Lucas 11
11
Jechu judi a̧ra̧ano̧rëremȩde Ütë tjamo̧ pio ju̧i̧ ni̧bäpea̧ pio ju̧i̧ chjiari
Mateo 6:9-13; 7:7-11
1Ado cja̧rȩmo̧ doremȩrä, Jechu judi jibëa̧ Ama̧i̧ pio ju̧i̧ ni̧bärëremȩdejȩ, Ütë tjamo̧ pio ju̧i̧. Ado judi ni̧bädäräa̧rä, jibëa̧ jadü pio judi cja̧rȩmȩrȩ yo̧epea̧dejȩ, ja̧di ta̧rëri̧ yo̧mȩrȩ:
—Ano̧mȩ, a̧ra̧ano̧ibe Ütë tjamo̧ pio ju̧i̧ ni̧bäpea̧ ji̧ —yo̧a̧dejȩ—. Jabechji̧ uirä chudamȩ Juan pio judi jibëa̧ jadü ji̧ri̧ a̧ra̧ano̧rërea̧mi̧ a̧ra̧ano̧ibe peaja̧di —yo̧a̧dejȩ.
2Ado Jechu judi dëbë yo̧mȩrȩ ja̧di ta̧rëri̧ yo̧a̧dejȩ:
—Danȩrȩ ca̧ pumȩ, mȩnȩro̧ Ütë tjamo̧ pio ju̧i̧ ni̧bärä, jabechji̧ ja̧di ta̧rëri̧ yo̧ji̧ri̧rȩ ni̧bätäreji̧ri̧renȩro̧jo̧ȩ: "Ama̧i̧, pumȩ judiro̧ ütëbodärärë pio mȩaiäpȩmo̧ ma ba chia jo̧rȩtatädiro̧mȩ na̧ quȩ ba chiati̧ oa —yo̧ji̧ri̧rȩ ni̧bätäreji̧ri̧renȩro̧jo̧ȩ—. Aja̧ Amai̧, pumȩ judiro̧ ütëbodärärë na̧ chja̧oerämo̧ cjo̧ro̧tädirȩ jo̧ȩra̧pe. 3Ado a̧ro̧rȩ do nö̧ta oa chjadëri̧ jurapea̧ oa yürüibe Ama̧i̧. 4Ado a̧ro̧rȩ chjai̧dëri̧ japea̧ pio ju̧i̧ duridëparȩmi̧ dari̧ japaibe Ama̧i̧. Aja̧, a̧ro̧rȩ pio ibëiäpȩmo̧ chjai̧dëri̧ japea̧ji̧ri̧ pio ji̧ri̧ duridëparȩmi̧ dari̧ japaibe peaja̧di. Ado chjadëri̧ tuti japaibe Ama̧i̧, a̧ro̧rȩ ma̧i̧ da chjai̧dë oa chjätärä oëra̧diä jo̧rȩtachea oa. Aja̧ Ama̧i̧, ja̧di ta̧rëri̧ yo̧mȩrȩ ni̧bärequedemȩ. Ja̧ditäde." Aja̧ ca̧ pumȩ, ja̧di ta̧rëri̧ ni̧bätäreji̧ri̧renȩro̧jo̧ȩ Ütë tjamo̧ pio ju̧i̧iäpȩmo̧ —yo̧mȩrȩ ni̧bä chjaorëremȩdejȩrȩ Jechu judi.
5Ja̧dëa ji̧ pio ji̧ri̧iäpȩmo̧ ji̧dë u̧i̧ a̧ra̧ano̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ Jechu judi na̧rȩrea̧ ma̧ȩmi̧ dara̧, Ütë tjamo̧ pio ju̧i̧iäpȩmo̧ ni̧bäpea̧ pio ju̧i̧ chjiari:
—Danȩrȩ, mȩnȩro̧ cja̧rȩmȩrȩ, na̧ jadü oa ëbarä judi, ado gȩnȩrȩ tjomo̧ro mȩnȩ pio ju̧i̧iäpȩ jurarea̧ oa cjo̧dëpea̧ oa järä judi, ado pio ju̧i̧ ëna̧diämȩrȩ na̧rȩno̧ ëte jurarea̧ oa cjo̧dërä judi, "aja̧, tjarari̧ chja̧pe oa eopacoe" yo̧rä judi, 6"Aja̧, ca̧ omȩ üdë pea goëdaera̧pea̧dique jabo cjäri̧ marequede, eami̧ jurarea̧ oa goadërequede pio ju̧i̧ ëba jurapea̧ oa" yo̧rä judi, 7danȩ, ja̧di ta̧rëri̧ dëbë yo̧pai̧ da jirodimȩ dibëa̧ jadü üdë: "Jabo cjäri̧ ma, tja̧rȩparȩdëcoe. Jabechji̧ cjo̧dëno̧dëcoe" yo̧pai̧ da jirodimȩ. "Jabechji̧ tuti cararea̧ joë ya üdë chjuari̧ tutia̧ oa cjiade. Ado ca̧ pumȩ pio ji̧ri̧ nö̧ta cjiarequede mo̧a̧rea̧ jo̧ tjoräpȩ, ado pio ju̧i̧iä a̧dorea̧mi̧dërequedemȩ" yo̧pai̧ da jirodimȩ. 8Jabo tjamo̧ri̧ yo̧requededibe —yo̧a̧dejȩrȩ Jechu judi—. Jabechji̧ judi a̧dëri̧ cjiaräbo, pio jȩaiä cjo̧dëmȩ pio ju̧i̧ a̧dodëri̧ cjiaräbo, jabechji̧ yürüpai̧ dadejȩ ji̧dë ma cjo̧dëa̧ oaiä. Aja̧, joë ya oa tao tao eari̧ ji̧dë ma gu̧na̧ gu̧na̧ cjia̧ oaiä, dëdë, cjitëpade davä pio jȩaiä cjo̧dëmȩ pio ju̧i̧ a̧dopea̧ oa. Tjamo̧ davä. Judi yürüdëa̧ oaiä idëri̧ cjiamȩrȩ cjiadiächea oa, jabechji̧ yürüpadejȩ. 9Ado pio ju̧i̧iä yo̧requededibe —yo̧a̧dejȩrȩ—. Jabechji̧ Ütë tjamo̧ pio ju̧i̧iä ji̧dë ma goë cjo̧dëriä cjo̧ro̧chji̧vä, ado yürüpadidibe davä jënȩ daba̧mi̧ —yo̧a̧dejȩrȩ—. Aja̧, ji̧dë ma na̧taji̧ri̧mi̧ dari̧ goë cjo̧dëchji̧vä mȩnȩro̧ dadärärea̧mi̧ dari̧ mitërea̧ dapea̧ oa. Ado joë ya oa ji̧dë ma tao tao eari̧ guna̧ gu̧na̧ cjiami̧ dari̧ goë cjo̧dë chjaochji̧vä Ütë tjamo̧ pio ju̧i̧iä, ado areia̧ oa cjiami̧ dari̧ cjiapade. 10Jabechji̧ eami̧ pumȩ üdë pio ju̧i̧iä goë cjo̧dëmȩ pio judi mitërea̧ dapade. Ado ji̧dë ma na̧tamȩmi̧ dari̧ cjo̧dëmȩ pio judi, jabechji̧ dadärärea̧mi̧ dari̧ dapade. Ado joë ya oa tao tao eari̧ guna̧ gu̧na̧ cjiami̧ dari̧ cjo̧dëmȩ pio judi, jabechji̧ areia̧ oa cjiami̧ dari̧ cjiapade pio ju̧i̧ ja̧ oa —yo̧a̧dejȩrȩ.
11Ado Jechu judi ji̧dë u̧i̧ ni̧bämȩrȩ ja̧di ta̧rëri̧ a̧de ni̧bä chjaorëremȩdejȩ Ütë tjamo̧ pio ju̧i̧iä cjo̧dëpea̧ pio ju̧i̧ chjiari:
—Danȩrȩ, eami̧ nö̧rimȩ judi dabade davä jibëa̧ bori̧ ji̧ri̧ yürüpea̧ ji̧ —yo̧a̧dejȩrȩ—. Jabechji̧ jibëa̧ ja üdë pio ju̧i̧iä jurarea̧ oa cjo̧dërä judi, cho̧ pio ju̧i̧ cjo̧dërä judi, ¿tjana̧ oa yürütäremȩdejȩ? ¿Jabo po pio ju̧i̧ yürütäremȩdejȩ? Jabo cjäri̧ madejȩ, ja̧di dari̧ yürürea̧mi̧dëdejȩ. Jabechji̧ dabade davä jibëa̧ ja pio ju̧i̧ chjadëri̧ yürüpea̧ ji̧. 12Ado joja üdë ocararo nö̧ oa juratämi̧ cjiarä judi, ocararo nö̧ oa pio ju̧i̧iä cjo̧dërä judi, ¿tjana̧ oa yürütäremȩdejȩ? ¿Jabo chjia ara pio ju̧i̧ yürütäremȩdejȩ? Jabo cjäri̧ madejȩ, ja̧di dari̧ yürürea̧mi̧dëdejȩ jabo chjadëri̧ yürütäremȩdejȩ. Jabechji̧ joja üdë cjo̧dëa̧mi̧ yürütäremȩdejȩ judi jibëa̧ ja oa chjadëri̧ yürüpea̧ ji̧ daba tara. 13Ado danȩrȩ ca̧ pumȩ, peaja̧di dabade ibëa̧ Ama̧i̧ judi —yo̧a̧dejȩrȩ—. Pio dibëiäpȩmo̧ chjadëri̧ yürüpea̧ ji̧ tjamo̧ri̧ dabade peaja̧di. Ado pio mȩnȩro̧ chjai̧dëri̧ japaji̧ri̧borë dibëa̧ u̧ri̧ pio ji̧ri̧iäpȩmo̧ chjadëri̧ yürüpea̧ ji̧ dabarä judi, ¿ji̧dë u̧i̧ dabadëde ibëa̧ Ama̧i̧ judi pio ibëiäpȩmo̧ yürüpea̧ ji̧? Dëdëde davä. Pio ibëiä ji̧dë u̧i̧ dabade jibëa̧ u̧ri̧ pio ji̧ri̧iäpȩmo̧ yürüpea̧ ji̧. Tjamo̧ davä. A̧dëräpȩ cjiamȩ Ama̧i̧ pio judi ji̧dë u̧i̧ dabade davä, pio jȩaiä cjo̧dëji̧ri̧ pio ji̧ri̧iäpȩmo̧ chjadëri̧ yürüpea̧ ji̧, ja̧ u̧ri̧ pio ji̧ri̧iäpȩmo̧ chjadëri̧ yürüpea̧ ji̧. Ja̧di tara pio ju̧i̧iä cjo̧dëji̧ri̧ pio ji̧ri̧iäpȩmo̧ yürüpadejȩrȩ Tjo tjamo̧ pio ju̧i̧ —yo̧mȩrȩ ni̧bä chjaorëremȩdejȩrȩ Jechu judi pumȩ ji̧ri̧, Ütë tjamo̧ pio ju̧i̧iä goë cjo̧dëpea̧ pio ju̧i̧ chjiari.
Jechu judi a̧ra̧ano̧rëremȩde Bechebu pio ju̧i̧ chjiari
Mateo 12:22-30; Marco 3:20-27
14Ado pumȩ judi cjo̧ro̧rëremȩde, ni̧bärea̧ dadëmȩrȩ. Jabechji̧ yaröca üdë ira̧diä cjaeäa̧ oaiä, ado ni̧bärea̧ yürüdëa̧ oaiä, jabechji̧ ni̧bädëmȩrȩ cjo̧ro̧rëremȩde. Jabo ado cja̧rȩmo̧ doremȩrä Jechu judi pio jiro yaröca oa baä tänȩrëremȩdejȩ, pumȩ pio judi ado chjereno̧ ni̧bärea̧mi̧ dari̧. Ado pumȩ judiro̧ pio ju̧i̧ daea̧ oaiä, ana̧ri̧ jo̧rȩtaji̧ri̧pea̧dirȩ, dacho bëremi̧ cjiami̧ dari̧. 15Jabo o judiro̧ pio ju̧i̧ daea̧ ji̧, ja̧di ta̧rëri̧ yo̧rëreji̧ri̧dirȩ Jechu pio ju̧i̧ chjiari:
—Jabo cjäri̧ madejȩrȩ, Jechu judi yaröca pio ji̧ri̧ baä tänȩrä, jibëa̧ jauëchjara̧ pio ju̧ri̧ra̧ baä tänȩdë madejȩrȩ jabo ado cja̧rȩmo̧ pio ju̧i̧iä baä tänȩrea̧ dadejȩrȩ. Jabechji̧ Bechebu quȩmȩ pio ju̧i̧iämo̧i̧ baä tänȩrea̧ dadejȩrȩ, yaröca ja̧ ano̧mȩ pio ju̧i̧iämo̧i̧. Tjamo̧ davä. Yaröca ja̧ ütë pio judi baä tänȩrea̧ yürüa̧ oaiiämo̧i̧ baä tänȩrea̧ dadejȩrȩ, jibëa̧ jauëchjadë maeara̧ —yo̧a̧dirȩ, Jechu pio ju̧i̧iäpȩmo̧ aechide yo̧ji̧ri̧rȩ.
16Ado o judiro̧, Jechu pio ju̧i̧ ütarami̧ dari̧ japatämi̧ cjiaji̧ri̧ pio judiro̧, puëräpȩ choë cjatämi̧ dari̧ japa tänȩtämi̧ cjiaji̧ri̧ pio judiro̧ jauëchja cjiari̧ na̧rȩtä eaji̧ri̧rȩ yo̧a̧diro̧jo̧ȩ:
—Danȩ, a̧ro̧rȩ ana̧ri̧ jo̧rȩtapea̧ oa, jabechji̧ a̧dëri ma̧na̧mȩ jauëchjarea̧ra̧ pio ju̧ri̧ra̧ chjadëri̧ na̧rȩibe. Jabechji̧ a̧ro̧rȩ pio mȩa chjiari quëna̧pea̧ oa, ‘Aja̧, Ütë tjamo̧ pio judi chjadëri̧ chjadüa̧ oa birë ma̧na̧diibëda’ quëna̧ jo̧rȩtapea̧ oa, jabechji̧ na̧rȩibe —yo̧a̧diro̧jo̧ȩ.
17Jabo Jechu judi, 'Aja̧, ja̧di dari̧ jo̧rȩtadiro̧da' quëna̧ dabamȩrȩ dëbë yo̧a̧dejȩrȩ na̧rȩrea̧ ma̧ȩmi̧ dara̧:
—Danȩrȩ, eami̧ chiriräpȩ cjo̧ro̧ji̧ri̧ pio judiro̧ chjadëri̧ ëba cjo̧ro̧dërä judi, jabo ji̧dë ma goëdëri̧ cjia jo̧rȩtarä judi, cjäri̧ madirȩ, chjarapë baämi̧ dari̧ cjo̧ro̧padirȩ, goarijärea̧mi̧ dari̧. Tjamo̧ davä. Eami̧ chiriräpȩ cjo̧ro̧ji̧ri̧ pio judiro̧ jadüchiami̧ bubami̧ dari̧ cjiadiärä judi, judiro̧ jibëa̧ dëbëti̧ra̧ chia dëbëpe chjaoji̧ri̧rȩ cjo̧ro̧rä judi, cjäri̧ madirȩ, chjarapë baämi̧ dari̧ cjo̧ro̧padirȩ goarijärea̧mi̧ dari̧ —yo̧a̧dejȩrȩ—. Aja̧ ca̧ pumȩ, ja̧di maeade. Ado peaja̧dide pumȩ ja̧ bëräpȩ cjo̧ro̧ji̧ri̧ pio ji̧ri̧iä. Jabechji̧ judiro̧ chjadëri̧ ëba cjo̧ro̧dërä judi, jabo jibëa̧ dëbëti̧ra̧ chia ji̧dë ma dëbëpe chjaomi̧ dari̧ japarä judi, judiro̧ jadüchiami̧ bubami̧ dari̧ cjo̧ro̧rä judi, jabechji̧ chjuchjupechäpadirȩ, pumȩ decjiape bagarea̧mi̧ dari̧. 18Ado peaja̧dide Ichiae pio ju̧i̧iä —yo̧a̧dejȩrȩ—. Danȩrȩ, Ichiae judi ira̧diä cjaeäji̧ri̧ pio ji̧ri̧ baä tänȩrä judi, pumȩ ja̧ icjarari pio judiri baä tänȩrä judi, ¿tjana̧ na̧rȩdiibe? Tjana̧ na̧rȩdë, jabechji̧ Ichiae judi jibëa̧ mu̧i̧tjoi̧ pio ji̧ri̧ dëbëpe chjaopea̧ pio ju̧i̧ na̧rȩdiibe. Pio ji̧ri̧ a̧dotärea̧ ji̧, dëbëpe chjaodejȩrȩ. Ado judi pio ji̧ri̧ tjamo̧ri̧ dëbëpe chjaorä judi, jabechji̧ yaröca ja̧ chja̧oerä cjo̧ro̧rea̧ japamitë üdë chjaodëri̧ goarijäpade. Jabo danȩrȩ, ja̧di ta̧rëri̧ yo̧nȩrȩ pio coa chjiari: "Aja̧, yaröca ja̧ ütë pio ju̧i̧ ja̧ ju chiarea̧ maeara̧, Bechebu quȩmȩ pio ju̧i̧ ja̧ ju chiarea̧ maeara̧ baä tänȩdejȩrȩ yaröca pio ji̧ri̧" yo̧nȩrȩ. 19Jabo danȩrȩ, cüdë Ichiae pio judi yürüa̧ ju chiarea̧ra̧ pio ju̧ri̧ra̧ yaröca pio ji̧ri̧ tjamo̧ri̧ baä tänȩrä judi, ¿chjia ja̧ ju chiarea̧ yürüa̧ oa baä tänȩdiro̧jȩrȩ dibëa̧ jadü judiro̧? Danȩrȩ, peaja̧di baä tänȩdiro̧jȩrȩ yaröca pio ji̧ri̧. Ado pio judiro̧borë yaröca pio ji̧ri̧ baä tänȩa̧ oaiä, jabechji̧ ana̧ri̧ jo̧rȩtapai̧ dadirȩ davä mȩnȩro̧ ja̧di ta̧rëri̧ yo̧a̧ pio ju̧i̧iä. Jabechji̧ mȩnȩro̧ pio coaiäpȩmo̧ aechide ni̧bäa̧ pio ju̧i̧iä, pio ji̧ri̧iäpȩmo̧bo aechide ni̧bämi̧ dari̧ ni̧bärenȩro̧jȩrȩ. “Aja̧, pio mȩnȩro̧borë Ichiae pio judi yürüa̧ ju chiarea̧ra̧ baä tänȩrenȩro̧jȩrȩ yaröca pio ji̧ri̧” yo̧mi̧ dari̧ aechide ni̧bärenȩro̧jȩrȩ pio ji̧ri̧iäpȩmo̧bo, dibëa̧ jadü pio ji̧ri̧iäpȩmo̧bo. Ado judiro̧ pio ju̧i̧ ta̧rë oaiä, jabechji̧ ütarë ta̧rëpadiro̧dibe davä, 'oëra̧ yo̧a̧diro̧da' quëna̧ jo̧rȩtaji̧ri̧rȩ. 20Jabo danȩrȩ, tjamo̧i̧ cjiari̧ yo̧requededibe —yo̧a̧dejȩrȩ—. Yaröca ja̧ ano̧mȩ pio judi yürüa̧ ju chiarea̧ra̧ pio ju̧ri̧ra̧ yaröca pio ji̧ri̧ baä tänȩdë marequedejȩrȩ, jabo Ütë tjamo̧ pio ju̧i̧ ja̧ jauëchjarea̧ oaiämo̧i̧ baä tänȩrequedejȩrȩ. Ado cüdë ja̧di dari̧ japea̧ pio oaiä, jabechji̧ na̧rȩrequededibe. Tjamo̧ davä. ‘Ütë judi yo̧a̧ chja̧oerä cjo̧ro̧rea̧ pio judi ma̧na̧na̧ra̧diibëda yaba̧’ quëna̧ jo̧rȩtapea̧ oa na̧rȩrequededibe —yo̧mȩrȩ ni̧bä chjaorëremȩdejȩrȩ Jechu judi.
21Ado Jechu judi Ichiae pio ju̧i̧ chjiari ji̧dë u̧i̧ ni̧bä chjaomȩrȩ ja̧di ta̧rëri̧ a̧de yo̧rëremȩdejȩrȩ pumȩ ji̧ri̧ cja̧rȩmo̧ na̧rȩrea̧ ma̧ȩmi̧ dara̧:
—Danȩrȩ, ju chiamȩ tjamo̧ pio judi jibëa̧ bë oa chjadëri̧ jidapea̧ oa ararä, jibëa̧ gu̧na̧rea̧ to ararä, jibëa̧ tjapënȩ oa, jibëa̧ chjibatobo oa ararä, jibëa̧ bë chjacjiamȩ tjamo̧ oa chjadëri̧ jidapea̧ oa ararä, jabechji̧ jibëa̧ üdë chjadëri̧ boea̧ oa cjiade. 22Jabo cjäri̧ madejȩ, pio ju̧i̧iä ji̧dë u̧i̧ ju chiamȩ pio judi acji yu̧a̧rä judi, bë jidamȩ pio ju̧i̧ acji bagura ëte boadärärä judi, jabechji̧ jënȩ jo̧rȩtami̧ baë mitëpadejȩ jibëa̧remȩ pio ju̧i̧. Ado jibëa̧ bë oa chjadëri̧ jidatämi̧ cjiamȩ pio judi jibëa̧ chjiparari pjatë chiamȩ ina̧rea̧ pio ju̧i̧ ina̧räbo, 'Aja̧, pio yoa chjibo itu oa chjadëri̧ jida̧ oa cjiemȩquëda' quëna̧räbo, cjäri̧ madejȩ, ji̧dë u̧i̧ ju chiamȩ pio judi boadäräpadejȩ. Ado ja̧dëa ji̧ boadäräa̧ oa goarä, jabechji̧ jënȩ jo̧rȩta̧mi̧ baë mitëpadejȩ jibëa̧remȩ oa, jibëa̧ chjiparari chiamȩ ina̧rea̧bo. Tjamo̧ davä. Jibëa̧remȩ pio ju̧i̧ baë mitëpadejȩ o ji̧ri̧ chjarapë yürüpea̧ oa. Ado danȩrȩ, peaja̧dimi̧ dari̧ baë boadäräa̧reconȩ Ichiae pio ju̧i̧ —yo̧a̧dejȩrȩ—. Tjamo̧ davä. Yaröca pio ji̧ri̧ go̧dü tänȩa̧ oaiä, pumȩ ja̧ icjarari pio judiri go̧dü tänȩa̧ oaiä, jabechji̧ baë boadäräa̧reconȩ Ichiae pio ju̧i̧ —yo̧a̧dejȩrȩ Jechu judi.
