Mat 26
26
Ɛ́ kal əmnaŋ se yuye Jesus
(Mak 14.1-2; Luk 22.1-2; Jn 11.45-53)
1Jesus mɛyse ɛyyiɛke yì ɛyjim è me suuy se ghon-ɛyfɛl nə wene ge: 2Ke ghɛn ke ge, ɛ́ lóó lun əbchii əbbua ɛ́ yɛ yiɛ Kechii Ɛyboyse, nɛ lu əbliy wɛ ɛ́ nɛ̂y feene mɛ wɛ Wanwel, ɛ́ bante se kentam.
3Ko kɛn əbliy fo, ghele mbiye se ghɛ́ ntaŋlee gese nɛ̀ chɛɛse konen ɛ Kaiafase bɛy wɛ ketuu se ghɛ́ ntaŋlee, 4è se siyse jii yɛ ɛ́ nyiake è koo Jesus è yuy. 5Ghene loo siyse dì, è me suuy ge: Lòó jia yɛ lu ɛ kechii keghakene, fɛ ghele lose əbchio.
Ɛ́ yiose Jesus ɛ Betani
(Mak 14.3-9; Jn 12.1-8)
6Jesus nɛ̂y lòò, è ndu ɛ ntɛke Betani, è shik ɛyghan se Simon, nɛ əb nè yimen yaf nɛ̀ kensaasee. 7Ghene loo yiɛ, əbvii əblee chia è ndu ɛ Jesus ɛybee, nɛ əb ki febel nɛ̀ keyiósén əbkaa əbtaa lu ɛ ten, è bàà ɛ Jesus ə Ketuu, 8ghon-ɛyfɛl nə Jesus yɛn, è se vəke ge: Əbvii vine jefse keyiósén kin lɛ bek ghɛ, 9nɛ kè lòó ɛ́ feene keyiósén kin se əbkaa se ɛydio, è gia əbkaa ten se ghɛ́ ketane.
10Ka ghene vəken dî, Jesus keele, è bif se ghene ge: Ghɛne foo ngɛk se əbvii vin se ghɛ? Əb dì nɛɛy nɛ lu naa kenəə kejuŋe san. 11Ghɛne ghele ketane lu əbliy əbjim, dî nɛ mɛ jia nɛ̂y yɛ lu ghɛsen əbliy əbjim. 12Keyiósén kɛ əbvii vin bààn ɛ mɛ əbghun lɛ, lu nɛ əb yiose se siyse əbghun ə wom ka əbliye kwɛn ɛ́ gvəəme. 13Ghɛn yɛ ke se əbluuy ge, naa ghááy wɛ ɛ́ náà yɛ fekte sakghɛ əbjuŋ nɛ̂ vin ɛ ketuu ntiɛ kejim, lu nɛ ɛ́ ko náà yɛ fekte sɛy kenəə kɛ əbvii vin nɛɛyen se yɛ kuume wen.
Judas bééme se fèène Jesus
(Mak 14.10-11; Luk 22.3-6)
14Wel əblee ɛ məme ghon-ɛyfɛl nə Jesus ghɛ njio-sebaa ɛyvəm nɛ ɛ́ toŋte ge Judas Iskaliot nɛ̂y lòò ɛ keleŋ əbliy fo è ndu se ghele mbiye se ghɛ́ ntaŋlee, 15è bif se ghene ge: Mɛ lɛ nɛɛy ghɛne koo Jesus, é ghɛn fó ghɛ se mɛ? Ghene yio dî, è me taŋ ɛshiɛ əbkaa silva əmmtal,#26.15 Ɛshiɛ əbkaa silva ghɛ əmmtal ghii nè lu əbkaa wɛ wel nè yuyen kekos ə wel ɛ Islael əb lak so (Kiy: Exodus 21.32). è fo se wen. 16Kɛɛte se əbliy fo, Judas me se kɛŋe jii yɛ əb nɛ̂y din Jesus, é ɛ́ koo.
