Məsəloox 28
28
1Şər amdara şəp'eğal nuval bakayin, t'inest'a,
Düzgün amdar isə aslan k'inək' mərd çurene.
2Ölkinə gərgürçiluğ bakat'an kalaluğbalxoval gelene bakon,
Q'amişakala q'a iz əşlə avabakala amdaren isə ölkinə enefon.
3Kəsibə incitmişala s'ila kala amdar
Əkinə os'k'i taşala sel k'inək'e.
4K'anuna pozmişalt'in pis amdarxone tərifbon,
K'anuna əməlbalxo isə şot'oğoy běšt'un çurk'on.
5Pis amdarxon düzgünluği k'ə baksuna tet'un avabakon,
Q'ončuğon laxi yaq'en tağalt'oğon isə mot'o şaat't'un q'amişakon.
6Təmiz ük'en yəşəyinşala kəsib amdar
Şər yaq'en tağala varlu amdaraxun şaat'e.
7Tərbiyinə q'abulbala ğar q'amiş ğare,
İz ğina tapanxorxoxun c'ovakest'alo isə bava biyaburbal.
8Şin ki tənginə kala faizen tast'unene dövlət girbsasa,
Şot'ay girbalo axırda kəsibxoynak' ük' bok'osp'alt'une mandon.
9K'anuna ibaksun nu çureğalt'ay afırınenal irit'p'esest'a.
10Düzgünt'oğo pis yaq'a zap'k'alo iz kašp'i kurane baft'on,
Ük' təmizt'oğon isə şaat' ğit'un ak'on.
11Varlu amdaren içu müdrike hesabbon,
Ama q'amiş kəsiben şot'ay ük'əne k'ale.
12Düzgünt'oğoy ooren bitot'aynak' mǔqluğe eçon,
Ama pis amdarxo kalaluğa eğayt'un, bito c'ap'ebakon.
13İz günaxxo c'ap'balt'in şaat' ği tene ak'on,
Şot'o iz ozane haq'i ene nu balt'in isə bağışlayinşaksune bə̌ğə̌bon.
14Həmişə Q'ončuğo çalxalo bəxt'əvəre,
İz ük' inadkər bakalo isə bəlinəne baft'on.
15Eht'iyəc bakala azuk'i pis kalaluğbal
Ğırık'ala aslan, hücümbala šuyen k'inək'e.
16Nu q'amişakala kalaluğbal q'əddar, zülümkəre bakon,
Haram q'azanca nifrətbalt'ay ömür isə boxoye bakon.
17Amdarbesp'al iç biyamin q'ı̌ye boşe.
Şuk'k'alenal şot'o tene köməybon.
18Ük' təmiz yəşəyinşalt'aynak' q'ı̌ tene bu,
Pis yaq'en tağalo isə kurane baft'on.
19İz oç̌ala əşp'alt'in boşşamin šume ukon,
Ams'i şeyurxoy qoşt'an tağalt'in isə iz kəsibluğa.
20Ext'ibərlu amdaren bol bərəkət q'azayinşale,
Usum varlayinşaksun çureğalo isə caza.
21Tərəfkəşluğbsun şaat' tene,
Ama bəzit'oğon sa loq'ma šumeynak'al pisluğt'unbsa.
22Tamaxkər var-dövləti bač'anexune t'ist'a,
Ama q'amiştene ki, kəsibluğene içu yaq'běğsa.
23Töhmətbalt'in axırda əfçidən tərifbalt'uxun gele hörməte q'azayinşon.
24Bava-nana fǔq'p'i "mo günax tene" uk'ala amdar əfçibalt'ay dost'e.
25Tamaxkəren davane galdon,
Q'ončuğo güvəyinşakalt'in isə şaat' ğine ak'on.
26İçu güvəyinşakalo q'ammaze,
Müdrikluği yaq'en tağalt'aynak' isə q'ı̌ tene bu.
27Kəsibə kul boxodalo hik'k'ala möhtəc tene bakon,
Şot'o fikir nu tadalt'in isə ləənəte q'azayinşon.
28Pis amdarxo kalaluğbal bakat'an, bito c'ap'ebaksa,
Şorox əfçibakat'an isə düzgünt'oğoy zore avuzbaksa.
Currently Selected:
Məsəloox 28: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.