23Ado Jechu judi cjiadiädëmȩrȩ ji̧dë u̧i̧ ni̧bä chjaorëremȩdejȩrȩ pjaricheo pio ji̧ri̧iäpȩmo̧:
—Danȩrȩ, eami̧ pumȩ judiro̧ pio coa a̧dodërä judi, jabechji̧ pio judiro̧ dëbëpe chjaomi̧ dari̧ japadiro̧coe —yo̧a̧dejȩrȩ—. Ado eami̧ pumȩ judiro̧ ca̧ ovejami̧ da pio ji̧ri̧ a̧dopapea̧ ji̧ a̧dodërä judi, jabechji̧ chjuchjuti̧mi̧ baä tänȩmi̧ dari̧ japadiro̧jȩrȩ —yo̧a̧dejȩrȩ.
24Ado Jechu judi cjiadiädëmȩrȩ a̧de ni̧bä chjaorëremȩdejȩrȩ pumȩ pio ji̧ri̧iäpȩmo̧, judiro̧ ji̧dë ma jiade chjaoa̧ pio ju̧i̧ chjiari. Ja̧di ta̧rëri̧ ni̧bä chjaomȩrȩ yo̧a̧dejȩrȩ na̧rȩrea̧ ma̧ȩmi̧ dara̧:
—Danȩrȩ, yaröca üdë pumȩ ja̧ icjararä ira̧diä cjaeäremȩ pio judi chjätäti̧ cjiami̧ dari̧ jä chjaode oëra̧ti̧ oa, ui decjiaräpȩ, dabu nȩgȩ maearäpȩ —yo̧a̧dejȩrȩ—. Jabechji̧ järätä chjapami̧ dari̧ cjo̧ro̧pea̧ oa, na̧e tai̧mȩmi̧ dari̧ jä chjaode oëra̧ti̧ oa ira̧diä cjaeäpea̧ oa, ano̧ mire bëpami̧ dari̧ ira̧diä cjaeäpea̧ oa. Jabo ano̧ mire bëparea̧räpȩ dadärädë madejȩ. Ado pio ju̧i̧iä ja̧di dari̧ jo̧rȩtade: ‘Cjäri̧ maquëda, ano̧ mire bëparea̧ dadëquëda, jabechji̧ cüdë ira̧diä cjaeärërea̧räpȩ ju̧ri̧ ado carupë baätäremȩquëda’ quëna̧ jo̧rȩtamȩrȩ cuchupë baäde, jënȩ cjo̧ro̧rërea̧ icjararäpȩmo̧, jënȩ bëparërea̧räpȩmo̧. 25Ado ju̧ri̧pȩ go̧düdäräa̧rä, jabechji̧ bë cjara mami̧ da oa dadärädejȩ, ado cja̧rȩmo̧rȩ ano̧ mire bëpadëa̧ oaiä. Jabechji̧ bë üdë chjadëri̧ jida̧ oa cjiamȩmi̧ da oa, chjadëri̧ cha̧oë ana̧ oa cjiamȩmi̧ da oa dadärädejȩ. 26Jabo judi pumȩ ja̧ icjara oa yu̧a̧bea yaboi̧, jabechji̧ jäeno̧dejȩrȩ jibëa̧ jadü pio ji̧ri̧iäpȩ, pio ji̧ri̧iäpȩmo̧ yabëpea̧ oa. Jabechji̧ pio jȩaiä ji̧dë u̧i̧ chjai̧dë tjamo̧ pio ji̧ri̧ yabëdejȩrȩ ado cja̧rȩmo̧ yaröca 7 oa. Ado ëba baädejȩrȩ jënȩ cjo̧ro̧rërea̧ icjararäpȩmo̧ pio ji̧ri̧ nö̧ta bëpapea̧ oa. Ado pio jiro pumȩ pio judi, cjäri̧ made, jënȩ pearä cjo̧ro̧rërea̧mi̧ cjo̧ro̧dëpade jabo ji̧dë u̧i̧ chjadëdëri̧ cjo̧ro̧pade —yo̧mȩrȩ ni̧bä chjaorëremȩdejȩrȩ judio ütëti̧ pio ji̧ri̧iäpȩmo̧ Jechu judi, pio jȩaiäpȩmo̧ eadëji̧ri̧ pio ji̧ri̧iäpȩmo̧, ji̧dë u̧i̧ chjadëdëri̧ cjo̧ro̧paji̧ri̧ pio ji̧ri̧iäpȩmo̧.
27Ado Jechu judi pumȩ pio ji̧ri̧iäpȩmo̧ ni̧bä chjaoa̧ nö̧ta, iei̧ cja̧rȩmȩrȩ, pume buba chjareräyi̧ iei̧ pio jini̧ to̧bari̧ ëna̧diärëreyi̧nȩ:
—Ütë tjamo̧ pio judi chjadëri̧ a̧dotädejȩ pio mȩa ararëreyi̧ iei̧ pio ji̧, pio mȩa chuchu yürürëreyi̧ iei̧ pio ji̧ —yo̧yi̧rȩ ëna̧diäa̧nȩ.
28Jabo Jechu judi pio ji̧ ta̧rëa̧ oaiä, ja̧di ta̧rëri̧ dëbë yo̧a̧dejȩ:
—Jabo damȩ iei̧, ji̧dë u̧i̧ chjadëri̧ a̧dotädejȩrȩ jibëa̧ ma̧ȩ oa ta̧rëji̧ri̧ pio ji̧ri̧, jibëa̧ ma̧ȩ pio ju̧i̧ ta̧rëdiäji̧ri̧ pio ji̧ri̧ —dëbë yo̧a̧dejȩ.
Na̧rȩrea̧ ma̧ȩmi̧ da oa yürürëremȩdejȩrȩ pumȩ ji̧ri̧ Jechu judi Jona̧ pio ju̧i̧ chjiari
Mateo 12:38-42; Marco 8:11-12
29Ado pumȩ buba judiro̧ ji̧dë u̧i̧ ji̧ra̧pe baga̧rä, ja̧di ta̧rëri̧ yo̧rëremȩdejȩrȩ Jechu judi:
—Jabechji̧ pio yaba̧ domȩ oa cjo̧ro̧ji̧ri̧ pio mȩnȩro̧, chjai̧dë tjamo̧nȩrȩ —yo̧a̧dejȩrȩ—. Jabechji̧ Ütë tjamo̧ pio ju̧i̧ putu jura̧ a̧dë chami̧ dari̧ a̧dë jo̧rȩtarenȩro̧jo̧ȩ. Jabechji̧ na̧rȩrea̧ pio ju̧i̧mo̧i̧ jo̧rȩtanȩrȩ. Na̧rȩrea̧ pio ju̧i̧mo̧i̧ jo̧rȩtaji̧ri̧rȩ datämi̧ cjianȩrȩ. Jabo yo̧requededibe —yo̧a̧dejȩrȩ—. Eami̧ oa na̧rȩrea̧ oa yürüdëparequededibe, jabo Jona̧ quȩmȩrea̧ pio ju̧i̧ chjiari maea na̧rȩrea̧ oa yürüparequededibe —yo̧a̧dejȩrȩ—. 30Danȩrȩ, Jona̧ judi tjarari̧ do chjätä ëte chjätärërea̧ üdë na̧rȩrëremȩdejȩrȩ Niniveräpȩ cjo̧ro̧ji̧ri̧ pio ji̧ri̧. Tjamo̧ davä. Judiro̧, Jona̧ judi chjätärërea̧ pio ju̧i̧ chjiari ta̧rëa̧ oaiä, 'jabechji̧ Ütë tjamo̧ pio judi tjamo̧ri̧ chjadüa̧ oa ma̧na̧diibëda' quëna̧ jo̧rȩtarëreji̧ri̧dirȩ. Ado danȩrȩ, Pumȩrȩ Ara̧ Tjamo̧ pio judi chjätäpea̧ üdë peaja̧di na̧rȩpadidibe. 'Aja̧, Ütë tjamo̧ judi tjamo̧ri̧ chjadüa̧ oa ma̧na̧diibëda' quëna̧ jo̧rȩtapea̧ oa na̧rȩpadidibe peaja̧di. 31Jabo cjäri̧ manȩrȩ jabo. Ji̧dë ma jiadanȩro̧coe. Ado pio ju̧i̧iä ütarapea̧ domȩ ju̧i̧iä ado cja̧rȩmo̧rȩ peaja̧di aechide yo̧pani̧dibe. Tjamo̧ davä. Ütë tjamo̧ pio judi pumȩ ütëbodärä oa ütarapea̧ domȩ ju̧i̧iä, jabechji̧ Cheba quȩmȩräpȩ cjo̧ro̧rëreji̧ri̧ pio ji̧ri̧ ja̧ ütërëreyi̧ pio jini̧borë cjitëpanȩ. Pio jini̧borë cjitëpanȩ pio yaba̧ domȩ oa cjo̧ro̧ji̧ri̧ pio dibëiäpȩmo̧ aechide yo̧pea̧ oa. Jabechji̧ ni̧bäpanȩ mȩnȩro̧ chjuari̧ jiada̧ pio ju̧i̧ chjiari. Danȩrȩ, pio jiro iei̧ pio jini̧ jachi tjamo̧räpȩ cjo̧ro̧rëreyi̧borë, jabechji̧ goë dae järëreyi̧venȩjȩ Icharaita ja̧ ütë pio ju̧i̧, Charomo̧ quȩmȩ pio ju̧i̧. Jabechji̧ pio ju̧i̧iä chjadëri̧ ta̧rëpea̧ oa, pio ju̧i̧iä urëdi oa jo̧rȩtarea̧ oa ta̧rëpea̧ oa, go̧düdärärëreyi̧venȩ jachi tjamo̧ri pio judiri. Jabo cjäri̧ manȩro̧coe —yo̧a̧dejȩrȩ—. Charomo̧ pio ju̧i̧ u̧i̧ ba chiamȩ pio ju̧i̧ irä ta̧rëji̧ri̧borë, Charomo̧ judi dabarërea̧ pio ju̧i̧iä ji̧dë u̧i̧ dabamȩ pio ju̧i̧ irä ta̧rëji̧ri̧borë jiadarenȩro̧coe. Ado pio ju̧i̧iä cjitëpanȩ pio jiro ütërëreyi̧ pio jini̧ pio dibë aechide yo̧pea̧ oa ütarapea̧ domȩ ju̧i̧iä —yo̧a̧dejȩrȩ.
32Ado ji̧dë u̧i̧ yo̧mȩrȩ yo̧a̧dejȩrȩ:
—Ado danȩrȩ, Niniveräpȩ cjo̧ro̧rëreji̧ri̧ pio judiro̧borë cjitëpadirȩ pio dibëiäpȩmo̧ aechide yo̧pea̧ oa —yo̧a̧dejȩrȩ—. Tjamo̧ davä. Ütë tjamo̧ judi pumȩ ütëbodärä oa ütarapea̧ domȩ ju̧i̧iä, jabechji̧ Niniveräpȩ cjo̧ro̧rëreji̧ri̧ pio judiro̧borë cjitëpadirȩ pio dibëiäpȩmo̧ aechide yo̧pea̧ oa. Jabechji̧ judiro̧ Jona̧ quȩmȩrea̧ pio ju̧i̧ ta̧rëa̧ oaiä, chjaodëri̧ ano̧ mire jo̧rȩtaji̧ri̧pea̧dirȩ. Jabo mȩnȩro̧ Jona̧ quȩmȩrea̧ pio ju̧i̧ u̧i̧ ba chiamȩ pio ju̧i̧ irä daji̧ri̧borë, mȩnȩro̧ pio ju̧i̧ u̧i̧ ba chiamȩ pio ju̧i̧ irä ta̧rëji̧ri̧borë, cjäri̧ manȩro̧coe, mȩnȩro̧ chjaodëri̧ ano̧ mire jo̧rȩtatärea̧ ji̧, ano̧ mire jo̧rȩtadë manȩrȩ pio coa chjiari. Ado pio ju̧i̧iä cjitëpadirȩ pio dibëiäpȩmo̧ aechide yo̧pea̧ oa —yo̧mȩrȩ ni̧bä chjaorëremȩdejȩrȩ Jechu judi.
Dibëa̧ dacho üdë, jabechji̧ dibëa̧ icjara ja̧ tataparea̧mi̧ dade
Mateo 5:15; 6:22-23; Marco 4:21; Uruca 8:16
33Ado Jechu judi ji̧dë u̧i̧ ni̧bä chjaomȩrȩ a̧de ni̧bärëremȩdejȩrȩ pio jȩa chjiari coëma cjiari̧ quëna̧pea̧ oa. Aja̧, judiro̧ pio jȩa chjiari ji̧dë u̧i̧ tjamo̧i̧ cjiari̧ dabapea̧ oa, jabechji̧ na̧rȩrea̧ ma̧ȩmi̧ dara̧ ni̧bä chjaorëremȩdejȩrȩ jënȩ a̧ra̧ano̧a̧ pio ju̧i̧ chjiari, tatami̧ darä jo̧rȩta tänȩrea̧ ma̧ȩ pio ju̧i̧ chjiari. Ado ja̧di ta̧rëri̧ yo̧a̧dejȩrȩ:#11:33 Judio judiro̧ na̧rȩrea̧ pio ju̧i̧ ji̧dë ma jo̧rȩtarëreji̧ri̧dirȩ. Aja̧, ji̧dë ma na̧rȩ chjaotä earëreji̧ri̧diro̧jo̧ȩ Jechu ju̧i̧. Jabo judiro̧ ja̧di dari̧ jo̧rȩtachea oa, na̧rȩrea̧ oa ji̧dë u̧i̧ datämi̧ cjiachea oa, jabechji̧ pio yoa ma̧ȩbo a̧de ni̧bä chjaorëremȩdejȩrȩ Jechu judi. Aja̧, judiro̧ pio jȩaiä ta̧rëa̧ ma̧ȩ pio ju̧i̧iä ji̧dë u̧i̧ carupë jo̧rȩtapea̧ oa, pio jiro ma̧ȩ oaiä ji̧dë u̧i̧ urëdi oa jo̧rȩtapea̧ oa, judiro̧ pio jȩa chjiari ji̧dë u̧i̧ dabapea̧ oa, pio yoa ma̧ȩbo a̧de ni̧bä chjaorëremȩdejȩrȩ. Aja̧, eami̧ na̧rȩrea̧ oa a̧de dadëa̧räbo ji̧dë u̧i̧ dabapatä eamȩrȩ yo̧rëremȩdejȩrȩ.