Jesus yiɛ əbfua-əbyíɛ́ne wɛ̂ Kechii Ɛyboyse ghene ghon-ɛyfɛl nə wene
(Mak 14.12-21; Luk 22.7-13,21-23; Jn 13.21-30)
17Nɛy loo lu ɛ kechii kɛ́ mbiye əbliy ɛyyiɛ keban kɛ tóó ghàà feshik è kaŋ,#26.17 Nè loo lu kechii kɛ ghele Islaele yiɛn Kechii Ɛyboyse ɛ́ yɛ yiɛ keban nɛ ɛ́ kaŋ kaŋen ka mèkalè di, nɛ ɛ́ loo too ghaa ɛ́ vii feshik, gese yɛn ɛ Mak 14.12, Lk 22.7. ghon-ɛyfɛl nə Jesus gwiy, è bif se wen ge: Wɛ̀ kɛŋe ge, ghɛs nɛyté əbfua-əbyíɛ́ne wɛ wɛ̀ nɛ̂y yiɛ Kechii Ɛyboyse so ghááy? 18Əb fise ge: Ghɛn lii ndu ɛ məme ntɛk, é ghɛn yɛn wel əblee, è suuy se wen ge: Ndinte suuy-a ge, əbliy ɛykuo nə yi kwɛnmen, nɛ yi kɛŋe ge, ghene ghon-ɛyfɛl nə yi yiɛ Kechii Ɛyboyse ɛ wene ndaa. 19Ghon-ɛyfɛl nə Jesus ghii me nɛɛy kɛn ka əb nè suuyen, è me fɛl əbfua-əbyíɛ́ne kechii ɛyboyse vi fo.
20Nɛ̂y se lu ɛ likfəəy, Jesus ghene ghon-ɛyfɛl nə wen ghɛ njio-sebaa ɛyvəme me diom è se yíɛ. 21Əb me suuy ge: Mɛ suuy kenəə kɛ́ əbluuye se ghɛn ge, wel əblee ɛ ghɛne məme nɛ̂y feene mɛ. 22Kenəə tene nè lô fo ngɛk se ghene se ŋaŋ, ghene me se bife femok femok ge: Lu mɛ-a? Báàba?
23Jesus fise ge: Wel wɛ ghɛse wene vii keghoo se kekaŋ əbfua-əbyíɛ́ne nɛ̂y feene mɛ. 24Wanwel shi se kuo kɛn ka ɛ́ nyaken ɛ ŋwaale-Feyin, dî nɛ ngɛk ɛytaa lu se wel vi wɛ əb feenen mɛ. Nɛ nè lòó ke yɛ jof ge, ɛ́ jia bii wel nɛ̂ vin naa se nkan. 25Judas wɛ əb kè feenen Jesus me bif sɛy ge: Lu mɛ-a Ndinte? Jesus fise ge: Lu ka wɛ̀ suuyen.
Jesus kɛɛte kenəə kum ɛyyiɛ nchinten
(Mak 14.22-26; Luk 22.14-20; 1Kl 11.23-25)
26Ghene loo yiɛ, Jesus liɛ ntuke keban ɛylee, è bɛ̀ɛ̀lè Feyin, è bɛkte è fo se ghon-ɛyfɛl nə wene, è suuy ge: Ghɛn ko, è yiɛ, lu əbghun ə wom.
27Jesus me gese liɛ əbbom əmnduk, è bɛ̀ɛ̀lè Feyin, è gese suuy se ghene ge: Ghɛn ko, è nəə naa ghel ɛjim, 28lu əmnduŋ mə mom mɛ kum kelek [kefɛɛ]; əm lɛŋ bek ghel se ɛydio ka Feyine lɛyse mbeese ghen. 29Ghɛn keele ge mɛ jia bo yî kase nəə əmnduk min se chin se ka mɛ yî yɛ nəə kefɛɛ ghɛsen, nɛ ba ə wom se sake əbfon ə wen. 30Ghene me yem njàŋ ɛykokse se Feyine, è me fəy è se koke ɛ kfən koo Olif.
Jesus suuy ge Bita nɛ̂y maa yi
(Mak 14.27-31; Luk 22.31-34; Jn 13.36-38)
31Jesus suuy se ghene ge: Ghɛn ghel ɛjime nɛ̂y nyiŋ nɛ ntəke, bek kenəə kɛ ke nɛ̂y gan san. Nɛ lu ka ɛ́ nyake ɛ ŋwaale-Feyin ge: “Mɛ nɛ̂y yuy nchiy-bvəyse, é kenon ə bvəyse takle. 32Dî nɛ Feyine nɛ̂y lose mɛ se ɛykuo, é mɛ lòò, è ndu se Galilee ɛ ghɛne mbiy.”
