Matéo 4
4
Satana oipy’ara’ã Hesúpe
1Upérõ Ñanderuete Pytu Porãitéva ogueraha Hesúpe desiértope, Satana oipy’ara’ã hag̃ua ichupe.
2Ha Hesu ndokarúigui 40 ára ha 40 pyhare pukukue, Ha’e iñembyahýi.
3Ha Satana ou hendápe oipy’ara’ã hag̃ua ichupe, ha he’i: Nde ramo Ñanderuete Ra’y ere ko’ã itápe oiko hag̃ua ichugui pan.
4Hesu katu ombohovái ichupe: Ñanderuete kuatiañe’ẽme katu ojehai voi napan rehe añói oikovehína yvyariguakuéra, opaite ñe’ẽ osẽvare Ñanderuete jurúgui uvei, (Deuteronómio 8,3).
5Upéi pe aña ogueraha Hesúpe Jerusalénpe ha ohupi ichupe Ñanderuete rogaguasu ári,
6ha he’i Hesúpe: Nde ramo Ñanderuete Ra’y, ejeity ko’águi yvýpe, Ñanderuete kuatiañe’ẽme he’i voi: Ha’e omboúta nderehehápe hi’angelkuéra, ha ndejokóta ipópe, ani hag̃ua reñepysãnga itáre, (Salmokuéra 91,11-12).
7Ha Hesu ombohovái ichupe: Ojehai avei ani reipy’ara’ã pende Ruete, nde Járape, (Deuteronómio 6,16).
8Ha pe aña ogueraha jevy Hesúpe peteĩ cérro ru’ã yvatépe, ha ohechauka ichupe opaite tetãguasu ha ipype oĩva mba’eporãita reheve, oĩva guive ko yvy apére,
9ha pe aña he’i Hesúpe: Opaite ko’ã mba’e rehecháva guive ame’ẽmbáta ndéve, Nde reñesũ ramo che renondépe ha chemomba’eguasu ramo.
10Upérõ Hesu ombohovái ichupe: Tereho, nde Satana, Ñanderuete kuatiañe’ẽme ojehai avei: Ñandejára, Ñanderuete renondépe añoite ija reñesũ ha reñembo’évo ichupe ha ichupe añoitente rejejokuaiukava’erã, (Deuteronómio 6,13).
11Upémaramo pe aña opoi Hesúgui, ha upérõ ou angelkuéra oservi hag̃ua Hesúpe.
Hesu oñepyrũ hembiapo Galiléape
12Hesu ohendúvo oñemoinge hague Juánpe cárcelpe oho jevy Galiléape.
13Ha Nazarétgui oho opyta hag̃ua Capernaúmpe, peteĩ táva opytáva ypaguasu rembe’ýpe, Zabulon ha Neftali yvy pa’ũme.
14Péva ojehu oiko hag̃ua pe proféta Isaías he’iva’ekue:
15Zabulon ha Neftali yvy, opytáva ypaguasu rembe’y rapépe, ysyry Jordan mboypýri, Galiléa yvýpe heta tetã ambueygua oikohápe,
16umi tetãygua oikóva pytũnguýpe ohecha peteĩ tesape ndetuicháva ha umi oguapýva pe ñemano’ãme g̃uarã ohesape peteĩ tesape ndetuicháva, (Isaías 9,1-2).
17Upete guive Hesu oñepyrũ omyasãi Ñanderuete ñe’ẽ ha he’i: Pejevýke Ñanderuete rendápe, hi’ag̃uíma Ñanderuete retãguasu ou hag̃ua.
Hesu ohenói irundy hemimbo’ekuérape
18Hesu oguatávo Galiléa ypaguasu rembe’y rupi, ohecha mokõi oñopehẽngue, Simon, hérava avei Pédro ha ityvýra Andres, oityvahína ired ypaguasúpe, ha’ekuéra ningo pira renohẽhára.
19Ha Hesu he’i ichupekuéra: Peju che rapykuéri ha Che ajapóta pendehegui tetãyguakuéra renohẽhára.
20Upevovete opoi irédgui, ha oho hapykuéri.
21Ha ohasávo upégui ohecha ambue mokõi oñopehẽngue, Jacóbo, Zebedéo ra’y, ha ityvýra Juan, oĩvahína itúva Zebedéo ndive ikanóape omyatyrõvahína iredkuéra, ha Hesu ohenói ichupekuéra.
22Upevovete ha’ekuéra oheja itúva ha hembiapo, ha oho Hesu ndive.
Hesu ombo’e ha oporomonguera
23Ha Hesu oguata Galiléa departaménto tuichakue rupi, ombo’e hag̃ua Ñanderuete rogakuérape, omyasãi Ñanderuete evangélio (marandu porã) ha omonguera opaichagua hasývape ojeguerúva guive hendápe.
24Herakuã porã oñemosarambi avei opaite Síria retãme, ha ojegueru opaichagua hasýva hendápe, opaichagua mba’asy ha angekõi vaípe oikóva guive, umi oguerekóva mba’epochy ipype, umi itarováva ha umi ndoguatáiva, ha Hesu omonguerapa umívape.
25Ha heta Galileaygua, Decapolisgua, Jerusalengua, Judaygua ha Jordan mboypyrigua omoirũ Hesúpe.
Currently Selected:
Matéo 4: ÑÑP2015
Highlight
Share
Copy
Want to have your highlights saved across all your devices? Sign up or sign in
Ñanderuete Ñe’ẽ Porã © MISIÓN ALEMANA ENTRE LOS NATIVOS DEL PARAGUAY - HARALD FÜRSTENAU, 2015.