1 Timoteo 5
5
Vitxumbꞌal qꞌu niman tetzu Jesuus tibꞌilaj
1Yitꞌ yaael koj qꞌu qꞌesla chaj vinaj saꞌaneꞌ aas sooksa tu jik. Pek jik chit iqꞌilal saꞌaneꞌ; echaꞌ iqꞌilal atat saꞌaneꞌ. Atoj tatin saatz. Utz aatz qꞌu xiak, echaꞌ atzaꞌqꞌ saꞌaneꞌ aas sooksa tu jik. 2Echat paj qꞌu qꞌesla chaj ixoj, ech iqꞌilal saꞌaneꞌ anan. Utz ech iqꞌilal aanabꞌ saꞌan tu qꞌu ixviak. Paat jikom vatxumbꞌal saꞌan te.
3Loch qꞌu txakay ixoj qꞌuꞌl nojchit yeꞌxhabꞌil tiꞌ. 4Pek oj atil titzꞌin oj tii mam, aꞌ samotxaqꞌon tetz. Tan ministeer sichus tibꞌ qꞌu kꞌaol meꞌala te aas aꞌ bꞌaxal siloch itxutx ibꞌaal. Siqꞌaavixsa bꞌoj te vaꞌl aqꞌax te tichꞌooil. Tan aꞌ u kam bꞌaꞌn niꞌenku tu u Tioxh. 5Pek aꞌ saloch vaꞌl nojchit txakay ixoj kaanaj sijunal. Aꞌ texh kꞌujlelk ikꞌuꞌl tiꞌ Tioxh utz, bꞌenamen niqꞌila isikꞌle Tioxh qꞌiils aqꞌbꞌal. 6Pek ech koj u txakay ixoj vaꞌl niteesa itxumbꞌal tu bꞌey, nitoksa tetz u tachaꞌv, tzꞌejxinaj u tatin vatz Tioxh kꞌuxh itzꞌlel tiloneꞌ. 7Aꞌ qꞌu kam sachus te tziꞌ. Jikom siꞌaneꞌ ech yeꞌk sael iqꞌii. 8Tan aatz qꞌu niman tetz u Jesuus qꞌuꞌl yeꞌ niloch u titzꞌin tatzik aas niyaꞌta tetz, yeꞌ nikꞌucheꞌ aas niman tetz u Jesuus. Utz aa paal iviꞌ vibꞌanon vatz qꞌuꞌl yeꞌ tootzaj Tioxh. Tan yeꞌxh bꞌoj nilochoneꞌ.
9Pek aꞌ saok tu ach xoꞌl qꞌuꞌl salochaxi qꞌu txakay ixoj qꞌuꞌl maas tek 60 iyaꞌbꞌ, maꞌl koꞌn ivinaj atinnaj. 10Ayaꞌ qꞌuꞌl kꞌuchul tetz u bꞌaꞌnil tibꞌanoneꞌ. Jik chꞌiisamal titzꞌin taqꞌo, aqꞌel ivatbꞌal aanima taqꞌo, txꞌaael tajan niman tetz u Jesuus taqꞌo, lochel aanima taqꞌo aas nipaal tu kꞌaxkꞌo utz, ayaꞌ qꞌuꞌl niꞌan yaꞌl tibꞌ tiꞌ ibꞌanax kajay qꞌu bꞌaꞌnil.
11Pek ooksach tu ach qꞌu txakay ixoj qꞌuꞌl txul ixoj tereꞌn. Tan bꞌaꞌn siꞌaneꞌ kam noj tok titxumbꞌal, taꞌxh sapaal tetz noj iqelka u Cristo noj ikꞌul tibꞌ tuchꞌ vaꞌt vinaj yeꞌ tootzaj Tioxh. 12Utz choobꞌal paav saꞌalax ikuꞌ tiꞌ oj echi tan, yeꞌn itzojpi vaꞌl vettaqꞌ iqul tuul. 13Utz kꞌuxh yitꞌ saꞌkojbꞌen tiꞌ vinaj, bꞌaꞌn siꞌaneꞌ sichus qꞌeꞌyil; jun texh otzotz ibꞌen tiꞌ ixaansal yol aas yeꞌk itxaꞌk. Utz satoksa tibꞌ tu kam aas yeꞌk tokebꞌal tiꞌ. 14Pek aal bꞌaꞌn satzumeꞌ qꞌu txakay ixoj qꞌuꞌl txul ixoj tereꞌn. Atinoj titzꞌin. Utz aꞌ satil imeꞌbꞌiꞌl tu tatibꞌal. Ech yeꞌk sataqꞌ tzii tu u txꞌiꞌliꞌinaj sachee yol tiꞌ taqꞌo. 15Tan at unjolol aas elyuka tiꞌ u Jesuus utz, aꞌ tek nitoksa tetz u txꞌiꞌliꞌinaj.
16Utz echaꞌ tziꞌ oj atil txakay ixoj xoꞌl titzꞌin tatzik maꞌj niman tetz u Jesuus, aal bꞌaꞌn aꞌ salochon. Ech taꞌxh salochax tu qꞌu niman tetz u Jesuus qꞌuꞌl nojchit yeꞌxhabꞌil tiꞌ.
17Aatz qꞌu ansiano qꞌuꞌl niꞌxhitxꞌol tiqꞌol qꞌu kam, nikꞌuloꞌk tiꞌ aas nojchit sibꞌ talcheꞌ siꞌaneꞌ. Aꞌ chit ibꞌoꞌqꞌol qꞌuꞌl nipaxsa u yolbꞌal Tioxh utz, tuchꞌ qꞌuꞌl nichusuneꞌ. 18Tan nital u Yolbꞌal Tioxh tzꞌibꞌamalka aas: —Yitꞌ saꞌkojooksa txim viꞌ ijuꞌ u vaakaxh vaꞌl nipaqꞌeꞌl triigo.— Chia. Utz nital majte aas: —Nikꞌuloꞌk tiꞌ u aqꞌonom aas sikꞌul ijaꞌmel.— Chia.#5.18 Choktaj u Deuteronoomio 25.4; U Tio 10.10; U Lucas 10.7.
19Yitꞌ yak koꞌnkoxh sanima oj abꞌil saxochon maꞌj qꞌu ansiano saatz. Pek ministeer saꞌatin kaꞌvoꞌj oxvoꞌj aanima aas nojchit ilel abꞌimal u kam taqꞌo vaꞌl saxochlika.#5.19 Choktaj u Deuteronoomio 17.6; 19.15.
20Abꞌiste qꞌuꞌl yeꞌxh niyaꞌ tiꞌ ibꞌanax u paav, yaa vatz qꞌu niman tetz u Jesuus. Ech saxoꞌv tereꞌn qꞌu aanima; yeꞌk sapaavini. 21Tii sanima qꞌu kam nivaleꞌ tzaꞌ. Niꞌxhval see vatz u Tioxh, vatz u kuBꞌaal Jesucristo utz, vatz qꞌul iaanjel txaael el taqꞌo. Yeꞌxhabꞌil koꞌxh at telaꞌ. Utz yeꞌxhabꞌil koꞌxh atil tatin saatz saꞌan tiꞌ itzojpixsaleꞌ.
22Yitꞌ oojeꞌl koꞌnkoxh sooksa maꞌj aanima tu qꞌesalail xoꞌl qꞌu niman tetz u Jesuus. Tan bꞌaꞌn siꞌaneꞌ atoj tu paav utz, ant axh sapotzonaxh tiꞌ u tel iqꞌii. Pek tiira kuentaꞌaxh tiꞌ u paav.
23Yitꞌ nojla koꞌnkoxh aꞌ suukꞌa, pek taꞌl uuva suukꞌa tiꞌ vavuul aas yaꞌv utz, tiꞌ tereꞌn qꞌul ayaabꞌil.
24At unjolol aanima aas vatzsaj qꞌul ipaav, ech yeꞌxtxoj saoki, kꞌuxh yeꞌsaj itxꞌolax inujul tu u Tioxh. Pek at unjot majte aas yeꞌ naꞌl. Anal sailaxi xamtele, aas latxꞌolax inujul tu u Tioxh. 25Bꞌaꞌn saok qꞌuꞌl qꞌu bꞌaꞌnla chaj kam niꞌaneꞌ tan, atia aas vatzsaj chit qꞌu bꞌaꞌnil niꞌaneꞌ. Utz atia xamtel saꞌeluꞌl vatzsaj.
Currently Selected:
1 Timoteo 5: ixlSJC
Highlight
Share
Copy
Want to have your highlights saved across all your devices? Sign up or sign in
© 2001, Wycliffe Bible Translators, Inc. All rights reserved.