Gálatas 4
4
1Pipis wamrallarä karqa herencianta manam chaskinrätsu. Chaskinanpä kaykarpis esclävunöllam kaykan. 2Tsaymi wätaqninpa podernillanchörä kaykan papänin dispöninqan junaqyaq. 3Tsaynöllam noqantsikpis wamranö kar Moisés qellqanqan leykunapa poderninchö karqantsik.
4Promitinqan junaq chämuptinmi Tayta Dios Tsurinta mandamurqan. Payqa noqantsiknö yurishqa karmi tsay leykunapa poderninchö karqan. 5Tsaynö karqan leykunapa poderninchö kanqantsikpita salvamänantsikpämi. Tsaynöpam paypa wamrankunana kanantsikpä qorimarquntsik. 6Wamran kashqam Tsurin Jesucristo awninqan Espíritu Santuta#Juan 16.7. shonquntsikman Tayta Dios mandamurqan. Espíritu Santum Tayta Diosta imaypis nin: <<¡Abba, Papä!>>#Rom. 8.15-16. 7Tsaymi esclävunönatsu kantsik, sinöqa Tayta Diospa wamrankunanam kantsik. Wamranna karmi awnimanqantsik herenciata [Jesucristo raykur] chaskishun.#Rom. 8.17.
Wawqikunapä y panikunapä Pablo llakikunqan
8Qamkunaqa Tayta Diosta manarä reqirmi mana rasunpa kaq dioskunata sirviyarqayki. 9Kananmi sïqa Tayta Diosta reqiyanki y paypis reqiyäshunki. Tsaynö kaykaptinqa ¿imanirtä Moisés qellqanqan leykunata cumpliyta munar yapay esclävunö kayta munaykäyanki? 10Tsaymi qamkunaqa Israel runakuna respitayanqan junaqkunata, killakunata, watakunata y fiestankunata respitaykäyanki. 11Tsaynö kayaptikim pasaypa llakikü. ¿Ardëllätsurä Jesucristupa willakuyninta qamkunata yachatsirqü? 12Wawqikuna y panikuna, qamkunatam rugä noqa kanqänö qamkunapis kayänaykipä. Noqapis mana Israel runakunanöllam Moisés qellqanqan leykunapa poderninchötsu kä.#1Cor. 9.20-22.
Qamkuna allim chaskiyämarqayki. 13Musyayanqaykinöpis qeshyaynïpam#2Cor. 12.7. qamkuna kaqchö Jesucristupa willakuyninta willakurqä.#Hech. 16.6. 14Tsaynö qeshyaptïpis qarqayämänaykipa rantinmi angeltanörä y kikin Jesucristutanörä rikayämarqayki. 15Kananqa ¿imatä päsayäshurquyki? Ñöpataqa ñawikikuna jipina kaptinqa jipiskirmi ñawïman churapayämankiman karqan. 16Kananqa ¿Jesucristupa willakuyninta yachatsinqäpitaku conträ shäriyarquyki?
17Llutan yachatsikuqkunam niyan Dios munanqannö alli kawayänaykita munayanqanta. Peru tsaynö nirpis manam rasunpatsu alli kawayänaykita munayan, sinöqa noqakunata manakaqman churayämar kikinkuna yachatsiyanqanta chaskikuyänaykitam munayan. 18Rasunpa alli kawayänaykita munar yachatsiyäshuptikiqa allim kanman. Peru qamkunawan kaykaptï o mana kaykaptïpis tsaynölla yachatsiyäshunkiman.
19Kuyay wamräkuna, Jesucristunö kawayänaykita munarmi warmi qeshyakur ñakanqannö noqapis qamkunapä pasaypa llakikü.#Rom. 8.29; 2Cor. 3.18. 20¡Shumaq tantiyatsinäpä qamkuna kaqchö imanöllarä tikraskïman! Karuchö karmi ima ruraytapis puëdïtsu.
Agarman y Saraman iwalatsinqan
21 Moisés qellqanqan leykunapa poderninchö kayta munarqa ¿pay qellqanqankuna ima ninqantapis tantiyayankiku? 22Tsaychömi nin Abraham ishkay tsuriyuq kanqanta. Jukaq tsurinmi sirviqnin warmichö karqan#Gén. 16.15. y jukaq tsurinnam warminchö karqan.#Gén. 21.2. 23Sirviqninchö kaq tsurinqa manam Tayta Dios awninqan tsurintsu karqan. Peru warminchö kaq tsurinmi sïqa Tayta Dios awninqan karqan.
24Tsay warmikunatam ishkay pactuman iwalatsiypa tantiyatsishayki. Abrahampa sirviqnin Agarmi Sinaí jirkanö kaykan. Sinaí jirkachömi Israel runakunawan Tayta Dios pactuta rurar leyninkunata entregarqan. Tsaymi pipis tsay leykunapa poderninchö kar esclävunö kaykan. 25Arabiachö Sinaí jirkanömi Agar kaykan. Tsaynöllam Jerusalénpis y wamrankunapis kaykan.#4.25 Jerusalén y wamrankunaqa Moisés qellqanqan leykunata cäsur salvakuyta munaqkunam kaykäyan. Tsaynö kaykäyan Moisés qellqanqan leykunapa poderninchö karmi. 26Abrahampa warmin Saranam Tayta Dios ruranqan mushuq pactunö kaykan. Tsay pactuta Tayta Dios cumplir salvamashqam noqantsikpa markantsik ciëluchö kaq Jerusalén kanqa.
27Ciëluchö kaq Jerusalén atska wamrayuq kananpä kanqanpitaqa Tayta Diospa palabranmi nin:
<<Qolluq warmi, ¡kushikuy!
Wamrayki mana kaptinpis ¡kushikur cantay!
Runan jaqishqa karpis runayuq warmipita masrämi wamraykikuna kayanqa>>.#Isa. 54.1.
28Wawqikuna y panikuna, tsaynö kaptinmi noqantsikqa Sarapa wamran Isaacnö kar Tayta Dios awninqanta cumplinqanpita paypa wamrankuna kantsik.
29Peru Espíritu Santupa poderninwan yuriq Isaacta Agarpa wamran chikinqannömi kananpis Moisés qellqanqan leykunata cumplitsiqkuna chikimantsik.#Gén. 21.9. 30¿Manaku yarpäyanki Tayta Diospa palabran imata ninqanta? Tsaychömi Sara nirqan: <<¡Tsay sirviqtaqa wamrantinta ras qarquy! Tsay warmipa wamranqa manam wamrä Isaacwan herenciata rakipänakuyanmantsu>>.#Gén. 21.10.
31Wawqikuna y panikuna, noqantsikqa manam sirviq kaq warmipa wamrannötsu kantsik, sinöqa Sarapa wamrannömi.
Currently Selected:
Gálatas 4: qxo
Highlight
Share
Copy
Want to have your highlights saved across all your devices? Sign up or sign in
© 2002, 2008, Wycliffe Bible Translators, Inc. All rights reserved.