Chhóng-sṳ Ki 24

Yî-sat Thó Pû-ngiòng Li-pak-kâ

1Â-pak-lâ-hón ló lé, ngièn-ki ya thai lé. Kì yit-sên-ngìn só-cho ke sṳ chhiòn-phu tet-tó Song-chú su-fuk. 2Kì tui kón-lî kì ke kâ-sán, ngièn-ki chui-thai ke phu̍k-ngìn kóng: “Chiông ngì ke sú piong chhai ngài lióng-kî thai kiok-pí chûng-kiên lòi fat-sṳ. 3Ngài oi ngì tui Song-chú — thiên-thi ke Song-ti hiong ngài fat-sṳ, ngì m̀-hó chhai Kâ-nàm liá thi-fông ke se-moi-é tông-chûng vi ngài chhìm sîm-khiû. 4Ngì yit-thin oi chón-hi ngài ke ku-hiông, chhai ngài ke chhîn-chhu̍k tông-chûng vi ngài ke lai-é Yî-sat thó yit-ke pû-ngiòng.”

5Phu̍k-ngìn tui kì kóng: “Na-he se-moi-é m̀-hén lì-khôi ku-hiông thèn ngài to liá thi-fông lòi, ngióng-pân hó nè? Ngài kám yin-kôi tai ngì ke lai-é chón ngì ke ku-hiông?”

6Â-pak-lâ-hón en kì kóng: “Ngì chhie̍t-tui m̀-hó chiông ngài ke lai-é tai-chón ke thi-fông! 7Song-chú — thiên-táng ke Song-ti tai ngài lì-khôi ku-hiông lâu ngài chhîn-chhu̍k ke thi-fông, Kì tui ngài siên-pu hiong ngài fat-sṳ kóng: ‘Ngài oi chiông liá-te thú-thi su-pûn ngì ke heu-thoi.’ Kì yit-thin voi chhâi-phai Kì ke sṳ́-chá siên-hi yi-phi, pûn ngì nèn chhai ke-vi vi ngài ke lai-é thó yit-ke pû-ngiòng. 8Na-he ke se-moi-é m̀-hén thèn ngì lòi, ngì tui ngài ke fat-sṳ chhiu lâu ngì mò koân-he; chúng-he ngì chhie̍t-tui cho-m̀-tet chiông ngài ke lai-é tai-chón ke thi-fông hi.” 9Ke phu̍k-ngìn chhiu chiông sú piong chhai chú-ngìn ke lióng-kî thai kiok-pí chûng-kiên, fat-sṳ oi cheu Â-pak-lâ-hón só kâu-tai ke hi-cho.

10Ke phu̍k-ngìn yu tui chú-ngìn ke lo̍k-thò chûng sién sṳ̍p-chak, tai-tén kiâ chú-ngìn ke kok-chúng chhòi-pó, chhut-fat hiong Mî-sok-put-tha̍t-mí-â pet-phu, Nâ-ho̍k he̍t ke sàng hi. 11Kì to ke thi-fông, chhiu ham lo̍k-thò khúi chhai sàng-ngoi ke chiáng-sùn. Ke-sṳ̀ he lìm-am-é, chhiu-he fu-ńg chhut-lòi tá-súi ke sṳ̀-chiet. 12Kì khì-tó kóng: “Song-chú — ngâ chú-ngìn Â-pak-lâ-hón ke Song-ti â! Khiù Ngì kîm-pû-ngit pûn ngài tông hó-yun; khiù Ngì sṳ̀n-chhiu Ngì tui ngâ chú-ngìn Â-pak-lâ-hón só tap-yin ke. 13Ngài liá-ha khî chhai chiáng-sùn, sàng-tú ke se-moi-é lûng-chúng voi chhut-lòi liá-vi tá-súi. 14Ngài oi lâu kì-têu tông-chûng ke yit-sà kóng: ‘Pai-thok ngì chiông súi-kon-é piong hâ-lòi, pûn-têu súi ngài lîm.’ Na-he kì kóng: ‘Chhiáng lîm! Ngài ya tá-súi pûn ngì ke lo̍k-thò lîm.’ Ngài hî-mong liá se-moi-é chhiu-he Ngì vi Ngì ke phu̍k-ngìn Yî-sat só-sién ke pû-ngiòng. Án-ngiòng, ngài chhiu voi tî Ngì sṳ̂-ên pûn ngài ke chú-ngìn.”

15Kì khì-tó hàn-màng so̍t, Li-pak-kâ yí-kîn to chiáng-sùn, kiên-thèu khià-tén súi-kon-é. Kì he Pí-thú-li ke moi-é; Pí-thú-li he Â-pak-lâ-hón ke ló-thâi Nâ-ho̍k lâu kiâ pû-ngiòng Me̍t-kâ ke lai-é. 16Li-pak-kâ he yit-ke chhin-chiâng ke se-moi-é, he mò-ngìn chhîn-khiun ko ke ngìn-kâ-ńg. Kì hâ-to chiáng-sùn, chiông súi-kon-é chông-mân súi chhiu sông-lòi. 17Ke phu̍k-ngìn chéu-to kì ke mien-chhièn, tui kì kóng: “Pai-thok ngì pûn-têu súi ngài lîm.”

18Kì kóng: “Sîn-sâng, chhiáng-lîm!” Kì kón-kín piong-hâ kiên-thèu táng ke súi-kon-é, yung sú thok-tén pûn ke phu̍k-ngìn lîm. 19Ke phu̍k-ngìn lîm-la lé, Li-pak-kâ chhiu kóng: “Ngài ya tá-súi pûn ngì ke lo̍k-thò lîm-to la.” 20Kì kiak-kiak chiông kon-tú ke súi tó-to súi-chhò, chai chéu to chiáng-sùn tá-súi, pûn só-yû ke lo̍k-thò lîm. 21Ke-ngìn oi tî Song-chú he m̀-he pûn kì vàn-sṳ̀n ngim-vu, chhiu tiâm-tiâm kín-khon Li-pak-kâ.

22Tén-to lo̍k-thò lîm la-pái, ke-ngìn chhiu nâ-chhut yit-chak pan-liông chhûng ke kîm phi-vàn, lâu yit-tui sṳ̍p-liông chhûng ke kîm sú-ak, pûn Li-pak-kâ tai. 23Ke-ngìn mun: “Chhiáng lâu ngài kóng, ngiâ-pâ he má-ngìn? Ngiâ-pâ ke vuk-hâ yû thi-fông hó chia-hiet mò?”

24Li-pak-kâ kóng: “Ngâ-pâ he Nâ-ho̍k lâu Me̍t-kâ ke lai-é Pí-thú-li. 25Ngâ vuk-hâ yû tông-tô chhó-liau, ya yû pûn ngì-têu hiet ke thi-fông.”

26Ke-ngìn chhiu khúi hâ-lòi kin-pai Song-chú. 27Kì kóng: “Chan-mî Song-chú — ngài chú-ngìn Â-pak-lâ-hón ke Song-ti! Kì yit-chhṳ̍t yung chhṳ̀-oi lâu sṳ̀n-sṳ̍t tui-thai ngài ke chú-ngìn; Kì chiông ngài chhṳ̍t-chiap tai-to ngâ chú-ngìn chhîn-chhu̍k ke vuk-hâ lòi.”

28Ke se-moi-é chéu-chón vuk-hâ hi, chiông só fat-sên ke sṳ lâu kiâ-mê pin vuk-hâ ngìn kóng. 29Li-pak-kâ yû yit-ke â-kô ham-cho Lâ-pân, kì chéu chhut-hi, to chiáng-sùn Â-pak-lâ-hón ke phu̍k-ngìn ke-vi. 30Kì khon-tó ló-moi tai-tén kîm phi-vàn lâu kîm sú-ak, ya thâng-tó ló-moi só-kóng ke-ngìn lâu kì kóng ke fa. Ke-sṳ̀ Â-pak-lâ-hón ke phu̍k-ngìn chhai chiáng-sùn, khî chhai lo̍k-thò phòng-piên. Lâ-pân hàng-chhièn hi, 31tui ke-ngìn kóng: “Chhiáng thèn ngài to vuk-tú lòi-chhô. Ngì he Song-chú su-fuk ke ngìn, cho-má-ke khî chhai ngoi-poi? Ngài yí-kîn vi ngì-têu chún-phi hó kiên-fòng, ya vi lo̍k-thò chún-phi hó thi-fông.”

32Ke-ngìn chhiu ngi̍p-hi vuk-tú. Lâ-pân piong-hâ lo̍k-thò poi-táng ke tûng-sî, pûn kì-têu chhó-liau sṳ̍t. Chiap-tén, kì têu-súi pûn Â-pak-lâ-hón ke phu̍k-ngìn lâu khiung-ha lòi ke ngìn sé-kiok. 33Fan-chhoi pài-hó ke sṳ̀, ke-ngìn kóng: “Tén yit-ha, ngài oi chiông ngài ke sṳ kóng chhîn-chhú, chang-lòi sṳ̍t.”

Lâ-pân kóng: “Chhiáng ngì kóng!”

34Ke-ngìn chhiu kóng: “Ngài he Â-pak-lâ-hón ke phu̍k-ngìn. 35Song-chú thai-thai su-fuk pûn ngài ke chú-ngìn, pûn kì fî-sòng hó-ngiak. Song-chú su-pûn kì yòng-khiùn, ngiù-khiùn, kîm-ngiùn, nù-phu̍k, nù-pî, lo̍k-thò lâu lì-è. 36Ngâ chú-ngìn ke pû-ngiòng Sâ-lâ ngièn-ló ke sṳ̀ chang vi kì kiung yit-ke lai-é; ngài ke chú-ngìn ya chiông só-yû ke chhòi-sán pûn liá-ke lai-é. 37Chú-ngìn ham ngài fat-sṳ, oi ngài cheu kì ke fûn-fu; kì kóng: ‘Ngì m̀-hó chhai Kâ-nàm ke se-moi-é tông-chûng thoi ngài chhìm sîm-khiû; 38ngì oi to ngài ke ku-hiông, ngài chhîn-chhu̍k ke-vi hi, vi ngâ lai-é chhìm yit-ke pû-ngiòng.’ 39Ngài tui ngài ke chú-ngìn kóng: ‘Kiâng-pha se-moi-é m̀-hén thèn ngài lòi, ngióng-pân hó nè?’ 40Kì en ngài kóng: ‘Ngài só kin-pai ke Song-chú voi chhâi-phai thiên-sṳ́ lâu ngì khiung-ha hi, pûn ngì vàn-sṳ̀n ngim-vu. Ngì voi chhai ngài ke ku-hiông, ngài ke chhîn-chhu̍k kâ-chûng vi ngâ lai-é thó yit-ke pû-ngiòng. 41Ngì hi-to ngài chhîn-chhu̍k ke vuk-hâ, ngì chhiu-son he vàn-sṳ̀n ngì ke chit-ngim. Ngài ke chhîn-chhu̍k na-he mò chiông se-moi-é kâu-pûn ngì, ngì ke fat-sṳ ya lâu ngì mò koân-he.’

42“Kîm-pû-ngit, ngài to chiáng-sùn ke sṳ̀, ngài án-ngiòng khì-tó: ‘Song-chú — ngâ chú-ngìn Â-pak-lâ-hón ke Song-ti â! Khiù Ngì pûn ngài vàn-sṳ̀n ngài ke ngim-vu. 43Ngài khî chhai chiáng-sùn, yû se-moi-é chhut-lòi tá-súi ke sṳ̀, ngài oi khiù kì pûn ngài lîm kì súi-kon-é ke súi. 44Na-he kì kóng: ‘Chhiáng ngì lîm, ngài hàn-oi tá-súi pûn ngì ke lo̍k-thò lîm’, ngài hî-mong kì chhiu-he Song-chú vi ngâ chú-ngìn ke lai-é só-sién ke pû-ngiòng.’ 45Ngài me̍t-tó hàn-màng so̍t, Li-pak-kâ chhiu chhut-lòi, kiên-thèu táng khià-tén súi-kon-é, to chiáng-sùn tá-súi. Ngài tui kì kóng: ‘Pai-thok pûn-têu súi ngài lîm.’ 46Kì ngiàm-sṳ̀ piong-hâ kiên-thèu táng ke súi-kon-é, kóng: ‘Chhiáng-lîm! Ngài ya tá-têu súi pûn ngì ke lo̍k-thò lîm!’ Ngài chhiu lîm, kì ya tá-súi pûn lo̍k-thò lîm. 47Ngài mun kì: ‘Ngì ke â-pâ he má-ngìn?’ Kì en-kóng: ‘Ngài ke â-pâ he Nâ-ho̍k lâu Me̍t-kâ ke lai-é Pí-thú-li.’ Ngài chhiu lâu kì tai phi-vàn lâu sú-ak. 48Ngài chhiu khúi hâ-lòi kin-pai Song-chú, chan-mî Song-chú — ngâ chú-ngìn Â-pak-lâ-hón ke Song-ti; yîn-vi Kì tai ngài hàng chṳn-khok ke lu, pûn ngài chhìm-tó chú-ngìn ke chhṳ̍t sûn-ńg lòi-cho kiâ sîm-khiû. 49Liá-ha, na-he ngì-têu ngien-yi yung chhṳ̀-oi lâu sṳ̀n-sṳ̍t tui-thai ngài ke chú-ngìn, chhiu lâu ngài kóng. Na m̀-hén, ya lâu ngài kóng, ngài hó kiet-thin ngióng-pân cho.”

