Mat 24
24
Jesus suuy ge ɛ́ náà kɛs ndaa-ɛykokse
(Mak 13.1-2; Luk 21.5-6)
1Jesus lòò se ndaa-ɛykokse è loo ndu, ghon-ɛyfɛl nə wene kokte è gwiy ɛ wen ɛyshiɛ è se dine ndaa-ɛykokse yi, bensen jii yɛ ɛ́ nè bomen ɛ ten. 2Jesus sɛy suuy se ghene ge: Ka ghɛne yɛnen nɛ kembome tene jofe lɛ, mɛ suuy əbluuy se ghɛn ge ɛ́ náà kɛs é ɛytiy ɛylee jia yɛ nyiŋ ɛ ɛylee ketuu. Ɛ́ náà səkse kefaa kejim se ntiɛ.
Ngɛkse ghene nəkse náà yɛ lu
(Mak 13.3-13; Luk 21.7-19)
3Nɛy se lu ka Jesus nè koken è diom ɛ kfən Olif, ghon-ɛyfɛl nə wene nyiake gwiy se wen è suuy ge: Fekte se ghɛs əbliy wɛ kenəə kine náà gan, gese nɛ̀ əbchəyte wɛ əb náà din ge wɛ̀ se gwiye, gese nɛ̀ wɛ əb náà din ge mbi se mɛye. 4Jesus fise ge: Ghɛn yɛ toknen fɛ wel lɛɛse ghɛn. 5Ghele náà fəy è gwiy se ɛydio è yɛ lɛɛse ghel ɛ mɛ ɛyghel suuye ge: Lu mɛ Vi wɛ Feyine nè Yiosen, é ghele jas jii se ɛydio. 6Ghɛne naa yio ge ɛ́ təme ɛyghoŋ fɛn-fɛn, è yio ge ɛ́ baate ɛyghoŋ ɛ əbtəm, ghàà ke yɛ foo ngɛk se ghɛn. Əbnəə nɛ̂ vin lu se nɛy se gan, dî nɛ báà se lu ge mbi se mɛye. 7Ɛylak ɛlee náà yɛ noo ɛylee, nɛ əbfon ghene ghele ə wene təme ɛyghoŋ ghene ghe əbfon əblee ghene ghel ə wene. Jeŋe naa koo. Ntiɛ naa yɛ shiken ketaan ketaan əblik se ɛydio. 8Əbnəə nɛ̂ vin əbjime nɛ̀y yɛ lu kɛn kenkɛɛte kenəə kɛn ka wán ɛ əbliy wɛ əb momen əbvii.
9Ɛ́ náà loo lu əbliy fô ɛ́ koo ghɛn è fo ge ɛ́ nəkse è yuy. Mbi ɛyjime náà yɛ bane ghɛn bek mɛ. 10Ghel se ɛydio náà maa mɛ, è yɛ bane wel nɛ̀ wel, kale əmnaŋ kum ngeŋse ghen. 11Nfektese əbbuame náà fəy è yɛ lɛɛse ghel se ɛydio. 12Əbnəə əbbee naa dio ɛ ketuu ntiɛ se ŋaŋ é ghel se ɛydio jia bo yɛ koŋe ghel ɛlee. 13Dî nɛ naa ndɛ wɛ əb teem ketaan se chin se kenləysene náà boy. 14Ɛ́ náà fekte sakghɛ əbjuŋ vin wɛ kum ɛysak ə Feyin é ketuu ntiɛ kejime yio, nɛ mbi geese mɛy.
Ngɛk ɛytaa yɛ ɛy yî gwiy
(Mak 13.14-23; Luk 21.20-24)
15Ghɛne náà yɛn nkfəm ɛybee ɛybee yɛ wele ntum nə Feyine wɛ Daniel nè suuyen, nɛ əb tiy ɛ ndaa-ɛykokse. Naa ndɛ wɛ əb jaŋen, keele. 16Ghɛne naa yɛn nɛ ke se gane, ghel ghɛ ɛ́ luun ɛ Judea mɛ nyiŋ è kok se kfən 17Wele yio lu ɛ ketuu ndaa, fɛ əb yɛ jefse əbliy ge yi ko səəke, è liɛ əbfua ə vi ɛ ndaa. 18Wele yɛ lu əbkwak ghàà əb kfəəy ge yi liɛ ndəyse kenton nə yi. 19Ke yi yɛ bef se əbkiy ghɛ ɛ́ luun nɛ̀ əmlɛɛme gese nɛ̀ se əbkiy ghɛ ɛ́ kiin ghon ɛbole ɛ keleŋ əbliy fo. 20Ghɛn yɛ jem se Feyine ge ghàà nsam yɛn nɛ̂ yi naa fəy nɛ bèŋ kene ɛ kechii ɛybam. 21Ghele naa yɛn ngɛk yɛ wel nè bɛɛy ghàà yɛn, se kɛ̀ɛ̀tè se əbliy wɛ mbi nè kɛɛten se kok se chin se leenen. Nɛ kenəə ka kii nɛ̂ kine jia bo yî gan. 22Nè báà buu nɛ Feyine fafte əbchii nɛ̂ vi fene wele-mesoŋe jia yî boy. Dî nɛ Feyine naa faf əbchii ten bek ghele wen ghɛ əb nè chokenmen.
23Wel naa suuy se ghɛn ge: Yɛn-a, Vi wɛ Feyine nè Yiosen vine kene ge! Əb vii dii! Ghàà wel beeme! 24Ghel ɛlee náà fəy è yɛ lɛɛse ghel ge ghene lu Vi wɛ Feyine nè Yiosen, nɛ ɛlee yia ge ghene lu ghele ntum nə Feyine. Ghene náà fek mbɛm è nɛɛy əbnəə əbchio əbyúméné, nɛɛy dî ge jii sɛ yɛ lu yɛ nɛɛy ge ghele jas jii-a, tete-tete ghɛ Feyine nè chokenmen. 25Yɛn-a! Mɛ suuymen əbnəə vin se ghɛn nɛ əbliye bɛɛy ghàà kwɛn. 26Ke me se lu ge ghele naa suuy se ghɛn ge: Yɛn-a! Əb lu əbkwak, ghàà ghɛn ndu fo, kene ɛ́ suuy ge: Yɛn-a! Əb lu ɛ məme ndaa fɛn, ghàà ghɛn beeme. 27Wanwele náà loo gwiy é ke yɛ lu ghɛɛ-ghɛɛ ka ɛyghuu liaken ɛy ban è tosen ɛyyio ɛyjim. 28Wel nè lô maa ngan ge: Kenkuo kefaa loo nyiŋ fɛɛy fene lu ghaa əbngum-ngume yɛ guo.
Ɛygwiye Wanwel
(Mak 13.24-27; Luk 21.25-28)
29Əbliye ngɛk setaa shine náà loo mɛy ɛ leghɛ é chuy liime, é njoŋ jia bo yɛ ban, é əmnjesme fɛyke se ɛyyio. Əbfua nɛ̂ vin wɛ əb kiin kediak ɛ ɛyyio yî shiken. 30Ke naa loo lu dì ɛ́ me yɛn əbchəyte Wanwel ka əb yɛnsen ɛ ɛyyio, é ghele ghɛ́ mbi fɛne ɛjim yɛ toŋnen, è me yɛn Wanwel nɛ əb gwiye ɛ məme mbàkse ɛyyio nɛ̀ kediake gese nɛ̀ əbghaake əbtaa. 31Əb náà loo gwiy, é ɛ́ toŋ ɛyshoŋ ɛyghuye, é əb tinse nchiyse-ndaa nə wen se tebuulese mbi tɛ tekɛɛk, é se bááte ghel ə wen ghɛ əb nè chokenmen ɛ ketuu ntiɛ fɛn ɛjim.
Ngan yɛ kum fekake fig
(Mak 13.28-31; Luk 21.29-33)
32Ghɛn liɛ nfek se fekake fige. Ɛghaa ə tene sɛɛ kaale, ɛfɛɛ kase loo tooke, wɛ̀ me keele ge əbsane se kake. 33Lu ghɛɛ-ghɛɛ ka ghɛne naa yɛn əbnəə nɛ̂ vin nɛ əb se gane, ghɛn me keele ge Wanwel se baksene nɛ əb shi kɛn ɛ əmtəəmese. 34Mɛ suuy əbluuy se ghɛn ge ghele ghɛ́ ntem fɛne jia naa kuo è mɛy nɛ əbnəə vine báà gan. 35Ɛyyio ghene ntiɛ yî mɛy, dî nɛ giɛ ə some jia yî mɛy.
Wele báà se ke əbliy wɛ Wanwele náà gwiy ɛ ten
(Mak 13.32-37; Luk 17.26-30,34-36)
36Wele báà se ke kechii, kene əbliy wɛ əbnəə vine náà gan ɛ ten. Chèmè lu nchiyse-ndaa nə Feyine ɛyyio, kene wán ə wen, fene ghene báà se ke. Lu kɛn Bay wen nyiŋ wɛ əb keen. 37Ɛygwiye Wanwele náà yɛ lu kɛn ka ke nè luun ɛ əbliy nə Noa. 38Nɛ jio geese lun se fəy se kuŋe ketuu ntiɛ, nè lu nɛ ghele yiɛ, nəə əmnduk, nɛ ɛluumene ghene əbkiye chintene, se kok se chin se kechii kɛ Noa nè liin se kenək, 39nɛ̀ ghele ke wiy kenəə kɛ ke ganen, se chin se əbliy wɛ jio nè lunen è fəy, è kuŋ ghene ɛjim. Lu ghɛɛ-ghɛɛ ka ke náà gan ɛ əbliy wɛ Wanwele gwiyen. 40Ɛ́ náà loo lu əbliy fo, nɛ ghele leme ɛylem ɛbaa, ɛ́ liɛ wɛ əbmok, è vəse əblee. 41Əbkiye náà yɛ guo keban ɛ ɛytiy ɛbaa, ɛ́ liɛ wɛ əbmok è vəse əblee. 42Ke me se lu ge ghɛn yɛ toknen bek ge ghɛne báà se ke kechii kɛ Báàba ə wen gwiyen ɛ ten. 43Ghɛn yɛ ke ge Ba ə ndaa lòò è yɛ ke əbliy wɛ əbchoŋe nɛ̂y gwiy ɛ ten, é əb chii se kek ka əb yɛ chiye ndaa ə wen è jia vəse ge əbchoŋ kol. 44Ke me se lu ge ghɛn yɛ lu kebaaten, bek ge Wanwele náà gwiy ɛ əbliy wɛ ghɛne báà se kwaatee.
Nkante wel ɛyfɛl
(Luk 12.41-48)
45Nkante wel ɛyfɛl wɛ əb feesen wɛ ba-ɛyfɛl lòó əb samse è lɛm ge əb yɛ toknen nɛ̀ ghon-ɛyfɛl nə wene gese yiɛse ghene əbliy əbjuŋe lu əbkɛ? 46Ke lu kejuŋ se wel ɛyfɛl nɛ̂ vi wɛ ba-ɛyfɛl nə wene nɛ̂y loo gwiy è yɛn nɛ əb nɛɛye ɛyfɛl ə wen. 47Mɛ suuy əbluuy se ghɛn ge, ba-ɛyfɛl nə wene nɛ̂y lɛm wen é əb yɛ toknen nɛ̀ ɛykɛŋ ə wen ɛyjim. 48Dî nɛ wel ɛyfɛl vi ki ndee ɛybee, é əb suuy se ngeŋ ə wen ge: Ba-ɛyfɛl nə mɛ jia nɛ̂y yaŋse fiile ɛybam; 49è me kɛɛte se yɛ tɛle ghon-ɛyfɛl ɛlee tɛlen, gese yiɛ, nəə ghene ghe ɛshiɛ əmnduk; 50é ba ə ɛyfɛl nə wen nɛ̂y gwiy ɛ kechii kɛ əb kè báà se kwaatee, gese nɛ̀ se əbliy wɛ əb báà se ke. 51Əb nɛ̂y gwiy dì è jum wen é əb ndu è yɛ lu ghene nfefsese ghaa ghene yɛ toŋnen gese kfəle ɛsoŋ.
Currently Selected:
Mat 24: oku
Highlight
Share
Copy
Want to have your highlights saved across all your devices? Sign up or sign in
©CABTAL, 2012