—Danȩrȩ, eami̧ pumȩ judi tataparea̧ pio ju̧i̧ cjitëparȩrä, jabechji̧ goadidë madejȩ. Canari boi̧dë yara̧ a̧de inë chji̧dädëdejȩ jabo chjadëri̧ da mirerea̧mi̧ dari̧ cji̧dädejȩ chjadë maearä, bëräpȩ yu̧a̧ji̧ri̧ pio judiro̧ chjadëri̧ da mirerea̧ dapea̧ oa tata pio ju̧i̧iä. Ado danȩrȩ, peaja̧dimi̧ dari̧ japea̧requededibe —yo̧a̧dejȩrȩ—. Jabechji̧ cüdë a̧ra̧ano̧a̧ pio ju̧i̧ goadidëa̧reconȩ jabo chjadë maearä cji̧dämi̧ dari̧ japea̧reconȩ mȩnȩro̧ chjadëri̧ dabaparea̧mi̧ dari̧. 34Danȩrȩ, dibëa̧ dacho üdë tataparea̧mi̧ dade. Ado dibëa̧ dacho üdë chjadërä judi, jabechji̧ tatami̧ darä jo̧rȩtanȩrȩ. Jabo dibëa̧ dacho üdë chjadëdërä judi, cjäri̧ manȩrȩ, bagönȩmi̧ darä jo̧rȩtanȩrȩ. 35Ado pio ju̧i̧iä yo̧requededibe mȩnȩro̧ oëra̧ jo̧rȩtachea oa —yo̧a̧dejȩrȩ—. Na̧e chiachji̧vä. 'Jabechji̧ tatami̧ darä jo̧rȩtamȩquëda' quëna̧ji̧ri̧borë bagönȩmi̧ darä jo̧rȩtapai̧ danȩrȩ. 'Tjamo̧i̧ cjiari̧ baämȩ ma̧ȩrä cjo̧ro̧mȩquëda' quëna̧ji̧ri̧borë oëra̧ quëna̧pai̧ danȩrȩ. Ado pio ju̧i̧iä jabechji̧ na̧e chiachji̧vä mȩnȩro̧ bagönȩmi̧ darä jo̧rȩtachea oa, tatami̧ darä jo̧rȩta tänȩmȩ ma̧ȩ oa jiadachea oa. 36Jabechji̧ mȩnȩro̧ tjamo̧ri̧ ta̧rë ja̧borä judi, cüdë a̧ra̧ano̧a̧ ma̧ȩrä tjamo̧ri̧ cjo̧ro̧rä judi, jabechji̧ tatami̧ darä jo̧rȩtariä cjo̧ro̧panȩrȩ, tataparea̧ üdë goae tarari̧ tatami̧ darä, bagönȩdë mami̧ darä —yo̧mȩrȩ ni̧bä chjaorëremȩdejȩrȩ Jechu judi na̧rȩrea̧ ma̧ȩmi̧ dara̧ judiro̧ oëra̧ jo̧rȩtachea oa.
Jechu judi aechide yo̧rëremȩdejȩrȩ pjaricheo pio ji̧ri̧, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧bo
Mateo 23:1-36; Marco 12:38-40
37Ado Jechu judi ni̧bä chjaoe cjiadiäa̧rä, pjaricheo pio judi cja̧rȩmȩrȩ yabërëremȩdejȩ jibëa̧ bëräpȩ jätä, pio jȩa nö̧ta ëba juratä. Ado pio ju̧i̧iä jäa̧de Jechu judi. Ado bërä yu̧a̧därä ëte, chadäräa̧de mechjaräpȩ. 38Jabo Jechu judi chjadëri̧ joadëa̧ oaiä, jibëa̧ ichi oa jurabea yaboi̧ chjadëri̧ joadëa̧ oaiä, cjäri̧ made, ana̧ri̧ jo̧rȩtamȩpea̧de pjaricheo judi, dacho bëremi̧ cjiami̧ dari̧ jo̧rȩtamȩrȩ#11:38 Pjaricheo judiro̧ oëra̧ jo̧rȩtarëreji̧ri̧dirȩ. 'Aja̧, cüdë jurabea yaboi̧ ca̧ ichi oa joadërä judi, Ütë tjamo̧ judi jiadapadicoada, cjäri̧ri̧ cjia dadëpadicoada' quëna̧ jo̧rȩtarëreji̧ri̧dirȩ.. 39Ado pio ju̧i̧iä Jechu judi na̧rȩrea̧ ma̧ȩmi̧ dara̧ ni̧bä chjaoa̧dejȩ, pjaricheo ütëbo oa jo̧rȩtamȩrȩ:
—Danȩ, pio mȩnȩro̧, pjaricheo pio judiro̧ ji̧dë ma järinȩrȩ davä dibëa̧ ichi oa joapea̧ ji̧. Jabo cjäri̧ manȩrȩ, jëdërea̧ oa jabomo̧ apëri joami̧ dari̧ japanȩrȩ. Ae jararea̧ oa jabomo̧ dairi joami̧ dari̧ japanȩrȩ. Mȩnȩro̧ tjori ja̧bo chjadëri̧ joami̧ dari̧ japatärea̧ ji̧, japadë manȩrȩ. Ado pio ju̧i̧iä mȩnȩro̧ pumȩ chjadë tjamo̧mi̧ dari̧ cjo̧ro̧räbo, jabechji̧ a̧dë chjäte cjari̧dami̧ dade dibëa̧ tjo üdë. Ma̧i̧ da i gȩrȩ chiami̧ dari̧ cjiade. Ado pio ju̧i̧iä järi tjamo̧nȩrȩ chjai̧dë pio ju̧i̧ japapea̧ ji̧, dibëa̧ pumȩ pio ji̧ri̧iä baë mitëpea̧ ji̧. Jabechji̧ mȩnȩro̧ dairi pio judirimo̧ chjadëmi̧ daräbo, jabechji̧ dami̧ti̧ oa baë mitë chjaonȩrȩ dibëa̧ pumȩ pio ji̧ri̧iä, dibëa̧ tjori ja̧ üdë ma̧i̧ da cjari̧dami̧ da tara. 40Jabo cjäri̧ manȩrȩ, japëtaraji̧ri̧nȩrȩ mȩnȩro̧ chjadëri̧ jo̧rȩtadë tara —yo̧a̧dejȩrȩ—. Danȩrȩ, Ütë tjamo̧ judi, dëdë, ibëa̧ icjara dairi ja̧ pio ju̧i̧ chjiari bücjüri̧ cjiade. Ado pio ju̧i̧iä ibëa̧ icjara oa jida̧ üdë, ibëa̧ icjara oa joa̧ üdë, jabechji̧ ba chiade. Jabo danȩrȩ, peaja̧di bücjüri̧ cjiade tjori ja̧ pio ju̧i̧bo. Ado pio ju̧i̧iä tjori ja̧bo chjadëri̧ jidapea̧de, tjori ja̧bo chjadëri̧ joami̧ dari̧ japapea̧ maeade. Jabechji̧ ibëa̧ icjara pio ju̧i̧ pearä judi jëdano̧rëremȩ pio judi peaja̧di ibëa̧ tjo pio ju̧i̧bo jëdano̧rëremȩdejȩ. 41Ado pio ju̧i̧iä yo̧requededibe —yo̧a̧dejȩrȩ—. Dibëa̧ tjori ja̧bo chjadëri̧ jidachji̧vä chjö̧na̧i̧ti̧ oa cjäri̧ ja̧boji̧ri̧ pio ji̧ri̧iäpȩmo̧ chjadëri̧ yürüa̧ oaiä. Ado mȩnȩro̧ o ji̧ri̧iäpȩmo̧ chjadëri̧ yürüa̧ oaiä, mȩnȩro̧ dibëa̧ chji̧ra̧ chjadëri̧ jo̧rȩta ëte yürüa̧ oaiä, jabechji̧ i gȩrȩ chiamȩ ae jararea̧ pio ju̧i̧ tjori ja̧bo chjadëri̧ joami̧ dari̧ japapanȩrȩ. Tjamo̧ davä. Mȩnȩro̧ o ji̧ri̧iäpȩmo̧ tjamo̧ri̧ yürütämi̧ cjiaji̧ri̧rȩ yürüa̧ oaiä, jabechji̧ igȩrȩ chiamȩ jëdërea̧ tjori ja̧bo chjadëri̧ joami̧ dari̧ japapanȩrȩ, goadëji̧ri̧ pio ji̧ri̧ chjadëri̧ ëba goa̧ pio ju̧i̧iä —yo̧a̧dejȩrȩ.
