YouVersion Logo
Search Icon

Luka 1

1
1Nikinawone wandu weingi wekigera mkono kutama mburi ya vindu viokie hetu, 2sandu tuuhie hena wala weokie wewonie na wahiri wa kiteto too kuwoka; 3mi nami niwonie keba, nikinaratere hena lunyarki viteto vyose too kuwoka, kukutamia we, Teofilo, 4sandu meraterane, nesa uwone kutisiwa kididi cha viteto uviloshijwe.
5Misi yakwe Herode mfumwa wa Uyahudi, heokie na mkara izina lakwe Zakariya, wa siri ya Abia; na mche wakwe eokie wa waana wa kiche wakwe Harun, na izina lakwe Elizabeti. 6Nawo wose weri weokie na ngoro ya kurongeka msongorana wa Izuwa, wekitonga ghati ya kiteto na uwedi wose wa Mzuri, wesiokie na ng’oki. 7Nawo weokie tewena mwana, amu Elizabeti eokie ndasa, nawo wose weri weokie wetonga hae hena misi yawo.
8Haya ikaoka ekihira ndima yakwe ya ukara msongorana wa Izuwa hena lukamba lwa siri yakwe, 9ikamfikia hena ndima ya ukara kufukija ekiingia hekaluni ha Mzuri. 10Na matorano mose ma wandu weokie wekiomba shighati hena magheri ma kufukija. 11Akamfumia malaika wa Mzuri, ekiimuka hena mkono wa kuume wa kisiko cha kufukijia. 12Ekinambone akaing’asiwa Zakariya, fole ikamwingia. 13Kake malaika akamburra, Usiituke, Zakariya, amu kuomba kwako kwasikiwa, na mche wako Elizabeti enekuwonia mwana wa kiume, na izina lakwe unemwitanga Yohana. 14Uneoka na kuizihirwa na kuisejwa, na wandu weingi weneizihirwa hena kuwoneka kwakwe. 15Amu eneoka mbaha msongorana wa Mzuri, tenenywa mawa nete kiengeja; naye eneizujwa na Ngoma Mshenete too ndeni ha mee. 16Na weingi ghati ya waana wa Israeli enewagharusha hena Mzuri Izuwa wawo. 17Naye enemrongoria hena ngoro na zinya ja Eliya, kujigharusha ngoro ja wawee hena waana wawo, na wala wesisikie hena kucha kwa wandu wekundie uwedi, kumwarehia Mzuri waana wearehike. 18Zakariya akamburra malaika, Ninetwarijaze kiteto iki? amu mi ni mughosi, na mche wangu naye atonga hae hena misi yakwe. 19Malaika akatalua ekimburra, Nimi Gabrieli, niimuka msongorana wa Izuwa, nami nitumiwe kuteta nawe na kukutindia mburi ii yedi. 20Yoa, uneoka bubu, usiidime kuteta, mtano musi vineikavifume vindu ivi; amu toitikije we viteto vyangu, vinefishwa hena magheri mawo. 21Na wandu weokie wekimwinda Zakariya, wakarighiwa hena kushesha kwakwe hekaluni. 22Mtano ekinafume teidima kuteta nawo: wakatwarija ti efumiwe ni kiteto hekaluni: naye mwenye akawakonyia mkono ekiikaa bubu. 23Ikaoka misi ya kuhira kwakwe ikinafishwe akatonga nyumbeni hakwe.
24Kutera kwa misi iyo, mche wakwe Elizabeti akaemea, akakuwisa mieji misano, ekiteta, 25Ni huwo Mzuri aniketia ghati ya misi ya kuniyoa, kuning’olia soni yangu ghati ya wandu.
26Na mweji wa katandatu malaika Gabrieli akaingijwa na Izuwa, kutonga kiongo cha Galilaya, izina lakwe Nazareti, 27ha isiri cokie eowowe na mume, izina lakwe Yusufu, wa nyumba ya Daudi; na izina la isiri eitangwa Maryamu. 28Akaingia hakwe akateta, Ngezia hako uingiwe mvono, Mzuri nawe. 29Akaituka muno hena kiteto ikyo, akakusara ni ngezia ani ii. 30Malaika akamburra, Usiituke, Maryamu, amu wawona mvono ha Izuwa. 31Yoa, uneemea, unewona mwana wa kiume uneitanga izina lakwe Yesu. 32Uu eneoka mbaha, enemwitangwa mwana wakwe eoho wanga, na Mzuri Izuwa enemwinga kichumbi cha Daudi wawee; 33eneitoria nyumba yakwe Yakobo tendarasi, nete kifumwa chakwe tekineoka na kuidiwika. 34Maryamu akamburra malaika, Kineokaze kiteto iki, amu simmaije mume? 35Malaika akatalua akamburra, Ngoma Mshenete inekuzia, na zinya jakwe eoho wanga jinekugera mvuri: amu iyo kila kinewonwa kineitangwa Kishenete, Mwana wa Izuwa. 36Na yoa, Elizabeti mbare yako, naye eemee mwana wa kiume ghati ya ucheku wakwe, na mweji uu ni wa katandatu hakwe eitangwe ndasa. 37Amu tehena kiteto kisiidimika ha Izuwa. 38Maryamu akateta, Yoa, mi kamwana ka kibora ka Mzuri, na kioke hangu hena kiteto chako. Malaika akafuma hakwe.
