Marko 3
3
Ɩlɔtsa Ɔkpʋnʋ Ɔdakɛ
(Mateo 12:9-14; Luka 6:6-11)
1Yesu lɛtra yɔ Yudafɔ ofiakpa ɩnʋ a, oyin ɔkʋ tsie ɩnʋ, mʋ ɩbɩ kʋlɛ lawu. 2Aha akʋ bɛtɛ Yesu kɩ bɛɛ ɔbɛ́tsa mʋ ɩlɔ ɔkpʋnʋ ɔdakɛ amʋ, mɛnɩ bénya mʋ ɩwɩ asʋn blɩ. 3Yesu lɛbla oyin amʋʋ mʋ ɩbɩ kʋlɛ lawu amʋ ɔbɛɛ, “Kʋsʋ bɛlɩɩ amʋ́ ansɩtɔ nfɩ.” 4Mʋʋ ɔlɛfɩtɛ amʋ́ ɔbɛɛ, “Ntɔ anɩ mbla lɛha ɔkpa ánɩ́ abwɛ ɔkpʋnʋ ɔdakɛ? Yile loo, ntɛ lalahɛ. Ahɔ ɔha nkpa loo, ntɛ amɔ mʋ?”
Tamɛ ɔhaa mɛlɛ mʋ́ ɔnɔ. 5Yesu lɔpʋ ɔblɔ kɩ amʋ́ bomli. Ɩlɔhɔ mʋ ɔsɩn, tsufɛ klʋntɔ bʋ amʋ́ odwin. Mʋʋ ɔlɛbla oyin amʋ ɔbɛɛ, “Tɩnkɩ fʋ ɩbɩ amʋ.” Olenya tɩnkɩ mʋ́ alɩ pɛ, ɔŋɛ lowie mʋ́tɔ. 6Farisifɔ amʋ bɛdalɩ yɔ, amʋ́a Owie Herode aha bɛkɩta agywɩɩn ɩnʋnʋ alɩá bɔ́bwɛ bɔ́mɔ Yesu.
Aha Tsɔtsɔɔtsɔ Ɩlɔ Tsa
7-8Yesu mʋa mʋ akasɩpʋ bɛnatɩ bɔyɔ Galilea ɔpʋ ɔnɔ. Ɔdɔm kpɔnkpɔɔnkpɔntɩ bobuo mʋ tsu Galilea mʋ́a Yudea ɔmátɔ, Yerusalem, Idumea, Yordan bʋnkpa ɔbɩn pʋ́ Tiro mʋ́a Sidon nsaɩntɔ ba mʋ wa. 9Aha amʋ bɔdʋbɩ. Mʋ́ sʋ ɔlɛbla mʋ akasɩpʋ ɔbɛɛ, bʋdunka ɔklʋn kʋ yaɩ ha mʋ, mɛnɩ bʋmóoputa mʋ. 10Tsufɛ alatsa aha tsɔtsɔɔtsɔ ɩlɔ. Mʋ́ sʋ alɔpʋ amʋtɔ okugyiɔkʋ dekleá ɔbɔ́pʋ ɩbɩ da mʋ. 11Nɩ aha ánɩ́ ɔŋɛ lalahɛ bʋ amʋ́sʋ benya wun mʋ alɩ badɩda mʋ ayabiasɩ, sʋra okitikiti blɩ bɛɛ, “Fʋgyi Bulu mʋ Bi amʋ nɩ!”
12Tamɛ ɔlɛda ɔŋɛ lalahɛ amʋ ɔla kinkiinkin ɔbɛɛ, ɩmáha aha abʋbɩ mʋ.
Akasɩpʋ Amʋ Ada
(Mateo 10:1-4; Luka 6:12-16)
13Yesu lɔdʋ yɔ bʋsʋ, ɔlɛtɩ aha ánɩ́ mʋ onuto odekle, bɔyɔtʋ mʋ. 14-15Mʋʋ ɔlɛlɛ amʋ́tɔ aha duanyɔ, ɔlɛtɩ amʋ́ mʋ sumbi ayɔpʋ ánɩ́ mʋa amʋ́nyɔ bétsia; otsia wa amʋ́ abʋyɛda mʋ asʋn ɔkan, abʋgya ɔŋɛ lalahɛ lɛ ahatɔ.
16Aha duanyɔ amʋ ada gyi, Simon ánɩ́ ɔlɛdɩnka mʋ Petro; 17Sebedeo abi Yakobo mʋa mʋ pio Yohane (ɔlɛdɩnka amʋ́ ada ɔbɛɛ, “Boanerges.” Mʋ́ asɩ gyi, “Ɔprada abi.”); 18Atrahɛ gyi; Andrea, Filipo, Bartolomeo, Mateo, Toma, Alfeo mʋ bi Yakobo, Tadeo mʋa Simon ánɩ́ ogyi ɩwɩsʋtsia adunkapʋ ɔpasuatɔ ɔha 19pʋ́ Yuda Iskariot ánɩ́ ɔlɛbɛlɛ mʋ ha.
Yesu Mʋa Beelsebul
(Mateo 12:22-32; Luka 11:14-23; 12:10)
20Brɛá Yesu lɔyɔ woyitɔ a, ɔdɔm bɛtra ba ɩnʋ. Mʋa mʋ akasɩpʋ bʋmenya ɔkpa ánɩ́ bégyi atɔ kʋraa. 21Brɛá mʋ woyitɔ aha bonu mʋ ɩwɩ asʋn a, bɔyɔ bɛyɛkpa mʋ, tsufɛ bʋkɩ bɛɛ mʋ nwun layinta.
22Mose mbla asunapʋ akʋá botsu Yerusalem ba ɩnʋ bɛblɩ bɛɛ, “Ɔŋɛ lalahɛ owie Beelsebul tsie mʋtɔ. Mʋ tumi ɔdɛpʋgya ɔŋɛ lalahɛ lɛ ahatɔ.”
23Mʋ́ sʋ Yesu lɛtɩ amʋ́ ba mʋ ɩwɩ wa, ɔlɛbla amʋ́ asʋn ayebitɔ ɔbɛɛ, “Nkalɩ Ɔbʋnsam ɔbɛ́talɩ gya mʋ ɩwɩ? 24Iwie ogyikpa ánɩ́ ɩlaye anyɔ, bʋdɛ aba kɔ ɩbɛ́dɩda. 25Woyi oduá mʋ́tɔ atsiapʋ bʋdɛ aba kɔ ɛ tobwie. 26Mʋ́ sʋ nɩ Ɔbʋnsam dɛ mʋ ɩwɩ gya a, ɔmɛ́ɛtalɩ lɩɩ. Mʋ ɔnɔ ɔmɔkpa nɩ.
27“Ɔhaa mɛ́ɛtalɩ wie ɔwʋnlɩnpʋ woyitɔ yɔkʋla mʋ atɔ, nkɛtɩ alagyankpa kɩklɩ mʋ tswɩ, asa ɔbɛ́talɩ kʋla mʋ atɔ fɛ́ɛ́.
28“Ɔnɔkwalɩ ndɛ mlɩ bla mbɛɛ, Bulu ɔbɛ́talɩ si lakpan pʋ́ abususʋ kugyikʋ kie nyankpʋsa. 29Tamɛ nɩ ɔkʋ ɔblɩ abususʋ Ɔŋɛ Wankɩhɛ amʋ ɩwɩ a, Bulu méesikie mʋ ɛkɛkɛɛkɛ, tsufɛ alabwɛ lakpan ánɩ́ sikie ma mʋ́ ɩwɩ.” 30Aha akʋ bɛblɩ bɛɛ, ɔŋɛ lalahɛ bʋ Yesutɔ. Mʋ́ sʋ ɔdɛ ɩnɩ blɩ nɩ.
Yesu Abusuanfɔ Onuto
(Mateo 12:46-50; Luka 8:19-21)
31Yesu mʋ yin mʋa mʋ apio bɛba bɛlɩɩ kpankpa, bɔwa ɔkʋ bɛɛ ɔtɩ mʋ ha amʋ́. 32Ɔdɔm bʋtsie bomli mʋ, bɛbla mʋ bɛɛ, “Fʋ yin mʋa fʋ apio bʋlɩɩ kpankpa, bʋdɛ fʋ dunka.”
33Mʋʋ Yesu lɛfɩtɛ amʋ́ ɔbɛɛ, “Amɛndɩ gyi mɩ yin mʋ́a mɩ apio?” 34Mʋʋ ɔlɛkɩ aha amʋʋ bʋtsie bomli mʋ amʋ, blɩ ɔbɛɛ, “Mlɩkɩ, mɩ yin mʋ́a mɩ apio gyi aha anfɩ a! 35Ɔhagyiɔha ánɩ́ ɔtɔbwɛ Bulu apɛ a, mʋgyi mɩ pio pʋ́ mɩ yin nɩ.”
Currently Selected:
Marko 3: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation