Mateo 7
7
Pitapis mana juzganantsikpä Jesús yachatsinqan
Lucas 6.37-38, 41-42
1<<Tayta Dios mana juzgayäshunaykipä runa mayikikunata ama juzgayaytsu. 2Runa mayikita juzgayaptikiqa Tayta Diosmi qamkunatapis juzgayäshunki. Runa mayikita imanöpis yanapayanqaykimanmi qamkunatapis Tayta Dios yanapayäshunki. 3Ñawikikunachö jatunkaray qeru jatiraykaptinqa ¿imanirtä runa mayikikunapa ñawinchö ichiklla shuka jatiraykaqta rikapäyanki? 4Ñawikikunachö jatunkaray qeru jatiraykaptinqa ¿imanöparä niyankiman: <Ñawikipita shukata jipipäshayki>? 5¡Allish tukuq runakuna! Puntataqa ñawikikunachö kaykaq qerutarä jipiyay. Tsayrämi shumaq rikayanki runa mayikipa ñawinpita shukata jipiyänaykipä.#7.5 Kay textuchömi runa mayintsikpa jutsankunata ñawinchö kaykaq shukaman iwalatsin. Kikintsikpa jutsantsiktanam ñawintsikchö kaykaq qeruman iwalatsin. Ñawintsikpita qeruta jipinantsikpä nirqa jutsantsikkunata dëjanantsikpämi nin. Tsaynöpam tantiyatsimantsik jukta juzganantsikpa rantin kikintsikpa jutsantsikkunata dëjanantsikpä kanqanta.
6<<Sagrädu kaqtaqa allqukunata ama jitapuyaytsu. Perlasnikitaqa kuchikunata ama jitapuyaytsu. Jitapuyaptikiqa kuchikunam jaruyanqa y allqukunam kanir ushayäshunki.#7.6 Sagrädu kaqkuna y perlaskunaqa Tayta Diospa willakuyninmi. Kuchikuna y allqukunaqa Diospa contrankunam.
Mana ajayaypa Tayta Diosta mañakunantsikpä Jesús yachatsinqan
Lucas 11.9-13
7<<Mañakuyaptikiqa Tayta Dios qarayäshunkim. Ashirqa tariyankim. Punkuta takakuyaptikiqa kichapuyäshunkim. 8Mañakuq kaqqa chaskinmi. Ashiq kaqqa tarinmi.#Deut. 4.29; 2Crón. 15.2-4; Jer. 29.13. Punkuta takakuq kaqtaqa kichapunmi.
9<<Mayqaykitapis wamraykikuna tantata mañakuyäshuptiki ¿rumitatsurä aptaparkuyankiman? 10Pescäduta mañakuyäshuptiki ¿culebratatsurä qarayankiman? 11Qamkuna mana alli ruraq karpis wamraykikunata alli kaqllata qaraykäyaptikiqa ¿manatsurä ciëluchö kaykaq Papänikipis mañakuq kaqtaqa alli kaqkunata alistapanqa?#Juan 14.13-14; 15.7, 16; 16.23-24; 1Juan 3.21-22; 5.14-15.
Runa mayintsikta alli rikanapä Jesús yachatsinqan
Lucas 6.31
12<<Imanömi runa mayiki rikayäshunaykita munayanki, tsaynölla qamkunapis runa mayikita alli rikayanki.#Luc. 6.31. Tsaynö kawanapämi Moisés qellqanqanchö y profëtakuna qellqayanqanchöpis nin.
Kichki punkuman Jesús iwalatsinqan
Lucas 13.24
13<<Kichki punkupa yaykuyay. Anchu punkupa yaykuqkunaqa jatun nänipam infiernuman aywayan. Atskaqmi tsay punkupa yaykuyan. 14Peru kichki punkupa yaykuqkunam sïqa llanu nänipa gloriaman aywayan. Wallkaqllam tsay punkupa yaykuyan.
Llutan yachatsikuqkuna pï kayanqanpis
Lucas 6.43-44
15<<Profëta tukuqkunata cuidädutä chaskiyankiman. Paykunaqa üshanö shamurpis wanutsikuq löbunömi kaykäyan. 16Jachata wayuyninpita reqinqantsiknömi runakunatapis imanö kawayanqanta rikar reqintsik. Manam kashakunapitatsu üvata pallantsik ni cardonkunapitatsu hïgusta qorintsik. 17Alli jachaqa allitam wayun. Peru mana alli jacham sïqa mana allita wayun. 18Tsaynöllam alli wayuq jachaqa mana allitaqa wayuntsu. Mana alli wayuq jachapis manam allitaqa wayuntsu. 19Tsay jachataqa mutuskirmi ninaman qaykuntsik.#Mat. 3.10; Luc. 3.9. 20Jachata wayuyninpita reqinqantsiknömi runakunatapis imanö kawayanqanta rikar reqintsik.#Mat. 12.33.
Tayta Diosta cäsukuqkunalla paypa puntanman chäyänanpä Jesús yachatsinqan
Lucas 13.25-27
21<<Manam <Señor, Señor> niyämanqallanpitatsu ciëluchö kaykaq Papänïpa Mandakuyninman yaykuyanqa, sinöqa pay munanqannö kawaqkunallam. 22Juiciu finalchömi atskaq niyämanqa: <Señor, Señor, qampa willakuynikitam willakurqä. Tsaynöllam qampa jutikichö supaykunatapis qarqurqä. Tsaynöllam qampa jutikichö milagrukunatapis rurarqä>. 23Tsaynö niyämaptinmi nishä: <Qamkunata manam reqïtsu. ¡Jutsasapa runakuna, ñöpäpita witikuyay!>#Sal. 6.8.
Cäsukuq runa y mana cäsukuq runa imanö kayanqanpis
Lucas 6.47-49
24<<Ninqäkunata cäsuq runaqa qaqa jananchö wayita shäritsiq runanömi kaykan. 25Tsay wayiqa pasaypa tamyaptinpis, mayu atskayar chaptinpis y alläpa vientuptinpis manam juchunqatsu.
26<<Peru ninqäkunata mana cäsuq runam sïqa arëna jananchö wayita shäritsiq runanö kaykan. 27Tsay wayiqa pasaypa tamyaptin, mayu atskayar chaptin y alläpa vientuptinmi juchunqa. Tsaynöllam mana cäsuq runa pasaypa kuyapaypä kanqa>>.
28Jesús tsaynö yachatsiptinmi runakuna pasaypa espantakuyarqan. 29Manam ley yachatsikuq runakunanötsu yachatsirqan, sinöqa mas poderyuq karmi shumaq yachatsirqan.#Mar. 1.22; Luc. 4.32.
Currently Selected:
Mateo 7: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.