Məsəloox 26
26
1Yəyə ı̌ǰ, exe vədine ağala nu yarayinşala k'inək',
Q'ammazal şərəf tene yarayinşbsa.
2Çovali t'ağay-mağay purbsun,
Bač'ayna hari-taysun k'inək',
Nahaq' q'arğişal ams'i şeye.
3Ěka tatar, elema q'antarğa hetəre yarayinşbsasa,
Q'ammazi bač'anal xaǰil hametəre yarayinşbsa.
4Q'ammazaxun iz muzin ma əyitp'a,
Tenesa şot'ay tayen bakon.
5Ama şot'o t'etər coğab tada ki,
İç iz piyes müdrik maq'an ak'eśi.
6Axmağaxun xavar yaq'abalo,
İçin iz tura bot'i ziyan zap'k'ala amdar k'inək'e.
7Q'ammazi ǰomoxun c'eğala məsələ
Topali axsağlayinşala tur k'inək'e.
8Q'ammaza tərifləyinşbsun
J̌ěna ragatk'ina ğaç̌bsun k'inək'e.
9Q'ammazi məsələ eşt'un
Finağoyen iz kiyel śaś biq'sun k'inək'e.
10Q'ammaza, nəəl hər yaq'axun c'ovakalt'u əşlə exst'un
İz əşlə nu avabakala oxbosali ox bost'un k'inək'e.
11İz səfeyluğa saal qaybakala q'ammaz,
Xə̌ye iz əsək'p'una qaybaksun k'inək'e.
12İçu iz piyes müdrik hesabbalt'u ak'enu?
Şot'oxunsa q'ammaza gele umudo.
13Tənbəlen unek'on: "Yaq'a aslano!
Şir küçəmoğone tarane!".
14Ç̌omo iz həncəmin loxol hetəre fırınesa,
Tənbələl iz bask'i gala hametəre fırık'on.
15Tənbəlen iz kula q'ave boş banedon,
İz ǰomo eşt'eynak' ərik'mişe bakon.
16Tənbəl iz piyes
Müdrik coğab tadala vǔğ tanaxunal müdrike ak'eğon.
17Q'ert'ay davina gərbaksun
Küçinə xə̌ye ǔmǔğo zapsun k'inək'e.
18-19Q'onşina ferett'i "zarafat'ezbi" upsun
Gije bok'ala ox bosi bisun eşt'un k'inək'e.
20Uš çark'at'an arux aç̌ala k'inək',
Əyittaradal nu bakala galal davane çark'on.
21S'ileynak' kömür, aruğeynak' uš hetəresa,
Davina bəc'ük'st'eynak'al əşgaldala amdar hametəre.
22Əyittaradalt'ay əyitmux ləzətlu tikoox k'inək'e,
Q'oq'exun hasande c'ovakon.
23Muč'a muzin, iz ük' isə şəren buy amdar
Gümüşi xena çəpeśi q'ə̌lik' k'inək'e.
24Düşməni muzexun uč'e barst'a,
Ama iz ük' bic'luğen buye.
25Şot'in cügü əyitalk'ayin, věmabaka,
İz ük' vǔğ cürə murdarluğen buye.
26İz pisluğa ç̌oyexun nuval ak'est'ayin,
Ama axırda camaati běš şo ç̌oyel c'eğale.
27Q'ert'aynak' kur kašk'alo içe t'e kura baft'on,
J̌ěyal şot'o t'ık'ırdalt'ay loxole eğon.
28Əfçiduğalen iz əfçi duğala amdara nifrətebon,
Yaltağlayinşakala muzenal bələne eçon.
Currently Selected:
Məsəloox 26: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.