MATEU 4
4
1Hohene amutwalile ku puya ku tachi ja Spiritu, hanga akamweseke kuli Ndiapu. 2Walitwaminyine kulia makumi awana a matangwa ni makumi awana a ufuku, ni kulutwe lia chize wevwile zala. 3Mukwa kweseka wejile nikwamba ngwenyi, Kachi yena uli mwe Mwana Zambi, amba mawe ano alumuke mbolo. 4Alioze iye wakumbulwile ngwenyi, Chinasonewa ngwo,
Hi ku mbolo wika ko, mutu mapwa ni mwono,
alioze ku maliji eswe akutuhuka mu kanwa lia Zambi.
5Hohene Ndiapu yamutwala ku limbo lisandu; wamusele ha kasonga ka tembele, 6yamba kuli iye ngwenyi, Kachi yena uli mwe Mwana Zambi, limbile hashi; mumu chinasonewa ngwo,
Kumakahana shimbi kuli angelo jenyi ha kutwala kuli yena:
ha moko jo kumakakumbata,
kuchina muhukana chiliato che ku liwe.
7Yesu wambile kuli iye ngwenyi, Cheka nawa chinasonewa ngwo, Kanda ukeseka Mwene Zambi ye. 8Cheka nawa, Ndiapu yamutwala ku mulundu usuku chikolo, yamulweza mawanangana eswe a hano hashi ni uhenya wo: 9wambile kuli iye ngwenyi, Yino yuma yeswe mungukwaha, kachi mafulamana unguwayile. 10Hohene Yesu yamba kuli iye ngwenyi, Sosolokako Satana: mumu chinasonewa ngwo,
Ukawayile Mwene Zambi ye,
iye wika ukamulingile.
11Hohene Ndiapu yamuhichika, ni kumanyi, angelo ejile amuvumbike.
12Achi, muze Yesu evwile ngwo, Hasa Yoano mu zuwo lia ususu, wakatukile aye ku Ngalileya. 13Yahichika Nazare, yaya mukutwama mu Kafwanaume, limbo lize Uli ku sesa lia Chitende, mu manjiza ja Zapulone ni Napatali; 14hanga chikamanunuke chize ahanjikile ku kanwa lia profeta Izaia, ngwenyi,
15Chifuchi cha Zapulone ni chifuchi cha Napatali,
Jila ya Chitende kuze kanda lia Yordau,
Ngalileya ya akwa mavungu,
16Atu aze atwamine mu milima
hanamono pangu linene,
Waze atwamine mu chifuchi cha kufwa ni Chizulie chacho,
Kuli ayo pangu hilinasoloka.
17Chize ku mwaka uze Yesu waputukile kwambujola, ngwenyi, Likonyekenu; mumu wanangana wa malilu hiunakundama.
18Ha kusesesa Chitende cha Ngalileya, wamwene asongo-ni-mutu, Semone yoze anamuvuluka ngwo, Petulu, ni mwanakwo Andeleu, kanatela wanda mu Chitende; mumu apwile akwa kutela yishi. 19Yamba kuli ayo ngwenyi, Tweyenu kunyima yami, mungunupwisa akwa kutela atu. 20No haze hene ahichikile manda jo, amukawile. 21Ha kusenya kuze kulutwe, wamwene asongo-ni-mutu akwo, Tiangu, mwana Zembendeu, ni mwanakwo Yoano, mu ulungu hamwe ni tato Zembendeu, kananukunyona manda jo, waatambikile. 22Haze hene ahichikile ulungu ni tato, amukawile.
23Yesu wayile nikujingajinga mu Ngalileya mweswe, nikulongesa mu masunangonga jo, nikwambujola sango lipema lia wanangana, nikuwuka misongo yeswe, ni weji weswe hakachi ka atu. 24Lufuma wenyi wafumanyine mu Seria mweswe; anehene kuli iye waze eswe ayijile, a kukwachika ni misongo yeka ni yeka ni yipupilo, ni akwa ndemoniu, ni akwa musongo wa ngulu, ni akwa kalepa, waawukile. 25Ni mbunga jinji amukawile ja ku Ngalileya, ni ja ku Ndekapole, ni ja ku Yerusaleme, ni ja ku Yundeya, ni ja kuze kanda lia Yordau.
Currently Selected:
MATEU 4: Csa
Highlight
Share
Copy
Want to have your highlights saved across all your devices? Sign up or sign in
Chokwe Bible © Bible Society in Angola, 1975.