42Ado Jechu judi ji̧dë u̧i̧ yo̧mȩrȩ ja̧di ta̧rëri̧ a̧de yo̧rëremȩdejȩrȩ pjaricheo pio ji̧ri̧iäpȩmo̧:
—Danȩrȩ, a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧ —yo̧a̧dejȩrȩ—. Danȩrȩ, järi tjamo̧nȩrȩ davä Ütë tjamo̧ ja̧ oa cja̧rȩmȩ oa china̧chjari̧ tutipea̧ ji̧, Ütë pio ju̧i̧iäpȩmo̧ yürümi̧ dari̧ japapea̧ oa. Jabechji̧ mȩnȩro̧ dibëa̧ tjadoro eami̧ jurarea̧ mirerea̧ boi̧chji̧ oa mitërä, piodai̧mi̧ da pio ju̧i̧ mitërä, jabechji̧ järi tjamo̧nȩrȩ davä, o oa china̧chjari̧ tutimi̧ dari̧ tutipea̧ oa, Ütë tjamo̧ pio ju̧i̧iäpȩmo̧ yürümi̧ dari̧ japapea̧ oa. Jabo cjäri̧ manȩro̧jo̧ȩ, ja̧di dari̧ japaji̧ri̧borë ji̧dë u̧i̧ ba chiamȩ ma̧ȩ pio ju̧i̧ a̧dë jo̧rȩte chjaorenȩro̧jo̧ȩ. Tjamo̧ davä. Dibëa̧ pumȩ pio ji̧ri̧ coëma cjiari̧ japatärea̧ ji̧, ado Ütë tjamo̧ pio ju̧i̧ tjamo̧ri̧ eatärea̧ ji̧, japadë manȩrȩ jabo ba chiamȩ pio ju̧i̧ a̧dë jo̧rȩtarenȩro̧jo̧ȩ. 43Ado pio ju̧i̧iä yo̧requededibe. Jabechji̧ Ütë tjamo̧ pio judi tänȩa̧ oa a̧dë chjäte uapai̧ darea̧ üdë acji cjatäpadidibe pjaricheo pio ji̧ri̧iäpȩmo̧.
Ado danȩrȩ, pio yoa ma̧ȩbo a̧de yo̧requededibe —yo̧a̧dejȩrȩ Jechu judi—. Danȩrȩ, 'pumȩ ba chia tjamo̧quëda' quëna̧ jo̧rȩtanȩrȩ pio dibë chjiari. Jabechji̧ pio mȩnȩro̧ judiorë a̧doparea̧ bëräpȩ a̧doparä, ado mȩnȩro̧ eami̧ charea̧räpȩ chjadëri̧ chatärea̧ ji̧, cjäri̧ manȩrȩ, charea̧ ba chia maearäpȩ chapea̧ ji̧ järi tjamo̧nȩrȩ, o judiro̧ pio dibëiäpȩmo̧ ba chia dapea̧ oa. Ado mȩnȩro̧ gatë tänȩrea̧ bëräpȩ järä, pio dibëiäpȩmo̧ ba chia daji̧ri̧rȩ jeatä ea tjamo̧renȩro̧jȩrȩ pumȩ ji̧ri̧. 44Tjamo̧ davä, uapai̧ dari̧ cjo̧ro̧nȩrȩ. Jabechji̧ a̧dë chjäte uapai̧ darea̧ üdë acji cjatäpadidibe —yo̧a̧dejȩrȩ—. Danȩrȩ, oëra̧ti̧ oa cjiamȩ pjatë puëmi̧ dari̧ cjianȩrȩ mȩnȩro̧. Ado pumȩ judiro̧ pio dibë chjiari na̧e chiadëji̧ri̧rȩ dibëa̧ uëmo̧i̧ a̧dë chjätämi̧ dari̧ dëbëdiädiro̧dibe, 'ëteräpȩ ju̧ri̧ ma̧i̧ da jerepea̧dida' quëna̧ dabadëji̧ri̧rȩ. Jabechji̧ mȩnȩro̧ a̧dë chjäte chjai̧dëpe bagaräbo, jabechji̧ pio dibë chjiari tjamo̧ri̧ dabadëji̧ri̧rȩ dadiro̧dibe pumȩ judiro̧ —yo̧a̧dejȩrȩ Jechu judi.
45Jabo cja̧rȩmȩrȩ, Moicherë go̧ȩparërea̧ ma̧ȩ oa a̧ra̧ano̧mȩ pio judi pio ju̧i̧ ta̧rëa̧ oaiä, yo̧a̧dejȩ Jechu ju̧i̧:
—Jabo cjäri̧ marenȩibe, mȩnȩ ja̧di ta̧rëri̧ yo̧a̧ oaiä, pio ibëiäpȩmo̧ aechide yo̧renȩibe —yo̧a̧dejȩ.
46Ado Jechu judi dëbë yo̧a̧dejȩ:
—Tjamo̧ davä. Pio dibëiäpȩmo̧bo acji cjatäpadidibe a̧dë chjäte uapai̧ darea̧ üdë, Moicherë go̧ȩparërea̧ ma̧ȩ oa a̧ra̧ano̧ji̧ri̧ pio dibëiäpȩmo̧bo —yo̧a̧dejȩrȩ—. Jabechji̧ mȩnȩro̧ Ütë tjamo̧ ja̧ ma̧ȩ maea oa a̧ra̧ano̧tärea̧ ji̧, pumȩ judiro̧ chjadëri̧ ta̧rëdiärea̧mi̧ dari̧ a̧ra̧ano̧tärea̧ ji̧, cjäri̧ marenȩro̧jȩrȩ, ta̧rë japarea̧mi̧dë ma̧ȩ pio ju̧i̧ a̧de a̧ra̧ano̧ chjaorenȩro̧jȩrȩ. Ado mȩnȩro̧ ja̧di dari̧ a̧de a̧ra̧ano̧a̧ oaiä, jabechji̧ chacha tjamo̧ oa ara tänȩmi̧ dari̧ japarenȩro̧jȩrȩ. Jabo pio mȩnȩro̧ pio jiro ma̧ȩ oa ta̧rëdiätärea̧ ji̧, mȩnȩro̧ a̧de a̧ra̧ano̧a̧ ma̧ȩrä chjadëri̧ cjo̧ro̧tärea̧ ji̧, cjäri̧ manȩrȩ, ta̧rëdiädë manȩrȩ jabo o ji̧ri̧iäpȩmo̧ ma yo̧tarenȩro̧jȩrȩ ta̧rëdiäpea̧ oa. Jabo cjäri̧ madidibe, jaboti̧ri̧ baänȩrȩ. Ado pio ju̧i̧iä jabechji̧ a̧dë chjäte uapai̧ darea̧ üdë acji cjatäpadidibe peaja̧di —yo̧a̧dejȩrȩ.
