Ạsuor 37
37
Ịpe kẹtolom bọ ọkaraph phọ rꞌogey phọ
1Kạ́aḅaghamian ologhi loor ẹmhu ạbuo ạsipioghom.
Kágbeghe bụo igborion phọ,
2ịdi eḍighi bọ ị́kel mun dị kọsam bịdi ịdipho ạroogho olereghi,
kụ bịdi ọkaraghar yogh kụ omuughu ịdipho ạroogho.
3Ḍuom ologhi Ọmoogh-we phọ bịn, aḍighi ghan igeny,
ọbo ạrol sịen aḅirini phọ abia, kụ agey ni kọngo ghan ni nyịna eḍien olhe.
4Mọogh ḍịḅeeraan esi Ọmoogh-we phọ.
Ọdi kạngo ni nyịna ịpe nạ rạatughian bọ.
5Ḍighom Ọmoogh-we phọ, aḍuom nyọdi ologhi,
bịn ọdi kạloghonaan ni nyịna ḍịghaagh.
6Ọdi kagananami ni ruukuan phọ ạna kụ ẹmhu ịdipho erumuḍio;
ḅịle ariliom mọ ạna ẹmhu ịdipho ootaany.
7Tọlan rꞌỌmoogh-we phọ, ạmoogh ọkparam, akori ghan nyọdi.
Kạ́aḅaghamian ologhi esi oye phọ ọpo ẹnighenom bọ,
oye phọ ọpo ạaghian bọ kụ raḍighi yogh bọ ọdo kịrokiro.
8Bịle ọghagh ologhi rꞌologhi ẹḍim.
Ịphen phọ retorori ghan oye kẹlogh esi ịkaraph.
9Bụphe oḍuom bọ ologhi Ọmoogh-we phọ kụ kọmoogh de phọ,
kụ opiemi bụo ạsipioghom mọ.
10Esugha ọony ẹnum amem bịn kopiemi ni bụo ạsipioghom mọ;
kụ mem lọ nạ ạatughian marugh oye ạsipioghom, keḍighi ni iikia rꞌaruugu esi ạna.
11 #
Mat 5.5
Bụphe osooromi bọ loor kụ kọtol sịen ade phọ,
kụ ọmoogh ẹepho rꞌedughom.
12Oye ạsipioghom mọ mamitenom ẹkaraph ezue ogeny oye phọ,
ạḅile rạkirigha rạlhaal kaphoghomi ghan ogeny oye phọ.
13Kụ Ọmoogh-we phọ rạmilogh ghan oye ạsipioghom mọ bịn,
ịdi eḍighi bọ ariiḍio ọdi ị́kel mun.
14Awe ạsipioghom mọ momitiom rolhool ẹgham, ọkpami sịkumugh ạbidi
roosophoghian ophiemi arukulom rꞌạbuphe ekuom bọ,
ọḅile ọze ạbuo aruukuan phọ.
15Arolhool ẹgham mọ ạbidi kẹze ni bịdi,
kụ ạsikumugh phọ ạbidi ebunughian.
16Ịyal-ikpo ịpe oye aruukuan phọ ạmoogh bọ
ẹnighe epu ẹelha oye ạsipioghom.
17Sikpe awe ạsipioghom mọ kobunughi ni
kụ ọlo Ọmoogh-we phọ raako ghan we aruukuan phọ.
18Ọmoogh-we phọ alegheri ni suḍughul-otu ạbuphe oseleman bọ,
kụ erua ạbidi kẹtol li kꞌagee-pọ.
19Umugholoor bịdi rásiph ghan mem ịminimiin;
ịgbakuro bịdi résoorom ghan.
20Bụo ạsipioghom mọ koguul li,
kụ bụphe ọlogh bọ ḍien Ọmoogh-we phọ kope ni ịdipho ipoola ạroogho,
bịdi kope ịdipho ạmughi.
21Bụo igborion phọ olhe ọmugh rọ́kpe ghan,
kụ ọlo ogeny oye phọ ạmoogh ghụsan kụ rạngo ghan.
22Bụphe Ọmoogh-we phọ ạseph bọ kụ kọmoogh de phọ,
kụ ọlo bụphe ọdi aruule bọ koporogh ni omitiom opiemi.
