Matthew 4
4
Tughneghaam Seghleghqesnaqutkegkanga Jesus
1Taagken Agleghnalghiim Taghnegham aghulaqutkaa Jesus kilgaanun, Tughneghaghmun seghleghqesnaqutkesqelluku. 240 aghneq, 40 unuk Jesus neghumangilnguq; taagken taakut aghneghet kingungitneng iyataqaq. 3Taagken Tughneghaam takuluku pikaa, “Kiyaghneghem Ighneqngukangaten, neqngughtesqiki tamaakut uyghaget.”
4Iwernga Jesus‑em pikaa,
“Akuzitet Igaqegkat pikaagut,
‘Yuuk kiyaghhnaanghituq neqnginaghhaghqun,
iwernga kiyaghsaghqaaguq tamaghhaakun Kiyaghneghem akuzitangakun.’”
5Taagken Tughneghaam Jesus aglaatkaa Jerusalem‑emun, Agleghnalghiimun Neghllagmun. Tawani Temple‑m uusqallghakun nekevesluku 6pikaa, “Kiyaghneghem Ighneqngukangaten, qetgeghi tesamavek; qayughllak Akuzitet Igaqegkat pikaagut,
‘Kiyaghneghemnguq yaqulegminun paqnasightesaghtughlleqaaten;
iiggmeggneng nuqneqelleqaaten luuraq itegaghten uyghaghquunnayukata.’”
7Jesus‑em pikaa, “Iwernga Akuzitet Igaqegkat whatenllu pikaagut, ‘Ataneq Kiyaghneghen nanghiiqugpenaan sasqelluku ellngan piyukelqenghilkanganeng.’”
8Taagken Tughneghaam Jesus mayuulluku uusqapiglleghiimun naayghamun kelgutkii qamagtengngwaaghluki ataneghpagullghi nunam, pinighnalleghllagillu. 9Enkaam pikaa, “Qamagtengngwaaghluki maakut tuunelleqanka elpenun, segesqughlluten manigughyaquvnga.”
10Taagken Jesus‑em pikaa, “Tughneghaq, iqiten! Akuzitet Igaqegkat whaten pikaagut, ‘Manigughyaghqaqan Ataneq Kiyaghneghen, ellnginaaguqlu qepghaasaghqan!’”
11Taagken Tughneghaam unisagu Jesus, yaqulget aflengaksaghtuqaat.
Jesus‑em Piinliqanga Ungipaqilleni Galilee‑mi
12Jesus‑em nagaqughluku John anusimingllaghvigmenniluku, Galilee‑mun uteghniqaq. 13Nazareth‑meng aglaqaq Capernaum‑emun tamaannaluni. Capernaum esnenganituq Naayvam Galilee‑m, nunami Zebulun‑enkuk Naphtali‑nkuk kingunghita kiyaghfigitni. 14-15Jesus‑em tawaten pilleghmikun apeghiiqaa uuknaliqistem Isaiah‑m uuknaliqellgha. Qavngarugllak Isaiah‑m uuknaliqutkegkaqii yuget kiyaghlleghhiit nunagkeni Zebulun‑enkuk Naphtali‑nkuk. Taakuk nunak naayvam tunganganilnguuk, nallangani Kiiwem Jordan‑em, Galilee‑melngughmi Gentile‑et kiyaghfigitni! 16Isaiah‑m pikaqegkangi whaten,
“Tamaakut kiyaghlleghhiit seghleghqellghem mamleghqestellghani esghaasaghqaagut nighugllagmeng.
Alingellghita tuqumeng llangaqa nunangat saapngalghii taghneghangutellghaneng tuqullghem.
Iwernga maaten aghtaghaataqii.”
17Galilee‑mun uteghnilleghmineng kenlekluku Jesus‑em piinliqaa ungipaqilleni, “Avuteghqellusi seghleghqennanightek, qayughllak Ataneghpagullgha Qilagem kaasaghtuumaaq.”
Jesus‑em Tagsiqangi Estamat Iqalliniightet
18Jesus‑em igleghutkelluku esnengani Naayvam Galilee‑m, esghaqakek anglegutkullghiik, Simon‑enkunguftuk (aatghan allgha Peter), Andrew‑nkuk. Iqalliniilghiik negaghpagtek miluutaqluku naayvamun. 19Taagken Jesus‑em pikakek, “Maligtegnenga, apeghtughlleqamtek iqalliniightengughtesqellutek yugneng.” 20Tawaninginaq negaghpatek unilluki maligtekaak.
21Taaganiqaaghaq esghaqakek anglegutkullghiik, James‑enkuk John‑enkuk ighneghqek Zebedee‑m. Angyameggni atakullghiit negaghpateng ilaaghtughaqeftiit. Jesus‑em tuqluqakek. 22Tawaninginaq angyaghtek unitkaak atayeklu enkaam Jesus maligtekaak.
Jesus Apeghtughilghiillu Naallghuqulghiillu
23Jesus igleghakaq tamanganun Galilee‑mi, synagogue‑ngitni apeghtughiiqluni. Nani alngunak ungipaqaq Pinilghiineng Ungipaaneng Ataneghpagullghem, naallghuquqaq tamaghhaaneng aqnighneghnengllu, qinuyugnengllu. 24Ungipaq mingitkaalghii naallghuqullgha tamaghhaani Syria‑mi. Enkaam yuget tagitkiit ellnganun qamaglluki qinuyulghiit, allaghhiinaaghneng aqnighnelget, ikfiqngalghiit, tughneghalget, sayugpagtaqayuget, uniiqatlu. Qamaglluki Jesus‑em naallghutkii. 25Uglaapiglleghhiim maligtekaat Galilee‑meng, Decapolis‑meng, Jerusalem‑emeng, Judea‑meng, Jordan‑emllu inglunganeng taagegken.
Currently Selected:
Matthew 4: ess
Highlight
Share
Copy
Want to have your highlights saved across all your devices? Sign up or sign in
© 2018, Wycliffe Bible Translators, Inc. All rights reserved.