2 ESIDERAASI 11
11
Empungu
1Mu kiro ekyokubiri nalaba mu kirooto empungu ey'ebiwaawaatiro kkumi na bibiri, n'emitwe esatu, ng'eyambuka okuva mu nnyanja.#Laba ne Dan 7:3-4; Kub 13:1 2N'eyanjuluza ebiwaawaatiro byayo ku nsi yonna, nga ntunula. Embuyaga ne zigifuuwako nga ziva ku njuyi zonna, n'ebire ne bigikuŋŋaanirako. 3Mu biwaawaatiro byayo ne mumeramu ebiwaawaatiro ebirala ebyakyebereka, naye byo nga bitono ebinyoomebwa. 4Emitwe gyayo esatu gyali gyebase, wadde n'ogwo ogwawakati omunene okusinga emirala. 5Nga nkyatunula, empungu eyo n'ebuuka mu bbanga. N'efuga ensi yonna n'abantu bonna abagiriko. 6Ne ndaba bw'efuga byonna ebiri wansi w'eggulu, nga tewali ayinza kugiwakanya. 7Awo ne ndaba empungu eyo ng'eyimirira ku njala zaayo, n'egamba ebiwaawaatiro byayo nti: 8‘‘Mwenna temuzuukukira kumu, mwebake we muli, era muzuukuke mu mpalo. 9Emitwe gye giba gisembayo okuzuukuka.” 10Nalaba ng'eddoboozi lyali teriva mu mitwe gyayo, wabula mu kitundu ky'omubiri gwayo ekya wakati. 11Nalaba ebiwaawaatiro byayo ebyakyebereka nga biri munaana.
12Awo ne ndaba ekimu ku biwaawaatiro ku ludda olwa ddyo nga kisituka ne kifuga ensi yonna. 13Obuyinza bwakyo bwe bwaggwaawo, ne kiviirawo ddala, obutakyalaba na kifo we kibadde. Olwo ekiwaawaatiro ekirala ne kisituka, ne kifugira ebbanga ggwanvu. 14Obufuzi bwakyo bwe bwali bunaatera okuggwaawo, nga kinaatera okuvaawo nga kiri ekyasooka, 15eddoboozi ne likigamba nti: 16‘‘Ofuze ensi okumala ebbanga ggwanvu, kaakano wulira kye nkugamba nga tonnabulirawo ddala. 17Mu banaakuddirira, tewali anaafugira bbanga ggwanvu ng'eriryo, wadde ekimu ekyokubiri kyalyo.” 18Ekiwaawaatiro ekyokusatu ne kisituka, ne kifuga ng'ekyasooka, era nakyo ne kitaddayo kulabikako. 19Ne guba bwe gutyo ne ku biwaawaatiro ebirala byonna. Byasitukanga kinnakimu ne bifuga, ne bibula.
20Ne nnyongera okutunula. Bwe waayitawo akabanga, ebiwaawaatiro ebirala ku ludda olwa ddyo, nabyo ne bisituka okwefunira obuyinza. Ebimu ku byo ne bifugira akaseera katono, ne bibula. 21Ebirala ne bisituka, naye ne bitasobola kufuga. 22Olwo ne ndaba ng'ebiwaawaatiro ekkumi n'ebibiri ebinene, n'ebitono bibiri, tebikyaliwo. 23Ku mubiri gw'empungu ne kutasigala kantu okuggyako emitwe esatu egyebase, n'ebiwaawaatiro ebitono mukaaga.
24Ne nnyongera okutunula. Amangwago ebiwaawaatiro bibiri ku biri ebitono omukaaga, ne byeyawula ku birala, ne bidda wansi w'omutwe ogw'oku ludda olwa ddyo. Ebirala ebina ne bisigalayo gye byali. 25Awo ne ndaba ng'ebyo ebiwaawaatiro ebitono ebina byali byekobaana okusituka biwambe obuyinza. 26Ekimu ku byo kyasituka, naye ne kibula mangu. 27Ekyokubiri nakyo ne kisituka, ne kibula mangu n'okusinga ekyasooka. 28Ne ndaba nga n'ebiwaawaatiro ebitono ebibiri ebisigaddewo, nabyo byekobaana okwetwalira obuyinza. 29Byali bikyateesa, ogumu ku mitwe egyebase, ogwa wakati era ogusinga n'obunene, ne guzuukuka amangwago. 30Ne ndaba nga gwegattibwako emitwe emirala, 31ne gukyuka nagyo, ne gulya ebiwaawaatiro ebitono ebibiri ebyali biteesa okwetwalira obuyinza. 32Omutwe ogwo ne gufuna obuyinza okufuga ensi yonna, bonna abagirimu ne gubafugisa bukambwe, ne gukozesa obuyinza bungi okusinga obw'ebiwaawaatiro byonna ebyasooka okufuga. 33Ebyo bwe byaggwa, ne ndaba omutwe ogwa wakati nga guggwaawo amangwago, ng'ebiwaawaatiro bwe byaggwaawo. 34Emitwe ebiri ne gisigalawo, era nagyo ne gifuna obuyinza okufuga ensi n'ebigiriko. 35Naye nalabira awo ng'omutwe ogw'oku ludda olwa ddyo, gumira ogw'oku ludda olwa kkono. 36Awo ne mpulira eddoboozi erigamba nti: ‘‘Ezera, tunuulira ekikuli mu maaso, okyetegereze.”
37Bwe natunula ne ndaba ekifaanana empologoma etaamye, n'eva mu kibira ng'ewuluguma. Ne mpulira ng'egamba empungu nti: 38‘‘Wulira ggwe bye nkutegeeza. Katonda Atenkanika akugamba nti 39ggwe wekka ggwe osigadde ku nsolo ennya ze nalonda okufuga ensi yange, enkomerero yaayo eryoke etuuke. 40Ggwe nsolo eyookuna, era owangudde endala zonna. Ebbanga ly'omaze mu buyinza, ensi ogifuzizza ntiisa, kubonyaabonya na bulimba, 41awatali kufa ku mazima n'akatono. 42Wabonyaabonya abateefu, n'olumya abaagala emirembe, wakyawa aboogera amazima, n'oyagala abalimba. Wazikiriza amaka g'abali obulungi, n'omenya ebigo by'abatakukolanga kabi. 43Katonda Atenkanika amanyi bulungi obujoozi bwo, n'okwekulumbaza kwo. 44Oyo ayinza byonna yeetegerezza ensi gye yateekawo. Ebiseera eby'omulembe guno biweddeyo, enkomerero etuuse. 45Kale ggwe empungu, bula oleme kuddayo kulabika. Bula n'ebiwaawaatiro byo ebinene eby'entiisa, n'ebitono ebibi ennyo, n'emitwe gyo egy'ettima, n'amaala go amabi, n'omubiri gwo gwonna ogutalina mugaso n'akatono. 46Ensi yonna eriwona obukambwe bwo, era erizzibwa buggya ng'esuubira Omutonzi waayo okusala omusango, n'okugikwatirwa ekisa.”
Currently Selected:
2 ESIDERAASI 11: LBwD03
Highlight
Share
Copy
Want to have your highlights saved across all your devices? Sign up or sign in
Luganda DC Bible © Bible Society of Uganda, 2003.