39Misi ila Maryamu akawuka, akatonga ekisara nduwini mtano kiongo cha Yuda, 40akaingia nyumbeni hakwe Zakariya, akamkezia Elizabeti. 41Ikaoka, Elizabeti ekinasikie ngezia ya Maryamu, mwana akatoroka ndeni hakwe, Elizabeti akaizujwa Ngoma Mshenete: 42akateta hena ighonda ibaha, akaghamba, Watasiwe we ghati ya wache, itasiwe ndunda ya ndeni hako. 43Na kiteto iki hangu chafumahi, mee Mzuri wangu anizie mi? 44Amu ighonda la ngezia yako likinaingie masikioni hangu, mwana akatoroka ndeni hangu hena kuizihirwa. 45Keba naye eitikije, amu vinefishwa viteto vila eviwurrirwe ni Mzuri. 46Maryamu akateta,
Ngoro yangu imwisisa Mzuri,
47Na ngoma yangu yaizihirwa hena Izuwa Mukija wangu.
48Amu auyoa udongo wa muzoro wakwe:
Amu yoa, too ingeriaha marika mose meneitanga mtasiwe.
49Amu ye mwenye zinya eniarehie mabaha,
Na izina lakwe nilo lishenete.
50Na lusario lwakwe hawo wemkundie,
Mtano marika mose.
51Eareha zinya na mkono wakwe,
Awabarasakanya wala wena mafuti ghati ya makusaro ma ngoro jawo.
52Awaseja wabaha ghati ya vichumbi vyawo,
Awakweja wafaa.
53Awaighusha na mawedi wesikie zaa,
Awawushija wenye mali wasiwone kindu.
54Amghenja mzoro wakwe Israeli,
Ekikumbuka lusario.
55Sandu ewawurrire waapa wetu,
Ibrahimu na kuwonwa kwakwe tendarasi.
56Maryamu akaikaa hakwe sandu mieji mitatu, akahunduka nyumbeni hakwe.
57Elizabeti akafisha magheri makwe ma kuwona, akawona mwana wa kiume. 58Na walatya na mbare yakwe wakasikia ti Mzuri enetija lusario lwakwe, wakaizihirwa hamwe naye. 59Ikaoka, musi wa kanane, wakaza kumtawana mwana, wakamwitanga izina la wawee, Zakariya. 60Mee akatalua akateta, Si huwo, eneitangwa Yohana. 61Wakamburra, Tehena mundu ghati ya mbare yako eitangwa izina ilo. 62Wakamkonyia wawee, nesa watisiwe ekundie aitangwe izina ani. 63Akakunda iboho la kutamia, akatama, ekiteta, Izina lakwe ni Yohana. Wakarighiwa wose. 64Likajughuwa itmubu lakwe, na lumi lwakwe chwi ila, akateta, ekimwisisa Izuwa. 65Wakaingiwa ni fole wose weikee mbai na mbai jawo; na viteto ivi vyose vikatetwa ghati ya nduwi jose ja Uyahudi; 66na wose wesikie wakavigera ngoroni hawo, wekighamba, Mwana uu eneoka mwana ani? Na mkono wa Mzuri ukaoka hamwe naye.
67Zakariya wawee akaizujwa na Ngoma Mshenete, akatinda, ekiteta,
68Etasiwe Mzuri Izuwa wa Israeli:
Amu awayoa awakombola wandu wakwe.
69Akatuwushijia luhembe lwa lukio:
Hena nyumba ya Daudi mundu wakwe.
70Sandu etetie hena itumbu la mroti wakwe washenete: weokie too kuwoka.
71Lukio hena maring’a metu, na mikononi hawo wose wetushishirwa.
72Kuareha lusario hena waapa wetu,
Na kukumbuka maaghano makwe mashenete.
73Kiraro ekimrarie apa wetu Ibrahimu,
74Ya kuoka enetuinga, tukikia mikononi ha maring’a metu,
Tuwone kumtumikia tusiituke
75Ghati ya ushenete na uwedi msongorana wakwe misi yetu yose.
76Na we, Mwana, uneitangwa mroti wakwe eoho wanga ya vyose:
Amu unerongora msongorana wa wusho wa Mzuri uarehe nzia jakwe;
77Uwatisiwije wandu wakwe lukio,
Ghati ya kuwushijiwa ng’oki jawo.
78Amu ya lusario lwedi lwa Izuwa wetu,
Hawo kuwaiwa kwa wanga kunetufumia;
79Kuwawaiya weikee kijeni na mvurini wa kifwa;
Kurongeshija maghu metu ghati ya nzia ya luworo.
80Mwana akaeha, akaneta kuketa zinya ngoroni, akaikaa mashighati, mtano musi wa kufuma kwakwe hena Waisraeli.

Currently Selected:

Luka 1: TAVETA

Highlight

Share

Copy

None

Want to have your highlights saved across all your devices? Sign up or sign in