1 Juan 2
2
1Kuyay wamräkuna, manana jutsata rurayänaykipaqmi kay cartata cartakayämuq.#Rom. 6.11-14. Jutsa rurayman shikwashqaqa Dios Yayapa puntanchö janantsik shärinanpaqmi abogäduntsik kaykan. Tsay abogäduqa alli ruraq Jesucristum. 2Paymi sacrificiu karqan jutsantsikkunata Dios Yaya perdonamänantsikpaq.#1Juan 4.10. Manam noqantsiklla perdonashqa kanapaqtsu wañushqa, sinöqa maytsay runakuna perdonashqa kayänanpaqmi.
3Dios Yayata reqinqantsiktam mandamientunkunata cumplir musyantsik.#Juan 14.15, 21, 23. 4Mayqantsikpis <<Dios Yayata reqïmi>> nikar mandamientunkunata mana cäsurqa manam rasunpa kaqtatsu parlantsik, sinöqa llullakuntsikmi. 5Peru mandamientunkunata cumplirmi sïqa Dios Yayata rasunpa kuyantsik. Tsaynöpam musyantsik Dios Yayapa poderninchö kaykanqantsikta. 6Pipis <<Dios Yayapa poderninchömi kä>> nirqa Jesucristo kawanqannö kawatsun.
Mushuq mandamientu
7Kuyay wamräkuna, juknin jukninwanpis kuyanakuyanki. Kay mandamientuqa manam mushuq mandamientutsu, masbien unaypitana musyanqantsik mandamientum. Tsay mandamientutaqa musyayankinam. 8Mushuq mana kaptinpis kananmi musyayanki Jesucristo kuyamanqantsiknö kuyanakuyänaykipaq kanqanta. Tsaymi tsay mandamientu mushuq kaykan. Jesucristo kuyakuq kanqannömi qamkunapis kuyanakuykäyanki. Tsaynö kuyanakurmi tutapaypita aktsiman yarquqnö kaykäyanki.
9Pï runapis <<aktsichömi kä>> nikar runa majinta chikirqa tutapäpukushqanömi kaykan. 10Peru runa majinta kuyarmi sïqa aktsichönö kaykan.#Rom. 13.12-13. Tsaynö kawakuptinmi pïmaypis payta rikar shumaq kawayanqa. 11Runa majinta chikiq kaqqa tutapäpukushqanömi kayan. Qapra runa maypa aywanqantapis mana tantiyanqannömi Dios Yaya munanqannö kawakunanpaqpis tantiyantsu.
Imanir Juan cartakunqan
12Kuyay wamrakuna, qamkunamanmi cartakamü Jesucristo noqantsik rayku wañunqanpita perdonashqa kayaptiki.
13Taytakuna, qamkunamanmi cartakamü qallananpita kawaq Jesucristuta reqishqa kayaptiki.
Jövinkuna, qamkunamanmi cartakamü Satanásta vencishqa kayaptiki.
14Kuyay wamrakuna, qamkunamanmi cartakamü Dios Yayata reqishqa kayaptiki.
Taytakuna, qamkunamanmi cartakamü qallananpita kawaq Jesucristuta reqishqa kayaptiki.
Jövinkuna, qamkunamanmi cartakamü kallpasapa kayanqaykipita y Diospa willakuyninta cäsurnin Satanásta vencishqa kayaptiki.
Diosta mana cäsuqkuna kawayanqannö mana kawanapaq ninqan
15Diosta mana cäsuq runakunanöqa ama kawayaytsu. Paykunanö kawarqa Dios Yayata manam kuyayankitsu. 16Diosta mana cäsuq runakunaqa shonqunkuna munanqannömi llutanta rurayan, imatapis rikanqantam munayan y llapanpitapis mas alli rikashqa kaytam munayan. Paykunanö kawarqa manam Dios Yaya munanqannötsu kawayanki, sinöqa jutsasapa runakunanömi. 17Kay patsapis y runakuna munayanqanpis ushakanqam. Peru Dios Yaya munanqannö kawakuq runakunam sïqa mana ushakaq kawayta tariyanqa.
Anticristukuna shayämunanpaq ninqan
18Kuyay wamräkuna, ultimu tiempuchönam kaykantsik. Anticristo shamunanpaq musyayanqaykinömi kananqa atska anticristukuna shayämushqa. Tsaynöpam musyantsik ultimu tiempuchöna kanqantsikta. 19Tsay runakunaqa ñawpata noqantsikwan qorikashqa karpis kananqa manam qorikäyämunnatsu. Paykunaqa Jesucristuta manam rasunpatsu chaskiyashqa. Jesucristuta rasunpa chaskishqa karqa noqantsikwanmi qorikäyanman. Noqantsikpita yarqushqa kayaptinmi Jesucristuta mana chaskikuyanqanta musyantsik.
20Qamkunamanmi Jesucristo Espíritu Santuta kachamushqa. Tsaymi tantiyayanki mayqan yachatsikuykuna alli y mana alli kanqantapis.#1Cor. 2.10-16. 21Tsaynömi tantiyayanki llullakuqkuna Dios Yayapa willakuyninta willakuyanqanpa rantin mana allikunata yachatsikuyanqanta. Rasunpa kaq yachatsikuyta tantiyayanqaykita musyarmi cartakamü.
22Tsay llullakuqkunam niyan: <<Jesúsqa manam Dios Yaya kachamunqan Cristutsu>>. Tsaynö yachatsiqkunaqa anticristo karmi Dios Yayata y Jesucristutapis nëgayan. 23Jesucristo Dios Yayapa Tsurin kanqanta pipis nëgarqa Dios Yayatam nëgan. <<Jesucristuqa Diospa Tsurinmi>> nirqa Dios Yayatam chaskin.
24Tsaymi Jesucristupa willakuynin yachakuyanqaykita ama qonqayaytsu. Mana qonqarqa Dios Yayapa y Tsurin Jesucristupa poderninchömi kawaykäyanki. 25Paymi änimashkantsik gloriachö imayyaqpis kawanapaq.
26Kay cartatam cartakamü llutan yachatsikuqkunata mana chaskiyänaykipaq. 27Jesucristupita chaskiyanqayki Espíritu Santum qamkunachö kaykan. Paymi rasunpa kaqkunallata llapantapis yachatsiyäshunki. Manam imaypis llullatsiyäshunkitsu. Tsaynö kaykaptinqa llutan yachatsikuykunata ama chaskiyaytsu. Espíritu Santu yachatsiyäshunqaykinölla Jesucristuman creyikur imaypis kawakuyay.
28Kuyay wamräkuna, Jesucristupa poderninchö imaypis kawakuyay. Tsaynö kawarmi Jesucristo kutimuptin mana mantsakur y mana penqakur puntanchö kayanki.
29Musyantsikmi Jesucristo imaypis alli ruraq kanqanta. Tsaymi pipis allita rurarqa Dios Yayapa wamran kaykan.
Currently Selected:
1 Juan 2: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.