50Lâ-pân lâu Pí-thú-li en-kóng: “Ki-yèn liá-sṳ he chhut-yì Song-chú, ngài-têu hàn-yû má-ke hó-kóng nè? 51Li-pak-kâ chhai liá-vi, ngì cho-tet tai-chéu, cheu Song-chú só-kóng ke, pûn kì cho ngì chú-ngìn ke sîm-khiû.” 52Â-pak-lâ-hón ke phu̍k-ngìn thâng-tó liá fa, chhiu phu̍k chhai thi-song kin-pai Song-chú. 53Chiap-tén, kì nâ kîm-hi, ngiùn-hi lâu sâm-fu sung-pûn Li-pak-kâ, ya sung kui-chhung ke lî-vu̍t pûn kiâ-kô lâu kiâ-mê.

54Yèn-heu, Â-pak-lâ-hón ke phu̍k-ngìn lâu thèn kì ke ngìn chang sṳ̍t-ya, pin hiet yit am-pû. Thi-ngi ngit chêu-sṳ̀n hong hí-lòi, phu̍k-ngìn chhiu kóng: “Pûn ngài chón-hi ngài chú-ngìn ke-vi.”

55Li-pak-kâ ke â-kô pin kì ke â-mê kóng: “Pûn se-moi-é lâu ngài-têu he̍t-kâ kí-ngit, chṳ-séu he̍t sṳ̍p-ngit chang-hi.”

56Phu̍k-ngìn kóng: “Chhiáng m̀-hó ngu-tó ngài ke sṳ̀-kiên. Song-chú ki-yèn pûn ngài vàn-sṳ̀n ngài ke ngim-vu, chhiáng ngì-têu pûn ngài chón chú-ngìn ke-vi hi.”

57Kì-têu kóng: “Ngài-têu ham se-moi-é lòi, khon kì ngióng-pân kóng.” 58Kì-têu chhiu ham Li-pak-kâ lòi, mun kì: “Ngì oi lâu liá-ke ngìn khiung-ha hi mò?” Kì en-kóng: “Ngài ngien-yi hi.”

59Án-ngiòng, kì-têu pûn Li-pak-kâ lâu kì ke nen-ôi, thèn Â-pak-lâ-hón ke phu̍k-ngìn lâu thùng kì lòi ke ngìn khiung-ha hi. 60Kì-têu chuk-fuk Li-pak-kâ kóng:

“Ngài-têu ke ló-moi â!

Ngien ngì sàng-cho chhiên-van ngìn ke â-mê!

Ngien ngì ke heu-thoi tet-tó thi̍t-ngìn ke sàng-mùn!”

61Li-pak-kâ lâu phì-ka ke sṳ́-ńg chún-phi hó, khì-sông lo̍k-thò. Â-pak-lâ-hón ke phu̍k-ngìn chhiu tai-tén Li-pak-kâ chhut-fat.

62Ke-sṳ̀, Yî-sat yí-kîn sái-to Pí-ngí-Lâ-hói-Lòi ke khóng-yâ, he̍t chhai Kâ-nàm nàm-phu. 63Lìm-am-é, kì chhai thièn-hong san-phu, ngo-thèu khon-tó lo̍k-thò chhui hàng chhièn-lòi. 64Li-pak-kâ yit khon-tó Yî-sat, chhiu tui lo̍k-thò poi-táng hâ-lòi, 65mun Â-pak-lâ-hón ke phu̍k-ngìn: “Tui thièn-hong hàng ko-lòi ngài-têu liá-phién ke he má-ngìn?”

Phu̍k-ngìn en kì kóng: “He ngài ke se chú-ngìn.” Li-pak-kâ chhiu yung mien-pha châ-tén chhṳ-kâ ke mien.

66Ke phu̍k-ngìn chiông chhṳ-kâ só-cho ke yit-chhiet chhiòn-phu lâu Yî-sat kóng. 67Yî-sat chhiu tai Li-pak-kâ ngi̍p-hi kiâ-mê Sâ-lâ he̍t-ko ke chong-phùng, thó kì cho pû-ngiòng. Yî-sat chhin-siak Li-pak-kâ, tui kiâ-mê sí-thet yî-heu, to liá-sṳ̀ kì chang tet-tó ôn-ví.

Currently Selected:

Chhóng-sṳ Ki 24: THV12Rdb

Highlight

Copy

Want to have your highlights saved across all your devices? Sign up or sign in

Learn more about HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán)

Chhóng-sṳ Ki 24

Popular Bible Verses from
Chhóng-sṳ Ki 24

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Chhóng-sṳ Ki 24

Chhóng-sṳ Ki 24

Popular Bible Verses from Chhóng-sṳ Ki 24

Bible:

Hakkafa (Roman script)

Version: HAK-NGÎ SṲN-KÎN – Hien-thoi Thòi-vân Hak-ngî Yi̍t-pún – Sîn-Khiu Yok Chhiòn Sû (Lò-mâ-sṳ pán) - THV12Rdb

Chhóng-sṳ Ki 24

Popular Bible Verses from
Chhóng-sṳ Ki 24