MALEKO 2
2
Ko te Faka'leiga o te Tagata Masaki Faka'mate
(Mata 9.1-8; Luka 5.17-26)
1I mo aso ki tua ifo ne toe foki atu Iesu ki Kapanaumi, kae ne salalau te tala e uiga ki a ia ko oko mai. 2Ne mumu mai a tino ki a ia, ka ko se ofi te fale ke oko foki eiloa ki te matafale. Ne folafola atu ne ia te muna ki a latou, 3ka ko nisi tino ne o'mai ne aumai ne latou a te tagata e masaki faka'mate, e tokofa latou ne sausau mai a ia. 4Ne se mafai ne latou o fakapilipili atu ki a ia ona ko te tokouke o tino. Tela, 'tala ei ne latou a te tuafale mai luga tonu eiloa o te koga e nofo i ei a Iesu. I te otiga ne 'tala ne latou te koga tena, tukutuku ifo ei ne latou te moega e takato i ei te tagata masaki. 5Ne iloa ne Iesu te lotou fakatuanaki, fai atu ei a ia ki te tino masaki, “Taku tama, ko magalo au agasala!” 6Ne 'nofo mai foki i kona nisi faiakoga o te Tulafono, ne mafaufau ifo foki latou i olotou loto penei: 7“Ai a e faipati se ava ei te tagata tenei ki te Atua? E se mafai ne se tino o fakamagalo agasala, na ko te Atua!” 8I taimi eiloa tena, iloa ei ne Iesu olotou mafaufauga 'funa, kae fai atu ki a latou: “Ai a e mafaufau ei koutou ki vaega mea kona? 9Tefea te mea e faigofie, ko te fai atu ki te tino masaki, ‘Ko magalo au agasala,’ io me ko te fai atu, ‘Tu ki luga puke tou moega kae sasale’? 10Tela la, ka fakamaoni atu ne au ki a koutou, i te Tama a te Tagata, e i a ia te pule o fakamagalo agasala i te lalolagi.” Tela, fai atu ei a ia ki te tagata masaki, 11“Au e fai atu ki a koe, tu ki luga, puke tou moega kae fano ki tou fale.” 12E onoono atu eiloa latou ki te tuakega o te tagata tena, puke tena moega kae fano fakavave keatea. Ko oko eiloa te ofo o latou kae 'viki atu ki te Atua penei, “E seki matea lele eiloa ne tatou se mea penei mai mua!”
Ko Kalagagina ne Iesu a Levi
(Mata 9.9-13; Luka 5.27-32)
13Ne toe fanaifo a Iesu ki te tafatai o te namo o Kalilaia. E tokouke a tino ne ualolo atu ki a ia, kamata ei a ia o akoako atu ki a latou. 14Ka koi sasale ake a ia, lavea atu ei ne ia a Levi te tama a Alefaio te tino ao lafoga e nofo i tena ofisa. Ne fai atu a Iesu ki a ia, “Tautali mai i a au.” Tu ake ki luga a Levi kae tautali atu i a ia.
15Fakamuli ifo a Iesu ne fai 'kaiga i te fale o Levi.#2.15: i te fale o Levi; io me i tena (o Iesu) fale. E tokouke foki tino ao lafoga mo tino agasala ne tau'tali atu ia Iesu, a nisi o latou ne fakatasi atu ki a ia mo ona soko i te 'kaiga tena. 16A nisi faiakoga o te Tulafono ne Falesaio. Ne matea ne latou a Iesu e 'kai fakatasi mo tino agasala pela foki mo tino ao lafoga; fesili atu ei latou ki ona soko, “Ai a e 'kai fakatasi ei a ia mo tino konā?” 17Ne lagona ne Iesu, tali atu ei a ia ki a latou: “E se aoga te tokita ki tino ma'losi, kae aoga fua ki tino ma'saki. Au e seki vau o kalaga ki tino amiotonu, ka ko tino agasala.”
Ko te Fesili e Uiga ki te Fakalikiliki mō Tapuakiga
(Mata 9.14-17; Luka 5.33-39)
18I nisi taimi e masani saale o fakaliki'liki mō tapuakiga a soko o Ioane te Papatiso, pela foki a soko o te kau Falesaio. Tena te mea ne o'mai ei a tino kae fesili mai ki a Iesu, “Se a te mea e fakaliki'liki ei mo tapuakiga a soko o Ioane te papatiso pela foki mo soko o te kau Falesaio, ka ko ou soko e se ti fakaliki'liki mo tapuakiga?” 19Ka ko Iesu ne tali atu penei: “E mafai ne takaga o te tagata fatoa fakaipoipo o fakalikiliki mō tapuakiga, ka koi fakatasi latou mo te tagata fatoa fakaipoipo? E se mafai o fai pena i aso koi fakatasi ei latou mo te tagata fatoa fakaipoipo. 20E isi eiloa te taimi e fano ei keatea te tagata fatoa fakaipoipo mai i a latou, ko te taimi tonu eiloa tena e fakaliki'liki ei latou mō tapuakiga.
21“E seai se tino e fono ne ia te gatu mago ki se kapa laugatu fou; me kafai e fai pena, e masae i ei a te gatu mago i te fono fou, ko na gasolo ei o masae. 22E se utu foki ne se tino a te uaina fou ki fagu pa'kili manu ko leva; me kafai e fai pena e ma'fa i ei a fagu pa'kili manu i te uaina, ko maumau ei a fagu pa'kili mo te uaina. Tela la, a te uaina fou e 'tau eiloa o utu ki fagu pa'kili manu fou!”
Ko te Fesili e Uiga ki te Sapati
(Mata 12.1-8; Luka 6.1-5)
23 #
Teu 23.25
Ne sasale atu a Iesu fakatasi mo ona soko i loto i togasaito i te Sapati, tau ei ne ona soko a kaufui saito. 24Tela, fai mai ei a te kau Falesaio ki a Iesu, “Kiloke, a te mea ko fai ne ou soko i te Sapati, ko te 'teke tena ki te Tulafono a tatou!” 25Ne tali atu a Iesu ki a latou: “Kai faitau eiloa koutou i te mea ne fai ne Tavita i te taimi ne fia'kai ei a ia mo tena kau? 26#Levi 24.9#1Samu 21.1-6 Ne ulu atu a Tavita ki loto i te fale o te Atua, kae kai ki falaoa kola ne ofo atu ki te Atua. Ne tupu te mea tena i aso o te Faitaulaga Pule ko Aviata, ka ko te tonuga o te Tulafono a tatou ko faitaulaga fua e 'tau o 'kai ki falaoa kona. Ka ko Tavita ne kai ki ei, tuku atu foki ei ne ia ki tena kau.” 27Ne fai atu foki a ia, “A te Sapati ne fai mō te 'lei o te tino; ka ko te tino seki fai mo te Sapati. 28Tela la, au ko te Tama a te Tagata, ko te Aliki eiloa o te Sapati.”
Currently Selected:
MALEKO 2: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific