Juan 14
14
Jesús näni kanqan
1<<Ama llakikuyaytsu. Dios Yayamanpis y noqamanpis creyikayämuy. 2Taytäpa wajinchöqa atskam cuartukuna kaykan. Tsaynö mana kaptinqa manam: <qamkunapaq alistaq aywä> niyaqmantsu karqan. 3Alistaskamurmi qamkunata pushayänaqpaq kutimushaq. Tsaymi noqa kanqächö qamkunapis kayanki. 4Musyayankim mayqan nänipa tsayman chäyänaykipaq kanqanta>>.
5Tomásnam nirqan: <<Taytay, maypa aywanaykipaq kanqantapis mana musyaykarqa ¿imanötan nänita reqiyäshaq?>>
6Jesúsnam nirqan: <<Noqam näni kä, rasun kaqmi kä y runakunata kawayta qaraqmi kä. Noqata mana chaskimarqa Taytä kaqman manam pipis chanqatsu.#Mat. 11.27; Juan 1.18; 6.46; Hech. 4.12. 7Noqata reqimarqa Taytätapis reqiyankim. Tsaymi kananpitaqa rikashqana kar reqiyankina>>.
8Felipinam nirqan: <<Taytay, Dios Yayata reqiykatsillämay. Reqiykatsimaptikiqa mananam tapushaykinatsu>>.
9Jesúsnam nirqan: <<Felipe, unayna paqtaykikuna kaykaptï ¿manaraqku reqimanki? Noqata reqimaq kaqqa Taytätapis reqinmi. Reqiykämarqa ¿imanirtan: <Taytaykita reqitsimay> nimanki? 10¿Manaku creyinki Taytäwan jukllaylla kanqäta y Taytäpis noqawan jukllaylla kanqanta? Tsaymi llapan niyanqaqkuna kikïpa yarpaylläpitatsu, sinöqa noqachö kaykaq Taytäpitam. Paymi munanqanta noqawan ruran. 11Taytäwan jukllaylla kanqäta y paypis noqawan jukllaylla kanqanta nikäyaptiqqa creyiyämankiman. Ninqäkunata mana creyiyämarpis milagru ruranqäkunata rikaykarqa creyiyämay.
12<<Rasun kaqtam niyaq: Taytä kaqman aywakuskiptïmi noqaman creyikamuqkuna noqa ruranqänö rurayanqa. Paykunaqa mas mantsakaypaq kaqkunatam rurayanqa. 13Noqapa shutïchö imatapis Taytäta mañakuyaptikim rurashaq. Tsurin karmi tsaynö rurashaq Taytä alabashqa kananpaq. 14Shutïchö imatapis mañakuyaptikim mañakayämanqaykita rurashaq.#Mat. 7.7-11; Luc. 11.9-13; Juan 15.7, 16; 16.23-24; 1Juan 3.21-22; 5.14-15.
Espíritu Santuta kachamunanpaq Jesús ninqan
15<<Noqata kuyamarqa llapan mandamientükunata cäsuyay.#Deut. 6.4-9; 11.1. 16Dios Yayata mañakuptïmi juk Yanapakuqta kachamunqa. Paymi imayyaqpis qamkunawan kanqa. 17Payqa rasun kaqta tantiyatsikuq Espíritu Santum. Dios Yayata mana cäsuqkunaqa Espíritu Santuta manam chaskiyanqatsu. Tsaynö chaskiyanqatsu payta mana ashir y payta mana reqirmi. Peru qamkunam sïqa reqiyanki qamkunawan kaptin y qamkunachö kananpaq kaptin.
18<<Qamkunataqa manam kikillaykikunatatsu dëjaskiyäshayki, sinöqa kutimushaqmi. 19Pöcu tiempullanam faltan runakuna manana rikäyämänanpaq. Peru qamkunam sïqa rikäyämanki. Noqa kawanqäpitam qamkunapis kawayanki. 20Tsay junaqmi tantiyayanki Taytächö noqa kanqäta, noqachö qamkuna kayanqaykita y qamkunachö noqa kanqäta. 21Mandamientükunata cumpliq kaqmi rasunpa kuyaman. Kuyamaq kaqtam Taytäpis kuyan. Noqapis kuyarmi paywan kaykäshaq>>.
22Mana Iscariote kaq Judasnam tapurqan: <<Taytay, noqakunawan kaykarqan ¿imanirtan wakin runakunawanpis kankitsu?>>
23Jesúsnam nirqan: <<Pipis kuyamarqa ninqäkunatam cäsukun. Kuyamaq kaqtaqa Taytäpis kuyanmi. Tsaymi Taytäwan shamur imayyaqpis paywan kaykäshaq. 24Noqata mana kuyamarqa ninqäkunatapis manam cäsuntsu. Noqa ninqäkunaqa manam kikïpa yarpaynïpitatsu, sinöqa kachamaqnï Taytäpitam.
25<<Qamkunawan kanqäyaqmi llapan kaykunata niyaq. 26Peru aywakuskiptïmi sïqa noqapa rantï Yanapakuq Espíritu Santuta qamkunaman Taytä kachamunqa. Paymi llapanta yachatsiyäshunki y llapan yachatsiyanqaqta yarpätsiyäshunki.
27<<Alli kawaytam qamkunata dëjapuyaq. Alli kawaynïtam qamkunata qarayaq. Noqa yanapayanqaqnöqa manam pipis yanapayäshunkitsu. Ama llakikuyaytsu ni mantsakäyaytsu. 28Aywakurpis kutimunäpaq kanqantam niyashkaqna. Taytä kaqman aywakuptï ama llakikuyankitsu. Paymi noqapita mas poderyuq. Rasunpa kuyayämarqa llakikuyanqaykipa rantin kushikuyankimanmi. 29Qamkunatam tsaynö willayaq manaraq aywakur. Aywakuskiptïmi niyanqaqkuna rasunpa kanqanta musyayanki.
30<<Kay patsapa mandakuqninmi shamuykanna.#14.30 Kay patsapa mandakuqninpaq parlarqa Satanáspaqmi Jesús parlarqan. Tsaymi qamkunawan alläpaqa parlashaqnatsu. Wañutsimänanpaqqa manam paypa podernin kantsu. 31Peru tsaynö kaptinpis Taytä nimanqanta cumplirmi wañutsimänanpaq permïtishaq. Tsaynöpam runakuna musyayanqa Taytäta kuyanqäta. ¡Shäriyay, kaypita sas aywakushun!>>
Currently Selected:
Juan 14: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.