jiŋ.
11Gamin okin̰co kuuk ki kilgiytu-aŋ yaa bire,
kar kiŋ gay goy doo.
Gamin kuuk ki kilgiytu-ak yaa zooɗe ar kesuun zooɗiyo.
12Ar batik taat ŋu maliyiita, kii maliyin̰ gamin-aku.
Ŋu asiy makin̰co ar kaak gee makiy kesuune.
Kar kiŋ gay makaaɗo, ki goy uudinen̰ di
ho menuwin̰ gaasaaɗo tak-tak. »#1.12 Wer ka gase kaawor ɗo Soom 102.26-28.
13Ƴiriy rakki, Buŋ bal kaawe ɗo rakki min ɗubilji aman :
« As goy ɗo meedar
nam wiktin taat naaco gedire ɗo adinen̰,
ŋuu gine wer ka lee asin̰jiŋ. »#1.13 Wer ka gase kaawor ɗo Soom 110.1.
14Ka seener, *ɗubal ku Buŋdi okin̰co, ŋuur ruwwinnay kuuk gina riy ɗo Buŋdi. Buŋ n̰aamiig a ŋuu gaayin̰ gee kuuk yaa gase jile.
Currently Selected:
Hebru 1: daa
Highlight
Share
Copy
Want to have your highlights saved across all your devices? Sign up or sign in
© 2012, Wycliffe Bible Translators, Inc. All rights reserved.