Matta 4
4
Iysanıń sınalıwı
(Mrk 1:12-13; Luk 4:1-13)
1Sonnan soń, shaytan sınasın dep, Muxaddes Ruwx Iysanı shólge alıp bardı. 2Iysa sol jerde qırıq kún, qırıq tún oraza tutıp, aqırı ash boldı. 3Sonda azǵırıwshı shaytan Onıń qasına kelip:
– Eger Sen Qudaydıń Ulı bolsań, mına taslarǵa buyır, olar nanǵa aylansın! – dedi.
4Iysa juwap qaytarıp:
«Adam tek ǵana nan menen emes, al Qudaydıń awzınan shıqqan hár bir sóz benen jasaydı»#4:4 Nzm 8:3., –
dep aytılǵan, – dedi.
5Sonnan soń, shaytan Onı muxaddes qala Erusalimge alıp barıp, Ibadatxananıń tóbesine turǵızıp qoydı da, 6Oǵan:
– Eger Sen Qudaydıń Ulı bolsań, tómen sekir. Sebebi bılay dep jazılǵan:
«Ol perishtelerine buyrıq beredi.
Ayaǵıńdı tasqa urıp almawıń ushın,
Olar Seni qollarında alıp júredi»#4:6 Zab 90:11-12., – dedi.
7Iysa oǵan:
– «Qudayıń Jaratqan Iyeni sınama!»#4:7 Nzm 6:16. – dep te jazılǵan, – dedi.
8Jáne shaytan Onı júdá biyik bir tawǵa aparıp, Oǵan dúnyanıń barlıq patshalıqları menen olardıń sán-saltanatın kórsetip:
9– Eger ayaǵıma jıǵılıp, maǵan tabınsań, usılardıń hámmesin Saǵan beremen, – dedi.
10Sonda Iysa oǵan:
– Joq bol kózimnen, shaytan!
«Qudayıń Jaratqan Iyege sıyınıp, tek Oǵan xızmet et!»#4:10 Nzm 6:13. –
dep Muxaddes Jazıwda aytılǵan, – dedi.
11Sonnan keyin, shaytan Onıń qasınan ketti. Sonda perishteler kelip, Iysaǵa xızmet etti.
Iysanıń Óz xızmetin baslawı
(Mrk 1:14-15; Luk 4:14-15)
12Iysa Yaqıyanıń tutqınǵa alınǵanın esitip, Galila úlkesine qaytıp ketti. 13Ol Nasıra qalasın qaldırıp, Zebulon hám Naftaliy dógeregindegi kóldiń jaǵasında jaylasqan Kaparnahum qalasına kelip ornalastı. 14Solay etip, Iyshaya payǵambar arqalı aytılǵan mına sózler orınlandı:
15«Háy, Zebulon jeri menen Naftaliy jeri,
Teńizge baratuǵın joldaǵı,
Iordannıń arǵı jaǵasındaǵı,
Basqa milletler jasaytuǵın Galila eli!
16Qarańǵılıqta jasaǵan xalıq
Úlken bir jarıqtı kórdi.
Ólim qarańǵısında jasaǵanlar ushın,
Jaqtılıq nurı tústi»#4:15-16 Iysh 9:1-2..
17Sol waqıttan baslap, Iysa:
– Táwbe etińler! Sebebi Aspan Patshalıǵı jaqınladı! – dep járiyalay basladı.
Iysanıń dáslepki shákirtleri
(Mrk 1:16-20; Luk 5:1-11)
18Iysa Galila kóliniń jaǵasında júrgende, kólge aw salıp atırǵan eki aǵalı-inilini: Petr dep atalǵan Shimondı hám onıń inisi Andreydi kórdi. Olar balıqshılar edi. 19Iysa olarǵa:
– Meniń izime erińler! Men sizlerdi adamlardı awlaytuǵın awshılar#4:19 Adamlardı awlaytuǵın awshılar – Qudaydıń jolına túsiriwshiler. qılaman, – dedi.
20Olar dárriw awların taslap, Onıń izine erdi.
21Sol jerden ketip baratırıp, Ol basqa eki aǵalı-inilini: Zebedeydiń ulı Yaqıptı hám onıń inisi Yuxandı kórdi. Olar ákesi Zebedey menen birge qayıqta awların jamap otırǵan edi. Iysa olardı da shaqırdı. 22Olar dárriw qayıqtı da, ákesin de qaldırıp, Onıń izine erdi.
Iysanıń awırıwlarǵa shıpa beriwi
(Luk 6:17-19)
23Iysa pútkil Galila úlkesin aralap júrdi. Olardıń májilisxanalarında tálim berdi hám Aspan Patshalıǵı tuwralı Xosh Xabardı járiyalap, xalıqtaǵı hár qanday awırıw hám hálsizlikti shıpalaytuǵın edi. 24Iysa tuwralı xabar pútkil Siriyaǵa jayıldı. Barlıq awırıw adamlardı, túrli sırqaw hám dártke ushıraǵanlardı, jin urǵanlardı, qoyanshıq hám láń bolǵanlardı Oǵan alıp keldi. Iysa olarǵa shıpa berdi. 25Onıń izine Galiladan, Dekapolisten, Erusalimnen, Yahudiyadan hám Iordannıń arǵı jaǵınan kelgen kóp xalıq erip júrdi.
Currently Selected:
Matta 4: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022