Matta 3
3
Wa'azi Yohana A̱yya Baptisma
(Markut 1:1-8; Luka 3:1-18; Yohana 1:19-28)
1Ka̱ram iya a̱mi Yohana A̱yya Baptisma nu na̱ yin ba a̱ yya wa'azi nu an kei Yahudiya na. 2A̱ hywa, “Yi brak i wwon a̱ka̱tukyya nyin nu, rot Dityok Tazwa ti ba shishrek.” 3Yohana a̱mi a̱ntyok tyyei ba̱ryat Ka̱za nu ba yin yei Ishaya nu ni na̱ yin dyat i kpa nu na a̱ hywa,
“A̱yanyet a̱n shyi a̱ yei a̱za̱ kei a̱ yya,
‘Yi jyi na̱ta̱ryen a̱gwam Ka̱za na wwon ba̱tuntwang
na̱ ga n cong.’ ”
4Ba yin nok ba̱tro Yohana ba da̱ a̱cat a̱rakumi, na̱ zzop kpa ndyang nu ka, kyangya nu na i yet bu ba̱nkpyai bu ditong ka̱yit. 5Ba̱nyet a̱ cong da̱ nu nyyai Urushalima bu sa̱rei ka̱byen Yahudiya, ba̱yanyet nyyai na̱mankrang ma̱nyyi ncen Urdun. 6Ba bu tyyei a̱ka̱tukyya mba nu, na̱ ba̱ yya baptisma nu a ncen Urdun na.
7Yohana na̱ bu ryi ba̱nyet Farisa bu ba̱nyet Sadusi ba̱gingang ba cong ba ba̱ yya baptisma, na̱ hywa da̱ mba, “Nyin shon jini, a̱nyan a̱ ya tyyei yi hok ka̱wun ka̱bvung ka Ka̱za ka ya bai i ni? 8Se yi yya nkyang a tyyei ka̱sak ka yin wwon a̱ka̱tukyya nyin nu ni. 9Yi ryok ya raai di yi ni shot ka̱bvung kani ho yi yet na̱mbvon Ibrahim ba. N ya tyyei: ki Ka̱za a̱ shim, ka brak kpang jini a̱n yya na̱mbvon Ibrahim. 10Ka̱tssong ka a̱ yemi a a̱nan na̱kon na. Ka̱kon ka a̱ rak sak a̱tsatsak disum ni ba ni ka̱ tyyak a̱ kprup a̱ tyyi an dong. 11N ya yya baptisma nu di ba̱shekwot n ga n tyyei ka̱sak ka yin brak i wwon a̱ka̱tukyya nyin nu ni, ma a̱tuba nu a̱ bai riryim nzuk ka ni a̱ ni ya yya baptisma nu di Tswa Ka̱za bu rong. Nu a̱tuba a̱ywu a̱ n dan ba̱zinzan; n maai ma n sook a̱kpatak nu na ba. 12A̱ shyi bu bibyyi tyyet yak nu na nbvak. A̱ ni kpo tyyet a̱ wwon ba̱zizrak, a̱ tung sa̱rei a̱ tyyi a a̱ngban nu; ma sunsso na ba na̱ tung a̱n tyyi rong a byyi rryik ni ba.”
Ba yya Yesu baptisma
(Markut 1:9-11; Luka 3:21-22)
13Ka̱ram iya Yesu a̱ drok nyyai Galili a̱ nat a ncen Urdun, a̱ si nat di Yohana na̱ ku yya baptisma. 14Yohana a̱ si cat Yesu a̱ shei rya nu na, a̱ hywa da̱ nu, “Nzuk a̱mi n wa myim n ba da̱ nwan a bu n yya baptisma nu, nwan si wu ba da̱ nzuk o?”
15Yesu a̱ hywa, “Ee, zi yen breng a̱mi i gi maai yya sa̱rei nkyang a Ka̱za ka za tyyi yya na ni.”
Yohana a̱ si shim. 16Ba bu tyak bu yya Yesu baptisma nu, na̱ wruk i ba̱shekwot ba, ba ku yrang Tazwa ji, na̱ ryi Tswa Ka̱za ji zi kyrep da̱ a̱bva ni bu swrang a̱za̱ nu. 17Diwan i si bu hyok nyyai Tazwa i hywa, “Ka̱won nzuk ka n nin sak rya ni. N pfong ansham nka ba̱t.”
Currently Selected:
Matta 3: kaj
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.