MATAIO 12
12
Ko te Fesili e Uiga ki te Sapati
(Male 2.23-28; Luka 6.1-5)
1 #
Teu 23.25
Mai tua ifo i te taimi tena, ne sasale atu a Iesu i loto i fatoaga saito i te Sapati. Ka ko ona soko ne fia'kai, tela tau ei ne latou a saito o kai. 2I te laveatuga ne Falesaio a te mea tenei, muna atu ei latou ki a Iesu, “Kiloke, a ou soko ko fai ne latou a te mea e tapu ma fai i te Sapati!” 3#1Samu 21.1-6Muna a Iesu, “E seki faitau ne koutou a te tala i te mea ne fai ne Tavita mo ona tagata i te taimi ne fia'kai ei latou? 4#Levi 24.9 Ne ulu atu a ia mo ona tagata ki loto i te fale o te Atua, kai ei ne latou a falaoa ne fai mō fai a taulaga ki te Atua, ka ko te mea tena e tapu i te Tulafono, me ko faitaulaga fua e taga o 'kai i ei. 5#Nume 28.9,10 E seki faitau ne koutou i te Tulafono a Mose, i faitaulaga e masani o ofa sale ne latou a te tulafono o te Sapati i te Fale Tapu, kae se agasala latou? 6Kae fai atu au ki a koutou, e isi se tino i konei e sili atu i te Fale Tapu. 7#Mata 9.13; Hose 6.6 Moi fai pela ke iloa tonu ne koutou te muna tenei, ‘Au e loto ki te alofa, kae se ko te taulaga,’ penei la e se fakasala ne koutou a tino kola e se 'tau o sala. 8Ka ko au te Tama a te Tagata ko te Aliki eiloa o te Sapati.”
Ko te Tagata Lima Mate
(Male 3.1-6; Luka 6.6-11)
9Ne tiakina ne Iesu a te koga tena kae fano ki loto i te lotou fale tapuaki. 10E isi se tagata i kona e mate tena lima. E isi foki ne tino e 'nofo i ei, e ma'nako o 'moli a Iesu i sena mea 'se e fai, tela fesili atu ei latou ki a ia penei: “E taga o faka'lei masaki i te Sapati?” 11Ne tali atu a Iesu ki a latou, “Kafai se tino e to sena mamoe ki loto i te lua i te Sapati, e a, e se avake ne ia ki luga? 12E tonu eiloa, me sili te tāua o te tagata i te mamoe! Tela la, e saoloto fua a te fai o galuega 'lei i te Sapati.” 13Ne fai atu a Iesu ki te tagata tena, “Fola tou lima.” Tela 'fola ei tena lima, ko te mea eiloa ko 'lei e pela mo tena sua lima. 14Ko olo keatea Falesaio mai kona, o fai olotou aofaga ke tamate ne latou a Iesu.
Ko te Tavini Filifilia a te Atua
15Ko iloa ne Iesu olotou aofaga, fano ei a ia keatea mai te koga tena. E tokouke a tino ne tau'tali atu i a ia. Ne fai foki ne ia ke 'lei olotou masaki katoa. 16Kae ne fakatonu atu ke se fakaasi atu ki tino a te mea ne fai ne ia, 17ko te mea ke fakamaonia ei a muna a te pelofeta ko Isaia:
18 #
Isa 42.1-4 (LXX) “Muna a te Atua, ko taku tavini tenei ne filifiligina ne au,
Ko taku fagasele e fiafia au ki ei.
E fakaeke ne au a toku Agaga ki luga i a ia,
E folafola atu ne ia a te fakamasinoga ki tino katoa.
19E se fakakinau io me pakalaga,
E se lauga foki mo te leo lasi i auala;
20E se unu ne ia se mouku ko magemage,
E se tamate foki ne ia se moli ko tai mate.
Ke oko eiloa ki te taimi e fai ei ne ia ke manumalo a te fai mea tonu;
21Ko tena igoa foki e fakamoemoe ki ei a tino katoa.”
Ko Iesu mo Pelesepulo
(Male 3.20-30; Luka 11.14-23)
22Ne aumai ne nisi tino ki a Iesu a te tagata kivi, kae gūgū foki me nofo i ei te temoni. Ne faka'lei ne ia tela mafai ei ne te tagata tena o faipati kae ile foki. 23Ne ofo katoa a te vaitino, kae fai ake penei, “E a, e se ko te Tama tenei a Tavita?” 24#Mata 9.34; 10.25 Ne lagona ne Falesaio olotou pati kona, tali atu ei latou ki ei, “E afuli fua ne ia temoni, i te mana o Pelesepulo te aliki o temoni.” 25Ne iloa ne Iesu olotou mafaufauga, faipati atu ei a ia ki a latou: “So se malo e nofo mavaevae kae fai taua, e se tumau. So se fa'kai me ko so se kaiga e nofo mavaevae kae fai taua, e se tumau foki eiloa. 26Kafai e fai taua a potu kau i loto i te malo o Satani, ko tena uiga ko nofo mavaevae tena malo, ko malepelepe ei. 27Kafai la e afuli ne au a temoni i te mana o Pelesepulo, e oi la te mana e afuli ei ne otou fanau a temoni? Tela la, ka fakamasino a koutou ne otou fanau. 28Kae kafai ko te Agaga o te Atua e afuli ei ne au a temoni, ko tena uiga ko i a koutou eiloa a te Malo o te Atua.
29“E se mafai ne se tino o ulu ki loto i te fale o te tagata mafi o puke ana mea, seiloga ke mua o saisai ne ia te tagata mafi, ko mafai ei ne ia o puke ne mea mai tena fale.
30 #
Male 9.40
“So se tino e se kau i a au, ko tena uiga e 'teke ki a au. So se tino foki e se fakamaopoopo fakatasi maua, ko tena uiga e fakamaofa ne ia aku mamoe. 31Tenei la te mea e fai atu ei au ki a koutou: e fakamagalogina agasala a tino mo olotou mea ma'sei e fai;#12.31: pati masei e faipati ne latou; io me pati masei e faipatigina ne latou ki te Atua. ka ko tino e faipati masei ki te Agaga Tapu, ka se fakamagalogina. 32So se tino e fai muna ki te Tama a te Tagata e fakamagalogina; ka ko te tino e fai muna ki te Agaga Tapu, e se fakamagalogina ke oko eiloa ki te se gata mai.”
Ko te Lakau mo ona Fuataga
(Luka 6.43-45)
33“Kafai e fia maua ne koe ne fuataga 'lei, e 'tau o maua ne koe se lakau e ola 'lei, kafai e isi sou lakau e ola masei, e maua ne koe a fuataga ma'sei. Me i te lakau e iloa 'lei eiloa i ona fuataga. 34#Mata 3.7; 23.33; Luka 3.7; Mata 15.18; Luka 6.45 A koutou ne gata ma'sei. E mafai pefea ne koutou o faipati ki muna 'lei manafai koutou ne tino ma'sei? Me i te gutu e faipati mai ne ia a mea e uke i te loto. 35A te tino 'lei e fakaasi atu ne ia a mea 'lei mai te fakaputuga o mea 'lei i a ia, ka ko te tino masei e fakaasi atu ne ia a mea ma'sei mai te fakaputuga o mea ma'sei i a ia.
36“Kae fai atu au ki a koutou, kafai e oko mai a te Aso Fakamasino, ka takutaku atu ne tino katoa a muna se aoga katoa kola ne fakaaoga ne latou. 37Me fakamasinogina koe i au muna e fai, ko au muna e taku'leia ei koe, ko au muna foki e fakasala ei koe!”
Ko te Manako ki se Vavega
(Male 8.11-12; Luka 11.29-32)
38 #
Mata 16.1; Male 8.11; Luka 11.16 Tela, faipati ake ei a nisi faiakoga o te Tulafono mo nisi o Falesaio, olotou muna, “Te Faiakoga, a matou e ma'nako ke fai ake ne koe se vavega.” 39#Mata 16.4; Male 8.12 Muna a Iesu, “Ko seai la se kautama masei mo te se fakamaoni penei! E a, e fia iloa ne koutou se fakailoga mai i a au? E seai! A te fakailoga ka tuku atu ne au ki a koutou, ko te fakailoga o Iona te pelofeta. 40#Iona 1.17 A Iona ne nofo i te tinae o te ika i ao mo po e tolu, ka pena foki te Tama a te Tagata, ka tolu ao, tolu po i lalo i te laukele. 41#Iona 3.5 Kafai e oko ki te Aso Fakamasino, a tino o te fenua ko Nineva ka 'tu mai o fakasala koutou, me ne sala'mo ona ko te talaiga a Iona; kae kiloke, ko i konei a te tino e sili atu i a Iona. 42#1Tupu 10.1-10; 2NTupu 9.1-12 Kafai foki e oko ki te Aso Fakamasino, a te Tupu fafine o te feitu ki Saute ka tu mai o fakasala koutou, me ne vau a ia mai te kapakapalagi o fakalogologo ki te poto o Solomona mo ana akoakoga; kae kiloke, au e fai atu ki a koutou, e isi se tino i konei e sili atu i a Solomona!”
Ko te Toe Fokimaiga o te Agaga Masei
(Luka 11.24-26)
43“Kafai ko fano keatea te agaga masei mai se tino, ko fano sale ei i koga fenua 'vela o fakamanava i ei. Kafai e se maua se koga mo ona fakamanava, 44ko mafaufau ifo ei a ia penei: ‘Au ka toe foki ki te fale ne tiakina ne au!’ Tela, foki atu ei a ia, kae i tena okoatuga ki te fale, ko seai eiloa se mea masei i loto, ko 'ma kae 'lei mea katoa. 45Fano ei a ia o aumai se tokofitu o agaga e ma'sei atu i a ia. Ko o'mai o 'nofo i te fale. Ko sili atu i te masei o foliga o te tino tena i lo ona foliga mua. E pena foki eiloa te faiga ka fai ki kautama masei o aso nei.”
Ko te Matua mo Taina o Iesu
(Male 3.31-35; Luka 8.19-21)
46Ka koi faipati a Iesu ki tino, ne oko mai tena matua mo ona taina! Ne 'tu i tua i te matafale kae fia faipati atu ki a ia. 47E isi se tino i kona ne faipati ki a ia, “Kiloke, a tou matua mo ou taina kola e 'tu mai tua, kae fia faipati ki a koe.#12.47: Nisi lomiga e seai se foaitau 47.
48Ne tali atu a Iesu, “Ko oi toku matua? Ko oi foki oku taina?” 49Tela, tusi atu ei te lima o Iesu ki ona soko, kae muna atu: “Kiloke! Konei oku matua mo oku taina! 50A te tino e fai ne ia a te loto o toku Tamana tela i te lagi, ko toku taina tena, ko toku tuagane, mo toku matua.”
Currently Selected:
MATAIO 12: Tusi Tapu
Highlight
Share
Copy
Want to have your highlights saved across all your devices? Sign up or sign in
Tuvalu Revised Bible © Bible Society in the South Pacific