मरकुस 3
3
वतिता कयदोर मानेयतुन येसु सुदरे किन्तोर
(मत्ति १२:९-१४; लूका ६:६-११)
1येसु असा मन्दिरतिगा हतुर, अगा वरोर मानेय मतोर ओर मानेयना कय वतिता मता। 2अनि येसु पवित्र दिया ओन सुदरे किन्तोर या केवोर इदाम परीसि लोकुरक येसुनिगा दोष लावे कियान साटि सन्दि हुळन्दुरक। 3असके येसु वतिता कयदोर मानेयतुन इतुर, “तेदा अनि नडुम निता।” 4अनि येसु ओरकुन इतुर, “बाताल पवित्र दिया सुदरे कियाना या गलति कियाना, जिवातुन पिसहाना या नाश कियाना बोद बेस मन्ता?” ओदबेरा परीसि लोकुरक येसुना मुने कमेक मतोरक। 5येसु लोकुरा हिरमुटा हुळसुन दुःखि आस होंगदे ओरकुन नालंगोसबासा हुळतुर अनि वतिता कयवाले मानेयतुन, “निया कयक मुने ताहा” इन्जोर इतुर; ओर आपुना कयक मुने ताहतुर अनि ओना कय बेस आत! 6असके ओर लोकुरक बाहरो पसियतुरक अनि ओन बदाम होवकिकाट इन्जोर हेरोदि राजाना मदत केवालोरासंग वळकिला लागतुरक।
येसुना परके पकाय भीळ
7येसु आपुनोर चेलालोरासंग समुद्रतीके हतुर, अनि गलील प्रदेशतोर लोकुरा पकाय भीळ ओना परके वातुरक। 8अनि यहुदिया, येरुसलेम, इदुमिया अनि यरदना हबाटा सूर अनि सिदोनता हेरेटाल लोकुरा पकाय भीळ ओना आश्चरयता बुतोता बारेते केन्जुन ओना हेरे वातुरक। 9असके भीळ नाकुन बोदे तकलिप आयमाकि इन्जोर येसु आपुनोर चेलालोरकुन, भीळता कारण उन्दि हुडिला डोंगा नावा साटि तयार किम इन्जोर इतुर#मर ४:१; लूका ५:१-३। 10बाक्याकि ओर पकाय लोकुरकुन सुदरे किस मतोर इन्जोर बचोक लोकुरक बिमार मतोर ओर लोकुरक येसुन इटान साटि ओना परके लागस मतोरक। 11दुष्टात्मा पयतोर लोकुरक ओन हुळन्दुरक असके ओना मुने मुटिन्दुरक अनि “निमा परमेस्वरनोर मरि आन्दि” इन्जोर जोरदे इन्दुरक। 12अनि “नना बोर आन्दान इन्जोर निमाट लोकुरकुन वेहमाट#३:१२ येसु परमेस्वरनोर मरि आन्दुर मति इद पोल्लो ओद समय इदाम प्रगट कियान साटि येसुन इच्चा हिले आसि इन्जोर ओर दुष्टात्मातुन इदाम चेतावनि हितुर।।” इन्जोर ओर ओरकुन चेतेकिस इन्दुर।
येसु बारा चेलालोरकुन आचान्तोर
(मत्ति १०:१-४; लूका ६:१२-१६)
13पजा येसु मटा पोरो हतुर अनि बोर लोकुरकुन केयाना इच्चा किन्दुर ओरकुन आपुना हेरे केयतुर अनि ओरक येसुना हेरे वातुर। 14असके ओरक ओनासंग मनिर अनि ओरकुन प्रचार कियाला लोहिर 15अनि दुष्टात्मातुन पसियाना अदिकार इरिर इन्जोर येसु ओरा निगाडाल बारा लोकुरकुन आचतुर अनि ओरकुन येसुना खास चेला लोकुरक#३:१५ प्रबु येसु मसि आपुना सेवाकियान साटि निवडे कितोरक बारा चेला लोकुरकुन येसुना खास चेला इतुर। अदेना अर्थ विशेषाल सन्देश वेहान साटि लोहतोर इन्जोर केयतुर। 16अनि बारा चेलालोर येरक आन्दुरक,
