MALEAKI 1
1
1On ma tona ni Tuhan tu si Maleaki sipalaluon tu halak Israel.
Holong ni roha ni Tuhan maradopkon Israel
2Didok Tuhan ma tu bangsoNia, “Sian najolo do Huhaholongi hamu.”
Tapi dialusi halahi do, “Bia ma he dibaen Ho manghaholongi hami?”
Dialusi Tuhan ma, “Nada he martinadohon si Esau dohot si Jakob? Huhaholongi do si Jakob dohot pomparanna, 3hape sego do rohangKu anggo mida si Esau dohot pomparannia. Huroncohon do tano partoran ni si Esau, jana Hupasahat tanona i tu angka binatang panyoro.”
4Sugari rupani didok halak Edom pomparan ni si Esau i, “Madung dironcohon angka hutanami, tapi bangunonnami ma i mangulahi,” jadi alusan ni Tuhan Na Markuaso i ma, “Haru pe dibangun halahi mangulahi, rumpakkononKu do i muse. Goaron ni halak ma halahi ‘Tano na durako’ dohot ‘Bangso na nimuruhan ni Tuhan sapanjangna.’ ”
5Idaon ni halak Israel ma i dohot mata ni halahi sandiri jana dokkonon ni halahi ma, “Na godang ma da antong Tuhan; salang tu ruar ni tano Israel pe lalu do kuasoNia!”
Koras dibaen Tuhan paingotkon angka malim
6Didok Tuhan Na Markuaso i ma tu angka malim, “Dipasangap anak ma amana, jana dipasangap naposo ma tuanna. Amangmu do Au; biasi nada dipasangap hamu Au? Tuanmunu do Au. biasi nada mabiar hamu mida Au? Dipalayas hamu Au, hape laing puluk muse do hamu manyapai, ‘Bia ma he hami baen palayaskon Ho?’ 7Songon on ma da dibaen hamu palayaskon Au. Dihaulkon hamu do sipanganon na so patut sihaulkonon di ginjang ni langgatanKu. Dung i disapai hamu ma, ‘Bia ma he hami baen na so hami parsangapi Ho?’ Hudok ma: Nayang do di rohamunu langgatanKi. 8Muda dihaulkon hamu tu Au binatang na mapitung sanga na marnyae, sanga na onyangon, adong he nada sala dietong hamu pangalaho na songon i? Cubo hamu jolo mangalehen binatang na songon i tu pamimpin! Pasti do nada sonang rohania manjagitsa jana nada denggan muse be baenonnia tu hamu, ninna Tuhan Na Markuaso.”
9Antong, hamu ale angka malim, cubo hamu ma jolo mangido tu Debata anso ibo nian rohaNia mida hita. Nada alusanNia tangiangmi, jana patunda ni dosamu sandiri ma sudena i. 10Didok Tuhan Na Markuaso i ma, “Sugari adong ma nian sian tonga-tongamunu, na giot manutup pintu, anso unang dipagara hamu api di langgatanKu di bagasan na so marguna. Nada jop rohangKu tu hamu, ninna Tuhan Na Markuaso jana nada jagitonKu haul sian tanganmu. 11Dipasangap angka bangso na di tano on do Au sudena. Sanga na di dia ditutung halahi do dupa laho pasangapkon Au jana dihaulkon halahi do angka haul na patut tu Au. Olo! sude do halahi pasangapkon Au!” 12Tapi anggo hamu madung marlayas goarKu dibaen hamu, hara ni hatamunu, “Langgatan ni Tuhan, madung marlayas bope na dihaulkon di ginjangna madung gabe haul na ramun.” 13Jana didok hamu do, “Ligi ma, maol na i!” Jana susa do Au dibaen hamu, ninna Tuhan Na Markuaso i, jana dihaulkon hamu do na ditangko, na onyangon, sanga na marnyae baen sihaulkonon tu Au. Sai jop ma he rohangKu manjagit i sian tanganmu? ninna Tuhan. 14“Hona bura ma pangicu na manghaulkon tu Au pahan-pahanan na so mararga, anggo adong dope pahan-pahanan na asing na dung dijanjihon humani tu Au! Angke Au do Raja Godang, jana sandok bangso do pasangapkon Au.”
Currently Selected:
MALEAKI 1: LAIAKB
Highlight
Share
Copy
Want to have your highlights saved across all your devices? Sign up or sign in
Indonesian Bible Society