47Ado ji̧dë u̧i̧ yo̧mȩrȩ ja̧di ta̧rëri̧ a̧de ni̧bä chjaorëremȩdejȩrȩ:
—Ado danȩrȩ, pio yoa ma̧ȩbo a̧de yo̧requededibe. Ütërë ea jana̧ chjadüa̧ oa ni̧bärëreji̧ri̧ pio ji̧ri̧ ja̧ icjararea̧ üdë idë a̧ra̧ oa cjiade ta̧dë cjararäpȩ ju̧ri̧. Ado pio jiro ta̧dë cjara oa chjadëri̧ jëdano̧nȩrȩ. Dibëa̧ ütëti̧rea̧ pio judiro̧ ja̧bo tänȩrërea̧ pio ji̧ri̧ ja̧ icjararemȩ üdë chjacjiamȩrä idë a̧ra̧ oa cjiapea̧ oa, chjacjiamȩri̧ jëdano̧nȩrȩ ta̧dë cjara pio ju̧i̧. Aja̧, pio jiro pumȩrea̧ chjö̧na̧i̧ oa ba chia jo̧rȩtaji̧ri̧mi̧ dari̧ jëdano̧renȩro̧jo̧ȩ pio ji̧ri̧ idë a̧ra̧rërea̧räpȩ. Jabo cjäri̧ marenȩro̧jȩrȩ, tjamo̧ri̧ ba chia jo̧rȩtadë marenȩro̧jȩrȩ. 48Jabechji̧ dibëa̧ ütëti̧rea̧ pio judiro̧ jo̧rȩtarërea̧mi̧ jo̧rȩtanȩrȩ peaja̧di. Danȩrȩ, ja̧bo tänȩrëreji̧ri̧diro̧jȩrȩ Ütërë ea jana̧ chjadüa̧ oa ni̧bärëreji̧ri̧ pio ji̧ri̧. Ado mȩnȩro̧, ¿yö̧ta dari̧ jo̧rȩtanȩrȩ? Yö̧ta dari̧ jo̧rȩtadë, peaja̧di ja̧bo tänȩrea̧ chji̧ra̧ jo̧rȩtarenȩrȩ. Peaja̧di ja̧bo tänȩa̧täreji̧ri̧renȩro̧jȩrȩ. Jabo cjäri̧ manȩrȩ, o judiro̧ pio dibë chjiari tjamo̧ri̧ dabadëchea oa, ji̧dë ma jëdano̧nȩrȩ Ütërë ea jana̧ chjadüa̧ oa ni̧bäji̧ri̧ pio judiro̧ idë a̧ra̧rërea̧räpȩ ju̧ri̧, jibëa̧ pjatë puëmi̧ da pio ji̧ri̧. Tjamo̧ davä. O judiro̧ pio dibë chjiari dabachea oa, 'Aja̧, Ütërë ea jana̧ chjadüa̧ oa ni̧bärëreji̧ri̧ pio judiro̧ ba chia dadëdiro̧da' quëna̧ dabachea oa, dibëa̧ tjoro ma̧i̧ da cjari̧darea̧ pio ju̧i̧ chjiari dabachea oa, jabechji̧ ji̧dë ma jëdano̧nȩrȩ, Ütërë ea jana̧ chjadüa̧ oa ni̧bärëreji̧ri̧ pio ji̧ri̧ ba chia dacji̧ quëna̧ japaji̧ri̧rȩ.
49Jabo danȩrȩ, a̧dë chjäte urëdi tjamo̧ oa jo̧rȩtamȩ Ütë pio judi ja̧di ta̧rëri̧ yo̧rëremȩde pio dibë chjiari: "Jabechji̧ chjadüparequededibe dibë a̧doji̧ri̧ pio ji̧ri̧. Ütërë ea jana̧ chjadüa̧ oa ni̧bäji̧ri̧ pio ji̧ri̧ chjadüparequededibe, ado cüdë mitëa̧ pio ji̧ri̧bo chjadüparequededibe. Ado dëdë, o ji̧ri̧ ja̧bo tänȩparenȩro̧jȩrȩ. Ado o ji̧ri̧ ma̧i̧ dari̧ conȩdaparenȩro̧jȩrȩ." Aja̧, ja̧di ta̧rëri̧ yo̧rëremȩde Ütë tjamo̧ judi. 50Ado pio ju̧i̧iä bape chjaoa̧ oa cjiapanȩrȩ —yo̧a̧dejȩrȩ Jechu judi—. Tjamo̧ davä. Dabu oa pearä judi pareapea̧ pio judiri yurori ni̧bärëreji̧ri̧ pio ji̧ri̧rea̧ ja̧ goe oaiä, Ütërë ea jana̧ chjadüa̧ oa ni̧bärëreji̧ri̧ pio ji̧ri̧rea̧ ja̧ goe pio oaiä bape chjaoa̧ oa cjiapanȩrȩ, dibëa̧ yaboi̧ cjo̧ro̧rëreji̧ri̧ pio judiro̧ goe gu̧rori̧ ja̧bo tänȩrërea̧ ba oa. 51Jabechji̧ Aberea̧ judi goe gu̧rori̧ ja̧bo tänȩa̧ oa cjiarëremȩde. Ado Aberea̧ pio judiri yurori coëma cjiari̧ cjo̧ro̧rëreji̧ri̧ pio judiro̧ no̧i̧dë tjamo̧rȩ ja̧bo tänȩa̧ oa cjiarëreji̧ri̧dirȩ peaja̧di Chacaria quȩmȩrea̧ pio judi cjo̧ro̧a̧rä yuro. Aja̧, Chacariarea̧ pio ju̧i̧ ja̧bo tänȩrëreji̧ri̧diro̧jo̧ȩ tjoro ju̧ri̧, Ütë tjamo̧ ja̧ bë, ado gu̧na̧rea̧ mechja tjoro ju̧ri̧. Ado pio judiro̧ ji̧ra̧ oa ja̧bo tänȩa̧ ba oa, jabechji̧ pio mȩnȩro̧ bape chjaoa̧ oa cjia mapanȩrȩ. Tjamo̧i̧ cjiari̧ yo̧requededibe —yo̧a̧dejȩrȩ—. Pio mȩnȩro̧, pio yaba̧mȩ yoaiä cjo̧ro̧ji̧ri̧ pio judiro̧ bape chjaoa̧ oa cjiapanȩrȩ dibëa̧ ütëti̧rea̧ pio judiro̧ Ütërë ea jana̧ chjadüa̧ oa ni̧bäji̧ri̧ pio ji̧ri̧ ja̧bo tänȩa̧ ba oa. 52Jabechji̧ Ütë tjamo̧ pio judi tänȩa̧ oa, a̧dë chjäte uapai̧ darea̧ üdë acji cjatäpadidibe Moicherë go̧ȩparërea̧ ma̧ȩ oa a̧ra̧ano̧ji̧ri̧ pio ji̧ri̧iäpȩmo̧bo —yo̧a̧dejȩrȩ—. Jabechji̧ mȩnȩro̧ Ütërë yo̧a̧ chja̧oerä yu̧a̧tärea̧ ji̧, yu̧a̧rea̧ dadëpanȩrȩ. Ado pumȩ judiro̧ no̧i̧dërë Ütërë yo̧a̧ chja̧oeräpȩ yu̧a̧tärea̧ ji̧, peaja̧di yu̧a̧rea̧ dadëpadirȩ pio mȩnȩro̧ yu̧a̧rea̧ joë ya oa tuti carami̧ dari̧ japea̧ oaiä, mȩnȩro̧ oëra̧ a̧ra̧ano̧ chjaoa̧ pio ju̧i̧iä —yo̧a̧dejȩrȩ.
53-54Ado Jechu judi ja̧di ta̧rëri̧ ni̧bä chjaoa̧ duri oa, go̧dürëremȩde. Jabo Moicherë go̧ȩparërea̧ ma̧ȩ oa a̧ra̧ano̧ji̧ri̧ judiro̧, ado pjaricheo pio judiro̧borë ërecjia tjamo̧pe bagarëreji̧ri̧diro̧jo̧ȩ. Ado pio judiri yurori järiji̧ri̧ tjamo̧pea̧dirȩ pio ju̧i̧ conȩdapea̧ ji̧, puëräpȩ choë cjatämi̧ dari̧ japapea̧ ji̧. Tjamo̧ davä. Judiro̧ iëno̧ë iëno̧ë cjia̧ pio ju̧i̧iä jabechji̧ puërä choë cjatämi̧ dari̧ japapea̧ ji̧ järiji̧ri̧ tjamo̧pea̧dirȩ. 'Jabechji̧ oëra̧ dëbë yo̧pai̧ dadiibëda, a̧ro̧rȩ pio ju̧i̧iäpȩmo̧ goae tarari̧ aechide yo̧rea̧mi̧ dari̧ oëra̧ dëbë yo̧pai̧ dadiibëda' quëna̧ jo̧rȩtaji̧ri̧rȩ iëno̧ iëno̧ cjiarëreji̧ri̧diro̧jo̧ȩ, dami̧ti̧ oa iëno̧ë ta̧rëji̧ri̧rȩ.
Currently Selected:
Lucas 11: Pume
Highlight
Share
Copy
Want to have your highlights saved across all your devices? Sign up or sign in
©2021 Global Partners, All Rights Reserved