Matéo 6
6
Jesús chacate ore ome pijmapié omenie
1Jé ca be ujetiga picotaque ua ome bátegoningárique. Uje uacai Dupade uje déji gaté a chiraja basocai uté enga a ca tẽrája ua to jne. 2-3Bamo arĩa uje ayoré dicotáreode ore isoca te iji ore aquiningaméone, jé iji ore ajesúode jnese. Ore gaidi tu gu ujetiga ore ujode ayoré chicota ore. Mu a ore chedu dajnéone picotaquéo uje a ca Dupade tẽrája ore to jne. Mu ujetiga asi bojórique ayoré jmatátique enga ca ango penomitique, bajõrapísirique uñeque. 4Apógu bátegoningáne marínga, bai Dupade a chiraja jne. Enga jé u uje a irasique ua jne. Enga a tẽrája ua jne.
Jesús cho ore quique ome picatecãraitigai isocade ome Dupade
(Lúcas 11:2-4)
5Ca oyo jnani táquechoquíode ujetiga acatecãchoi Dupade. Uje cachi ore imitiguéo uje ore chague iji ore iquéode uje ore catecã́ri Dupade iji ore aquiningaméone, jé aja guesode rĩ. Ore gaidi tu ujetiga ore ujode ayoré chicota ore gu. Mu a Dupade jé chedu ore gajnéone picotaquéo ome ore enga a ca tẽra cucháringome ore jne. 6Mu ujetiga acatecã́ri bai Dupade enga acája baguíjnai enga ajuru baquigade enga acatecã́ri Dupade iji. Dupade déji bari iji uté gu. Dupade chimo cucha pipoguiédode enga a chimo ua iji baguíjnai ajei jne uje gusu ua iji mu. Enga a jé u jne ujetiga chisi ome bataitique cucha ome ua.
7Eti acatecã́ri Dupade enga ca agota barúrigo iji jnumi. Uje agúpurayóde ore ome Dupade ore isoca uté gu. Ore jos eti Dupade tangaripísi ore gu ore uru dipeséode. 8Ca beyoi udore ore isocade to. Uacamóño uje cáma ãraracho, mu uacai Dupade e chiraja cuchade uje qué chona uaque. 9Jecute oyósi te ujetiga acatecãchoi Dupade:
Yocai Dupade á, uje bagúsiji gaté, Yisígo babai.
10Yocajéode u ujetiga jĩraque ãri báringai eduguéjna údi iji erámi uné. Yirajágo uje gaté unirisórone ore dopísi báyipiedie quigode. Enga apésabu yóguiji jnumi ujetiga yicoi báyipiedie quigode to jne.
11Apésabu to enga ca cucha pibotique chona yóguiji diri uné jnese.
12Acadígui yoquisijnaringuéone. Adi tu uje yicadíjoi yocujode ayoré ore isijnaringuéone to ome yoque.
13Ca ajuéga yógome páyipie gajnaréngueraque ujetiga yore yoquimánique. Enga ãraque yógome Satanás uje que áyipieraque ujñapegome yoque gu. Yirajágo báringai cuchábejna, báringai ujopíerãque. Uje yoqueduguéjnai a u ua iji deréjna pitade unojo jne. Amén.–
14Chejna unojo guesi enga cho dacajnaquéode quigode ome ore enga chojninga:
–Ujetiga acadíchoi uñane ate gajnaréngone ome uaque jne enga uacai Dupade uje déji guéode uéchai a chicadígui uacate gajnaréngone to jne. 15Mu ujetiga ca acadíchoi uñane ate gajnaréngone ome uaque enga uacai Dupade a ca chicadígui uacate gajnaréngone to jne.
Jesús chacate ore ome ore úringai uyatac
16Yirajágo uje ijoyatade ore edodie chísaja jnumi, uje ore gaidi tu gu ujetiga ore úringai uyataque pijóguiji ore. Enga jé u uje ore urasade chisi ore gáyode ome ore úringane Dupade anguresóño. Mu ca aracho ore to. Uje Dupade a ca tẽrája ore ome ore úringane uyatácho jne. Ore gajnéone a u ore ujode ayoréo icotaquéode jne. Enga jé gusu. 17Jé basa ua ujetiga o bayatáguiji ua enga aru bedodie, ariguétapo babai te rĩ. 18Enga ca bojórique ayoré chiraja ua ome báringárique uyataque. Jé edu bai Dupade uje chiraja badode. Cachodi a u jne ujetiga bai Dupade nína re ome ua enga a tẽrapója ua to jne rĩ.–
Dupade a cho danguresórone ore oré jne iji guéode uéchai
(Lúcas 12:33-34)
19Jesús jé chajnera dacajnaquéode údi enga chojninga:
–Ca acueyoi ujetiga ajéyo uacagúcharigo aja ñane gáyode iji erámone unojo. Uacamóño uje pugúchade jĩraque dijite enga jĩraque íjnongapo rĩ. A ca dijidírase mu socase ore toria. 20Mu omi tu ujetiga apemérañoji uacátegoningáringo ejode ujetiga Dupade tẽra cucha dipesérigo ome uaque jne iji gaté. Enga yirajágo uje que toque jne ujetiga Dupade guẽratique cucha dijite iji gaté. Oriechoquírique a ca dépoji jne rĩ. 21Ujetiga uacanguretigai déji Dupade guẽratique yui enga a uacáyipiedie jogadípise Dupade jne. A uacagúcha dipesérigo déji jnumi uné enga uacáyipiedie a ca jnoji jne.
