Marko 10
10
Ɔkakina Ɩwɩ Atosunahɛ
(Mateo 19:1-12; Luka 16:18)
1Yesu lɔkʋsʋ tsu ɩnʋ yɔ Yudea ɔmátɔ, Yordan ntsu ɔbɩn. Ɔdɔm bɛtra befia bomli mʋ, ɔlɛtra suna amʋ́ atɔ fɛ alɩá ɔtɔbwɛ yaɩ.
2Farisifɔ akʋ bɛba mʋ wa, bʋdekleá bɔ́sɔ mʋ kɩ. Mʋ́ sʋ bɛfɩtɛ mʋ bɛɛ, “Anɩ Mbla lɛha ɔkpa ánɩ́ oyin ɔbɛ́talɩ kina mʋ ka?”
3Yesu lɛfɩtɛ amʋ́ ɔbɛɛ, “Nkalɩ anɩ nain Mose lɔwa mbla ha mlɩ?”
4Bɛlɛ mʋ́ ɔnɔ bɛɛ, “Mose lɛha ɔkpa ánɩ́ oyin ɔwanlɩn ɔkakina ɔwʋlʋ pʋkina mʋ ka.”
5Yesu lɛbla amʋ́ ɔbɛɛ, “Mlɩ klʋntɔ-odwin sʋ Mose lɔwanlɩn mbla anfɩ ha mlɩ. 6Tsu brɛá Bulu lɛlɛ ɔyɩ a, ɔtsɩ mʋ́a oyin ɔlɔbwɛ. 7Ɩnɩ sʋ oyin obótu si mʋ sɩ mʋa mʋ yin yɛmanta mʋ kasʋ, 8amʋ́ abanyɔ bɔ́bwɛ ɔyʋlʋ kʋlɛ nɩ. Bʋtra bʋmegyi abanyɔ, mboun babwɛ ɔbakʋlɛ. 9Ɩnɩ sʋ aha ánɩ́ Bulu labwɛ amʋ́ kʋlɛ a, ɔhaa mámaɩn amʋ́ abasʋ.”
10Brɛá beyinki ba woyitɔ a, Yesu akasɩpʋ amʋ bɛtra fɩtɛ mʋ asʋn tsu asʋn anfɩ ɩwɩ. 11Yesu lɛbla amʋ́ ɔbɛɛ, “Nɩ oyin okina mʋ ka layetsia ɔtsɩ bamba a, alatɔ mbʋa. 12Alɩ kɛn nɩ ɔtsɩ okina mʋ klu layetsia oyin bamba a, alatɔ mbʋa nɩ.”
Nyebi Yula
(Mateo 19:13-15; Luka 18:15-17)
13Aha akʋ bɛkpa nyebi ba Yesu bɛɛ, ɔpʋ ɩbɩ dɩnka amʋ́sʋ, tamɛ mʋ akasɩpʋ amʋ bɔwa ɩyɩn wa amʋ́. 14Brɛá Yesu lowun a, ɔblɔ lɛkɩta mʋ. Mʋʋ ɔlɛbla akasɩpʋ amʋ ɔbɛɛ, “Mlɩha nyebi amʋ ɔkpa abʋba mɩ wa. Mlɩmátin amʋ́ ɔkpa, tsufɛ aha anfɩ odu bʋ Bulu iwiegyi amʋ nɩ. 15Ɔnɔkwalɩ ndɛ mlɩ bla. Ɔha ánɩ́ ɔmɔhɔ Bulu iwiegyi amʋ fɛ kebi a, omóowie mʋ́tɔ.” 16Mʋʋ ɔlɛlata amʋ́ puta, pʋ ɩbɩ dɩndɩnka amʋ́sʋ, oloyula amʋ́ a.
Atonyahɛ Ɩwɩ Atosunahɛ
(Mateo 19:16-30; Luka 18:18-30)
17Brɛá Yesu lɔpʋ ɔkpa ɔyɔ a, oyin ɔkʋ lɛsrɩ ba bɛda akpawunu mʋ ayabitɔ fɩtɛ mʋ ɔbɛɛ, “Osunapʋ yile, ntɔ nɔ́bwɛ asa nénya nkpa ánɩ́ ɩtamata?”
18Yesu lɛfɩtɛ mʋ ɔbɛɛ, “Ntogyi sʋ fʋdɛ mɩ tɩ ɔha yile? Ɔhaa megyi ɔha yile, nkɛtɩ Bulu nkʋlɛ. 19Yɛ fʋyin Bulu mbla amʋ dodo? Ɔbɛɛ, mámɔ ɔha, mátɔ mbʋa, máwi atɔ, máka asʋn dɩnka fʋ basʋ, másisi ɔha, bu fʋ sɩ mʋ́a fʋ yin.”
20Oyin amʋ lɛbla mʋ ɔbɛɛ, “Osunapʋ, tsu mɩ nyebitɔ ɔpá ndɛ ɩnɩ fɛ́ɛ́sʋ gyi.”
21Yesu lɛkɩ mʋ diin, mʋ asʋn lɔwa mʋ ɔdwɛ. Mʋʋ ɔlɛbla mʋ ɔbɛɛ, “Ɩlasi toku kʋlɛá fɔ́bwɛ. Yɛfɛ fʋ ɩwɩsʋ atɔ fɛ́ɛ́, afʋye kɔba amʋ ha ahianfɔ, mɛnɩ fénya siadɩɛ ɔsʋsʋ. Fɔbwɛ mʋ́ ta a, ba afʋbobuo mɩ.” 22Brɛá oyin amʋ lonu asʋn anfɩ a, ɩwɩ lowu mʋ. Mʋ́ sʋ ɔlɛnatɩ diin, tsufɛ ɔhɩɛ ɔbʋ atɔ.
23Yesu lɛkɩ bomli, ɔlɛbla mʋ akasɩpʋ amʋ ɔbɛɛ, “Ɩbɛ́hɩɛ wa ɔnlɩn asa ɩwɩ onyapʋ obówie Bulu iwiegyi amʋtɔ!”
24Brɛá akasɩpʋ amʋ bonu asʋn anfɩ a, ɔnɔ lobwie amʋ́. Tamɛ Yesu lɛla bla amʋ́ ɔbɛɛ, “Mɩ abi, Bulu iwiegyi amʋtɔ wie ɩbɛ́hɩɛ wa ɔnlɩn! 25Ɩlɔpɔn ha kpɔsɔ ánɩ́ ɔbɔ́tsʋn ɔbɩn-atɔ ɔbɔtɔ, dʋn ánɩ́ ɩwɩ onyapʋ obówie Bulu iwiegyi amʋtɔ.”
26Asʋn anfɩ lɛha ɔnɔ lɛhɩɛ bwie amʋ́. Mʋ́ sʋ bɛfɩtɛ aba bɛɛ, “Mʋmʋ ma mɛɛ Bulu ɔbɔ́hɔ nkpa?”
27Yesu lɛkɩ amʋ́ diin, ɔlɛbla amʋ́ ɔbɛɛ, “Tɔá ɩdʋn nyankpʋsa bwɛ mɔdʋn Bulu, tsufɛ Bulu mʋ́ tɛtalɩ bwɛ togyitɔ.”
28Mʋʋ Petro lɛbla mʋ ɔbɛɛ, “Yɛ anɩ mʋ́ anɩlasi togyitɔ tswɩ bobuo fʋ o!”
29Yesu lɛbla mʋ ɔbɛɛ, “Ɔnɔkwalɩ ndɛ mlɩ bla. Ɔhagyiɔha ánɩ́ olesi mʋ woyi, mʋ apio, mʋ sɩ mʋa mʋ yin, mʋ abi ntɛ mʋ ɔsʋlʋ ɔmagya, mɩa mɩ asʋn wanklaan amʋ sʋ a, 30ɔbɛ́lanya mʋ woyi, mʋ apio, mʋ ayin, mʋ abi pʋ́ mʋ agyapadɩɛ amʋ odu tse lafa sei. Bɛ́dɩnka mʋsʋ ɛ sei, tamɛ obénya nkpa ánɩ́ ɩtamata brɛ amʋʋ ɩba amʋtɔ. 31Tamɛ agyankpapʋ tsɔtsɔɔtsɔ bébemli amapʋ, amapʋ ɛ bébemli agyankpapʋ.”
Yesu Lowu Ɩwɩ Asʋn Blɩ Otse Sasɩ
(Mateo 20:17-19; Luka 18:31-34)
32Yesu mʋa mʋ akasɩpʋ amʋ bɔpʋ ɔkpa bɔyɔ Yerusalem wulutɔ, ogyankpa. Ɩlɔwa amʋ́ wanwan, ifu lɛkɩta aha amʋʋ bʋbuo amʋ́ amʋ. Mʋʋ ɔlɛkpa akasɩpʋ duanyɔ amʋ ya ɩtsɛtɔ, ɔlɛtra bla amʋ́ tɔá ɩbɛ́ba mʋsʋ. 33Ɔbɛɛ, “Mlɩnu! Nɩ awie Yerusalem a, bɛ́lɛ mɩ, Nyankpʋsa-Mʋ-Bi anfɩ ha Bulu igyi ahapʋ dɛhɛn pʋ́ Mose mbla asunapʋ. Bɛ́ha mɩ lowu ɩpɔn, pʋ mɩ wa aha ánɩ́ bʋmegyi Yudafɔ ɩbɩtɔ. 34Bɔ́bwɛ mɩ ahinla, tu atsʋnɔ wʋlɩ mɩ, nwɛn mɩ mplɩ, mɔ mɩ; tamɛ ɛkɛ sasɩ a, Bulu ɔbɔ́kʋsʋa mɩ tsu afulitɔ.”
Ɔhandɛ Osum Mʋ Aba
(Mateo 20:20-28)
35Sebedeo abi Yakobo mʋa Yohane bɔkpʋkpɛ manta Yesu bla mʋ bɛɛ, “Osunapʋ, anɩdekleá fʋbwɛ tɔkʋ ha anɩ.”
36Mʋʋ Yesu lɛfɩtɛ amʋ́ ɔbɛɛ, “Ntɔ mlɩdekle mlɩaa mbwɛ ha mlɩ?”
37Bɛbla mʋ bɛɛ, “Ha anɩtɔ ɔkʋlɛ otsia fʋ gyɔpɩsʋ, ɔkʋlɛ ɛ otsia fʋ bɩnasʋ brɛá Bulu ɔwa fʋ numnyam.”
38Tamɛ Yesu lɛbla amʋ́ ɔbɛɛ, “Mlɩmeyin tɔá mlɩdɛkʋlɩ! Mlɛ́talɩ wun ɩwɩɔsɩn amʋʋ nɛba bowun amʋ, ntɛ mlɛtalɩ wu lowu amʋʋ nówu amʋ?”#10:38 Mlɛ́talɩ wun ɩwɩɔsɩn … wu lowu amʋʋ nówu amʋ? Ntɛ Mlɛ́talɩ nun nta ánɩ́ nɛba bonun ntɛ ha bɔ́bɔ mlɩ asu amʋʋ nɛba bɔbɔ amʋ?
39Bɛlɛ mʋ́ ɔnɔ bɛɛ, “Ee abɛ́talɩ.”
Mʋʋ ɔlɛbla amʋ́ ɔbɛɛ, “Mlówun ɩwɩɔsɩn amʋʋ nɛba bowun amʋ, wu lowu amʋʋ nówu amʋ ɛ, 40tamɛ mma tumiá nɛ́lɛ ɔha ánɩ́ obétsia mɩ gyɔpɩ ntɛ bɩnasʋ. Alɩ otsiakpa anfɩ mʋ́ ɩda gyo aha amʋʋ Bulu lala ɩnʋ yaɩ ha amʋ.”
41Brɛá akasɩpʋ idu atrahɛ amʋ bonu asʋn anfɩ a, Yakobo mʋa Yohane ɩwɩ lɔwa amʋ́ ɔblɔ. 42Yesu lɛtɩ amʋ́ fɛ́ɛ́ ba mʋ ɩwɩ wa, ɔlɛbla amʋ́ ɔbɛɛ, “Mlɩyin ánɩ́ aha ánɩ́ obú bʋ amʋ́sʋ, bʋgyi ɔmátɔfɔsʋ agyipʋ bʋtɛhɩɛ amʋ́ aha, amʋ́ ahandɛ ɛ bʋtenya tumi amʋ́sʋ. 43Tamɛ mlɩtɔ mʋ́ a, ɩmába alɩ. Ɔha ánɩ́ odekleá ɔbɔ́bwɛ mlɩtɔ ɔhandɛ ɔbwɛ mlɩ fɛ́ɛ́ ɔkpábi. 44Nɩ mlɩtɔ ɔkʋ ɛ dekleá ɔbɔ́bwɛ mlɩ nkpa ogyapʋ a, ɔbwɛ mlɩ fɛ́ɛ́ ɔkpábi. 45Tsufɛ mɩ, Nyankpʋsa-Mʋ-Bi anfɩ ɛ mmɛba mbɛɛ, bʋsum mɩ. Aha osumkpa nɛba, ampʋ mɩ nkpa hɔ aha tsɔtsɔɔtsɔ nkpa.”
Ansibi Obwiepʋ Ɔkʋ Ɩlɔ Tsa
(Mateo 20:29-34; Luka 18:35-43)
46Boyowie Yeriko wulutɔ. Brɛá mʋa mʋ akasɩpʋ pʋ́ ɔdɔm kpɔnkpɔɔnkpɔntɩ amʋʋ bʋbuo mʋ amʋ bʋdɛdalɩ ɩnʋ a, bowun Timeo mʋ bi Bartimeo. Mʋ ansibi labwie, otsie ɔkpatɔ ɔdɛ atɔ kʋlɩ. 47Brɛá olonuá Yesu Nasaretyin amʋ dɛtsʋn a, ɔlɔwa kplʋn bɩ ɔbɛɛ, “Anɩ Wie Dawid mʋ na Yesu, wun mɩ nwɛ!”
48Amʋ́tɔ aha tsɔtsɔɔtsɔ bɔkplʋn wa mʋ bɛɛ, ɔkpa ɔnɔ bun. Tamɛ mʋ mʋ́ ɔlɛlakplʋn dʋn alɩ ɔbɛɛ, “Anɩ Wie Dawid mʋ na, wun mɩ nwɛ!”
49Yesu lesi lɩɩ, ɔlɛbla amʋ́ ɔbɛɛ, “Mlɩtɩ mʋ ha mɩ.”
Bokpoli ansibi obwiepʋ amʋ, bɛbla mʋ bɛɛ, “Fʋ klʋn ɩdɩ fʋ asɩ, afʋkʋsʋ ba. Ɔdɛ fʋ tɩ!”
50Ɩnʋ oyin amʋ lɔtswɩ mʋ ɔsʋsʋ atadɩɛ tsalɩfwɩ, nwan kʋsʋ ba Yesu wa.
51Yesu lɛfɩtɛ mʋ ɔbɛɛ, “Ntɔ fʋdekle fɛɛ, mbwɛ ha fʋ?”
Ɩnʋ ansibi obwiepʋ amʋ lɛbla mʋ ɔbɛɛ, “Osunapʋ, ha mɩ anwun atɔ!”
52Ɩnʋ Yesu lɛbla mʋ ɔbɛɛ, “Natɩ, fʋ hogyi latsa fʋ ɩlɔ.”
Ɩnʋnʋ mʋ ansibi lobwii, ɔlɛkpla buo Yesu.
Currently Selected:
Marko 10: nko
Highlight
Share
Copy
Want to have your highlights saved across all your devices? Sign up or sign in
© 2017, Wycliffe Bible Translators, Inc. in cooperation with Ghana Institute of Linguistics, Literacy and Bible Translation