Nüxíraxü̃xü̃ ga popera ga Techarónicawa yexmagüxü̃ ga yaxõgüxü̃tanüwa namuxü̃ ga Pauru 3
3
1Rü yexguma taxuacüma wenaxarü petanüwa taxĩxgu, rü düxwa nagu tarüxĩnüe nax toxicatama Aténagu tarüchoxü̃.
2-3Rü nagu tarüxĩnüe nax pexü̃tawa tanamuxü̃ ga taenexẽ ga Timutéu nax pexü̃ íyadauxü̃ca̱x. Rü nüma nixĩ i Tupanaarü puracütanüxü̃ i wüxigu tomaxã puracüxü̃ nax nüxü̃ tixuxü̃ca̱x i ngẽma ore i mexü̃ i Cristuchiga. Rü yéma petanüwa tanamu nax pexü̃ nangü̃xẽẽxü̃ca̱x nax yexeraãcü peyaxõgüxü̃ca̱x rü aixcüma petaãẽgüxü̃ca̱x rü yemaacü taguma texé ga petanüwa nüxü̃ rüxoxü̃ca̱x ga yexguma yema guxchaxü̃gü pexü̃́ yexmagu. Erü pematama marü nüxü̃ pecua̱x nax guxãma i yixema nax yaxõgüxü̃ rü ngúxü̃ tá tingegü.
4Rü yexguma petanüwa tayexmagügu rü marü pemaxã nüxü̃ tixu nax ngúxü̃ tá pexca̱x ínguxü̃. Rü pema marü nüxü̃ pecua̱x nax aixcüma yemaacü pexü̃ naxüpetüxü̃.
5Rü yemaca̱x ga yexguma marü tama yáxna namaxã chaxĩnügu nax tama pechigaxü̃ chacuáxü̃, rü yemaca̱x düxwa Timutéuxü̃ yéma petanüwa chamu nax pexna yacaxü̃ca̱x rü aixcüma yixĩx nax peyaxõgüamaxü̃ i Tupanaarü ore. Yerü chaxoegaãxẽ rü bexmana Chataná rü chixexü̃gu pexü̃ nayixẽxẽ, rü yemaca̱x natüca̱xmamare chi nixĩ ga torü puracü ga petanüwa taxüxü̃.
6Natürü ñu̱xma nax ínanguxü̃ i Timutéu nax petanüwa ne naxũxü̃, rü mexü̃ i ore i pechiga ngéma ne nange. Rü tomaxã nüxü̃ nixu nax mea peyaxõgüxü̃ rü pegü pengechaü̃güxü̃. Rü tomaxã nüxü̃ nixu nax guxü̃guma toxü̃ pengechaü̃güãcüma toxna pecua̱xãchiexü̃. Rü tomaxã nüxü̃ nixu ta nax poraãcü wena toxü̃ pedaugüchaü̃xü̃ ngẽxgumarüxü̃ i toma rü ta wena pexü̃ tadaugüchaüxü̃rüxü̃.
7Rü ngẽmaca̱x, Pa Chauenexẽgüx, rü woo guxchaxü̃ toxü̃́ nax ngẽxmaxü̃ rü ngúxü̃ nax tingegüxü̃, rü poraãcü toxü̃ nataãẽxẽxẽ i ngẽma pexü̃ nax tacuáchigaxü̃ nax mea peyaxõgüamaxü̃.
8Rü ñu̱xma nax nüxü̃ tacuáchigaxü̃ nax aixcüma mea tórü Coriaxü̃́ peyaxõgüamaxü̃, rü poraãcü tataãẽgü.
9¿Rü ñuxãcü tá Tupanana moxẽ taxã naxca̱x i ngẽma taãxẽ i taxü̃ i toxna pexãxü̃? Erü aixcüma pegagu nixĩ i toxü̃́ nangẽxmaxü̃ i wüxi i taãxẽ i taxü̃ i nape̱xewa ya Tupana.
10Rü ngunecü rü chütacü rü tayumüxẽgü, rü Tupanana naxca̱x tacagü nax petanüwa toxü̃ nawoeguxẽẽxü̃ca̱x nax wena pexü̃ tadaugüxü̃ca̱x rü pexü̃ tarüngü̃xẽẽgüxü̃ca̱x nax yexeraãcü nüxü̃́ peyaxõgüxü̃ca̱x.
11Rü poraãcü tanaxwa̱xegü nax Tanatü ya Tupana rü tórü Cori ya Ngechuchu ya Cristu toxü̃ natauxchaxẽẽxü̃ nax wena petanüwa ítayadaugüxü̃ca̱x.
12Rü tanaxwa̱xegü nax tórü Cori ya Ngechuchu pexü̃ rüngü̃xẽẽxü̃ nax yexeraãcü pegü pengechaü̃güxü̃ca̱x rü guxü̃ i duü̃xü̃güxü̃ nax pengechaü̃güxü̃ca̱x, ngẽxgumarüxü̃ i toma rü poraãcü pexü̃ nax tangechaü̃güxü̃rüxü̃.
13Rü tanaxwa̱xegü nax tórü Cori ya Ngechuchu pexü̃ rüngü̃xẽẽxü̃ nax peãẽwa aixcüma mea peyaxõgüxü̃ca̱x rü norü duü̃xü̃gü i aixcüma mexü̃gü nax pixĩgüxü̃ca̱x rü nax nataxuxü̃ca̱x i perü pecadugü i nape̱xewa ya Tanatü ya Tupana i ngẽxguma wena núma naxũxgu ya tórü Cori ya Ngechuchu ya Cristu namaxã i guxü̃ma i ngẽma Tupanaarü Duü̃xü̃gü i Üünexü̃. Rü ngẽmaãcü yixĩx.
© 2022, Wycliffe Bible Translators, Inc. All rights reserved.