2 SAMUEL 22
22
David Nih Luatnak A Hmuh Caah Hla A Phuah
(Slm 18.1-50)
1Cun Bawipa nih David a ral vialte hna kut chung le Saul kut chungin a chuahter ni ah, hi hla hin Bawipa cu a hloi.
2“Bawipa cu ka lungpi le ka ralhruang
le a ka chuahtertu a si,
3Ka Pathian, a chung i kaa dornak
lungpi, ka phaw le ka khamhnak ki,
ka ralhau le ka himnak;
Ka khamhtu, nangmah nih
zaang-ennak chungin
na ka khamh.
4Thangṭhat awk a tlakmi Bawipa cu
ka auh i ka ral hna chungin
a ka khamh.
5“Zeitintiah thihnak tilet nih
an ka dum,
Rawhralnak tilian nih
a ka tlunhnawh;
6Sheol hri nih a ka zelh,
Thihnak rap nih a ka foih.
7“Ka harnak chungin Bawipa kha
ka auh;
Ka Pathian kha ka auh.
A biaknak inn in ka aw kha
a rak theih i
Ka aunak kha a hna chung a phan.
8“Cun vawlei kha aa hnin i aa sai;
A thin a hun caah van hram hna kha an ther i an i hnin.
9A hnar kua in meikhu a chuak i
A kaa chungin mei alh a chuak;
Amah sinin meiṭil vaam an chuak.
10Van kha a kuaih hna i a rung ṭum
A chahmi muihnak cu a ke tangah
a um
11Cherub aa cit i a zuang;
Thli thla cungah khan amah cu
an hmuh.
12Muihnak a chahmi khuadawm,
ti aa pummi cu,
A velchum in i khuhnak ah a ser.
13Amah hmai i ceunak chung khan
Meiṭil an i hliau duakmak.
14 Bawipa cu van in khuarit in a rung ri i
Cung Nung Bik nih a aw kha a chuah.
15Cun thal kha an thlah hna i
a ṭhek hna,
Nimtlau kha a thlah i
a dawi dih hna.
16 Bawipa nih a sik hna i a hnar thaw nih a chem hna caah
rili kuang hna cu an lang i
vawlei hram hna cu an lang.
17“Cungpi khin a run ka banh i
a run ka lak,
Ti tampi chungin a ka chuah.
18A ṭhawngmi ka ral hna le a ka huatu
hna chungin amah nih a ka chuah,
Zeitintiah annih cu ka caah
an ṭhawng tuk.
19Ka vanchiat ni ah an ka chuahhnawh;
Sihmanhsehlaw Bawipa cu ka cherhchan a si.
20Hmun kaupi ah a ka kalpi;
Keimah chungah lawmhnak
a ngeih caah a ka chuahter.
21 Bawipa nih ka dinnak ningin
laksawng a ka pek;
Ka kut hna an thianning in
a ka lehrulh.
22Zeitintiah Bawipa lam kha
kaa tlaih hna i
Ka Pathian sinin, sualnak lam zulh awkah kaa ṭhen lo.
23Zeitintiah a phunglam vialte cu
ka hmaiah an um i
A nawlbia hna kha ka pialtak bal hna lo.
24Amah hmaiah soi awk um lo ka si i
Mawhnak zeihmanh tuah loin
ka um.
25Cucaah Bawipa nih ka dinnak ningin
a ka lehrulh,
Amah mit hmuh i ka thiannak ningin.
26“Zumhtlakmi sinah zumhtlak in naa
langhter,
Soi awk a um lomi sinah soi awk
um loin naa langhter.
27A thiangmi sinah a thiang in naa langhter,
A hrokhrawlmi sinah zer ngaiin naa langhter.
28Nangmah nih toidormi cu na chuahter hna,
Sihmanhsehlaw ruamkaimi cu annih
kha ṭhumh awkah an cungah
na mit a um.
29Asi, nangmah cu ka mei inn na si, maw Bawipa,
Cun ka Pathian nih ka muihnak kha a ceuter.
30Asi, nangmah thawngin ralkapbu bu
khat ka tei khawh i
Ka Pathian thawngin vampang kha ka per khawh.
31Hi Pathian hi amah a lam cu
ṭhat a tling;
Bawipa biakamnak cu a dik taktakmi
a si;
Amah chung i aa dormi vialte caah amah cu phaw a si.
32“Zeitintiah Bawipa dah ti lo cu ahodah Pathian a si?
Kan Pathian dah ti lo cu ahodah lungpi a si?
33Hi Pathian hi, a ṭhawngmi
ka himnak a si,
Amah nih ka lam kha him tein a ser.
34Amah nih ka ke cu sazuk ke bantuk ah a ser hna i
Hmun sang ah him tein a ka chiah. #Hab 3.19
35Ka kut cu raldohnak caah
a cawnpiak hna,
Cucaah dar likuk kha ka ban nih
an koih khawh.
36Nangmah nih na khamhnak phaw cu na ka pek cang i
Nangmah bawmhnak nih a ka lianhnganter.
37Ka tang i ka ke hlannak caah
hmun kaupi na ka pek i
Ka ke cu a nal lo;
38Ka ral hna kha ka dawi hna i
ka hrawh hna,
An dih hlan lo ka kir lo.
39Ka thah dih hna; tleng lak in ka chunh
hna, cucaah an tho kho ti lo;
Ka ke tangah an tlu.
40Zeicahtiah raldohnak caah
nangmah nih
ka tai ah ṭhawnnak na ka sawmh i,
A ka chuahhnawhtu kha ka tangah
na pilter hna.
41Ka ral hna le a ka huatu hna cu,
An hnulei na ka chitter hna i
ka hrawh hna.
42Khua an zoh, sihmanhsehlaw
khamhtu ding pakhat hmanh
an um lo,
Bawipa kha an auh, sihmanhsehlaw
a hawi hna lo.
43Vawlei i leidip bantuk ah ka rial hna,
Ka den hna i lam i nawncek bantukin ka lamh hna.
44“Miphun hna he i siknak in
na ka khamh,
Miphun hna lu ah na ka chiah;
Ka hngalh lomi hna nih khan
ka rian an ṭuan.
45Ramdangmi nih bawh buin ka sinah an ra;
Ka bia an theih cangka, ka nawl
an ngaih.
46Ramdangmi cu an hnabei a dong i
An ralhau chung khan ther lengmang in an ra chuak.
47“Bawipa cu a nung ko;
ka lungpi cu thangṭhat si ko seh,
Ka Pathian, ka khamhnak lungpi cu.
48Ka phu a ka hlampiak i ka tangah miphun hna a chiatu,
49Ka ral hna chungin a ka chuahtu
Pathian cu hlorh si ko seh;
Nangmah nih ka ral hna cungah
na ka hlorh,
Mipuar hna lakin na ka luatter.
50“Mah hi ruangah hin, maw Bawipa,
Miphun hna lakah kan hlorh lai i
Na min cu hla in ka thangṭhat lai. #Rom 15.9
51Amah nih a siangpahrang cu teinak lianngan a pek i,
A chiti thuhmi cu a fekmi dawtnak
a hmuhsak,
David le a tefa hna cu, zungzal in.”
Currently Selected:
2 SAMUEL 22: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006