Génesis 8
8
Diluviu yaku tsakinqan
1Dios Yayaqa manam qonqarqantsu Noétawan arcachö kaykaq wätakunatapis. Tsaymi yaku wallkänanpaq wayrätsimurqan. Tsay wayrawanmi yaku yawyar qallaykurqan. 2Tsaymi patsa rurinchö kaq lamarpita yaku pashtamuqkunapis pärarqan. Ciëlupita yaku yarqamunanpaq kicharaykaq punkupis wichqakaskirqanmi.
3Tsaymi yaku yawyar qallaykurqan. Pachak pitsqa chunka (150) junaqtanam 4arca bäjarnin Araratchö kaykaq qaqachö pärakarqan. Tsayqa karqan qanchis kaq killa chunka qanchis junaqchömi. 5Tsaypita yaku waran waran yawyaptinmi chunka killa qallaykunan junaq jirka puntakuna rikakäyarqanna.
6Tsaypita chusku chunka (40) junaqtanam Noé kicharqan arcapa ventänanta. 7Tsaypitanam juk cuervuta#8.7 Cuervuqa yukrispita mas jatun yanam. kacharqan yaku tsakinqanta o mana tsakinqantapis rikapakamunanpaq. Tsaynö kaykaptinpis tsay cuervuqa manam kutimurqantsu, sinöqa yaku jananpam wakpa kaypa pärir purirqan yaku tsakinqanyaq.
8Tsaypitam kacharqan juk palumatana patsa tsakikanqanta o mana tsakinqanta musyananpaq. 9Patsa jananchö yaku juntallaraq kaptinmi maychöpis ratänanpaq mana kaptin palumaqa arcaman kutirqan. Tsaypitam makinta Noé makyaskiptin paluma ratarqan. Rataykuptinnam arcaman yaykatsirqan.
10Tsaypita qanchis junaqtam palumata yapay Noé kacharqan. 11Patsa tutapaykaptinnam olïvu räman amushqa paluma kutirqan. Tsaynöpam Noé musyarqan yaku tsakiykanqantana. 12Kutinqanpita qanchis junaqtanam yapay palumata kacharqan. Peru tsay palumaqa mananam kutirqannatsu.
13Soqta pachak juk (601) watayuq Noé kaykaptinmi yaku tsakirqan. Tsayqa karqan mushuq wata qallaykunan junaqmi. Tsay junaqmi arca qataraykanqanta kicharkur Noé rikarqan patsa tsakishqatana. 14Ishkay kaq killachö ishkay chunka qanchis (27) junaq kaykaptinmi patsa tsakishqana karqan. 15Tsaymi Noéta Dios Yaya nirqan: 16<<Kananqa warmikiwan, tsurikikunawan y llumtsuynikikunawan arcapita yarquyayna. 17Tsaynölla llapan casta wätakunata qarquyna manshu kaqta, chucaru kaqta, lätaypa puriq kaqta y llapan casta päriqkunatapis maytsaypa aywar entëru munduchö mirayänanpaq>>.
18Tsaynö niptinmi Noé yarqurqan warminwan, tsurinkunawan y llumtsuyninkunawanpis. 19Tsaynöllam yarquyarqan manshu y chucaru kaq wätakuna, lätaypa puriqkuna y tukuyläya casta päriqkunapis. 20Noé yarquskirnam Dios Yayata adorananpaq juk altarta perqarqan. Tsaypitanam cada casta püru kaq wätakunapita y päriqkunapita pishtaskir altarchö sacrificiuta waykarqan.#Lev. 1.1-7. 21Tsaynö waykanqanpa mushkuyninpitam Dios Yaya kushikurqan. Tsaymi nirqan: <<Runakunaqa wamra kayanqanpitam shonqun munanqannö jutsa ruraypaq yarpäyan. Tsaynö kawayaptinpis kay patsata manam yapayqa maldicionäshaqtsu. Kanan ushakätsinqänöqa kay patsachö kawaqkunata manam ushakätsishaqnatsu.
22<<Kay patsa manaraq ushakanqanyaqqa runakuna murupakuyanqam y cosechayanqam.
Tsaynöllam kanqa alaypis, achaypis, usyapis, tamyapis, junaqpis y paqaspis>>.
Currently Selected:
Génesis 8: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.