शिमोन येना पोरोय येसु पतरस इरतुर।
17अनि जबदिनोर मरि याकुब
अनि याकुबनोर तमो युहन्ना, अनि ओना पोरोय बुवनरगिस इदाम येसु इरतुर, इदेना अर्थ गर्जनतोर मरि इन्जोर मता।
18अनि अन्दरियास,
अनि फिलिपुस,
अनि बरतुलोमायि,
अनि मत्ति,
अनि थोमा,
अनि हलपिनोर मरि याकुब,
अनि तद्दायि,
अनि शिमोन कनानि।
19अनि बोर येसुन पयिस हितुर ओर यहुदा इस्करियोति।
दुष्टात्माता सरदारताल वने येसु पकाय लाववाले मन्तोर
(मत्ति १२:२२-३२; लूका ११:१४-२३; लूका १२:१०)
20येसु लोन वातुर असके ओरक रोटिंग वने तिन्दा परोर आतुरक इदाम भीळ आत। 21अनि येसुना परिवार इद केन्जतुर अनि ओना मन उन्दि जागा हिले इदाम इन्जुन ओरक ओन पयान साटि पसियतुरक। 22अनि येरुसलेमतिगाडाल वातोर मूसाना नियमतुन करिहवालोरक वने “ओनिगा बालजबुल#३:२२ बालजबुल-दुष्टात्माता मुक्याल सयतान मतोर मन्ता#मत्ति ९:३४; १०:२५” इन्जोर इतुरक। अनि दुष्टात्माता सरदारना मदतते ओर दुष्टात्मातुन पुळान्तोर इन्जोर इतुरक। 23इन्जोर येसु ओरकुन हेरे केयसुन उदाहरनते वळकिला लागतुर, “सयतान बदाम सयतानतुन टन्ड परान्ता? 24बोदायि राज्यते आप आपुनाय वाहचाना आन्ता ते ओद राज्य नाश आन्ता। 25अनि बोदायि लोतिगा आप आपुनाय वाहचाना आन्ता ते ओद लोन वने नाश आन्ता। 26इन्जोर सयतान आपुनाय विरुद होंग कियानुर ते सयताना राज्य बदाम बनेमास मन्दार; ओना नाश आयार। 27पहेलवानतुन दोहोर आयनुर ते कलेर मानेय बोरायि पहेलवानना लोतिगा होळियस ओना संपति कलिला परोर, पहेलवानतुन दोहानुर ते ओना लोता संपति कलिला परान्तोर। 28अनि मानेयतोर मरिना विरुद पाप कितोर ओर लोकुरकुन मापि किया लागार इन्जोर नना मिकुन खरोय इन्तोना। 29मति बोरायि पवित्र आत्माता विरोदते निन्दा केविर ते ओन परमेस्वर बसकेय मापि किया परोर अनि ओर अनन्त काळता दन्ड साटि अपरादि ठहरे मायनुर#लूका १२:१० ।” 30अनि “ओनागा बोदे दुष्टात्मा मन्ता इन्जोर हुचुक लोकुरक इन्दुर” इन्जोर येसु इद पोल्लो इतुर।
येसुना अवहारि अनि तमोलोरक
(मत्ति १२:४६-५०; लूका ८:१९-२१)
31येसुना अवहारि अनि तमोलोरक वासुन बाहरो नितस येसुन केयिला लोहतुरक। 32येसुना हेरे पकाय भीळ उदस मता; असके वरोर मानेय येसुन इतुर, “हुळा, निया अवहारि अनि तमोलोरक बाहरो निकुन पळकिला आतोरक।” 33येसु ओन उत्तर हितुर, “नावा अवहारि अनि तमोलोरक बोर आन्दुर?” 34अनि ओना हेरे उदस मतोर ओर लोकुरकुन हुळस इतुर, “हुळाट, नावा अवाह अनि तमोह येरकेय आन्दुरक! 35बाक्याकि बोरायि परमेस्वरना इच्चाते ताकान्तोर ओरे नावोर तमो, हेलाळ, अनि अवाल आन्द।”
Currently Selected:
मरकुस 3: fmu
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.