Uje yocáyipiedie jogadípise Dupade enga díreca yoquejode
(Lúcas 11:34-36)
22Uaquedodie gajnúone u pibiotique ome uaque. Ujetiga uñeque edodie uchui, enga pañapísiji dajiritígo. 23Jé basa a gajnarénguei bedodie jne, enga a cho jne ujetiga agúsirásiji ijnangunúraque. Mu ujetiga bedo uchudie gajnarénguepo rĩ enga a apáñapísiji ijnangunua úringa guecorise jne.
Que toc ujetiga ayorérique chijnóra Dupade marínga, áyipieraque ca jnoji pláta paquesúraque
(Lúcas 16:13)
24Uacarajáyopise uje que togome jnanírique ujetiga doi darósõre gárerigo ore ajéningo jnese. Áyipie quigode a u jne uje chijnóra uñai, jé chetaque uñai. Isocai jé u uje a pésupúsu uñai áyipiedie jne, mu a chó uñeque áyipierigui gáningo jne. Enga jé gajnui tu uje a ca togome gosi jne ujetiga cháta Dupade, plátadie ore aja ñane ujetiga chijnóra ore jnese.–
Dupade chirodípise dabode ore jnese
(Lúcas 12:22-31)
25Jesús qué jno dacajnaquéode údi enga chojninga:
–Yingome uaque ujetiga ca oyo uacáyugu uaque ome uacabosode, uacajódode cucha, uacaguidedie cucha rĩ. ¿Ja ca cucha uñane qué déji ujetiga ejnáño uacáyipiedie aja? 26A uacai Dupade guẽracho uacabotígo ore ome uaque jne. Uacamóño chungúperenie to uje que guejnatígo cuse. Que ore chacápo cuchárique rĩ. Que ore iguíjnaringo cusapo rĩ. Mu uacai Dupade uje déji guéode uéchai átapiei udire enga guẽrate posode ome. ¿Ja Dupade chijnóra chungúperenie udire marínga, ca chijnorapisirase uaque? 27¿Ujetiga uaque gosi chejnápise dáyipierigui aja daquéraningai enga jé uté gosi quérãrásiji a? Úngare. Enga páyuguhebátigade jé ate jnese uje a yejnangorase yocáyipiedie aja marínga, que cuchárique tṍraji.
28¿Gotique gu a uje uacoyo uacáyugu uágome uacaborárigui? Uacamóño cucha asíguedie uje que ore chisa dejórique. Que ore pésapo daguidérigui rĩ. Mu jé ueradei. 29Enga udire sué eduguéjna cuchábi Salomón gai ome dahueratigai. Ueradei eduguéjna cuchábi Salomón iguidedie to nanique múñi. 30Dupade chosõre cucha asíguedie ome úringanie ueradei, uje jĩraque beta múñi. Jétapũrérase uacaguidérigui ujetiga chisi ome uaque. ¿Gotique gu a uje garósi uacanguretigai ome Dupade? 31Yuruode qui tu ujetiga ayáyo uaquedójnaringuéone ome uacacuegode cucha piboso, uacajótigo cucha ore. Jé chopome uacaguidedie rĩ. 32Erámi unirisórone uje que ore chiraja Dupade to enga ore edójnaringuéi gaite cuchade ome re. Mu uacajnengóri déji uje uacai Dupade u iji gaté enga uté chiraja ujetiga ajmátayo uágome cuchárique. Enga a chisi ome uacameserane cucha ome uaque jne. 33Ueradi tu ujetiga ejnáñope uágaja Dupade iroquéode bajaque enga jogadi u ujetiga uacasuté Dupade tẽrája uágome cuchade udore jnese jne. 34Jé ca uacáyipiedie déji dire uñai ome pujuré pipesudérigui. Mu jé eduyo yoquijogosṍri dire jogotodie pujuré uniji ujetiga amácho aja quigode. Chamáñaje pujuré uñanie sué yoquibai iji yoquiquei ujetiga yocáyipiedie déji to.–
Currently Selected:
Matéo 6: Ayore
Highlight
Share
Copy
Want to have your highlights saved across all your devices? Sign up or sign in
© 2021 Ethnos360