Santiago 5
5
Rïcukunata olqüpashqan
1¡Rïcukuna, cäsukamay! ¡Juiciu finalcho fiyupami nakapäkunkipaq! ¡Tsaymi qaparayparaq waqapäkunki! 2Lapan riquëzaykikunapis ismurmi ushakanqa. Röpaykikunatapis puyumi ushanqa. 3Qorikipis qellaynikipis manami välinqanatsu. Ultimu tiempuchöna kaykaptintsipis riquëzakunata kikilaykipaqmi shuntarkaykanki. Tsaymi juiciu final junaqcho tsay riquëzaykikuna codiciösu kashqaykipita acusashunki. Tsaykuna salvashunaykipa trukanqa ninanömi rupar ushapäkushunkipaq.#Mat. 6.19.
4Mana pägaypa arutsishqaykipitami minkaynikikuna Tayta Diosta waqaparkaykan. Paykuna waqapashqanta lapanta mandaq Tayta Dios musyaykanmi.#Deut. 24.14-15. 5Qellayniki kaptinmi munashqaykita rurar kay patsacho kawarkaykanki. Tsayno kawarmi pishtanapaq werayätsishqa uywano karkaykanki. 6Qamkunaqa defiendikuyta mana puëdiq jutsaynaq runakunatami wanutsishqanki.
Jesucristuta mana ajayaypa shuyäkunantsipaq nishqan
7Wawqi panikuna, Señor Jesucristuta kutimunanyaq mana ajayaypa shuyarpay. Chakra aruqkunapis murunanpaq tamyataraqmi shuyarpan. Cosëchata shuntananpaqpis usyataraqmi shuyarpan. 8Tsaynöla qamkunapis lapan shonquykiwan yärakur mana ajayaypa Señor Jesucristuta shuyarpay. Payqa kutimunanpaqnami kaykan.
9Wawqi panikuna, ama jamurpänakuytsu. Jamurpänakuptikiqa Jesucristo kutimur juzgashunkipaqmi. Payqa runakunata juzgananpaqnami kaykan.
10Wawqi panikuna, yarpapäkuy Tayta Diospa jutincho wilakuq profëtakuna imano kawashqantapis. Paykunaqa ima nakaycho karpis mana ajayaypami Tayta Dios munashqanno kawapäkurqan. Tsaynöla qamkunapis kawapäkuy. 11Musyantsimi imano nakarpis mana ajayaypa Tayta Dios munashqanno kawaqkunata pay yanapashqanta.#Job 42.10-17. Tsaynölashi Job fiyupa nakarpis Tayta Diosman mana ajayaypa yärakurqan.#Job 1.20-22; 2.7-10. Tsayno yärakuptinshi Tayta Dios ali shonqu y kuyapäkuq kashpan bendicionninta qorqan.#Sal. 103.8; 111.4.
12Kuyay wawqi panikuna, imatapis awnir ama jurapäkunkitsu jana patsacho kaykaqkunapa jutincho ni kay patsacho kaykaqkunapa jutinchöpis. Ama imapa jutinchöpis jurapäkunkitsu. Tsaypa trukanqa cumplinaykipaq kaptin awnipäkunki y mana cumplinaykipaq kaptinqa ama awnipankitsu. Tsayno kawapäkuptikiqa Tayta Dios manami castigashunkitsu.#Mat. 5.34-37.
Tayta Diosta manakunantsipaq nishqan
13Lakishqa karqa Tayta Diosta manakäriy. Kushishqa karpis Tayta Diosta agradëcikur alabapäkuy. 14Mayqaykipis qeshyar imarqa mayor wawqikunata qayatsinki Tayta Diosta manakunanpaq. Paykunami Jesucristupa jutincho aceitita umaykiman winaparkushushpayki aliyänaykipaq Tayta Diosta manakärinqa.#Mar. 6.13; Luc. 10.34. 15Lapan shonqunwan yärakur manakuptinqa Tayta Dios aliyätsishunkimi. Jutsata rurashqa kaptikipis perdonashunkimi. 16Tsayno kaykaptinqa jutsa rurashqaykita yärakuq mayikita wilar confesakäriy. Nirkur jukniki juknikipaqpis Tayta Diosta manakäriy. Tsaynöpami qeshyashqaykipita aliyankipaq. Tayta Dios munashqanno kawaq runa manakushqantaqa Tayta Dios mayanmi.
17Profëta Elías manakushqantapis Tayta Dios mayarqanshi. Noqantsino runala kaykarpis mana tamyananpaq lapan shonqunwan manakuptinshi kimsa wata y soqta killa mana tamyarqantsu.#1Rey. 17.1; 18.1; Luc. 4.25. 18Yapay tamyananpaq manakuptinshi tamyarqanna.#1Rey. 18.42-45. Tsayshi runakuna murushqanpis wayurqanna.
19Wawqi panikuna, mayqanikipis jutsaman tuniptiki pilapis tantiyatsishushpaykiqa 20wanuypitami salvaykäshunki.#5.20 Wanuypitami salvaykäshunki ninanqa infiernuman mana qaykushqa kanaykipaq kashqantami niykan. Tsaynöpami mayjina jutsata rurashqa karpis perdonashqa kanki.#Prov. 10.12; 1Ped. 4.8.
Currently Selected:
Santiago 5: qvmB
Highlight
Share
Copy
Want to have your highlights saved across all your devices? Sign up or sign in
© 2003, Wycliffe Bible Translators, Inc. All rights reserved.