ZAKHARIA 8
8
Tuhan nen o Yerusalem hobuk wusugun iluk abok yagaisasikhe wene
1 Tuhan Omame Mondok Hokho mene a'nogo nen yi'nogo yagaisano iluk an noba yaganeti logolik mel ikhe, 2”An nen afuni o Yerusalem werek mene inoba nendawi hundik hilinginafi lagimo re, it inaselei mene o kota werek mene andoma inoba na'mage fikhi lagi o. Ma re, nendawi hundigen he An nen it Yerusalem mene leberisagain anggikhi lagi. 3An nebe sugulogo o An Nawi Yerusalem kota mondok horek mene a'nogoba wesimbik andoma logogin o. Nen, o Yerusalem andi re kota tiphogo hilingitu mene iluk inelu mondok logogun, nen Tuhan Omame Mondok Hokho mene Andom andi re Punu mondok Horek mene iluk ikhi logogun. 4O kota Yerusalem o silimo andoma re, hobuk hemi yamanugwi inom, ap yamanugwi inom andoma hurek logogun. A'nogo hurek wela'luk louwogeluk he sige tomukhogo laga logogun. 5Nen, ebekhe kwe o kota laga logogun kwe andoma re yenggerugwi magendek mene yele yafi logogun mene nen hoporogo hilingik logogun.
6A'nogo hilinglasigin mene andi faget it ap inunggulenu yogondak ineluk werek mene nen he, wene andi re hilinglasigin elo'lek anggagarek, oba nen An nen hilingisu lek mene ekhe werek lek. 7An nen he, nagainafuri o ekhema-ekhema it felelenghogo woginarek lagaukwakwe omanogo nen inagap telinabimbik, 8it inebe mo ero fikhiren inom, erumbul fikhiren inom woginarek wesumo re, it inebe nekhengge o Yerusalem logogun. It he An nagainafuri asumo re An he it ineisena Allah logogin. An nen he it inoba tiphogo hilingfisigik, higithogo ferinarek welagik ikhi logogin, ikhe ino,” iluk yaganete.
9 Tuhan nen At againafuri inoba ikhi logolik, ”Hinendawinggen wurikhogo logoni o! Yogondak he, o An Nawi ambotkwe wusugun mene ubule fogoin oba it nabi nen wene ugunem holhi lagagip mene a'nogo re yogondak ogo holhi lagebat andi. 10Nen, o andem oba oan asi wagi'le'ma re, afuni nen it ekhe yabu onggo faget hilingisuageluk yagaisigik, wam en habulik loageluk miminginafik, ikhi lagaikha lek, nen, it inaselei meneba nen ogore, inebe inendawinggen yamukhogo werek mene re lek aga. Andi nen he it ap ekhe nen ekhe inom lang-lang asuageluk hilingfisasigi andi, 11yogondak it inunggulenu yiba nen fena ineluk werek mene andoma re, An nen it attak inoba hilingfisikhi lagagi hakhogo re lek oba nen, we mondok hunikhogo ekhe hilingfisagain o. 12It he, inendawinggen fanoba nek awingge enggen feik lakfikhi logogun. Nen, it inagayo anggur enggen itik, inanggweang oba nen enggen ugu paligik, meiso pogoroba nen hokhorogo pelagisa wagik, ikhi logogin. It inunggulenu ari mene nen fena ineluk werek mene andoma inoba re An nen fanoabet fisikhi logogin aro. 13Yago, hit Israel hinap inom Yehuda hinap inom yoma sani! O attak-attak andoma nen engge it ap pok mene nen inane homan ekhe nen ekhe inoba figik, ekhe nen ekhe inoba figik hilingirik wagunem, ’It Yehuda mene inom, it Israel mene inom inoba enggin-fenggin agaikhe mene andoma hakhogo hat hoba ogo a'nogo aga logouwak!’ ikhi lagaukwaba nen, An nen hit telhinabumo it ap pok mene andoma nen ikhi logolik, ’It Yehuda inom, Yerusalem inom inoba fanotfisili'lago mene andoma hit hinoba ogo a'nogo hilinghinobagakhi logouwak! Ikhi logogun,’ iluk ikhi lagaikhanggere hiren hinailo agi'lek hinendawinggen hambukhogo logoni o!” ugunem holhi. 14Tuhan Omame Mondok Hokho mene a'nogo nen ikhi logolik, ”It inambu inombalagen An na'mage kwelafi lagaukwaba re An nen it inoba unggum mondok omamerogoat wogisikhi lagagi aro. An nen hilingisigin anggigirek mene a'nogo agam eti'legengge, hilingisigin anggigirek mene a'nogoat hilingiti lagagi. 15Oba nen he, yogondak An nen afuni Yehuda mene inom, Yerusalem mene inom fanoabet fisikhi lagi hilingi'mo re hinailo asu fuk. 16Hiren hilingiti logogun mene ebe re yi: Hiren hinane uogeluk halok he, eberogo mene nek hinagaila'lak inoba yagaisigik, nen, o wene katokhogo palharek oba omanogo nen wene tegeti logolik hinendawinggen se asu hak mene nek ikhi logolik higithogo tegeti logoino.#Ef. 4:25 17Hit hinagaila'lak inoba weak mene hilingfisogoin iluk inabok palu fuk. Nen, hineranhogo hinane nen lalogo hombuk palu fugat. An he, ineranhogo wene agarek mene inom tiphogo hilingitarek lek mene inom, ina'mageba hilingfisagarek mene inom andoma re nabit inoba fisikhi lagi o,” iluk yagaisugunem holhi.
18 Tuhan Omame Mondok Hokho mene a'nogo nen At againafuri faget wene yi'nogo yagaisano iluk an yaganeti logolik, mel ikhe: 19”Tugi enggaminogo nek mene inom fuap mene inom sabit mene inom nomolo mene inom, oba andoma re sumburu ninggi'lek inambe pok logolik hilingitarek mene oma re afuni Yehuda mene nen he, mondok inagaiyekhogo inanggiluk oba ebetu mondok logogun. Eberogo wene inom, fano liokhogo welagaikharek awene inom hinendawirogo logoni o!” iluk ikhe isikhe.
20 Tuhan Omame Mondok Hokho mene a'nogo nen ikhi logolik he, ”Inenggi ekhe wesigin meneba re afuni o kota yi awi ti awi logogun mene re it inebe hokhorogo o Yerusalem andogosi wesugun. 21It afuni o kota misik ekhe nen he it kota ekhe meneba ikhi logolik, ’Nit he, Tuhan Omame Mondok Hokho welagarek mene a'nogo fogerasi lambik he, Aren nit fanot ninobagauwageluk kino yagasi louwogen he, ninom logouwgen weni o!’ ikhi logogun. 22A'nogo yagaisugunem he, afuni hokhorogo inom it ekhe inunggulenu inomame werek mene inebe hokhorogoat inom o Yerusalem wesimbik, An Tuhan Nomame Mondok Hokho mene a'nogo fogetnafik, An nen fanorinabuageluk kino yaganetik, i waga logogun. 23Inenggi andem oba re, ap pok mene inebe nomolo nen mene re ap Yahudi mene misik ekhe ambit wesimbik oba yagati logolik, ’Nit ninesanggo holhunemen he, hit he hineisena Allah nen fanot hinobagali'lago ugunem holhi lago o, andi nen he, nirogo a'nogo hilingninobagaumo ambisangma enggen ugu helikhi logoilo, iluk anggikhi lago,’ ikhi logogun,” iluk Tuhan Omame Mondok Hokho mene a'nogo ane yaganetunem holhi.
Currently Selected:
ZAKHARIA 8: inohap
Highlight
Share
Copy
Want to have your highlights saved across all your devices? Sign up or sign in