Ạsuor 42
42
Omuneniom ịyal ạḍinya
(Ạsuor 42—72)
Ịiḅereghi oye dị odi iiruen
1Ẹnaan, ịdipho ẹephua ạmuum asikol rẹpu ghan bọ ọya ọnuen,
ịdipho kụ ẹdi ẹephua ạna rẹpu ghan uwaloor ạmi.
2Ẹephua ạna rẹpu ghan uwaloor ạmi, nạ kụ Ẹnaan phọ ẹpe rémugh ghan bọ.
Ạpur amem kụ ẹdi mị katu bọ aganana egbodo ạna?
3Ootaany rꞌaḍughul mị amoghi
kụ izin bịn kụ eḍien ạmi;
oomo amem ạbumulogh-ḍien ạmi upuru ghan ịmi,
“Ẹnaan phọ ạna edi ẹghen?”
4Oḅiom ạmi ạsalaany mem dị mị ạatughian igbaany,
mem ẹyaal dị mị ạghi rꞌaḍita phọ sịphe otu Ẹnaan phọ.
Mị kụ uḍiemiom ghan
bụphe rọmoor bọ koboom Ọmoogh-we phọ.
5Uwaloor ạmi, eeghe kụ iḍighi kụ nạ akururu bọ ịduon phọ,
eeghe kụ rẹeḅaghami nyịna?
Mị aḍuom Ọmoogh-we phọ ologhi
kụ mị kạḅile kẹn ni aboom nyọdi ọpelia phọ ạmi rꞌẸnaan phọ ạmi.
6Uwaloor ạmi mạḍua loor ạmi,
kụ iḍighi kụ mị odi ẹphen ade phọ ạJodan rꞌẹphen Eegum ạHermon rꞌEegum ạMizar rạatughian ghan nyịna.
7Aḍigher ẹmagh ḍigher,
loor ẹḍogh okiilian ạmuum mọ ạna.
Oomo arookpoogh oologh phọ ạna
miikpereghiom ịmi.
8Ọmoogh-we phọ uḍeenaan ịmi ẹphomoghian phọ ọdi rémuneen ghan bọ mem ootaany,
pịdi mị ạmoor ḍụor ḍughul,
ạaḅereghi Ẹnaan phọ ẹmoogh bọ ghuḍum mọ ạmi.
9Mị kạḅeni Ẹnaan aḍighiigh phọ ạmi mọ,
“Uḍighi ika kụ nạ uwula bọ ịmi,
kụ mị odimom ghan bọ rꞌọto
loor ịgbiphoghom ạbumulogh-ḍien phọ ạmi?”
10Ạrigilaam ạbumulogh-ḍien phọ ạmi mịlhogh ịmi ẹgha,
loor ịdi bịdi rupuru ghan ịmi oomo aḍio mọ,
“Ẹnaan phọ ạna edi ẹghen?”
11Uwaloor ạmi, eeghe kụ iḍighi kụ nạ akururu bọ ịduon phọ,
eeghe kụ rẹeḅaghami nyịna?
Mị aḍuom Ọmoogh-we phọ ologhi
kụ mị kạḅile kẹn ni aboom nyọdi ọpelia phọ ạmi rꞌẸnaan phọ ạmi.
Currently Selected:
Ạsuor 42: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS