Malaxiya 3
3
1«Mine, Men Óz xabarshımdı jiberemen. Ol Meniń aldımda jol tayarlaydı. Sizler kóriwdi ańsap júrgen kelisimniń xabarshısı kiyatır. Sizler izlep atırǵan Iye tosattan Óz Ibadatxanasına keledi», – deydi Álemniń Jaratqan Iyesi.
2Biraq Ol kelgende, kim shıday aladı? Ol payda bolǵanda, kim tura aladı? Sebebi Ol taplap tazalaytuǵın ot sıyaqlı, kir juwıwshınıń sabını sıyaqlı boladı. 3Ol gúmisti eritip tazalap alatuǵın adam sıyaqlı húkim taxtına otırıp, lebiylilerdi pákleydi. Awa, altın hám gúmisti tazalaǵanday etip, tazalaydı. Sonda olar Jaratqan Iyege tuwrı jol menen qurbanlıqlar usınatuǵın boladı. 4Keyin ótken kúnlerdegidey, burınǵı jıllardaǵı sıyaqlı, Yahuda hám Erusalimde usınılǵan sadaqalar Jaratqan Iyege maqul boladı.
5«Sonda sizlerdi húkim qılıw ushın baraman. Mennen qorqpaǵanlarǵa: juldız izertlewshilerge, buzıqlıq qılǵanlarǵa, jalǵan ant ishkenlerge, jumısshınıń is haqısın bermegenlerge, jetim-jesirlerdi eziwshilerge hám kelgindilerdiń huqıqın sheklegenlerge qarsı shıǵıp, olardı tezlik penen áshkaralayman», – deydi Álemniń Jaratqan Iyesi.
Onnan birlerdi urlaw
6«Men Jaratqan Iyemen, Men hesh waqıtta ózgermeymen. Sonıń ushın, sizler joq bolıp ketpedińler, háy, Yaqıp urpaqları! 7Sizler ata-babalarıńızdıń dáwirinen baslap, Meniń qaǵıydalarımnan júz burıp, oǵan ámel qılmay kiyatırsız. Endi táwbe qılıp, Meniń aldıma kelińler. Sonda Men de sizlerge qaytıp baraman», – deydi Álemniń Jaratqan Iyesi.
«Biraq sizler: „Ne sebepten táwbe qılıwımız kerek?“ – dep soraysızlar.
8Adamzat Qudaydan bir nárse urlawı múmkin be? Al sizler bolsa, Mennen urlap atırsızlar. „Sennen ne urlappız?“ – dep soraysız.
Sizler onnan biri menen sadaqalardı urlap atırsızlar! 9Sizler ǵarǵısqa ushıradıńlar. Sebebi sizler – pútkil xalıq Mennen urlap atırsız. 10Úyimde azıq-awqat bolıwı ushın, barlıq onnan birlerińizdi zatlar saqlanatuǵın bólmege alıp kelińler. Meni usılayınsha sınap kórińler», – deydi Álemniń Jaratqan Iyesi. «Sonda aspan qaqpaqların ashaman, sizlerdiń ústińizge bereket jawdırıp, tolıp tastıraman. 11Eginlerińizdi shegirtkelerdiń jep ketiwine jol qoymayman hám júzim baǵlarıńız jemissiz qalmaydı», – deydi Álemniń Jaratqan Iyesi. 12«Sonda barlıq xalıqlar sizlerdi: „Qanday baxıtlı xalıq“ – dep ataydı. Sebebi sizlerdiń elińiz ájayıp bir jer boladı», – deydi Álemniń Jaratqan Iyesi.
13«Sizler Maǵan qarsı jaman sózler sóyledińiz», – deydi Jaratqan Iye. «Sonda da sizler: „Bizler Saǵan qarsı ne aytıp edik?“ – dep soraysız. 14Sizler bılay dep aytqan edińiz: „Qudayǵa xızmet etiwdiń paydası joq. Álemniń Jaratqan Iyesiniń talapların orınlawdıń, Onıń aldında aza tutqan adamday bolıp júriwdiń bizlerge ne keregi bar? 15Al endi bizler menmenlerdi baxıtlı dep esaplaymız. Jawızlıq qılıwshılar tabısqa erisip atır. Mine, Qudaydı sınaǵanlar jazadan aman qalıp atır“».
16Biraq Jaratqan Iyeden qorqatuǵınlar óz ara sáwbetlesti. Jaratqan Iye olardıń sáwbetine qulaq salıp, tıńladı. Jaratqan Iyeden qorqıp, Onıń atın sıylaǵanlar ushın, Onıń aldında bir estelik kitabı jazıldı.
17«Men belgilegen sol kúnde, olar Meniń ǵáziynem boladı», – deydi Álemniń Jaratqan Iyesi. «Áke ózine boysınǵan ulına qanday miyrim kórsetse, Men de olarǵa sonday miyrim kórsetemen. 18Sol waqıtta sizler haq adam menen jawız adamnıń, Qudayǵa xızmet etken adam menen xızmet etpegen adamnıń arasındaǵı ayırmashılıqtı jáne kóresiz».
Currently Selected:
Malaxiya 3: QrqMK22
Highlight
Share
Copy
Want to have your highlights saved across all your devices? Sign up or sign in
© Институт перевода Библии, 2022