Ạsuor 45
45
Ạḍuor apinien kꞌọdaam
1Ịma ịitughian emuza ologhi ạmi,
kụ mị ạtu bọ ạlogh ḍụor phọ ạḍien ọmooraan ọdaam mọ.
Anem ạmi ẹkigh ịdipho ọgeom oye lọ ạmaar ịgeeghi.
2Nạ kụ ooḅi dị apu oomo awe;
ogbul ịidoronhu ạna ghụsan ọghaaphom ghan ọghaaph,
kụ iḍighi kụ Ẹnaan mẹseph nyịna kꞌagee-pọ.
3Ḅạnaam elhool ẹgham mọ ạna.
Nạ ogbogh ọdaam dị ạkuan ni ạpataghan.
4Ḍighom ạsu rughuenian phọ ạna
kụ aghiilom rꞌedughom loor ọgba ghan igey, rꞌoogbo iiḅi ịiruen,
Ạḍighaagh iphelegbe phọ ạna keḍighi ịdi nạ kạkpar apu ẹpomoghian phọ.
5Ịkpina phọ ạna etoph ni
kụ mekpurion bụphe ọlogh bọ ḍien ọdaam mọ,
ḅịle oomo areelhe phọ momeleghu ude ruwol ạna.
6 #
Hib 1.8, 9 Ẹnaan, ạgada ọdaam ẹmha phọ ạna kạtol li kꞌagee-pọ.
Ịkpara ọdaam ẹmha phọ ạna ịkpara iiḅi ịiruen.
7Nạ ạpomoghian ruukuan kụ ạsipioghom ekia ni nyịna.
Pọ kụ ịyaar phọ Ẹnaan, Ẹnaan phọ ạna, mẹsaḅar bọ nyịna
ogbul nyịna elho ọḅaal ologhi dị epu nyẹpe iigbo phọ ạna.
8Oomo arukpe phọ ạna repur ghan eḍu amaa rꞌalos rꞌakasia.
Ạbuo areephegh ropheghenaan nyịna ephegh ọḅaal ologhi sịphe ogiga dị oselemiom oḍu ọoma.
9Ogbo arisina ạnmanyaan ịsiphe ogiga phọ ạnmanyaan ạbudaam odimom aani ni,
kụ sịphe elhiom ạgada ọdaam ẹmha phọ ạna ukueni-ạnir phọ ạmeera,
aanmenan ịnme ịma agol dị ọsighe ẹpe Ofir.
10Ọnyani ọdaam dị rakeel kꞌolhom, ler rụru esi ịphen mị rạḅem bọ.
Bula we phọ ạna rꞌọto kꞌanyina,
11Ẹnighe ạna kụ keḍighi ịdi ọdaam mọ kạwa nyịna;
ọdi uwotu ạna. Esi ịduon phọ nạ ạmoogh ọnaghanan ọdi.
12Awe phọ aTaya koruom ni nyịna inmo;
awe dị ọmoogh ẹelha kọwa ni ḍịḅeeraan esi ạna.
13Ọkpanyan ọdaam mọ, esi ọḍagha ílho;
ibura phọ ọdi oḍighinom gol.
14Kọsighe ni ọnyani dị ọmaar oonmenemi otorori osiemi kꞌọdaam mọ;
arisina phọ iigbo phọ ọdi kụ kotorori nyọdi.
15Ọḅaal ologhi rꞌiboh kụ ẹdi bịdi kọpam
kụ oḍighom sịphe otu ọdaam mọ.
16Ạnmuny ạna kụ kọtol sịdol ạburude phọ ạna,
ḅịle nạ kạsighe bịdi ạtolomi dọl ịtooghi sịen aḅirini phọ.
17Kụ mị aḍighi ịdi aḍien ạna képe oghiil atum oghiil,
ḅịle awe koboom ghan ni nyịna ọrugh atum ọrugh.
Currently Selected:
Ạsuor 45: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS