Kalangan 103
103
Kalangan 103
Kalangan si Da'ud
1Pudjiku si Yawe min deyom pangatayanku.
Pudjiku ōnna sussi min palnyawahanku
maka min kuwat-anggauta'ku.
2Aho', pudjiku PANGHŪꞋ min deyom pangatayanku,
mbal takalipat kamemon kahāpan ya bay pamuwanna.
3Sabab iya ya angampun kamemon paldusahanbi.
Iya ya amauli' kamemon sakibi.
4Iya isāb angal'kkat kallumbi min lahat kamatayan.
Iya isab amalipatan ka'am lasa maka ase'.
5Iya ya amuwanan ka'am ginisan kahāpan ya makahāp palasahanbi,
angkan tabawi' bay kosog kabata'bi.
Sapantun kam belle' ya mbal ata'u binale'.
6Abontol PANGHŪꞋ-Yawe ma kahinanganna kamemon,
pinabontol e'na hukuman ma sasuku pininjala' e' sara'.
7Bay pata'una si Musa pasal kaniyatanna.
Bay pa'nda'na hinangna ni bangsa Isra'il.
8Patiase'un maka patilasahun asal PANGHŪꞋ-Yawe,
mbal akagit atayna magdai'-dai',
gom pa'in palabi lasana tuman.
9Mbal iya paddas amabukag,
mbal anatas ka'astolna sampay ni kasaumulan.
10Mbal kita pinat'nna'an kabinasahan ya makatōpan dusata.
Mbal kita tinungbasan e'na ma buwat hinangta ala'at.
11Sabab-kalna', landu' aheya lasana ma sasuku magmatāwan iya.
Mbal tabista kaheya lasana itu, buwat diyata' langit
mbal tabista langkawna min babaw dunya.
12Pinalawak e'na paldusahantam,
buwat lawak sobangan maka s'ddopan.
13Aheya ase' ma sasuku magmatāw ma iya,
buwat ka'ase' matto'a ma panganakna.
14Sabab kinata'uwan asal e'na ya bay pangompolan kitam manusiya'.
Taentomna in kitam bay nihinang min bagunbun tana'.
15Ya niōnan manusiya' itu mbal anatas,
sapantun parang-parang dai'-dai' patubu'.
Sapantun sumping huma dai'-dai' manisna.
16Pagtumbuk pa'in baliyu, magtūy halam na.
Mbal taentom bay kamahē'na.
17Malaingkan ya kasi-lasa PANGHŪꞋ ni sasuku magmatāw ma iya
anatas min awal tagna' sampay ni kasaumulan.
Pasampay kahandakna abontol ni anak-mpu saga a'a kamemon,
18sasuku amogbogan kapagsulutan sigām maka Tuhan,
maka atukid ameya' ma pandu'na.
19Pinatuman e' si Yawe pagparintana ma sulga'
ati magtuhan iya ma papanjarihanna kamemon.
20Pudjihunbi PANGHŪꞋ-Yawe,
ka'am saga mala'ikatna patikawasahun
ya angahinang kahandak Tuhan,
ya ameya' ma panoho'anna.
21Pudjihunbi PANGHŪꞋ, ka'am kalaksa'-laksa'an
ya sosoho'anna ma deyom sulga',
maka ka'am ya maghinang kabaya'anna.
22Pudjihunbi PANGHŪꞋ, ka'am papanjarihanna,
pudjihunbi iya maingga-maingga ma pagparintahanna.
Pudjiku isab PANGHŪꞋ sampay min buli'-atayku.
Currently Selected:
Kalangan 103: sml
Highlight
Share
Copy
Want to have your highlights saved across all your devices? Sign up or sign in
© 2008, Wycliffe Bible Translators, Inc. All rights reserved.