MALEKO 5
5
Ko Faka'lei ne Iesu a te Tino ne Ulufia ne Agaga Masei
(Mata 8.28-34; Luka 8.26-39)
1Ne oko atu latou ki te sua feitu o te Namo, ki te fenua o tino Kelesene. 2Ne fanake a Iesu mai te poti, kae ne fakafetaui atu te tagata ne vau mai tanuga. 3A te tagata tenei ne ulufia ne te agaga masei, kae ne nofo a ia i tanuga. Ne seai eiloa se tino ne mafai o saisai a ia ki seni; 4i te mea ko uke taimi ne saisai ei ona vae mo ona lima; kae motumotu faeloa ne ia a seni, kae ofa ne ia a pikifao i ona vae. A te tagata tenei ko to malosi, tela ko se mafai ei ne se tino o puke a ia! 5I ao mo po e fano sale faeloa a ia i tanuga mo mauga, e pakalaga kae selesele foki a ia ne ia eiloa ki fatu.
6Ne lavea 'mao atu ne ia a Iesu, kae ne tele atu o ifo ki a ia. 7Ne kalaga atu foki a ia mo te leo lasi penei, “Iesu te Tama a te Atua tafa sili i te Maluga! Se a te mea e manako ei koe ki a au? I te igoa o te Atua, ko fai atu ei au ki a koe, sa fakasalagina au!” 8Ne fai mai a ia pena ona ko Iesu ne faipati atu ki a ia penei, “Te Agaga masei, fano keatea!” 9Tela fesili atu ei a Iesu ki a ia, “Ko oi tou igoa?” Ne tali mai a ia penei, “Toku igoa ko Lekeono, ko tona uiga e tokouke matou!” 10Fakatagi atu ei a ia ki a Iesu, ke sa afuligina latou mai te fenua.
11E isi foki se lafu puaka e kai'kai pili mai i tafa o te mauga. 12Ne fakatagi mai foki agaga masei ki a Iesu, “Uga atu matou ki puaka ke ulu matou ki ei.” 13Tela, tuku atu ei latou ke olo ki puaka. Olo ei keatea agaga masei mai te tagata, kae ulu atu ki puaka. A te lafu puaka, e tai katoa te lua afe ne 'tele ifo i kautafa o te mauga, eva ki loto i te vai ma'lemu katoa ei.
14A tino tausi puaka ne 'tele ki te fa'kai, kae tala atu ne latou a te mea ne tupu, tela o'mai ei a tino o onoono ki ei. 15Ne o'mai latou ki a Iesu, matea ei ne latou te tagata ne ulufia ne temoni, e sagasaga atu, ko fai ona gatu, ka ko atamai foki, tela, ma'taku ei latou. 16A tino ne lavea ne latou, ne fakamatala atu ne latou a te mea ne tupu ki te tagata ne ulufia ne temoni, mo te mea ne tupu ki puaka. 17Tela, fakatagi mai ei latou ki a Iesu, ke fano keatea mai te lotou fenua.
18I te taimi ne sopo ei Iesu ki te poti, ne fakamolemole mai te tagata ne ulufia, “Ke olo tasi taua!” 19Ne seki talia ne Iesu, kae ne fai atu ki a ia, “Foki ki tou fale i tou kaiga, kae taku atu ki a latou a mea e uke ne fai ne te Aliki mō koe, mo tena alofa lasi mō koe!” 20Tela, fanatu ei a ia ki fa'kai e sefulu e igoa ki a Tekapoli, o tala atu a mea ko oti ne fai ne Iesu mō ia; ka ko tino ne lagona ne latou ko oko eiloa i te ofo.
Ko te Tama Fafine a Iailo mo te Fafine ne Fakapatele ki te Gatu o Iesu
(Mata 9.18-26; Luka 8.40-56)
21Ne toe foki atu a Iesu ki te sua feitu o te namo. Ne oko atu a ia ki ei, kae mumu atu a te vaitino ki a ia. 22I te taimi tena ne vau ki a ia se tino pule i te fale tapuaki i kona, ko Iailo tena igoa, ne totuli kae ifo atu ki a ia, 23kae fakatagi atu mo te loto katoatoa penei: “A taku tamaliki fafine ko oko eiloa i te masaki. Au e fakatagi ki a koe me a, e mafai o fanatu koe o fakaeke ake ou lima ki luga i a ia, ko te mea ke ola!” 24Tela, olo ei laua; kae ualolo atu te vaitino i ona tafa ko i takitaki eiloa.
25E isi se fafine i kona e tafe tena sua i tausaga e sefulu lua, 26e uke a mea ne fi'ta ei a ia i tokita, palele ana koloa ne fakamaumau, kae seai eiloa se 'lei ne maua ne ia, ka ko na gasolo ake ei o masei. 27Ne logo a ia i tala e uiga ki a Iesu, tela fakatōtō atu ei a ia i te vaitino i tua o Iesu. 28I tena manatu, “Ko au fua ke patele atu ki te gatu o Iesu, ko 'lei ei au.” 29I te patelega a ia ki te gatu o Iesu, 'lei ei tona masaki, ka ko lagona ifo foki eiloa ne ia i tena foitino ko 'lei. 30I taimi eiloa tena, ne lagona ne Iesu a te mana ko fano keatea mai i a ia. Tela, saga atu ei a ia ki te vaitino, kae fai atu, “Ko oi te tino ne fakapatele mai ki toku gatu?” 31Kae tali atu ona soko, “E matea eiloa ne koe te i takitaki atu o tino ki a koe, kae fesili mai faeloa koe, me ko oi ne patele atu ki a koe?” 32Ka ko Iesu ne kilokilo sale ona mata, me ko oi ne fakapatele atu ki a ia. 33Ka ko te fafine ko polepole eiloa i te mataku i te mea ko tupu ki a ia; tela, fakapaku ifo ei ki vae o Iesu; kae fakaasi tonu atu me ko ia. 34Ko Iesu eiloa ko fai atu ki a ia, “Taku tama, ko tou fakatuanaki ko ola ei koe. Na fano la mo te manuia, i a koe ko 'lei.”
35Ka koi faipati atu a Iesu ki ei; kae oko mai a tino mo te fekau mai te fale o Iailo penei, “Tau tama fafine ko mate. Sa toe fakalavelave koe ki te Faiakoga.” 36Ka ko Iesu ne seki saga atu ki olotou pati,#5.36: sa saga ki ei; io me ne seki lagona fakalei. kae ne fai atu ki a Iailo, “Sa mataku, talitonu fua mai.” 37I te taimi tena ne seki talia ne ia se tino ke olo tasi mo ia, kae na ko Petelu fua mo Iakopo mo tena taina ko Ioane. 38Ne oko atu latou ki te fale o Iailo, ne lavea ne Iesu te fakalavelave ko tupu, kae lagona ne ia a leo o tino e 'tagi paka'laga. 39Ne ulu atu a ia ki loto kae fai atu, “Se a te mea ko tupu? Kae 'tagi ai a koutou? E seki mate te tamaliki. E moe fua!” 40Ka ko latou ne 'kata fakatauemu ki a ia, tela afuli ei ne Iesu a latou ki tua, kae olo ei mo matua o te tamaliki mo ona soko e tokotolu ki loto i te potu tela e moe i ei te tamaliki. 41Ne puke a ia ki te lima o te tamaliki, kae fai atu penei, “Talita kumi,” ko tena uiga, “Au e fai atu ki a koe e taku tamaliki fafine, tu ki luga!” 42I te taimi eiloa tena, ne tu ake te tamaliki kae sasale i olotou mua, me ko sefulu lua ona tausaga. Ko oko eiloa i te ofo o latou. 43Ka ko Iesu ne fakatonu malosi atu eiloa ki a latou, ke sa taku atu ki se tino a te mea ne tupu, kae toe fai atu ei, “Fagai ake la.”
Currently Selected:
MALEKO 5: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific