Atɔ Lɛsunahɛ 3
3
Sardis Ɔpasua Nkla
1Ɔlɛtra bla mɩ ɔbɛɛ, “Wanlɩn asʋn anfɩ sɩsɩ Akristofɔ ɔpasua ánɩ́ ɩbʋ Sardis wulutɔ ɔbɔpʋ fɛɛ,
“Ɔha amʋʋ ɔbʋ Bulu Ɔŋɛ asienɔ pʋ́ ntsrakpabi asienɔ amʋ ɔbɛɛ: Nyin fʋ bwɛhɛ fɛ́ɛ́. Fʋbʋ ɩda ánɩ́ fʋkɩ nkpa, tamɛ fawu fʋna. 2Mʋ́ sʋ tsinki, afʋwa fʋ atɔ trahɛ amʋ ɔwʋnlɩn, tsufɛ idekle iwu. Nawun ánɩ́ fʋ bwɛhɛ lesian mɩ Bulu ansɩtɔ. 3Mʋ́ sʋ kaɩn tɔá bosuna fʋ pʋ́ mʋ́á fonusʋ. Gyi mʋ́sʋ, afʋdamli klʋntɔ. Tamɛ nɩ fʋmetsinki a, nóbofwie fʋtɔ fɛ owikplu, fʋmɛ́ɛbɩ brɛá nɛ́ba. 4Tamɛ aha akʋ bʋbʋ wulu amʋtɔá bʋmɔkʋkpɔɩ amʋ́ atadɩɛ.#3:4 Bʋmɔkʋkpɔɩ amʋ́ atadɩɛ asɩ gyi bʋmɔkʋbwɛ lalahɛ. Bɔ́wa atadɩɛ fututu, mɩa amʋ́nyɔ abɛ́natɩ, tsufɛ bafʋn. 5Nɛ́ha ɔha ánɩ́ olegyi ɩsʋ ɔbɔ́wa atadɩɛ fututu. Mméetsitsi mʋ ɩda lɛ nkpa ɔwʋlʋ amʋtɔ. Nɛ́blɩ mɩ Sɩ mʋa mʋ abɔpʋ ansɩtɔ mbɛɛ, mɩbʋ mʋ.
6“Ɔha ánɩ́ ɔbʋ asʋ onu asʋn ánɩ́ Ɔŋɛ Wankɩhɛ amʋ dɛ ɔpasua amʋ bla asɩ.”
Filadelfia Ɔpasua Nkla
7Ɔlɛtra bla mɩ ɔbɛɛ, “Wanlɩn asʋn anfɩ sɩsɩ Akristofɔ ɔpasua ánɩ́ ɩbʋ Filadelfia wulutɔ ɔbɔpʋ fɛɛ,
“Ɔha amʋʋ ɔlɔwankɩ, ɔtamawa afunu, ɔdɛ Owie Dawid saafɩ, ofinki ɔhaa tamatalɩ fin, ofin ɛ ɔhaa tamatalɩ finki amʋ ɔbɛɛ: 8Nyin fʋ bwɛhɛ fɛ́ɛ́. Kɩ, nafinki obu yaɩ ha fʋ. Ɔhaa mɛ́ɛtalɩ fin mʋ́. Nyin ánɩ́ fʋma ɔwʋnlɩn, tamɛ fagyi mɩ atosunahɛsʋ, fʋmɛkpa mɩ ɔma. 9Ɔbʋnsam abuopʋ amʋʋ bʋdɛ afunu wa bɛɛ, Yudafɔ bʋgyi amʋ a, nɛ́ka amʋ́ hɩɛ bɛ́ba bɛda akpawunu fʋ ayabiasɩ. Amʋ́ fɛ́ɛ́ bɛ́bɩá ntɔdwɛ fʋ. 10Fagyi mɩ asʋnsʋ, fanya klʋn lɩɩ kinkiinkin. Mʋ́ sʋ nɛ́lɛ fʋ lɛ ipian amʋʋ nɔ́pʋsɔ ɔyɩtɔ aha fɛ́ɛ́ kɩ amʋtɔ. 11Kɩ, nɛba nɩ. Mʋ́ sʋ kɩta ɩtɔ amʋʋ fʋbʋ amʋtɔ kinkiinkin, mɛnɩ ɔhaa mɔ́ɔhɔ fʋ ɩsʋgyi-ɩpa lɛ fʋ ɩbɩtɔ. 12Ɔha ánɩ́ olegyi ɩsʋ a, nɔ́pʋ mʋ bwɛ mɩ Bulu ɔtswɛkpa obu amʋ ɔtan. Ɔmɛ́ɛtra dalɩ ɩnʋ ɛkɛkɛɛkɛ. Nɔ́wanlɩn mɩ Bulu ɩda dɩnka mʋsʋ. Nɔ́wanlɩn mɩ Bulu wulu, igyi Yerusalem pɔpwɛ amʋ ɩda dɩnka mʋsʋ. Wulu amʋʋ ɩbɛ́kplɩ tsu ɔsʋsʋ mɩ wa ba amʋ, nɔ́wanlɩn mɩ onuto ɩda pɔpwɛ amʋ ɛ dɩnka mʋsʋ.
13“Ɔha ánɩ́ ɔbʋ asʋ onu asʋn ánɩ́ Ɔŋɛ Wankɩhɛ amʋ dɛ ɔpasua amʋ bla asɩ.”
Laodikea Ɔpasua Nkla
14Ɔlɛtra bla mɩ ɔbɛɛ, “Wanlɩn asʋn anfɩ sɩsɩ Akristofɔ ɔpasua ánɩ́ ɩbʋ Laodikea wulutɔ ɔbɔpʋ fɛɛ,
“Ɔha amʋʋ bʋtɛtɩ mʋ Amen, mʋ sʋ Bulu asʋn fɛ́ɛ́ ɩtɛba mʋ́tɔ, ogyi ɔdansɩyin ɔnɔkwalɩpʋ, ɔtamawa afunu, ogyi Bulu atɔ bwɛhɛ fɛ́ɛ́ nwun amʋ ɔbɛɛ: 15Nyin fʋ bwɛhɛ fɛ́ɛ́. Fʋmɛblɩ ogya, fʋmolwii ɛ. Nɩ fɛblɩ ogya ntɛ folwii a, tɛkɩ ɩbʋ alɛ. 16Tamɛ fʋgyi bwɩanbwɩan, fʋmɛblɩ ogya, fʋmolwii ɛ. Mʋ́ alɩ sʋ nótu fʋ tsitsa. 17Fɛɛ, atɔ onyapʋ fʋgyi, fʋbʋ atɔ. Tɔtɔ mɛdɛ fʋ hian, tamɛ fʋma tɔtɔ. Fʋmeyin ánɩ́ ohiani fʋgyi. Fʋbʋ nwɛ, fʋ ansibi labwie, fʋna yaya. 18Mʋ́ sʋ ndɛtɔɩ kpla fʋ mbɛɛ, pʋ kɔba bɔhɔ sika pɛpɛá bafwɩ mʋ́ ogyatɔ mɩ wa. Mʋ́ ɔbɛ́ha fénya atɔ onutonuto nɩ. Ntra ndɛ fʋ bla mbɛɛ, fʋbɔhɔ atadɩɛ fututu, afʋpʋtin fʋ pɛlɩ mʋ́a fʋ yaya amʋ. Bɔhɔ afa da fʋ ansibisʋ, mɛnɩ fówun atɔ. 19Aha ánɩ́ ntɔdwɛ a, amʋ́ ntɔwa ɩyɩn wa, bɩtɩ amʋ́ ɩsʋ. Mʋ́ sʋ wa nsi, afʋdamli klʋntɔ. 20Kɩ, nlɩɩ obu-ɔnɔ, ndɛ agoo tswɩ. Nɩ ɔkʋ lonu mɩ ɔmɛ, olefinki ha mɩ a, nébitiwie mʋ wa, mɩa mʋnyɔ abɔ́wa ɩbɩ gyi atɔ. 21Ɔha ánɩ́ olegyi ɩsʋ a, nɛ́ha mʋ obétsia mɩ wa, mɩ owie obia amʋsʋ. Alɩ kɛn mɩ ɛ negyi ɩsʋ, ntsie mɩ Sɩ wa mʋ owie obia amʋsʋ nɩ.
22“Ɔha ánɩ́ ɔbʋ asʋ onu asʋn ánɩ́ Ɔŋɛ Wankɩhɛ amʋ dɛ ɔpasua amʋ bla asɩ.”
Currently Selected:
Atɔ Lɛsunahɛ 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation