MATAIO 18
18
Ko oi te Tino e Sili
(Male 9.33-37; Luka 9.46-48)
1 #
Luka 22.24
I te taimi tena, ne olo atu a soko o fesili ki a Iesu, olotou muna, “Ko oi te tino e sili i te Malo o te lagi?” 2Ne kalaga atu a Iesu ki se tamaliki, kae fakatu ne ia i olotou mua, 3#Male 10.15; Luka 18.17 kae fai atu ki ona soko, “E tonu au e fai atu ki a koutou, kafai e 'fuli koutou ke pela mo tamaliki, e mafai ne koutou o ulu atu ki te Malo o te lagi. 4A te tino e sili i te Malo o te lagi, ko te tino tela e fakamalalo ne ia a ia eiloa, ke pela mo te tamaliki tenei. 5Ko te tino e talia ne ia se tamaliki penei i toku igoa, e talia foki ne ia a Au.”
Ko Fakaosoosoga ke Agasala a te Tino
(Male 9.42-48; Luka 17.1-2)
6“So se tino e fai ne ia se mea ke agasala a tamaliki konei, kola e talitonu ki a au, e sili atu moi fai ne 'sai tena ua ki se fatu kae 'pei ki te moana 'poko. 7Kalofa eiloa i te lalolagi ona ko fakaosoosoga ki te agasala! Me e oko mai eiloa a fakaosoosoga, kae kalofa eiloa i a ia tela e fakatupu ne ia te fakaosoosoga!
8 #
Mata 5.30
“Kafai e faka'se koe ne tou lima io me ko tou vae, 'kati kae 'pei keatea! Me e sili atu mafai e sao koe ki te ola, kae seai sou lima mo se vae, i lo tou pei ki te afi se gata mai mo ou lima mo ou vae. 9#Mata 5.29 Kafai foki e faka'se koe ne tou mata, tapale kae 'pei keatea. Me e sili manafai e sao koe ki te ola mo te mata e tasi, kae masei manafai e 'pei koe mo ou mata ki te afi o Kena.”
Ko te Tala Fakatusa ki te Mamoe ne Galo
(Luka 15.3-7)
10“A koutou eiloa, me mana fakaseaoga ne koutou se tino o tamaliki konei. Me muna atu au ki a koutou, i olotou agelu i te lagi e matea faeloa ne latou a foliga o toku Tamana i te lagi.#18.10: I nisi lomiga e fakaopoopo te foaitau e 11: Me i te tama a te tagata ne vau o fakaola a latou kola ne 'galo (onoono ki a Luka 19.10). 11#Luka 19.10 (Me i a au ko te Tama a te Tagata ne vau o fakaola a tino ne 'galo.) 12“Se a te mea ka fai ne se tino e isi ne ana mamoe e selau, kae galo se mamoe e tasi? E a, e se tuku ne ia a te iva sefulu iva mamoe i tafatafa o te mauga, kae fano o 'sala a te mamoe ne galo? 13Kafai la ko maua ne ia, au e muna atu ki a koutou; ka lasi atu tena fiafia ki te mamoe ne galo i lo mamoe e iva sefuluiva kola ne 'toe. 14E pena foki eiloa te otou#18.14: te o'tou; Naai lomiga e isi i eitaku. Tamana i te lagi. E se manako ke galo se tino o latou konei koi fo'liki.”
Ko te Taina ko Agasala
15 #
Luka 17.3
“Kafai e agasala mai tou taina ki a koe,#18.15: I naai lomiga e se sae i ei 'teke ki a koe. fano ki a ia o fakaasi atu a tena 'se i a koulua ake eiloa tokolua. Kafai e fakalogo mai ki a koe, ko tena uiga ko maua ne koe tou taina. 16#Teu 19.15 Kae kafai e se fakalogo ki a koe, ke olo koulua mo se tino io me se tokolua, ko te mea ke fakamaoni ei a muna katoa eiloa ne se tokolua io me se tokotolu molimau. 17Kae kafai foki e se fakalogo ki a latou, taku atu ki te Ekalesia. Kafai foki eiloa e se fakalogo ki te Ekalesia, ke taku la ne koe pela me se tino o fenua fakaatea io me se tino ao lafoga.”
Ko te Fakatapu mo te Fakataga
18 #
Mata 16.19; Ioa 20.23 “Au e fai tonu atu ki a koutou: ko te mea e fakatapu ne koutou i te lalolagi, e fakatapu foki i te lagi. Ko te mea e fakataga ne koutou i te lalolagi, e fakataga foki i te lagi.
19“Au e toe fai atu ki a koutou: me kafai e loto ma'lie se tokolua o koutou ki se mea, kae 'talo atu ki te Atua mo te mea tena, e fai eiloa ne toku Tamana i te lagi. 20Me so se koga e fakapotopoto ei se tokolua, io me se tokotolu i toku igoa, e iai foki au i kona.”
Ko te Tala Fakatusa o te Tavini se Loto Fakamagalo
21 #
Luka 17.3,4 Ne fanatu a Petelu o fesili ki a Iesu, ana muna, “Te Aliki, e fakafia taimi e fakamagalo ei ne au a toku taina, manafai e agasala mai ki a au? E a, e fakafitu?” 22#Kene 4.24 Ne tali atu a Iesu, “Ikai, e se fakafitu,” “kae fitu sefulu a fitu.#18.22: fitusefulu fatele ki te fitu; io me fitu sefulu fitu a taimi. 23Me i te Malo o te lagi, e pau eiloa mo se tupu tela ne mafaufau o fakamasino ana koloa e tausi ne ana tavini. 24I te kamataga o fakamasino ana tavini, ne mua a ia tela ne kaitalafu ne ia ne miliona tālā. 25Ko se maua ne ia o 'togi tena kaitalafu, tela fakatonu atu ei tena pule ke ave a ia o fakatau atu e pela mo se pologa, fakatasi mo tena avaga mo ana tamaliki, pela foki ana mea katoa mō 'togi tena kaitalafu. 26Ne totuli kae ifo a te tavini i mua o tena pule, ana muna, ‘Te aliki, kufaki malie ake eiloa, me e toe 'togi atu ne au ki a koe au mea katoa!’ 27Ne oko ifo ki te pule a te loto alofa ki a ia, tela, fakamagalo ei ne ia tena kaitalafu, kae tuku atu ke fano.
28“Ne fanatu a te tavini ki tua kae fetaui mo te sua taina tavini ne kaitalafu ne ia ne mo tālā i ana tupe. Puke ne ia, kae tolo ki lalo kae fai atu ki ei, ‘Togi fakavave mai tau kaitalafu.’ 29Tela, fakasiga ifo ei ki lalo tena taina tavini o fakamolemole mai ki a ia, ana muna, ‘Ke kufaki malie ake eiloa koe, e toe 'togi atu eiloa ne au ki a koe a taku kaitalafu!’ 30Kae ne se talia eiloa ne ia a te fakamolemole a tena taina tavini. Ne 'pei ne ia ki te falepuipui, ke oko ki te taimi e palele ei ne 'togi tena kaitalafu. 31I te mateaga ne nisi taina tavini a te mea ne tupu, ko oko eiloa i te loto se fia'fia. Olo atu ei ki te lotou pule o fakamatala a mea katoa ne fai. 32Tela, kalaga atu ei te pule ki te tavini tela se loto fakamagalo ke vau ki loto, kae fai atu ki ei, ‘A koe se tavini masei!’ Ne fakamagalo ne au a tau kaitalafu i a au, me ia koe ne fakamolemole mai. 33Ne 'tau mo koe o alofa atu ki tou taina tavini, e pela eiloa mo au ne alofa foki ki a koe!’ 34Ko oko eiloa i te ita o te pule, tuku ei ne ia te tavini se loto fakamagalo ki te fale puipui, ke oko ki te taimi e palele ei ne 'togi tena kaitalafu katoa.” 35Tela, fakapalele atu ei a muna a Iesu penei: “Ka pena eiloa a faiga a toku Tamana i te lagi ki a koutou katoa, manafai e se Loto fakamagalo koutou ki otou taina.”
Currently Selected:
MATAIO 18: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific