ỌMWỤ ỌDADA 20
20
Ebiraham bala Abimẹlẹkị
1Ụka kọ nụwa lẹ, Ebiraham a mwụ bwu ịMamrẹ kele koye nya edii nya ọpyị nya iKenan kaka kụ ẹgẹhẹ apewa nya ịKadẹchị bala iChuu lẹlẹ. Ụka kọ nọ chẹẹ ọ rụ bwu ụwa ka kụ ị-ịGẹra. 2Ụ-ụwa ị-Gẹra, Ebiraham ayịdang juwa kpa ọnụ nyamwụ ya je angịnyị wuu yẹkẹẹ, “ISera ọlẹ nyị ri ọnyadịdọwa ọnyang.” Ịnyị lẹ, Abimẹlẹkị ọlẹ kọ ri adịrahụ nya alụwa a du ẹrụ kaka wụrụ iSera chị ịlọmwụ ọgụ lẹlẹ. 3Ọọwa, ụka ká Abimẹlẹkị Adịrahụ ka ube kaka nune kpá lẹ, Ohe Oluhye a chị ịlọmwụ ehe mẹjọọ ẹ-ẹpwụ nya ụlaa lodu lẹ, Ohe Oluhye a byoo yẹkẹẹ, “Abimẹlẹkị ee! A gbu alẹ lẹ! Chajị ọnyang ọwẹ ká kpa warị wẹ ube alẹ wẹẹ lẹ, ahụ nya ọlẹng ọkịla, ọ ri lẹ.” 4Ụka ọwẹ lẹ, Abimẹlẹkị ayịdang á tị ka ẹga nya iSera lẹka. Ọọwa lẹ, Abimẹlẹkị a wẹ byi Ohe Oluhye yẹkẹẹ, “Ahụ Ọngọlahị ayịdang ri ọngọ nwụ alabwẹla ọnyịịla ododu, ụka ọlẹ ká eje nya ịngịngịhyẹ onyobyi ọhọhọ, á wu ọngọọwa ene ka kpịlọ lẹ, lee? 5Ebiraham ayịdang kpa ọnụ nya ịlọmwụ byim yẹkẹẹ, iSera nyị ri ọnyadịdọwa ọnyang. Ene ká iSera ayịdang myịmyị-ị̀ byim yẹkẹẹ, Ebiraham nyị ri ọnyadịdọwa ọlẹng ịnyịnyị. Ịnyị a du kam jẹ kaka lẹ, kam wụrụ iSera wẹ ẹpwụ-ube nyam lẹ. Lẹ, a tị́ yẹ wẹ lẹ, Ohe Oluhye, ẹ-ẹpwụ nya ọkịlẹtụ ọhụratata bala ụbwọ ocheri-cheri, m kpa họ ẹla ọlẹ lẹ.” 6Ịnyị lẹ, Ohe Oluhye a wẹ byi Abimẹlẹkị ẹ-ẹpwụ nya ụlaa ọọwa yẹkẹẹ, “Abimẹlẹkị yẹ mẹ! M jẹ ká họ ẹlẹwẹ ẹ-ẹpwụ nya ọkịlẹtụ ọhụratata bala ụbwọ ocheri-cheri ịnyịlẹhị. Ịnyị a tịtị du kaam ayịdang hung abwọ la ọhọbịrị ọwẹ ọhọhọ bam wẹ bwula ọ-myị ká họ iSera abwọhẹ kaka lẹlẹ. 7Lẹ, Abimẹlẹkị wo mẹ, tụụbwọ hi iSera kọ rụ ka ẹga nya ọrụmwụ mẹ. Ebiraham, ọrụmwụ ọwẹ ayịdang ri ọlọmwụ nyam am Ohe Oluhye. Ọ ka raabwọ chajị nyang ká ka gbu kaka. Ọ́ tị ri ká pwa, ká kpa ahụ nyamwụ ọwẹ ụ-ụwa pyịyọọ lẹ aalẹ, aa jẹ mẹ, ahụ ayịdang bala angịnyị nyang wuu á ka dayi la ogbugbu kaka.”
8Ịnyị lẹ, Abimẹlẹkị à wụrụ alụkụrwọ ịtụkụ yoo wuu kaka guru lụtụrụ gbegbegbe lẹ, ọ wa ụlaa nyamwụ ọwẹ jaa lẹlẹ. Ụka ọọwa, ọ laa ịwa wuu ju uhi dapwụ hụ amẹ. 9Ọọwa lẹ, Abimẹlẹkị a wụrụ Ebiraham kele lẹ, ọ byoo yẹkẹẹ, “Ebiraham ẹla ọlanyị, a tị́ họhị họ ịnyị? Ẹẹla ịyẹ onyobyi, m tị́ họng kpong-kpong kpụ ká lẹẹ tịtọ nyọka kpa ayịreji ọtata ọtụka ọlẹ warị wam am ayịdang bala alịpyị adịrahụ nyam wuu ịnyị ene? Ang ọchịla-chịla-ka, a wẹ ká họ lẹ. 10Ebiraham, a ka myị ya jem ang odudu ká họm ẹla ọlẹ kpong-kpong?” 11Ịnyị lẹ, Ebiraham a wẹ byoo yẹkẹẹ, “Abimẹlẹkị yẹ, a wụ ẹjẹ ka. Am ayịdang mẹ irya yẹkẹẹ, ọngọngọhẹ a kaa ju uhi nya Ohe Oluhye ẹgẹlẹ kpong-kpong ka lẹ, m me kọ ri kam ya ẹla nya ịlẹhị yẹkẹẹ, iSera ri ahụ nyam lẹ, kanụ ka nwụm hyoo. Ịnyị a du kam kpa ya jenu yẹkẹẹ, ọnyịnam lẹ.” 12Ebiraham myịmyị wẹ byoo yẹkẹẹ, “Jaabwọ kọ la a lẹẹ lẹ, ọọnam ọnyang, iSera ayịdang a ri ịnyịlẹhị lẹ. Ọ ri nya ịlẹhị, ọ́-ri ọnyịnam bwu ẹpwụ, kokoo. Ma, ọnyadam bwu ẹpwụ kpangga, ọ ri ene kam yoo nya ahụ nyam lẹẹ lẹ. 13Ịnyị lẹ, ụka ọlẹ ká Ohe Oluhye be ẹkọ wụrụm, byim yẹkẹẹ, am nyị rụ gba kpehe hi ọpyị nya adam mẹ, kam lẹẹ ga tụ ẹga myị ẹga da lẹ, am ayịdang byi iSera yẹkẹẹ, ‘ISera, a ka dam ụbwọ lẹ! Ẹga myị ẹga ọlẹ kahị pwụ lẹ, aa yẹkẹẹ, ọwa ayịdang nyị ri ọnyịnam ọnyang chajị kị ka nwụm hing kaka mẹ.’ ”
14Ụka ọọwa lẹ, Abimẹlẹkị a go ịmwụ bala ịna bala anyịrẹ lụmẹ-lụmẹ bala iru nya anyịhị anyang bala anyịhị alẹng lụmẹ-lụmẹ ga ha Ebiraham lẹ, ọ tụụbwọ hi iSera ahụ nyamwụ họọ ịnyịnyị lẹlẹ. 15Adịrahụ Abimẹlẹkị ọwẹ myịmyị byi Ebiraham yẹkẹẹ, “Ebiraham wo mẹ, ẹga myị ẹga ọlẹ wuu kọ háng, ám ọ-ọpyị nyam ọlẹ, kam lẹẹ kpẹhị rịrị lẹ, a chụ ha ịlọng ká kụ ẹpwa ụ-ụwa mẹ.” 16Abimẹlẹkị byi iSera ayịdang yẹkẹẹ, “ISera wo mẹ, am ya okpoko onyoowuru ụnọ ookpokpo jwo ijwo ha ayịbang o-oluhye nyang chajị kam ka wụng ido nya o-ri ọlụchị ká ọng myị ọng wuu ka jẹ yẹkẹẹ, ahụ nyị ri ọnyang ọ-họ ụchị kpong-kpong ka ịnyịlẹhị.” 17Ịnyị lẹ, Ebiraham a raabwọ ha Ohe Oluhye chajị nya Abimẹlẹkị ayịdang bala alẹpwa nyamwụ wuu jaabwọ ká Ohe Oluhye ya ịnyịlẹhị lẹlẹ. Ọọwa lẹ, Ohe Oluhye a họ Abimẹlẹkị uda lẹlẹ. Ohe Oluhye myịmyị họ ahụ nya Abimẹlẹkị uda nya ụma ọtata bala anyịhị anchẹ anyang nyamwụ ịlẹ kị tụma ká Abimẹlẹkị kpaa ẹ-ẹpwa lala ịhụ nyamwụ ịnyịnyị. 18Amkpaa lẹẹ du ẹdụrụ nya ụma ọtata kele ka ẹpwụ nya anyang ịlẹpwa nya adịrahụ Abimẹlẹkị ene-ene o-oluhye nya iSera ahụ nya Ebiraham ọlẹ ká Abimẹlẹkị kpa kele ka ube nyamwụ lẹ.
Currently Selected:
ỌMWỤ ỌDADA 20: IBNO
Highlight
Share
Copy
Want to have your highlights saved across all your devices? Sign up or sign in
Igede Bible © The Bible Society of Nigeria, 2019.