Luka 2
2
1Ikaoka misi ila, kiteto kikafuma ha Kaisari Augusto, ti masanga mose matamwe. 2Na lutamo ulu lwa kuwoka luokie Kirenio ekinatorie Shami. 3Wakagura zia kutonga wose kuretamwa, mundu ose na kaa yakwe. 4Yusuf naye akafuma Nazareti, kiongo cha Galilaya, akakwea isanga la Uyahudi, kutonga kiongo cha Daudi, kiitangwa Betlehemu, amu eokie mundu wa nyumba na mbare ya Daudi, 5akutame hamwe na Maryamu eokie ekimwowoa, ekioka eemec. 6Ikaoka wekiikaa kula, misi yakwe ya kuwona ikafishwa; 7Akawona mwana wakwe mbele, akamchunga na suke ja kingerengere, akamgera ghati ya iboho la kirigha, amu teweokie na handu ghati ya nyumba ya wagheni.
8Na warisha weoho isanga lila, weikee ishighati, wekirinda ifio lawo hena lukamba, magheri ma kio. 9Yoa, malaika wa Mzuri akawafumia, ubaha wa Mzuri ukawawaiya; wakaingiwa ni fole muno. 10Malaika akawawurra, Musiondoke, yoeni, namuetie mburi yedi ya luizihirwo lubaha, lunewafikia wandu wose; 11amu awonwa henyu yoo mkija, niye Masihi Mzuri, ghati ya kiongo cha Daudi. 12Na luwano lwenyu ni ulu; munembona mwana echungiwe na suke ja kingerengere, eyejwe ghati ya iboho la kirigha. 13Turu na turu wakaoka na malaika weingi wa lweriri lwa wanga, wekimwisisa Izuwa, wekiteta,
14Ubaha hena Izuwa wanga,
Luworo masangeni hena wandu wamwizihira.
15Ikaoka, wekinawafumie malaika wekitonga wanga, warisha wakawurrana, Tutonge na uswi mtano Betlehemu, tureyoa kiteto iki cheokie, Mzuri atutindia. 16Wakasara, wakambona Maryamu na Yusufu, na mwana eyejwe ghati ya iboho la kirigha. 17Wekinawone, wakawalia mburi ya kiteto wawurrwa wanga ya mwana uu. 18Wose wasikia wakarighiwa hena vila wawurrwa na warisha. 19Kake Maryamu akavigura viteto ivi vyose, akavigheshijia ngoroni. 20Warisha wakahunduka wekimwisisa na wekimwerewa Izuwa hena vindu vyose wevisikie, weviwona, sandu wewurrirwe.
21Na ikinafike misi minane ya kutawana mwana, izina lakwe akaitangwa Yesu, lila lighambiwe ni malaika esimeemejwa.
22Na misi ya kuzerrijwa kwawo, hena kiteto cha Musa, ikinafike, wakamwete Yerusalemi, wamng’olie Mzuri, 23(sandu itamiwe ghati ya kiteto cha Mzuri, Mwana ose wa kiume mbele aitangwe mshenete ha Mzuri;) 24wareng’ola itasi, sandu itetiwe ghati ya kiteto cha Mzuri, mabeta meri, kana vidongo viri vya vihunguru. 25Yoa, heokie na mundu Yerusalemi, izina lakwe Simeoni, na mundu uu wedi, mkunda Izuwa, ekiinda lughenjo lwa Israeli, Ngoma Mshenete ikaoka wanga yakwe. 26Naye etindiwe ni Ngoma Mshenete, ti tefwaye esimembona ini Masihi wa Mzuri. 27Akaza hekaluni hena Ngoma; na wambona wakwe wekinamwete mwana Yesu, wamketie sa miaghanyiwe na kiteto, 28ye akamwuhia mikononi, akamwisisa Izuwa, akateta,
29Ee Mzuri, ingeriaha umshige muzoro wako
Sandu ughambie, nitonge na kiboha.
30Amu meso mangu meluwonie lukio lwako,
31Uluarehe wushoni ha wandu wose;
32Changaji cha kuangaja mbare,
Na Kirumi cha wandu wako Israeli.
33Wakarighiwa wawee na mee hena ama metetiwe wanga yakwe. 34Simeoni akawatasia, akamburra Maryamu mee, Yoa, uu awikwa, weingi wagwe na waimuke ghati ya Waisraeli, aoke luwano lutetiwa. 35(Nawe mwenye muhandi unekuingia ngoroni) nesa makusaro ma ngoro nyiingi majughuke. 36Heokie na Hana mroti mche, mwana wa Fanueli, wa mbare ya Asher, naye eokie mcheku wa misi miingi, na ekinaoke mbora eokie na mume miaka fungate. 37Naye tena mume, wa sa miaka makumi manane na minne, esiwuke hekaluni, ekimwomba Izuwa hena kuchunga na kuomba kio na hemusi. 38Ekifumiria naye magheri mala akamwinga haika Izuwa, akaghamba mburi yakwe hena wose weokie wekiinda lukombola ghati ya Yerusalemi. 39Na wekinafishe vindu vyose viwawe hena kiteto cha Mzuri, wakahunduka Galilaya, ha kiongo chawo cha Nazareti.
40Mwana ula akaeha, akaongejeka zinya ekiizujwa kucha; mvono wakwe Izuwa ukaoka wanga yakwe.
41Na mwaka ose wambona wakwe wetonga Yerusalemi, musi mbaha wa Pasaka. 42Na ekinafishe miaka ikumi na miri, wakakwea hena miketiwe ya musi mbaha; 43na misi yawo ikinafike, wekihunduka, ula mwana Yesu akaikaa nyuma Yerusalemi; wambona wakwe wesitisiwe; 44kake wekigheshijia ti eoho kimwe na siri yawo, wakatonga mitongie ya musi mwe, wakamwenda ghati ya mbare yawo na waghenji wawo, 45wasimbone; wakahunduka Yerusalemi wekimwenda. 46Ikaoka kutera kwa misi mitatu, wakambona hekaluni ekiikaa ghati ya walosha, ekiwasikija, ekiwawujanya. 47Wakarighiwa muno wose wemsikie hena kucha kwakwe na kutalua kwakwe. 48Na wekinambone wakarighiwa muno: mee akamburra, Mwana wangu, nikini watuketa huwo? yoa, waweo na mi twakuenda na lusaro. 49Akawawurra, Nini kunienda? tomutisiwe ti yaniwe kuoka ghati ya ndima ya Apa wangu? 50Nawo tewetwarije kiteto kila ekiteta nawo. 51Akasea nawo, akaza Nazareti, akakugera si yawo. Mee akavigura viteto ivi vyose ngoroni hakwe.
52Yesu akaneta hena kucha na hena kizomba, na hena mvono ha Izuwa na ha wandu.
Currently Selected:
Luka 2: TAVETA
Highlight
Share
Copy

Want to have your highlights saved across all your devices? Sign up or sign in
Taveta New Testament, published inportions from 1892 to 1906, by the British and Foreign Bible Society. Psalms was published by SPCK in 1905.