33Bita me suuy ge: Ghele chèmè nɛ̂y nyiŋ wɛ̀ naa ɛjim, é mɛ jia nyiŋ se ten.
34Jesus suuy se wen ge: Kɛ́ əbluuye, kɛn nɛ ntəke lan, lumngvəə nɛ̂y yɛ ghan ge əb toŋ nɛ wɛ̀ maamen mɛ kaŋ ɛtal.
35Bita ko gok kɛn kɛ́ wene ge: Chèmè lu nɛ mɛ nɛ̂y kuo ghɛsoo, é mɛ jia maa wɛ̀! Ghon-ɛyfɛl ɛjime me chìntèn è suuy kɛn dî.
Jesus Jem ɛ Getsemane
(Mak 14.32-42; Luk 22.39-46)
36Jesus lòò ghene ghene mè se nduu ɛ kelik kelee nɛ ɛ́ toŋte ge Getsemane, ɛ́ ndu è chin, əb suuy se ghon-ɛyfɛl nə wen ghii ge: Ghɛn diom fɛn é mɛ keŋte ndu ɛ mbiy è jem. 37Əb suuy dì, è me liɛ Bita ghene ghon ə Zebedee ɛluumene ɛbaa, ghene ghene keŋte ndu. Ketuu toŋ wen, ɛyteme wene me kɛɛte se chiŋe naa se ŋaŋ. 38Əb me suuy se ghene ge: Kenəə kelee foo ngɛk ɛ mɛ ɛytem nɛ lòó ke yuy mɛ. Ghɛn yɛ lu fɛn, ɛ mɛ ɛybee keke.
39Əb suuy dì, è me lòò, è keŋte ndu ɛ mbiy se ɛylaay, è təm əblɛɛ ɛ ntiɛ è jem ge: Ba ə wom, loo lu nɛ lòó wɛ̀ nɛɛy ge ghàà mɛ nəə ɛ te əbbome ngɛkse ghan, wɛ̀ nɛɛy. Dî, nɛ ghàà nɛɛy ɛ mɛ ɛykoŋ, nɛɛy ɛ wɛ̀ ɛykoŋ.
40Əb jem dì, è me kase fiile, è ndu bene fɛ ghon-ɛyfɛl nə wen ghɛ ɛtal ghii nè luun, è yɛn nɛ ghene buunee. Əb me bif se Bita ge: Lɛ lu ge kè lòó ghɛn jia yɛ kek jeme ghɛsen kɛn naa se chuy ɛymok-a? 41Ghɛn yɛ chiy gese jeme, ka ghɛne jia fɛy se məme ɛymomse. Ghɛn yɛ ke ge ɛyteme koŋe se yɛ nɛɛy ɛyfɛl ɛyjuŋe, dî nɛ əbghune kwene. 42Əb kase ndu se jem ge kaŋ ɛbaa, è jem ge: Ba ə wom, loo lu ge lòó əbbom ə ngɛkse vin jia fəy se mɛ keghoo, buu ge mɛ nəə, ke yɛ lu kɛn ka wɛ̀ kɛŋen. 43Əb mɛyse ɛyjem, è kase fiile ghaa ghon-ɛyfɛl nə wen ghii nè luun, è gese yɛn nɛ ghene ko bo buune, bek ka mbuunese nè diilen ɛ ghene ɛshiɛ naa se ŋaŋ.
44Əb me gese lòò, è vəse ghene, è ndu se jem ge kaŋ ɛtal, è jem kɛn ka əb kè se jemen. 45Əb jem dì è kase gwiy se ghon-ɛyfɛl nə wene nɛ ghene ko bo buune, è suuy ge: Ghɛn ko bo tɛse buune-a? Yɛn-a, əbliye baksenmen wɛ ɛ́ feene Wanwel se ghele mbeese. 46Ghɛn loolé, é ghɛsen yɛ ndu. Wel wɛ əb feenen mɛ se gwiye.
Ɛ́ koo Jesus
(Mak 14.43-50; Luk 22.47-53; Jn 18.3-12)
47Se lu kɛn ka Jesus suuyen dî, Judas wɛ nè luun wel əblee ɛ məme ghon-ɛyfɛl nə wen ghɛ njio-sebaa ɛyvəm me tum fo. Əb nè gwiye nɛ̀ ngoo wel, nɛ ɛ́ ki fiakse nɛ̀ əbbule, nɛ tum ghele mbiy se ndaa-ɛykokse Feyin, gese nɛ̀ chɛɛse. 48Nè lu dî nɛ Judase siysemen ghene ghene ge, ghene nɛ̂y yɛn nɛ yi chakte wel nɛ̀ ɛyngvəmlee fene lu-a wen, ghene me koo.
49Ghene ghene gwiy è chin, ɛ leghɛ Judas chia è teem ɛ Jesus ɛyshiɛ, è chakte wen ge: Ndinte, mɛ chakte wɛ̀, è me baamé wen.
50Jesus suuy se wen ge: Bɛ ə wom, nɛɛy yi kenəə kɛ wɛ̀ kɛŋen se nɛɛy.#26.50 Nɛ ke lu ge: Yaŋse nɛɛy kenəə kɛ wɛ̀ gwiyen se nɛ̀ɛ̀y. Ghel ghii me kaame ɛ Jesus ɛ ketuu, è faŋ wen.
51Wel əblee wɛ ghene ghe Jesus nè luun fo sasen è guf fiak ə wen se əbkuu è gwɛl kekos se ketuu se ghɛ́ ntaŋlee so, è kɛf ketuule. 52Jesus kɛy, è suuy se wen ge: Kase vii fiak ə viɛ se əbkuu. Yɛɛ ke ge naa ndɛ wɛ əb chóken fiak lu nɛ əb nɛ̂y kuo ɛykuo nɛ ɛy ko chia nɛ lu ɛ fiak. 53Wɛ̀ báà se ke ge kè lu əbnoo, é mɛ suuy se Ba ə wom, é əb tinse əbnone nchiyse-ndaa nə wen ɛ nkamse nkamse əbliy əbmok, é ghene gwiy è noo san-a? 54Mɛ lɛ nɛɛy dì, é kenəə kɛ ɛ́ nyaken ɛ ŋwaale-Feyin ge ke lu se gan, bo náà ghan lɛɛy se geese gan?
55Jesus suuy dì, è me bif se ngoo wel yi ge: Ghɛn bɛ̀yten fiakse gese nɛ̀ əbbule ka ɛ́ jume nɛ lu əbchoŋ se gwiy se koo mɛ-a? Nè tun ghɛ ge ghàà ghɛn koo mɛ əbliy wɛ mɛ nè yesen dinten əbnəə se ghele ɛ ndaa-ɛykokse kechii nɛ̀ kechii? 56Əbnəə vin lɛ gan lɛ se lunse əbluuy əbnəə wɛ ghele ntum nə Feyine nè nyaken ɛ ŋwaale-Feyin. Ka ɛ́ koon Jesus dì, ghon-ɛyfɛl nə wene me vəse wen, è nyiŋke ɛjim.
Jesus teem ɛ ɛytiy nsak nə chɛɛse
(Mak 14.53-65; Luk 22.54-55,63-71; Jn 18.13-14,19-24)
57Ghel ghɛ ɛ́ nè koon Jesus ghi, me liɛ wen, è ndu so se Kaiafase bɛy wɛ ketuu se ghɛ́ ntaŋlee. Ghene nè nduu dì nɛ ndintese tesake ghene chɛɛ sɛ ɛylak foo kè shi fo chiytee. 58Ɛ́ loo ndu nɛ̀ Jesus dì, Bita se nyiake nduu ɛybam, dî nduu baksen wiy se ghene. Əb ndu è chin ɛ ntetembɛy nə ketuu se ghɛ́ ntaŋlee, è chia diom ghene nchiyse-ndaa, è se yiote ge é sɛ gan ghɛ se Jesus-a?
59Ghele mbiy se ghɛ́ ntaŋlee, ghene ghel ɛjim ghɛ ɛ́ nè luun ɛ ɛydiom fo, me se kɛŋe kenəə kɛ toy ɛ Jesus əbghun, ka ɛ́ yuy wen; 60è chèmè jia yɛn ghɛy. Naa nɛ ghel əbbuame teem naa se ɛydio è se toye əbnəə ɛ Jesus əbghun! Ke ghak, ghel ɛlee din ketuu ɛbaa, 61è suuy ge: Biɛ vin ne suuy ge lòó yi sakte ndaa-ɛykokse nə Feyine, è kase bom ɛychin se əbchii əbtal.
62Ketuu se ghɛ́ ntaŋlee me loole, è teem ɛyyio, è bif se Jesus ge: Wɛ̀ lɛ ki kenəə se suuy ɛ kenəə kɛ ghel ghine suuyen kum wɛ̀-a? 63Jesus gok kɛn ɛ chichi. Ketuu se ghɛ́ ntaŋlee ki me suuy se wen ge, mɛ suuy ge wɛ̀ kan ɛyghel ə Feyin Fɛ Fe chiin ge wɛ̀ sɛ lu Vi wɛ Feyine nè Yiosen, wɛ̀ luun wán ə Feyin-a.
64Jesus fise ge: Ke lu ka wɛ̀ suuyen. Dî nɛ ghɛn gese yɛ ke ge, ɛ́ lóó moote é ghɛn yɛn Wanwel nɛ əb diom ɛ ɛybee əbkoy əbtaa nə Feyine, Wɛ Ba-Əbtaawe-Əbjim, è gese yɛn nɛ əb gwiye ɛ məme mbàke sɛ́ ɛyyio.
65Ketuu se ghɛ́ ntaŋlee yio dî è me sas ndəyse wen nɛ̀ ngeŋ wen, è suuy ge: Wel vin tɛymen Feyin. Lòó ɛ́ jia bo yɛ kɛŋe kenəə kɛŋen kum wen. Ghɛn lu nɛ ɛ́ yio sɛy ka əb tɛyen Feyin. 66Ghɛne kwaate ge ɛ́ nɛɛy lɛ́ɛ́y nɛ̀ wen?
Ghene fise naa ghel ɛjim ge, ɛ́ yuy wen.
67Ghel ɛlee me tio teliɛ ɛ Jesus ɛykek, ghel ɛlee kfənle wen, nɛ ɛlee saaye ɛghoo ɛ wen ɛykek. 68Ghene nɛɛy əbnəə vin se Jesus dì, è me se wɛysee, bife se wen ge: Wɛ̀ wɛ wɛ̀ been ge wɛ̀ lu Vi wɛ Feyine nè Yiosen, lɛ lòó wɛ̀ din wel wɛ əb tɛ̀lèn wɛ̀-a?
Bita maa Jesus
(Mak 14.66-72; Luk 22.56-62; Jn 18.15-18,25-27)
69Ka ɛ́ nɛɛyen dî, nɛ Bita ko diom kɛn se ntetembɛy fo. Wándɛ əbvii əblee wɛ əb nè fɛ́len ɛ bɛy fo yɛn wen, è ndu, è suuy se wen ge: Wɛɛ wɛ̀ sɛy nè lô se lu ghɛne Jesus wɛ̂ Galilee vi.
70Bita maa lɛ keful ɛ ɛyshiɛ nə ghel ɛjime, è suuy ge: Mɛ báà se ke kenəə kin kɛ wɛ̀ suuyen se mɛ. 71Əb maa dî, è me lòò se fo, è ndu è teem jii əbchio bɛy. Wándɛ əbvii əblee wɛ əb ko nè fɛ́len ɛ bɛy fo sɛy gese yɛn wen, è suuy se ghel ghɛ ɛ́ nè teem fo ge: Wel vin nè lô se lu ɛ ngoo nə Jesuse wɛ̂ Nazalet.
72Bita gese maa, è kan ɛyghele Feyin, ge yi báà se ke wen.
73Se moote kɛn lɛ ghel ghɛ ɛ́ nè teem əbchio bɛy ghi, kokte è ndu, è suuy se Bita ge: Ke loote lu se əbluuy ge wɛ̀ lu wele ngoo nə Jesus, bek ge kesuŋnene kiɛ dine ge wɛ̀ lu wele wɛ̂ Galilee.
74Bita me kɛ̀ɛ̀tè leenen se laa kelek ge, loo lu nɛ yi yia əbbuam, Feyine mak ngɛk se yi ketuu, yi báà se ke wel nɛ̂ vin. Kɛn ka əb choken giɛ se əbchio, lumngvəə me toŋ. 75Əb me kuume kenəə kɛ Jesus nè suuyen ge: Lumngvəə nɛ̂y yɛ ghan ge əb toŋ, nɛ wɛ̀ maamen mɛ kaŋ ɛtal. Ka Bita kuumen dî, è me nyiake teem jii bɛy, è kɛ̀sèn nɛ̀ ɛydiye.
Currently Selected:
Mat 26: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012