Mat'fey 13
13
Śarpi śile barada məsələ
(Mrk'. 4:1-20; Luk'. 8:4-15)
1T'e ği İsus k'oyaxun c'eri, taśi göle t'ǒğǒl areśi. 2İz hərrəmine gele amdar giresuna görə məcburebaki ki, lodk'ina arśane, camaat isə q'ariluğane çurpi. #13:2 Luk'. 5:1-3 3İsusen şot'oğoynak' gele şeya məsəloğone exlətpsay:
«Mone, sa əkinçi śil śarpsane c'eysa. 4Śark'ala vədine śilurxoy sa hemo yaq'e t'ǒğǒle bist'a, q'uşurxonal hari şot'oğo t'uk't'i ut'unksa. 5Sa hemo k'ul mal bakala ǰěluğ ganxone bist'a. İçoğoy k'ul mal baksuna görə şorox usum göyünt'unbaksa, 6ama běğ c'eri şot'oğo bok'osebsa, t'ı̌q'p'i śilural hələ kalabakinut q'arinebaksa. 7Sa hemo śaśurxoy aranene bist'a, śaśurxonal kalabaki şot'oğo əfçinebsa. 8Bərəkətlu oç̌ala biti śilurxon isə sabaç̌, altmış nəəl ki otuz q'at gele məhsult'un tast'a. 9Ǔmǔx bakalt'in ibakeq'an!»
İsusi het'u görə məsəloğon əyitpsuni barada
10T'e vədə şagirdxon İsusa ı̌šabaki xavart'un haq'i: «Het'aynak'en şot'oğoynak' məsəloğon exlətpsa?» 11İsusen şot'oğo coğabe tadi: «Şot'aynak' ki, göye padçağluği sirurxo avabaksun və̌x tadeśene, ama şot'oğo tene tadeśe. 12Şii bunesa, şot'o Buxačuğon samalal gele tadale, şoval bolluği boş bakale, ama şii tene busa, iz bakalt'uval iz kiyexun haq'ale. #13:12 Mat'. 25:29; Mrk'. 4:25; Luk'. 8:18; 19:26 13Zu şot'aynak'ez şot'oğoxun məsəloğon exlətpsa ki, "şot'oğon bět'unğsa, ama tet'un aksa; ǔmǔxt'unlaxsa, ama nə itet'unbaksa, nə q'amiştet'unbaksa". 14İsaya xavareçalen şot'oğoy barada pi me əyitmux bexe p'ap'i:
"İbakalnan, ama tenan q'amişakal,
Běğalnan, ama tenan ak'al.
15Şot'aynak' ki, me azuk'a hik'k'al t'ə̌q'tenesa:
Ǔmǔxxo biq', pulmuxal q'ic'e şot'oğoy.
Tene, pul bakalt'in anek'oy,
Ǔmǔx bakalt'in inebakoy,
Ük' bakalt'inal q'amişebakoy.
T'e vədə Bez t'ǒğǒlt'un eğoy,
Zuval şot'oğo q'olayezboy". #13:13-15 İsa. 6:9-10; İoan. 12:39-40; Ap'ost'. 28:26-27
16Ama ef pulmux bəxt'əvəre, şot'aynak' ki, aneksa, ef ǔmǔxxoval bəxt'əvəre, şot'aynak' ki, inebaksa! 17Və̌x düzinəz nex: gele xavareçalxon q'a düzgün amdarxont'un ef ak'it'oğo aksun çureśi, ama tet'un ak'i, ef ibakit'oğoval ibaksun çureśi, ama tet'un ibaki. #13:16-17 Luk'. 10:23-24
Śarpi śile barada bakala məsəlinə q'andırişbsun
18İsə əkinçin barada məsəlin məninə ǔmǔxlaxanan: 19amdaren göye padçağluği xavara ibaki şot'o nu q'amişakat'an, şər bakalt'in hari şot'ay ük'e boş biti śilə ext'i taneşt'a. Me śil yaq'e t'ǒğǒl biti śil k'inək'e. 20J̌ěluğ ganxo biti śil isə, xavara ibaki şot'o hat'e saad mǔqluğen q'abulbalt'ay ük'e biti śil k'inək'e. 21Ama metər śilen tum tene duğsa, şot'o görəl me amdari věbaksunen boxoy tene zap'e, t'e xavara q'abulbalt'oğoy əzyətə q'a çətinluğa ak'ala k'inək' hat'e saad qoşebaksa. 22Śaśurxoy boş biti śil isə, xavara ibaki, ama şot'o hər ğinen eçala çətinluğen q'a təngin qoşt'an t'ist'unen iz boş q'ə̌q'ə̌pi amdari ük'e biti śil k'inək'e. Metər śilen bar tene eçon. 23Bar tadala oç̌ala biti śil isə əyitə ibaki şot'o q'amişakala amdari ük'e biti śil k'inək'e. Metərt'in bit'eśit'uxun sabaç̌, altmış nəəl otuz q'at gele bare eçon».
İle q'a arumi barada məsələ
24İsusen şot'oğoynak' sa məsələl exlətebi:
«Göye padçağluğ iz q'oruğa şaat' śil śarpi sa amdarane oşq'ar. 25Ama sa üşe, bito bask'i vədine şot'ay düşmənen hari arumi arane il śarpi tanesa. 26Hari arum kalabaki bul c'eq'ala vədine iləl bureqsa ak'esa. 27Q'oruği q'ončuğoy k'ulurxon hari şot'o next'un: "Ağa, hun vi q'oruğa c'ək'eśi śil ten śarpey ki? P'oy me il mayine əmələ hari?" 28Şot'in k'ulurxo metəre coğab tast'a: "Mo düşməni əşe". K'ulurxon isə şot'o "çurensa tağen şot'oğo ilben?" next'un. 29Q'oruği q'ončuğonal şot'oğo nexe: "Təə, şot'aynak' ki, ila zapi c'evk'at'an şot'oğoxun sagala arumal c'evk'alnan. 30Barta exal śirik' p'ǒğə̌l sagala kalabakeq'at'un. Exe vədine isə zu exp'alxo tapşurboz ki, süft'ə iləq'at'un topbi ğaç̌p'i. Şot'oğo bok'osp'it'uxun oşa bez aruma ambarxo bapest'oz"».
P'ilp'iluni śile saal ə̌yini barada məsələ
(Mrk'. 4:30-34; Luk'. 13:18-21)
31İsusen q'erəz sa məsələl şot'oğo exlətebi:
«Göye padçağluğ sunt'in q'oruğa bit'i sa dənə p'ilp'iluni śil k'inək'e. 32Me śil śilurxoy boş ən mis'ik'oval bakayin, kalabakat'an bost'ani bitk'iğoxun alloye ěqesa, lap xode boydane baksa. Q'uşurxonal purpi hari şot'ay taymoğoy loxol mest'un biq'sa».
33İsusen şot'oğo q'erəz sa məsələl exlətebi:
«Göye padçağluğ sa çuğoy ext'i xib put xarinen šarpi boq'oya gərbi ə̌yin k'inəke, dirist' t'e boq'oyane ayevk'on şot'in».
34İsusen mot'oğo bitova amdarxoynak' məsəloğone exlətpsay, şot'oğoynak' hik'k'ala məsələ eçerinut tene exlətpsay ki, 35xavareçalen pi me əyit bex p'ap'ane:
"Məsəloğon əyitk'oz,
Dünyə yaranmişakit'uxun mağay c'ap' mandit'oğo bayanboz". #13:35 Ǐvel mə̌ğ. 78:2
Q'oruğa bakala arumi q'a ile məsəlinə q'andırişbsun
36Oşa İsus amdarxoxun cöybaki k'oyane baśi. İz şagirdxo İz t'ǒğǒl hari pit'un: «Q'oruğa c'eri ile məsəlinə yax q'andırişa». 37İsusen şot'oğo metəre coğab tadi: «Şaat' śilə śarpiyo Amdari Ğare. 38Q'oruğ - dünyəne. Şaat' śil - padçağluğa tağala yaq'a c'ək'p'iyorox. İl - şər bakalt'ay amdarxone. 39İla śarpi düşmən - iblise. Ex - dünyəni axıre, exp'alxo isə - angelxone. 40İla girbi aruğo bok'osp'alt'ullarik' bakale dünyəni axırast'al. 41Amdari Ğaren İz angelxo yaq'abale, şot'oğonal pis yaq'a zap'k'alt'oğo q'a şər əş biq'alt'oğo bitova Şot'ay padçağluğaxun c'evk'i 42nu aç̌ala aruğo bosalt'un. Ǒnepsun q'a uluxxo ğırıc'enst'un bakale t'iya. 43Düzgün amdarxon isə içoğoy Bavay padçağluğa běğ k'inək' işiğ sakalt'un. Ǔmǔx bakalt'in ibakeq'an!
Xəzinə saal mirvarin barada məsəloox
44 Göye padçağluğ q'oruğa c'ap' sa xəzininəne oşq'ar. Bə̌ğə̌bi amdaren şot'o təzədən c'ap'ebsa, mǔq-mǔq taśi izi k'ə bunesa toydi t'e q'oruğa haneq'sa.
45 Göye padçağluğ gözəl mirvari qə̌věğala sa haq'i-toydalal oşq'are. 46Sa ği şot'in t'e gele toyexlu mirvarina bə̌ğə̌nebsa taśiyal izi k'ə bunesa toydi şot'o haneq'sa.
Tore barada məsələ
47 Göye padçağluğ çəlibiq'alxon dənizə tor bosi cürbəcür çəli biq'sunane oşq'ar. 48Tor buybakat'an şot'o q'ariluğat'un zap'e, arśiyal şaat't'oğo c'ək'p'i q'avurxot'un buybsa, pist'oğo isə t'ǒǒxt'un bost'a. 49Dünyəni axırast'al metər bakale. Angelxon hari pist'oğo düzgünt'oğoy boşt'an cöybi 50şot'oğo nu aç̌ala aruğo bosalt'un. T'et'iya ǒnepsun q'a uluxxo ğırıc'enst'un bakale.
51İsə bitova q'amişnanbaki?» Şot'oğonal "hoo, ay Q'ončux", pi coğabt'un tadi. 52İsusen şot'oğo pine: «Metərluğen, göye padçağluğa sa şagird bakala hər k'anun zombal iz girbit'oğo qaypi t'et'iin ham təzə, ham bisi şeymux c'evk'ala k'ojin q'ončuğone oşq'ar».
İsusi İz yurdnu nu q'abulbaksun
(Mrk'. 6:1-6; Luk'. 4:16-30)
53İsusen me məsəloğo exlətp'i çark'i t'et'iin taneśi. 54İz doğma şəhəre hari sinagoga zombsane burqi. Şot'o ǔmǔxlaxala camaat məət't'əle manst'ay. Şot'oğon metərt'un nexey: «Me amdaren mema mayine ava, me əşurxo biq'seynak' içust'a me zor mayine? 55Mo ust'ay ğar tene ki? İz Nana Mariya, iz viçimuxal İak'ov, İosif, Simon saal İuda tene ki? 56Bito iz xunçimuxal beş piin běš tene ki? P'oy me amdarast'a morox mayine?»
57Metərluğen, şot'oğon İsusi şu baksuna nu q'amişaki Şot'o tet'un q'abulbi. İsusenal şot'oğo pine: «Xavareçala saycə iz yurdnu q'a iz k'oya tet'un hörmətbsa, mandi hər gala!» #13:57 İoan. 4:44 58Şo t'iya çurpi hələ gele nu ak'eśi əşure bes bakoy, ama şot'oğost'a věluğ nu baksuna ak'i tene bi.
Currently Selected:
Mat'fey 13: udi
Highlight
Share
Copy
Want to have your highlights saved across all your devices? Sign up or sign in
© Translation Services International Ltd.