Mak 15
15
Jesus Pailat Mala Bun Ifaren
(Matyu 27:1, 2, 11-26; Luk 23:1-5, 13-25; Jon 18:28–19:16)
1Bonimei bagai, pris odudug, mudur adodo, lo ifelnẽdiya tamo, Juda neid kaunsel ganan geid, od difon. Idi Jesus difõ dale dirou, Pailat ima bun dinon.
2Pailat Jesus to fiyen, “Õ Juda neid king de?”
Jesus solof iron, “Are de yer, õ urok anĩ.”
3Pris odudug ĩ bouwa bun od musei dun. 4Anĩ nigin, Pailat baban Jesus to fiyen, “Õ to solo wo urõf de? Ereb ereb musei nigin bouwã bun od dinof anĩ ulef.”
5Anĩ ere, Jesus fau od taka to solo fen. Age fe di, Pailat terẽ ye fen, kisi musei yalen.
6Gawaman nẽ tobonunã are, Pasa Sifa inoya bun tamo kayau dirõ di, kalabus bun tamo taka dalisnẽdig. 7Tamo taka yana Barabas ĩ, tamo kusĩ dales fen, tamo didenkesin, kalabus bun dinenan anidi neid taka. 8Tamo kayau mala odug dise, Pailat gai age fedig anĩ, age fenẽdiyouf nigin to difiyen.
9Pailat to fedin, “Ã aya Juda neid king anĩ aliskeneĩf de?” 10Pailat keleĩ, pris odudug idi kiyeĩ dino fen, Jesus ĩ ima bun dinon. 11Anĩ ere, pris odudug tamo kayau waud dale fen, dirokenẽdi di, idi Jesus ban Barabas anĩ Pailatem yaliskenẽdiyouf nigin diron.
12Pailat idi to fiyẽdin, “Juda neid king gedig anĩ, aya ĩ nigin naig afiyẽf?”
13Idi diweig diron, “Aa tetek bun ũf!”
14Pailat idi to fiyẽdin, “Ere nigin? Ere mosor ĩ age fen?”
Anĩ ere, idi totol bagai diweig diron, “Aa tetek bun ũf!”
15Tamo kayau waud el fouf nigin, Pailat Barabas yaliskenẽdin. Pailat irõ di, Jesus wagĩ difiye ken, aa tetek bun dũf nigin, kusĩ tamo imeid bun inon.
Kusĩ Tamo Jesus Ketẽ Difiyen
(Matyu 27:27-31; Jon 19:2, 3)
16Kusĩ tamo idi, Jesus dale dirou gawaman mudur nẽ fõ aaben dile fen, kusĩ tamo ganan diweignẽdi di, guru difen. 17Idi gabar kadaũ difounkenen, age de fen, idi malũ duri ado dale, teter tanak kori de fen, ĩ mudur bun kurũ difen. 18Age de fen, idi ĩ diweig dirokenen, “O, Juda neid king gai gai ibodõf!” 19Baba baban idi werĩ tibog nem mudur bun du ken, disisnen. Idi iboreid bobou de, kususu de fen, ketẽ difiyen. 20Idi ketẽ difiye kel fen, gabar kadaũ dinukeis, yogon gabar bagai anĩ difounkenen. Age de fen, idi ĩ aa tetek bun dũf nigin dirou diselen.
Jesus Aa Tetek Bun Dun
(Matyu 27:32-44; Luk 23:26-43; Jon 19:17-27)
21Tamo taka Sairini tamal, yana Simon, Aleksanda Rufus ado neid temeid, ĩ yogon fonom isi, luwen wal fediyoũ mog, idi Jesus nẽ aa tetek faali fouf nigin nugo difiyen. 22Idi Jesus modoũ yana Golgota (anĩ nẽ gariya, Mudur Tuwa nẽ Modoũ) an dirou diselen. 23Age de fen, idi Jesus darau naal to karĩ youf nigin wain marasin#15:23 Marasin nẽ yana, ‘mer (myrrh).’ taka ado falei de difenen, anĩ ere, ĩ to yon. 24Idi ĩ aa tetek bun du ken, in gabar foi de fen, aibem ereb anĩ yalouf nigin aisaĩ kodẽ den.
25Bonimei nain kilok bun, idi ĩ aa tetek bun dun. 26Jesus bouwa yũya od eig de ditoton: JUDA NEID KING. 27Idi bẽ tamo urug, ĩ geid aa tetek bun didenen, taka Jesus ima biyalẽ, taka ima kilẽ.#15:27 Itotoya tunĩ eig de ditoton: kilẽ. 28 Age de fen, Negur nẽ Itotoya enei kisi felen, “Ĩ lo difodulẽdig anidi geid bagu difedin.” (Asaia 53:12) 29Tamo kayau dile disi dife, kono difiye ken, kasã difiyẽ, mudureid dira ken, diron, “Õ, tempel narĩ afel fen, baban naa towo bun anouf, won, 30õ ogo nigin usenne ken, aa tetek bun tamal kutũ weis!”
31Age difiyen gen, pris odudug, lo ifelnẽdiya tamo geid, idi dogo dogol wogõ de fen, ĩ ketẽ difiyen. Idi diron, “Ĩ tunĩ isennẽdidig, anĩ ere, ĩ yogo isennẽya kisi feleya sã! 32Kristus enĩ, Israel neid King, utornẽg len, gama aa tetek bun tamal kutũ yeis len, tail fen, momoi tauf.” Idi ĩ geid aa tetek bun didenẽdineg, ĩ kono difiyen.
Jesus Laa Fen
(Matyu 27:45-56; Luk 23:44-49; Jon 19:28-30)
33Gaa atun tuwelf kilok bun, gugum isi, teneub ganan kerũ fel ile, tri kilok aragaun. 34Aragau tri kilok bun, Jesus wade bagai iweig iron, “Eloi, Eloi, lama sabaktani?” –ani nẽ gariya, “Neu Negur, neu Negur, ere nigin õ aya utornal?”#Sam 22:1
35Tunĩ melsã difaren, anĩ karĩ de fen, idi diron, “Karĩg, ĩ Eliya iweignek.”
36Tamo taka gudu re ile, spons#15:36 Maaĩwõ tamal safina taka, ku nanaal musei ado naan dũ fedig. yalen, wain makik ado bun nu feis fen, tibog bun ino fen, Jesus yãf nigin ifenen. Agef fen, ĩ iron, “Gama utornẽg. Eliya isi yaleisnẽ mog, tailauf.”
37Jesus ait odug nem iweig fen, laa fen.
38Tempel nẽ gabar faraf uru fen, ilunenem irousil teneburen. 39Kusĩ tamo neid orowa, Jesus wagen an ifaren anĩ, in kaĩya anĩ karĩ ye, in laa anĩ ile fen, iron, “Momoi bagai, tamo enĩ Negur Naal!”
40Kayau tunĩ so del difar fen, lo difen. Idi atun, Maria Magdala, taka Maria, Jems naal bagai Joses ado neid sineid, taka Salome. 41Galili an kayau enidi Jesus dõ difiye ken, aruna dalen. Kayau musei, Jesus geid Jerusalem diselen anidig an difaren.
Jesus Mũ Difen
(Matyu 27:57-61; Luk 23:50-56; Jon 19:38-42)
42Naa are dodok fiya nẽ naa (naa anĩ bure fele di, Sabat naa wõ youf). Aragau mog, 43Josef, Arimatea tamal, ĩ kaunsel neid odug taka, ĩ yogo anĩ Negur nẽ tano tari fen, ĩ kumĩ sã Pailat garan ile, Jesus bouwa buru yalouf nigin to fiyen. 44Pailat Jesus mogo laa fel ya anĩ karĩ ye fen, terẽ yen. Ĩ kusĩ tamo neid orowa iweigne ken, Jesus mogo be laa fel anĩ, ĩ to fiyen. 45Sain ĩ kusĩ tamo neid orowa bun laa fel ya karĩ ye fen, ĩ Jesus bouwa buru yaleya nigin Josef yo fiyen. 46Age fe di, Josef gabar lalau na yale fen, bouwa buru yaleis, gabar lalau anim sile fen. Agef fen, ĩ matmat sa bun ku dalen anĩ kur inenen. Gama ĩ meein wele fe di, matmat bobog katĩ felen. 47Maria Magdala, Maria Joses nẽ sina ado, ĩ dinenen modoũ anĩ dilen.
Currently Selected:
Mak 15: dad
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.