23Ọmoogh-we phọ kụ rạma ghan eten kaḍeenaan oye
kụ raako ghan bụphe ọḅeeraan bọ nyọdi.
24Ghạlamo bịdi umeel li, bịdi kọ́tol pạ ude phọ,
ịdi eḍighi bọ Ọmoogh-we phọ kạpam ni bịdi aḅerion ạmeremi.
25Mị uḍighi ni ọbumoony kụ nyịidipho mị okumoor oye. Mị mạrol li sịen aḅirini phọ abia,
kụ mị kꞌekulha kọ̋miin ghan dị Ọmoogh-we phọ aghel bụo aruukuan phọ,
ọbo ọbo ạnmuny ạbidi ọlom eḍien kụ olhe.
26Esi oomo amem bịdi rọngo ghan oopho kụ kạale bụnon,
kụ ạnmuny ạbidi oḍighi ḍịseph.
27Kel igborion aḍighi ghan iiḅi,
ọbo ọto ạna ạrol sịen aḅirini phọ kꞌagee-pọ.
28Ọmoogh-we phọ ạpomoghian ịpe eḍighi bọ elhiom,
ọdi óghel we oḍuom-ologhi phọ ọdi.
Kaako ghan bịdi kꞌagee-pọ,
kụ ọlo nmụny ạbuo ạsipioghom mọ kopiemi ni.
29Bụo aruukuan phọ kụ kọmoogh de phọ;
ḅịle bịdi kụ kotugh sịen ade phọ kꞌagee-pọ.
30Ogeny oye phọ rạkaaph ghan ọghaaph olegheri ịyaar,
ḅịle ọdi raalemi ghan ni ịiruen.
31Iilogh phọ Ẹnaan edi ghan ologhi ọdi oomo amem,
ịgbaranuom aruwol phọ ọdi kẹ́piom.
32Oye ạsipioghom mọ raasophoghian ghan
oye aruukuan phọ ịlo oghiigh.
33Ọmoogh-we phọ kạ́bile nyọdi aḍigh esi ạraghaagh ạbumulogh-ḍien phọ ọdi,
mụghumo omeera lọ kosoph ọoruen opume nyọdi.
34Ḍuom ologhi Ọmoogh-we phọ kụ aako ghan iilogh phọ ọdi.
Ọdi kaghueni ni nyịna kụ ạngaani nyịna de phọ,
kụ nạ ạmiin dị mophorogh oye ạsipioghom mọ.
35Mị mạmiin ghan ni oye ạsipioghom dị rạadaraghu rꞌiboom ịikpo,
kụ apoph ịdipho ọsaga ạLebanon.
36Kụ ruukuna phọ mị aten sịphe kꞌọdi, rꞌạḍigum ílho mun;
mị ạwa nyọdi, mị ụ́miin.
37Lọgh elegh ogeny oye kụ akiririom oye aruukuan phọ aphogh,
oye ẹepho rạmoogh ghan ni ẹemara ẹemara.
38Kụ ọlo koogulemi ni we ogborion phọ bịn opiemi.
Aruukuna phọ ạbidi amuphe bịn.
39Ọmoogh-we phọ kụ ọpelia ạbuo aruukuan phọ.
Ọdi kụ ịnyaam ạbidi mem ịiḅaghami.
40Ọmoogh-we phọ rạloghonaan ghan ḍịghaagh bụo aruukuan phọ kạphel,
rạpel ghan bịdi kạsighe rạghaagh ạbuo ạsipioghom mọ,
ịdi eḍighi bọ bịdi rọbooghian ghan esi ọdi.
Currently Selected:
Ạsuor 37: ẠḌI
Highlight
Share
Copy
Want to have your highlights saved across all your devices? Sign up or sign in
© 2018 ALDLS
Abuan Language Development and Literacy Society
Ayama-Abua, Rivers State, Nigeria
Published by
NBTT
Nigeria Bible Translation Trust
No. 7 Old Airport Road
P.O. Box 790, Jos Plateau State, Nigeria
ISBN: 978-978-966-354-5
In cooperation with
MIDI BIBLE
Ch. de Praz-Roussy 4b, 1032 Romanel-sur-Lausanne, Switzerland
The New Testament in Abuan was originally published
in 1978 by The Bible Society of Nigeria with © UBS